Ibuot 27

Ntak Emi Nsikerede ke Akpana Kpukpru Se Nnamde Ẹfọfọn?

Ndi esịt esiyat fi ke ini mûbehe udomo ukan kpukpru owo?

□ Ih

□ Ihih

Ke ini ẹsuade n̄kpọ ẹnọ fi, ndi emesikere ke uwọrọke aba n̄kpọ ndomokiet?

□ Ih

□ Ihih

Ndi esisọn̄ fi ndinam ufan ye owo ke ntak emi ekerede ke idụhe owo emi edikemede ndidu uwem nte oyomde?

□ Ih

□ Ihih

EDIEKE ibọrọ fo edide ih ke ekededi ke otu mme mbụme emi, ọwọrọ emesikere ke akpana kpukpru se anamde m̀mê se mbon en̄wen ẹnamde ẹfọfọn. Edi afo emekeme ndibụp ete: ‘Nso idiọk ke owo ndiyom kpukpru se enye anamde ẹfọfọn?’ Inyeneke se idiọkde do. Bible akam ototoro owo emi “enyenede usọ ke utom esie.” (Mme N̄ke 22:29) Edi owo emi ekerede ke akpana kpukpru se inamde m̀mê se mbon en̄wen ẹnamde ẹfọfọn aka anyan akaha.

Ke uwụtn̄kpọ, Jason emi edide isua 19 ọdọhọ ete: “Ke akpatre isua oro n̄kodude ke ufọkn̄wed, eketie mi ke idem nte ke edieke mmembehe udomo n̄kan kpukpru owo, ọwọrọ ndịghe eti eyen ufọkn̄wed. Mma nsibre piano n̄ko, ndien n̄kesikere ke akpana mbre nte àtá ebre piano.”

Owo ndikere ke akpana kpukpru se inamde ẹfọfọn ekeme ndikpan enye ndituak ibuot nnọ Jehovah. Kere se ikemede nditịbe nnọ uyen emi ẹdọhọde mme uyen eken ẹkpebe. Sia ofụri enyịn owo ẹwụhọde enye ke idem, enye ekeme ndikere ke imọ itie nte owo oro asan̄ade ke urụk, kpukpru enyịn owo ẹse nte idinamde n̄kpọ. Edi akpanikọ ke mme Christian, n̄kpri ye ikpọ, ẹsibọ ufọn ẹto nti uwụtn̄kpọ ke esop. Nte ededi, edieke uyen oyomde kpukpru se enye anamde ẹfọfọn kpukpru ini, oro idiyakke enye aka iso okop inem ndinam n̄kpọ Abasi. Edieke oro etịbede, oyom ẹn̄wam uyen oro. Edi ekeme ndidi enye ididọhọke ẹn̄wam imọ ke ntak emi ekerede ke mbon oro ẹkesikponode-kpono imọ idikponoke imọ aba. Enye akam ekeme nditre ndinam n̄kpọ Abasi ofụri ofụri, ọdọhọde ete: ‘Edieke mmen̄kemeke ndinam kpukpru n̄kpọ oro akpanade nnam, ufọn edisịn ukeme?’

Kûkere ke Akpana Se Ẹnamde Ẹfọfọn Kpukpru Ini

Mbon oro ẹsikerede ke akpana kpukpru se mmimọ m̀mê se mbon en̄wen ẹnamde ẹfọfọn ẹsidue ẹkere ke ikpanaha ẹnam ndudue ndomokiet. Edi utọ ekikere oro ọdiọk etieti. Bible etịn̄ in̄wan̄-in̄wan̄ ete: “Kpukpru owo ẹnam idiọkn̄kpọ ẹnyụn̄ ẹtaba ubọn̄ Abasi.” (Rome 3:23) Mmọdo, owo nnyịn ndomokiet ikemeke ndifọn mma. Ke nditịm ntịn̄, afo ndikere ke imekeme ndinam kpukpru n̄kpọ nnana ndudue etie nte ndikere ke emekeme ndifrọ ndọk enyọn̄ mfe. Idem ọkpọkọm emenen̄ede enịm ke emekeme ndinam emi, udukemeke ndife!

Nso ke akpanam mbak udukere ke akpana se ẹnamde ẹfọfọn kpukpru ini? Domo ndinam mme n̄kpọ emi:

Fiak dụn̄ọde se adade nte edikụt unen. Ndi emesitie akpa ekikere aban̄a nte kpukpru se anamde ẹkpefọnde ẹma? Bible ọdọhọ ke utọ ekikere oro etie nte “edifehe mbịne ofụm.” (Ecclesiastes 4:4) Se idude edi ke iwakke mbon oro ẹsikemede ndinam se ẹdade nte “mfọnn̄kan.” Ndien idem ke ini owo ọdọhọde ke utom imọ ọfọn akan, isibịghike owo en̄wen emi utom esie akam ọfọnde akan oro esiwọrọ edi. Ndikụt unen ọwọrọ ndinam ofụri ukeme fo—idịghe ndinam n̄kan owo en̄wen.—Galatia 6:4.

