Nte Akan̄a Ebiere Ini Iso fo?

EDIEKE afo ọkpọbọhọde idiọk mbabuat n̄kpọntịbe, nte afo ekpekere ete ke edi akan̄a akan̄wam fi? Mîdịghe ndi afo utu ke oro okpowụt esịtekọm nte ke afo n̄kukụre okodu ke nnennen itie ke nnennen ini?

Enyene-ọniọn̄ Solomon ọkọdọhọ ete: “Ntie ke idak utịn n̄kabade, nnyụn̄ n̄kụt nte ke idịghe mbon nsọpitọk ẹkan ke mbuba, inyụn̄ idịghe mbon uko ẹkan ke ekọn̄, nte ke idịghe mbon eti ibuot ẹnyene udia, inyụn̄ idịghe mbon ikike ẹkụt inyene, inyụn̄ idịghe mme ọfiọkn̄kpọ owo ẹnyene itoro: koro ini ye unọmọ ẹtịbede ẹnọ mmọ kpukpru.” (Ecclesiastes 9:11) Mme n̄kpọntịbe unana idotenyịn ẹsiwak nditịbe didie ntem! Ebre mbre mbuba oro ẹketịmde ẹdori enyịn ndikan ada unan, ndien enyeoro ẹkedoride enyịn ndikpu akabade akan. Ubi ubi mbabuat n̄kpọntịbe esida nditaha okụk ọsọk anam-akpanikọ owo mbubehe, ayakde amia mbuba nsan̄a esie oro mînamke akpanikọ akabade edi imọ owo. Edi nte Solomon ekeyịri esen esen n̄kpọntịbe ẹmi ye akan̄a? Ndomo esisịt. Mmọemi n̄kụkụre ẹdi utịp “ini ye unọmọ.”

Jesus Christ ama anam ukem utịn̄ikọ oro. Ke etịn̄de otụk n̄kpọntịbe oro nte an̄wan̄ade ekedide ọsọ ifiọk ke otu mme andikpan̄ utọn̄ nnọ enye, Jesus ama obụp ete: “Owo efụteta ẹmi tọwa Siloam ọkọduọde ọtọ mmọ owot, nte mbufo ẹse ẹte mmọ ẹdi mme abiatibet ẹkan kpukpru mme andidụn̄ ke Jerusalem?” (Luke 13:4) Jesus ikemenke n̄kpan̄a emi idori ndusụk enyene-ndịk akan̄a m̀mê uduak Abasi, m̀mê enye ndikenịm ke akpanikọ nte ke mbon n̄kpan̄a oro ke usụn̄ ekededi ẹma ẹdiọk ẹkan mmọ en̄wen. N̄kpọntịbe mmọn̄eyet oro ekedi sụk uwụtn̄kpọ efen aban̄ade nte ini ye unọmọ odude ke edinam.

Idụhe itie ndomokiet ke Bible oro onyịmede ye ekikere oro nte ke Abasi ama ebebiere ini n̄kpa nnyịn onịm. Edi akpanikọ nte ke Ecclesiastes 3:1, 2 ọdọhọ ete: “Ẹmenịm ini ẹnọ kpukpru n̄kpọ: kpukpru utom ke idak enyọn̄ ẹnyụn̄ ẹnyene ekemini mmọ: ini eke ẹmande, ye ini eke ẹkpade; ini eke ẹtọde ke isọn̄, ye ini eke ẹdịberede se ẹtọde.” Edi Solomon n̄kukụre ekeneme aban̄a n̄kaiso ndutịm edisan̄a n̄kanade eke uwem ye n̄kpa oro ọnọmọde anana mfọnmma ubonowo. Nnyịn imana, ndien ini ama ekem, ke ini ndammana iduọk uwem owo edide edisịm—nte ido ededi ke isua 70 mîdịghe 80 m̀mê n̄kpọ ntre ẹbede—nnyịn ikpa. Edi, Abasi ibiereke nnennen ini n̄kpa inịm kpa nte ọtọin̄wan̄ mîbiereke nnennen ini “eke ẹtode” m̀mê “eke ẹdịberede se ẹtọde.”

Ke akpanikọ, Solomon ke ukperedem owụt nte ke owo ekeme ndikpa ke ini mîkemke, ọdọhọde ete: “Kûnam idiọkn̄kpọ ukan, kûnyụn̄ udi ndisịme owo: afo edinam didie akpa ke mîkemke kan̄a ke ini fo?” (Ecclesiastes 7:17) Item emi ekpenyene nso ufọn ke ekpedide ẹma ẹbebiere ini n̄kpa owo ẹnịm nte mîkemeke ndikpụhọde? Bible ke ntre esịn ekikere akan̄a. Mme ọsọn̄ibuot nditọ Israel ẹmi ẹkenyịmede ukpepn̄kpọ mme okpono ndem emi edi se Abasi okobiomde ikpe ọkpọsọn̄ ọkpọsọn̄. Isaiah 65:11 ọdọhọ ete: “Edi ama edi mbufo ẹmi ẹkpọn̄de Jehovah, ẹnyụn̄ ẹfrede edisana obot mi, emi ẹbride okpokoro ẹnọ Gad [“abasi Mfọniso,” New World Translation], ẹnyụn̄ ẹdade mbuaha ẹsịn ẹnọ Menin [“abasi Akan̄a,” NW] ẹyọhọ.”

