Messiah Edisịm

NDI Jehovah ayanam mme owo ẹdiọn̄ọ Messiah emi ẹken̄wọn̄ọde? Ih. Kam kere ban̄a se Abasi akanamde. Ekedi n̄kpọ nte isua 400 nte ẹkewet N̄wed Abasi Usem Hebrew ẹkụre. Angel Abasi ama aka ekese n̄kaiferi emi ekerede Mary ke obio Nazareth, ke n̄kan̄ edem edere obio Galilee. Angel Gabriel ama ọkọdọhọ enye ete ke Abasi ọmọn̄ ada edisana spirit esie anam enye aman eyen, kpa ye oro enye mîkọfiọkke erenowo kan̄a. Eyen emi edidi Edidem oro ẹken̄wọn̄ọde, emi edikarade ke nsinsi! Eyen emi edidi Eyen Abasi, emi Abasi edisiode uwem esie ke heaven isịn ke idịbi Mary.

Mary ama enyịme san̄asan̄a utom emi. Joseph anam-usọ eto oro enye okoyomde ndidọ ama edidọ enye ke Abasi ama ọkọdọn̄ angel eketịn̄ ọnọ enye ete ke Abasi okosio uwem Eyen esie esịn ke idịbi Mary. Edi nso kaban̄a ntịn̄nnịm ikọ oro ọkọdọhọde ke Messiah edimana ke Bethlehem? (Micah 5:2) Ndito Nazareth n̄ka ekpri obio oro ekedi n̄kpọ nte kilomita 140!

Andikara Rome ama owụk ewụhọ ete ẹbat kpukpru owo. Ẹma ẹdọhọ mme owo ẹnyọn̄ obio emana mmọ ẹkesịn enyịn̄ ke n̄wed. Etie nte Joseph ye Mary ẹketo Bethlehem, ntre Joseph ama emen n̄wan esie emi akasan̄ade ye idịbi aka do. (Luke 2:3) Mary ama aman eyen ke ufọk ufene, ndien esịn eyen oro ke usịnudia ufene. Abasi ndien ọdọn̄ angel kiet akasian mme ekpemerọn̄ ke eyen oro akamanade do ekedi Messiah, m̀mê Christ.

Nte ini akakade, mbon en̄wen ẹyesọn̄ọ ke Jesus ekedi Messiah oro ẹken̄wọn̄ọde. Prọfet Isaiah ama ebem iso etịn̄ ete ke owo kiet eyebem iso edidiọn̄ usụn̄ ọnọ Messiah man enye anam akpan utom esie. (Isaiah 40:3) John andinịm owo baptism ke enye eketịn̄ aban̄a oro. Ke ini enye John okokụtde Jesus, enye ama ofiori ete: “Sese, Eyenerọn̄ Abasi oro emende mme idiọkn̄kpọ ererimbot efep!” Ndusụk mbet John ẹma ẹdaha inikiet ẹtiene Jesus. Owo mmọ kiet ama ọdọhọ ete: “Nnyịn imokụt Messiah.”—John 1:29, 36, 41.

Ikọ ntiense en̄wen ama odu. Ke ini John ekenịmde Jesus baptism, Jehovah ke idemesie ama etie ke enyọn̄ etịn̄ ikọ. Enye ama ada edisana spirit esie emek Jesus nte Messiah onyụn̄ ọdọhọ ete: “Emi edi edima Eyen mi, emi ami nnyịmede.” (Matthew 3:16, 17) Messiah oro ẹken̄wọn̄ọde ama edisịm ndien!

Ini ewe ke emi eketịbe? Ekedi ke isua 29 E.N., ata nnennen ini emi isua 483 oro Daniel ekebemde iso etịn̄ aban̄a, esịmde utịt. Ke akpanikọ, emi edi kiet ke otu akakan idiọn̄ọ oro anamde ẹfiọk ke Jesus edi Messiah, m̀mê Christ. Edi nso etop ke enye editan̄a ke ini enye odude mi ke isọn̄?

—Ẹda ẹto Matthew ibuot 1 esịm 3; Mark ibuot 1; Luke ibuot 2; John ibuot 1.