• “Ẹdọn̄ Ikọt Mi Esịt”
    Ntịn̄nnịm Ikọ Isaiah—Un̄wana Ofụri Ubonowo I

    • 12, 13. (a) Ntak emi ẹkemede ndiberi edem ke un̄wọn̄ọ edifiak n̄wụk? (b) Nso eti mbụk odu ọnọ mme Jew mbon ntan̄mfep, ndien ntak emi mmọ ẹkemede ndinyene mbuọtidem?

      12 Isaiah ọnọ ọyọhọ ntak iba emi anamde ẹkeme ndiberi edem ke un̄wọn̄ọ edifiak n̄wụk. Enye Emi anamde un̄wọn̄ọ emi edi ọkpọsọn̄ Abasi emi esede aban̄a ikọt esie ke ima. Isaiah aka iso ete: “Afo Zion emi obụkde eti mbụk, dọk ke edikon̄ obot; O Jerusalem emi obụkde eti mbụk, sọn̄ọ menede, uyo fo; menede, kûdịghe; dọhọ mme obio Judah, ete, Se Abasi mbufo! Sese, Ọbọn̄ Jehovah ayada odudu edi, ubọk esie oyonyụn̄ akara ọnọ enye: sese, utịp esie odu ye enye, n̄kpọ-eyen-utom onyụn̄ odu enye ke iso. Enye ọyọbọk ikọt esiemmọ nte ọbọk-ufene: ayatan̄ nditọ erọn̄ ke ubọk esie, akama ke ikpanaesịt esie, onyụn̄ ada mme ọnọ-mmọn̄eba usụn̄.”—Isaiah 40:9-11.

      13 Ke mme ini Bible ekedi ido ọnọ iban ndidia usọrọ edikan, ẹfioride m̀mê ẹkwọde eti mbụk ẹban̄a ekọn̄ oro ẹkande m̀mê ubọhọ oro edide. (1 Samuel 18:6, 7; Psalm 68:11) Isaiah owụt ke ntịn̄nnịm ikọ ete ke eti mbụk odu ọnọ mme Jew mbon ntan̄mfep, mbụk oro ẹkemede ndifiori ye unana ndịk, idem ẹdade ke enyọn̄ obot ẹfiori—Jehovah ayada ikọt esie usụn̄ afiak ọnyọn̄ edima Jerusalem! Mmọ ẹkeme ndinyene mbuọtidem, koro Jehovah “ayada odudu edi.” Ke ntre, n̄kpọ ndomokiet ikemeke ndikpan enye ndisu un̄wọn̄ọ esie.

  • “Ẹdọn̄ Ikọt Mi Esịt”
    Ntịn̄nnịm Ikọ Isaiah—Un̄wana Ofụri Ubonowo I

    • 15. (a) Ini ewe ke Jehovah ‘akada odudu’ edi, ndien anie edi ‘ubọk emi akarade ọnọ enye’? (b) Nso eti mbụk ke ana ẹtan̄a ye unana ndịk?

      15 Mme ikọ Isaiah ẹnyene ekese se ẹwọrọde ke ntịn̄nnịm ikọ ẹnọ eyo nnyịn. Ke 1914, Jehovah ama ‘ada odudu’ edi onyụn̄ owụk obio ubọn̄ esie ke heaven. ‘Ubọk emi akarade ọnọ enye’ edi Eyen esie, Jesus Christ, emi Jehovah odoride ke ebekpo esie eke heaven. Ke 1919, Jehovah ama anyan̄a mme asan̄autom esie emi ẹyetde aran ke isọn̄ osio ke ufụn Akwa Babylon onyụn̄ ọtọn̄ọ ndifiak n̄wụk edisana utuakibuot odu-uwem ye ata Abasi ofụri ofuri. Emi edi eti mbụk oro anade ẹtan̄a ye unana ndịk, nte n̄kpọ eke ẹdade ke enyọn̄ obot ẹfiori man ntọt oro asuana. Do, ẹyak nnyịn imenede uyo nnyịn ke enyọn̄ uko uko inam mbon efen ẹfiọk nte ke Jehovah Abasi amafiak owụk edisana utuakibuot ke isọn̄ emi!