Edi ndisịme n̄kpọ, ndien, didie ntem ndidọhọ ke mbabuat n̄kpọntịbe ye unọmọ oto akan̄a m̀mê, ke ọdiọkde akan oro, oto Abasi ke idemesie! Bible ọdọhọ ete, “Abasi edi ima,” ndien ndidori enye ikọ nte andidi ntak nnanenyịn ubonowo ọbiọn̄ọ isọn̄ akpanikọ emi nnennen nnennen.—1 John 4:8.

Mme Un̄wọn̄ọ Abasi Kaban̄a Ini Iso

Nso, ndien, kaban̄a idotenyịn edinyan̄a nnyịn? Ndi akpanikọ oro nte ke akan̄a oro owo mîkemeke ndinyan̄a ikarake uwem nnyịn ọwọrọ ke ana nnyịn iyo ye unana uduak? Ke baba usụn̄ kiet, koro Abasi ama ebiere ini iso ubonowo ke ofụri ofụri. Bible etịn̄ aban̄a edibot “obufa isọn̄” emi “edinen ido edidụn̄de.”—2 Peter 3:13.

Man anam emi, Abasi eyesịn ubọk nnennen nnennen ke mme edinam owo. Ke mûfiọkke, ekeme ndidi afo emesibọn̄ akam ete emi ada itie ebe ke nditịn̄ akam oro ọdọhọde ete: “Yak Ubọn̄ fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Obio Ubọn̄ emi edi ata ukara oro ẹwụkde ke heaven. Ke ndibọn̄ akam nte enye edi, afo ọbọn̄ akam ete Obio Ubọn̄ oro edida itie ukara eyomfịn ke isọn̄.—Daniel 2:44.

Ndinyene Ubiọn̄ Nnọ Ini Iso Fo

Nte n̄wọrọnda n̄kpọntịbe emi editụkde ini iso fo ọkọn̄ọ, idịghe ke akan̄a m̀mê idem ke ini ye unọmọ, edi ke usụn̄uwem oro afo emekde nditiene. Ti n̄kpọntịbe tọwa eke Siloam oro. Jesus akada mfụhọ mfụhọ n̄kpọntịbe oro ndikpep akwa ukpepn̄kpọ. Mbon unọmọ tọwa oro ọkọduọde ikekemeke ndibọhọ se ikotịbede inọ mmọ. Ke usụn̄ okpụhọrede, mme andikpan̄ utọn̄ nnọ Jesus ẹkpekeme ndifep nsobo oro osụn̄ọde oto iyatesịt Abasi. Jesus ama odụri mmọ utọn̄ ete: “Edi ke mbufo mîkabakede esịt, mbufo kpukpru ẹyetak kpa ntre.” (Luke 13:4, 5) Nte an̄wan̄ade, mmọ ẹma ẹkeme ndimek ini iso mmọ.

Ẹnam ukem ifet oro atara osịm nnyịn mfịn—ndinam n̄kpọ mban̄a edinyan̄a nnyịn. (Philippi 2:12) Abasi oyom ete “kpukpru owo . . . ẹsịm ifiọk akpanikọ.” (1 Timothy 2:4) Ndien okposụkedi nte se idade imana ye idaha ke uwem otụkde nnyịn owo kiet kiet ke ndusụk udomo, Abasi ọmọnọ nnyịn ifụre uduak—kpa ukeme ndibiere nte iyomde ndida uwem nnyịn nnam n̄kpọ. (Matthew 7:13, 14) Nnyịn imekeme ndinam se inende m̀mê se ikwan̄ade. Nnyịn imekeme ndinyene eti idaha ye Jehovah Abasi inyụn̄ inyene uwem, mîdịghe nnyịn imekeme ndin̄wọn̄ọde n̄n̄wana ye enye inyụn̄ ikpan̄a.

