Nditịmede Esịt Mban̄a N̄kpọndịk

Alona ọdọhọ ete: “Ke ini n̄kopde uyom emi owụtde ke n̄kpọ etịbe, nsia esiyomo mi, ndien mmesifehe n̄kodụk itie emi bọmb mîkemeke ndibom. Idem esisụk enyenyek mi do. Edi esinen̄ede ọdiọk ke ini ndude ke an̄wa sia ebiet mîdụhe ndidịbe. Enyene usen kiet emi n̄kasan̄ade ke efak, ndien n̄kop uyom emi. Mma ntọn̄ọ nditua n̄konyụn̄ n̄kemeke ndikot ibifịk. Ama ada ini mbemiso n̄keme ndimụm idem n̄kama. Edi uyom oro ama afiak ọtọn̄ọ.”

Ekọn̄ edi kiet ke otu ediwak n̄kpọ emi ẹsinamde ikop ndịk. Ke uwụtn̄kpọ, ibuot esiyon̄ owo ke ini enye okopde ke imọ m̀mê owo imọ enyene udọn̄ọ emi ekemede ndiwot owo. Ndien mbon en̄wen ẹsitịmede esịt ẹban̄a se iditịbede ke ini iso. Mmọ ẹsikere m̀mê nditọ ye nditọ nditọ mmimọ ẹdisụk idụn̄ ke ererimbot emi ekọn̄, ubiatibet, ye ndiọi udọn̄ọ okponde ntem. Mmọ ẹsikere n̄ko m̀mê ẹyeka iso ẹbiat isọn̄, ofụm, ye mmọn̄, m̀mê eyo oyofiop akaha mîdịghe ebịt akaha. Nso ke ikeme ndinam ke ini esịt etịmerede nnyịn aban̄a mme n̄kpọ ntem?

“Owo mbufiọk ada okụt afanikọn̄ edịbe” sia enye ọdiọn̄ọ ke ndiọi n̄kpọ ẹsitịbe. (Mme N̄ke 27:12) Ndien kpa nte isinamde se ikekeme man ikûdọn̄ọ, ana isinam ofụri se ikemede man ekikere ana nnyịn sụn̄, ikûnyụn̄ utie mfụhọ mfụhọ. Afai ye mme enyene-ndịk n̄kpọ oro isikụtde ke fim ye TV ẹsinam nnyịn ye nditọ nnyịn idọdiọn̄ itịmede esịt. Nditre ndise mme utọ n̄kpọ emi iwọrọke ke nnyịn iyomke ndidiọn̄ọ se ikade iso ke ererimbot. Abasi ikobotke nnyịn man isitie ikere ndiọi n̄kpọ. Utu ke oro, akpana isikere ‘n̄kpọ ekededi eke edide akpanikọ, enende, asanade, ẹnyụn̄ ẹmade.’ Edieke inamde emi, “Abasi emem” ayanam ekikere ye esịt nnyịn ana sụn̄.—Philippi 4:8, 9.

UFỌN AKAM

Edieke inen̄erede ibuọt idem ye Abasi, nnyịn idinen̄ekede itịmede esịt. Bible ọdọhọ ‘itịn̄ enyịn ikpeme man ikeme ndibọn̄ akam.’ (1 Peter 4:7) Imekeme ndidọhọ Abasi an̄wam nnyịn onyụn̄ ọnọ nnyịn ọniọn̄ ye uko man ikeme ndiyọ se ededi oro isobode, sia imọdiọn̄ọ ‘ke enye ọyọbiọn̄ utọn̄ ke se ededi oro nnyịn iben̄ede.’—1 John 5:15.

