Se Abasi Ekpepde Nnyịn Anam Inyene Idotenyịn
Abasi ọn̄wọn̄ọ ndinam n̄kpọ ọfọn ke mîbịghike. Enye ayanam mme owo ẹkûbọ ufen aba onyụn̄ anam isọn̄ enenem ndidụn̄. (Psalm 37:11) Ntak emi ikpenịmde ke mme n̄kpọ emi ẹyetịbe? Sia “Abasi idịghe owo eke okposude nsu.” (Numbers 23:19) Yak ineme ndusụk nti n̄kpọ emi Abasi aduakde ndinam.
Abasi Oyosobo Mme Idiọkowo Efep
“Ke ini mme idiọkowo ẹfiaride nte mbiet kpukpru mbon ibak ẹnyụn̄ ẹsehede, edi man ẹkpesobo mmọ ẹfep ke nsinsi.”—PSALM 92:7.
Nte iketịn̄de ke ibuotikọ oro osụk okụrede do, mme owo ẹyedọdiọn̄ ẹnam idiọk. Ikpanaha emi akpa nnyịn idem, sia Bible ama etetịn̄ ke 2 Timothy 3:1-5 ete ke mme owo ẹyenen̄ede ẹdiọk ke “mme akpatre usen.” Mme akpatre usen nso? Mme akpatre usen idiọk ererimbot emi. Ibịghike Abasi ọmọn̄ osobo kpukpru mbon oro mîmaha nditre ndinam idiọkn̄kpọ efep. Ini oro, nti owo kpọt, oro edi, mbon oro ẹkopde uyo Abasi, ẹdidụn̄ ke isọn̄ emi. Bible ọdọhọ ete: “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.
Abasi Oyosobo Satan Efep
“Abasi emi ọnọde emem ayanuak Satan.”—ROME 16:20.
Emem oyodu ke ofụri isọn̄ ke ẹma ẹkesobo mme idiọkowo, Satan, ye mme demon ẹfep. Abasi ọdọhọ ke ‘idụhe owo eke edinamde nnyịn idịghe.’—Micah 4:4.
Abasi Ayanam Udọn̄ọ ye N̄kpa Ẹtre
“Ebietidụn̄ Abasi omodu ye owo . . . Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—EDIYARADE 21:3, 4.
Ufen ye udọn̄ọ ẹyetre sia Abasi ọyọdiọn̄ kpukpru se Satan, Adam, Eve, ye idiọkn̄kpọ nnyịn ẹbiatde. Ntre, ‘n̄kpa ididụhe aba’ ini oro. Mbon emi ẹmade Abasi ẹnyụn̄ ẹkopde uyo esie ẹyedu uwem ke nsinsi. Edi mmọ ẹdidụn̄ ke m̀mọ̀n̄?
Abasi Ayanam Isọn̄ Edi Paradise
“Wilderness ye edisat ebiet ẹyedara, ndien unaisọn̄ desat ayadara onyụn̄ asiaha ikọn̄ nte saffron.”—ISAIAH 35:1.
Isọn̄ edidi Paradise ke Abasi ama okosobo mme idiọkowo efep. Ndiye itie emi mme owo ẹkemede nditie mbọ ofụm ẹdiyọyọhọ kpukpru ebiet, udia edinyụn̄ idi barasuene. (Psalm 72:16) Mmọn̄ inyan̄, akpa, ye idịm ẹyesana, ediwak iyak ye unam-mmọn̄ ẹyenyụn̄ ẹdu. Owo ndomokiet idibiatke isọn̄, ofụm, m̀mê mmọn̄. Mme owo ẹyebọp ufọk idemmọ ẹdụn̄. Kpukpru owo ẹyenyene ebiet emi ẹdụn̄de, biọn̄ ididụhe, ubuene inyụn̄ idụhe.—Isaiah 65:21, 22.
Abasi Ayanam Mme Akpan̄kpa Ẹset
‘Mme owo ẹyeset ke n̄kpa.’—UTOM 24:15.
Ndi akpama ndifiak n̄kụt mbon fo emi ẹkekpade? Ata Ọkpọsọn̄ Abasi ayanam mmọ ẹset ẹdidu uwem ke Paradise mi ke isọn̄. Afo ọyọdiọn̄ọ mmọ, mmọ n̄ko ẹyediọn̄ọ fi. Kere nte esịt edinemde fi, kere n̄ko nte edinemde mmọ! Nso inam inịm ke emi eyetịbe? Sia Bible etịn̄ aban̄a ikpọ owo ye nditọwọn̄ emi ẹkenamde ẹset ẹfiak ẹdidu ye ubon mmọ. N̄ko, ediwak owo ẹma ẹkụt ini emi Jesus akanamde mme owo ẹset.—Luke 8:49-56; John 11:11-14, 38-44.