Ediwak owo ẹmek ndidu uwem nda-ke-idem n̄kpọn̄ Abasi. Mmọ ẹyak uwem mmọ ẹsịn ke ndibịne mme n̄kpọ obụkidem, inemesịt, m̀mê uwọrọetop. Edi Jesus okodụri owo utọn̄ ete: “Ẹtịm ẹkpeme idem mbufo ke kpukpru orụk edisịn esịt ke n̄kpọ owo: koro owo enyene se enyenyene, uwem esie isịneke enye ke ubọk [“itoho ke mme n̄kpọ oro enye enyenede,” NW].” (Luke 12:15) Ke nso, ndien, ke uwem nnyịn ọkọn̄ọ? Ke 1 John 2:15-17, Bible anam an̄wan̄a ete: “Ẹkûma ererimbot, ye se idude ke ererimbot. . . . Ofụri ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot. Ndien ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”

Ndimek Uwem

Didie ke afo ekeme ndifiọk nte ke afo ke akpanikọ ke anam uduak Abasi? Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Nnennen ifiọk otode Bible omonịm isọn̄ ọnọ mbuọtidem. “Ke mbuọtidem mîdụhe, owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọemi ẹyomde Enye utịp.” (Mme Hebrew 11:6) Ifiọk oro oyomde afo enyene ododu kpukpru ini. Mme Ntiense Jehovah ẹmen̄wam ediwak miliọn owo ndinyene enye ebe ke ukpepn̄kpọ Bible ofụri ini.a

Man enem Abasi esịt, afo enyene ndinam ndusụk ukpụhọde. Ndusụk ndiọi edu ẹkeme ndidu oro anade afo akan mîdịghe idem oburọbụt edinam oro anade etre. Kûkpa mba, nte n̄kpọ eke ẹdọhọde ke imemke utom afo ndikpụhọde. Ekikere oro nte ke n̄kpọ ikemeke ndikpụhọde edi sụk ekikere efen oro ẹdade ẹto nsunsu edinịm ke akpanikọ aban̄ade akan̄a. Ye un̄wam Jehovah, owo ekededi ekeme ‘ndikpụhọde’ nnyụn̄ nnyene ‘obufa edu.’ (Rome 12:2; Ephesus 4:22-24) Ukeme fo ndinem Abasi esịt idiwọrọke ikpîkpu. Enye odu ke mben̄eidem ndidiọn̄ mbon oro ẹnamde uduak esie.

Nte ẹnyịmede, ndikpep Bible idikọkke kpukpru mfịna fo. Mme ata asan̄autom Abasi ẹsisobo mbabuat n̄kpọntịbe ye ndiọi idaha, nte mbon en̄wen. Nte ededi, Abasi ekeme ndinọ nnyịn eti ibuot ndiyọ idiọk idaha. (James 1:5) Idara odu n̄ko ke ndifiọk nte ke owo enyene eti itie ebuana ye Abasi. Mme N̄ke 16:20 ọdọhọ ete, “Owo eke ọbuọtde idemesie ye Jehovah, ọfọfọn ọnọ enye!”

Ke Paradise oro ẹfiakde ẹwụk ke idak Obio Ubọn̄ Abasi, nnyịn idikopke ndịk aba iban̄a ini ye unọmọ. Ke akpanikọ, Abasi eyesio kpukpru n̄kpọ oro ẹbiatde inemesịt ubonowo idahaemi efep. Bible ọn̄wọn̄ọ ete, “Enye eyekwọhọde kpukpru mmọn̄eyet ke enyịn [nnyịn] efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” (Ediyarade 21:4) Anana-ibat mbon n̄kpan̄a mbabuat n̄kpọntịbe ẹyenyene ediset ke n̄kpa.—John 5:28, 29.

Nte afo eyeda ubọn̄ ubọn̄ ini iso emi enyene? Ke ini nditọ Israel ẹkedude ke idaha ndidụk Isọn̄ Un̄wọn̄ọ, Moses ama asian mmọ ete: “Mmada uwem ye n̄kpa, edidiọn̄ ye isụn̄i, nnịm fi ke iso; mek uwem, ndien, man afo ye nditọ fo ẹdu uwem: man afo ama Jehovah Abasi fo onyụn̄ okop uyo esie, onyụn̄ eyịre ye enye: koro enye edide uwem fo, ye uniọn̄ mme usen fo.”—Deuteronomy 30:19, 20.

Baba, nnyịn idịghe mme anana un̄wam asan̄autom ke ubọk anana-mbọm akan̄a. Inemesịt ini iso fo, ke akpanikọ nsinsi ini iso fo, odu fi ke ubọk. Nnyịn imakpak fi ndimek uwem.

[Mme Ikọ idakisọn̄]

[Se Ẹwetde ke Ikpọ Abisi ke page 5]

Mme ọsọn̄ibuot nditọ Israel oro ẹkenyịmede ukpepn̄kpọ mme okpono ndem aban̄ade akan̄a edi se Abasi okobiomde ikpe ọkpọsọn̄ ọkpọsọn̄