Diọn̄ọ ukeme fo. Se afo ekerede ke imekeme ndinam ikpanaha okpon m̀mê osụhọde akan ukeme fo. Ndikere ke idụhe n̄kpọ emi mûkemeke ndinam owụt ke udiọn̄ọke ukeme fo, m̀mê ke edi owo n̄kụtidem. Apostle Paul ama ọnọ eti item ete: “Ntịn̄ nnọ kpukpru owo do ke otu mbufo nte owo okûkere aban̄a idemesie akan nte enye ekpekerede.” (Rome 12:3) Ntre, diọn̄ọ ukeme fo. Dụn̄ọde mme n̄kpọ oro ekerede ke imekeme ndinam. Domo ndinam ofụri ukeme fo, edi kûkere ke akpana kpukpru se anamde ẹfọfọn.

Tuak inua imam! Domo ndinam ndusụk n̄kpọ oro mûsukemeke ndinam ọfọn, utọ nte ndibre ndido ikwọ. Edi akpanikọ ke ayanam ekese ndudue. Edi da mme ndudue oro ke isio isio usụn̄. Bible ọdọhọ ke “ini eke ẹsakde imam” odu. (Ecclesiastes 3:4) Ntre domo ndisituak inua imam ke ini anamde ndudue. Oro ayanam okụt ke ndinam ndudue edi kpa ukpep. Edi akpanikọ ke idimemke fi ndinyịme ke imanam ndudue. Edi kûyak mme ndudue oro ẹnam idem emem fi m̀mê ndinam ekere se mûkpukereke.

Ti kpukpru ini ete ke Jehovah idọhọke ke akpana kpukpru se nnyịn inamde ẹfọn ẹma; enye akam oyom nnyịn inam akpanikọ inọ imọ. (1 Corinth 4:2) Edieke odomode ndinam akpanikọ, emekeme ndinem esịt mban̄a orụk owo emi edide—okposụkedi emi mûfọnke uma.

AKPAN ITIE N̄WED ABASI

“Baba edinen owo kiet idụhe ke isọn̄ eke anamde eti mînyụn̄ inamke idiọkn̄kpọ.”​—Ecclesiastes 7:20.

ITEM

Kere ban̄a utom emi esimen̄ede ndinam ke ntak emi ekerede ke udukemeke ndinam enye ọfọn. Ekem nịm usen emi edinamde enye.

NDI AMA ỌFIỌK . . . ?

Jehovah ọfọn ama, edi ke ini enye anamde n̄kpọ ye mme anana mfọnmma owo, enye isikereke ke akpana kpukpru se mmọ ẹnamde ẹfọn ẹma. Enye enyene eti ibuot inyụn̄ iyomke nnyịn inam se ikande ukeme nnyịn.

SE NDINAMDE

Ke ini ntọn̄ọde ndikụt ndudue nnọ idem mi n̄kaha, se ndinamde edi ․․․․․

Ke ini ntọn̄ọde ndikụt ndudue nnọ mbon en̄wen n̄kaha, se ndinamde edi ․․․․․

Se ndibụpde ete m̀mê eka mi mban̄a n̄kpọ emi edi ․․․․․

AFO EKERE DIDIE?

● Ndi emesiduak ndinam mme n̄kpọ emi ẹkponide ẹkan fi? Edide edide ntre, mme n̄kpọ ewe?

● Mme itien̄wed Bible ewe ẹtịn̄ in̄wan̄-in̄wan̄ ke Jehovah Abasi ikereke ke akpana mme asan̄autom imọ ẹfọn ẹma?

● Ntak emi mme owo mîdimaha ndidian idem ye afo edieke esikerede ke akpana kpukpru se mbon en̄wen ẹnamde ẹfọfọn?

● Ke ini iso, nso ke edinam ke ini anamde ndudue?

[Se ẹwetde ẹban̄a ndise ke page 226]

“Ndinam ofụri ukeme fo ye ndikere ke akpana kpukpru se anamde ẹfọn ẹma ẹdi nsio nsio n̄kpọ iba—kiet ọfọn, enye eken ifọnke.”​—Megan

[Ekebe ke page 228]

Ndisiyom Se Mbon En̄wen Ẹnamde Ẹfọfọn Mbemiso Anamde Ufan ye Mmọ

Ndi emesisịn ndinam ufan ye mme owo n̄kukụre sia mmọ mîdụhe uwem nte afo oyomde? Mîdịghe, ndi nti owo ẹsifehe ndinam ufan ye afo sia etiede nte mmọ idikemeke ndidu uwem nte afo oyomde? Bible eteme ete: “Kûda idem ke edinen owo ukaha, kûnyụn̄ uwụt idemfo ke owo ọniọn̄ ukaha. Ntak emi akpadade nsobo ọsọk idemfo?” (Ecclesiastes 7:16) Usụn̄ kiet emi owo oro oyomde kpukpru se mbon en̄wen ẹnamde ẹfọfọn ekemede ndida nsobo nsọk idemesie edi ndinam mbon oro ẹkpedide mme ufan esie ẹsọn m̀mê ẹdian̄ade ẹkpọn̄ enye. Eyenan̄wan kiet emi ekerede Amber ọdọhọ ete: “Idụhe owo oro amade ndinam ufan ye owo emi edinamde enye ekere ke imọ iwọrọke n̄kpọ, ndien mmokụt nte ata n̄kpri n̄kpọ ẹnamde mbon emi ẹyomde kpukpru se mbon en̄wen ẹnamde ẹfọfọn ẹtaba nti ufan mmọ.”

[Ndise ke page 229]

Ufọn idụhe ndikere ke akpana kpukpru se anamde ẹfọfọn sia oro ekpetie nte ndidomo ndife