‘Emem Enyenede Mbon Oro Ẹyomde Usụn̄ ye Mbon Eke Ẹkperede’

22. Nso ini iso ke Jehovah ebem iso etịn̄ (a) aban̄a mbon oro ẹtuade n̄kpọfiọk? (b) aban̄a mme idiọkowo?

²² Ke owụtde ukpụhọde ke ufọt mbon oro ẹtuade n̄kpọfiọk ye mbon oro ẹkọbọde ke mme idiọk usụn̄ mmọ, Jehovah atan̄a ete: “Mbot mfri n̄kpọk-inua; emem, emem, nnọ owo eke oyomde usụn̄ ye owo eke ekperede, ndien nyọkọk enye. Ndien mme idiọk owo ẹbiet nyoyoho inyan̄; koro enye mîkemeke ndina sụn̄; mmọn̄ esie onyụn̄ obụrọde ndek ye mbat . . . mme idiọk owo, Emem idụhe.”—Isaiah 57:19-21.

23. Nso idi mfri n̄kpọkinua, ndien ke nso usụn̄ ke Jehovah ‘obot’ mfri emi?

²³ Mfri n̄kpọkinua edi uwa ekọm oro ẹnọde Abasi—kpa an̄wan̄wa uyarade eke okponode enyịn̄ esie. (Mme Hebrew 13:15) Didie ke Jehovah ‘obot’ an̄wan̄wa uyarade emi? Man ẹkeme ndiwa uwa ekọm, owo enyene ndibem iso n̄kpep mban̄a Abasi ndien ekem ọbuọt idem ke enye. Mbuọtidem—kpa mbun̄wụm spirit Abasi—onụk owo oro nditịn̄ se enye okopde nnọ mbon efen. Ke ikọ efen, enye anam an̄wan̄wa uyarade. (Rome 10:13-15; Galatia 5:22) Ẹkpenyene nditi, n̄ko, nte ke Jehovah enen̄ede edi enye oro ọkọdọn̄de mme asan̄autom esie nditan̄a itoro esie. Ndien Jehovah edi enye oro akanyan̄ade ikọt esie, anamde edi mmemmem ọnọ mmọ ndinọ mme utọ uwa ekọm oro. (1 Peter 2:9) Ntem, ẹkeme nditịm ndọhọ nte ke Jehovah okobot mfri n̄kpọkinua emi.

24. (a) Mmanie ẹnyene emem Abasi, ndien ye nso utịp? (b) Mmanie mînyeneke emem, ndien nso idi utịp mmọ?

²⁴ Nso aduai-owo-idem mfri n̄kpọkinua ke anaedi mme Jew ẹkenọ ntem nte mmọ ẹfiakde ẹnyọn̄ọ obio emana mmọ, ẹkwọde itoro ẹnọ Jehovah! Anaedi mmọ ẹdat esịt ndinyene emem Abasi, edide mmọ ‘ẹyom usụn̄’—ẹdude nsannsan ẹkpọn̄ Judah, ẹsụk ẹbetde edifiak nnyọn̄ọ—m̀mê ‘ẹkperede’—ẹdude ke obio emana mmọ. Ke okpụhọrede ke ntatara usụn̄, n̄kpọ edi isio ye mme idiọkowo didie ntem! Owo ekededi oro okpude ndibọ ntụnọ Jehovah, ke akpanikọ, kpukpru ndiọi owo—owo ekededi ye ke ebiet ekededi oro mmọ ẹdude—inyeneke emem ndomokiet. Ke ẹfụtde nte akpa emi adahade, mmọ ikaha iso ndision̄o mfri n̄kpọkinua, edi ẹsion̄o “ndek ye mbat,” kpukpru n̄kpọ oro mîsanake.

25. Didie ke ediwak owo oro ẹtode nsannsan ye n̄kpet n̄kpet ẹnyene emem?

²⁵ Mfịn, n̄ko, mme andituak ibuot nnọ Jehovah ke kpukpru ebiet ẹtan̄a eti mbụk Obio Ubọn̄ Abasi. Mme Christian oro ẹdude nsannsan ye n̄kpet n̄kpet ke se iwakde ibe idụt 230 ẹnọ mfri n̄kpọkinua mmọ, ẹtan̄ade itoro ata Abasi kierakiet. Ẹkop itoro oro mmọ ẹkwọde ke “utịt ererimbot.” (Isaiah 42:10-12) Mbon oro ẹkopde mme ikọ mmọ ẹnyụn̄ ẹnamde n̄kpọ ẹban̄a ke ẹbọ akpanikọ eke Ikọ Abasi, kpa Bible. Utọ mbon oro ke ẹnyene emem, oro otode edinam n̄kpọ nnọ “Abasi emem.”—Rome 16:20.