Mme Mbụme Ẹtode Mme Andikot
Ntak emi Isaiah 30:21 etịn̄de aban̄a ikọ Jehovah nte “uyo ke edem fo,” ke adan̄aemi ufan̄ikọ Isa 30:20 oro ebemde iso owụtde ke Jehovah odu ke iso ke ndidọhọ, “enyịn fo ẹyenyụn̄ ẹkụt [“Akwa Anditeme,” NW] fi?”
Isaiah 30:20, 21 okot ete: “[“Akwa Anditeme,” NW] fi ididịbeke aba: enyịn fo ẹyenyụn̄ ẹkụt [“Akwa Anditeme,” NW] fi: ndien utọn̄ fo ẹyekop uyo ke edem fo, ete, ‘Emi edi ọkpọusụn̄, mbufo ẹsan̄a ke esịt,’ ke mbufo ẹdin̄wọn̄ọrede ẹka nnasia, m̀mê ẹnyụn̄ ẹka ufien.”
Ke ikerede iban̄a itien̄wed oro ke ata ata usụn̄, andikot itien̄wed emi okụt Jehovah, Akwa Anditeme, ke iso esie, edi okop uyo Esie ke edem. Nte ededi, mme ikọ emi ẹdi ndamban̄a ikọ ndien ẹkpenyene ndida mmọ ntre.
Ndamban̄a ikọ oro ẹdade ke Isa 30 ufan̄ikọ 20 anam nnyịn iti asan̄autom oro eben̄ede idem ndinam n̄kpọ nnọ eteufọk esie, nnyụn̄ nnam kpukpru se eteufọk esie etemede. Kpa nte asan̄autom emi etịmde ese eteufọk esie man ọfiọk se enye oyomde imọ inam, ikọt Jehovah mfịn ẹnen̄ede ẹtịn̄ enyịn ẹse man ẹbọ item Bible oro Jehovah akade iso ada esop esie eke isọn̄ ndinọ. (Psalm 123:1, 2) Ih, mmọ ẹnam n̄kpọ ẹtiene ndausụn̄ oro enye ọnọde, ẹdude ke edidemede ẹban̄a se ededi oro Jehovah adade “asan̄autom emi anamde akpanikọ, onyụn̄ enyenede ọniọn̄” anam ẹfiọk.—Matthew 24:45-47.
Nso, ndien, kaban̄a uyo oro mme asan̄autom esie ẹkopde ke edem mmọ? Owụt eti ibuot ndibiere nte ke uyo oro ẹkopde ke edem mi edi uyo Abasi eke ini idem oro ẹkewetde ẹsịn ke Ikọ esie, emi “akama-ukpọhọde, emi anamde akpanikọ” anamde an̄wan̄a. (Luke 12:42) Mme asan̄autom Abasi eke eyomfịn ẹkop uyo esie ebe ke nditịn̄ enyịn n̄kpep Bible nnyụn̄ nda mme edumbet esie nsịn ke edinam ke uwem mmọ ye un̄wam mme n̄wed oro “asan̄autom emi anamde akpanikọ, onyụn̄ enyenede ọniọn̄,” kpa “akama ukpọhọde, emi anamde akpanikọ” etịmde. Ebede ke ndiberi edem ke enye nnyụn̄ ntịn̄ enyịn̄ ntiene ekemini ndausụn̄ oro Akwa Anditeme ọnọde ye ke ndikpep Ikọ Abasi, oro ẹkewetde ke ediwak isua ikie emi ẹkebede, mme asan̄autom esie ẹkụt enye ke iso mmọ ke ndamban̄a usụn̄, ẹnyụn̄ ẹkop uyo esie ke edem mmọ.—Rome 15:4.