Bible ọdọhọ ke Satan edi “andikara ererimbot emi,” idịghe Abasi, ye nte ke “ofụri ererimbot esịne ke idak odudu andidiọk.” (John 12:31; 1 John 5:19) Ntre, idịghe n̄ke ke Jesus ekeke ke ini enye ekekpepde nnyịn ndibọn̄ akam nte: “Nyan̄a nnyịn sio ke ubọk andidiọk.” (Matthew 6:13) Alona ọdọhọ ete: “Ini ekededi emi n̄kopde uyom emi owụtde ke n̄kpọ ọmọn̄ etịbe, mmesibọn̄ akam ndọhọ Jehovah an̄wam mi mmụm idem n̄kama. N̄ko, edima ebe mi esikot mi onyụn̄ ọbọn̄ akam ye ami. Akam esinen̄ede an̄wam nnyịn.” Onyụn̄ edi nte Bible ọdọhọde ete: “Jehovah emekpere kpukpru mbon oro ẹsemede ẹkot enye, emekpere kpukpru mbon oro ẹsemede ẹkot enye ke akpanikọ.”—Psalm 145:18.

IDOTENYỊN NNYỊN

Ke ini Jesus ọkọkwọrọde ikọ ke obot, enye ama ọdọhọ mme mbet esie ẹsibọn̄ akam ẹte: “Yak obio ubọn̄ fo edi.” (Matthew 6:10) Obio Ubọn̄ Abasi eyetre kpukpru editịmede esịt. Abasi ọyọdọhọ Jesus emi edide “Ọbọn̄ Emem” anam “ekọn̄ etre tutu esịm utịt isọn̄.” (Isaiah 9:6; Psalm 46:9) “Enye [Abasi] eyebiere ikpe ke otu ediwak owo . . . Idụt idimenke akan̄kan̄ itiene idụt, mmọ idinyụn̄ ikpepke aba ekọn̄. . . . Ididụhe owo eke edinamde mmọ ẹdịghe.” (Micah 4:3, 4) Mme owo “ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ.” (Isaiah 65:21) “Ndien baba andidụn̄ kiet ididọhọke ite: ‘Ndọdọn̄ọ.’”—Isaiah 33:24.

Imọdiọn̄ọ ke ọkpọkọm ikpeme idem nte ikpekpeme, ke “n̄kpọntịbe unana idotenyịn” edisụk itetịbe, nnyịn inyụn̄ ikemeke ndidiọn̄ọ kpukpru ebiet ye ini emi n̄kpọ editịbede. (Ecclesiastes 9:11) Toto ke eset, ekọn̄, afai, ye udọn̄ọ ẹwot nti owo. Nso ke Abasi edinam inọ mmọ?

Abasi ayanam mme owo ẹset. Ibat mbon emi ẹdisetde awak etieti; Abasi kpọt ọdiọn̄ọ. Kan̄a ke emi, mmọ ẹdede, sia Abasi ifreke mmọ, ndien usen kiet ‘kpukpru mme andidu ke udi editi ẹyewọn̄ọ ẹdi.’ (John 5:28, 29) Kop se Bible etịn̄de mi aban̄a ediset ke n̄kpa: “Idotenyịn emi ke nnyịn inyene nte ukwak ubom ukpọn̄ nnyịn, emi mîdikpụhu, emi onyụn̄ ọsọn̄ọde ada.” (Mme Hebrew 6:19) Ndien Abasi “ọnọ kpukpru owo nsọn̄ọ ke emi enye akanamde [Jesus] eset ke n̄kpa.”—Utom 17:31.

Kan̄a ke emi, idem mbon oro ẹdomode ndinem Abasi esịt ẹyesobo mme mfịna emi ẹdinamde esịt etịmede mmọ. Paul, Janet, ye Alona ẹsibọn̄ akam man ẹkpere Abasi, ẹnam se mmọ ẹkemede, ẹnyụn̄ ẹnyene mbuọtidem ke se Abasi ọn̄wọn̄ọde aban̄a ini iso, ntre mmọ iyakke mfịna mmọ etịmede mmọ esịt. Kpa nte Abasi anamde ọnọ mmọ, enye n̄ko ‘akpakam anam fi ọyọhọ ye idatesịt ye emem oto ke afo ndinịm ke akpanikọ, man afo ọkpọyọhọ ye idotenyịn.’—Rome 15:13.