Ndidat Esịt Idahaemi Ye Ke Nsinsi
“Mbufo ẹdat esịt, ẹnyụn̄ ẹbre nsinsi ke se ami mbotde: koro, sese, ami mbot Jerusalem ke n̄kpọ inemesịt, mbot mbio esie ke n̄kpọ idatesịt.”—ISAIAH 65:18.
1. Didie ke utuakibuot akpanikọ otụk owo kiet kiet ke ediwak isua ikie ẹmi ẹbede?
KE OFỤRI isua ikie ẹmi, ata ediwak owo ẹmekop akwa idatesịt ke ndinam n̄kpọ ata Abasi, Jehovah. David ekedi kiet ke otu ediwak owo oro ẹkekopde idatesịt ke utuakibuot akpanikọ. Bible obụk ete ke ini ẹkedade ekebe ediomi ẹdọk ẹdi ke Jerusalem, “David ye ofụri ufọk Israel ẹda ekebe Jehovah ẹdọk ke n̄kpo idara.” (2 Samuel 6:15) Utọ idatesịt oro ke ndinam n̄kpọ Jehovah idịghe ikpîkpu n̄kpọ eset. Afo emekeme nditiene mbuana. Ndien idem mbufa ikpehe idatesịt ẹkeme ke mîbịghike ndidi okwo!
2. Ke ọwọrọde ọkpọn̄ akpa edisu eke Isaiah ibuot 35 ke idem mme Jew oro ẹkefiakde ẹnyọn̄, mmanie mfịn ẹbuana ke edisu efen?
2 Ke ibuotikọ oro ekebemde iso, nnyịn ima idụn̄ọde mme akpa edisu eke aduai-owo idem prọfesi oro ẹwetde ke Isaiah ibuot 35. Nnyịn nte enende imekeme ndikot enye prọfesi edifiak n̄wụk koro oro edi se enye ekedide ọnọ mme Jew eke eset. Enye enyene ukem edisu oro ke ini nnyịn. Didie ke edi ntre? Ọfọn, ọtọn̄ọde ye mme apostle Jesus ye mbon en̄wen ke Pentecost 33 E.N., Jehovah anam n̄kpọ ye nditọ Israel eke spirit. Mmọemi ẹdi mme owo oro ẹyetde aran ke edisana spirit Abasi ẹmi ẹkabarede ẹdi ubak se apostle Paul okotde “Israel Abasi.” (Galatia 6:16; Rome 8:15-17) Ti, n̄ko, ete ke 1 Peter 2:9, ẹkot mme Christian ẹmi ‘ubon eke ẹmekde, oku edidem, edisana obio, ikọt eke Abasi onịmde ọnọ idemesie.’ Peter akaiso ndinam ẹdiọn̄ọ utom oro ẹnọde Israel eke spirit: “Mbufo ẹka ẹkatan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana Esie.”
Edisu ke Eyo Nnyịn
3, 4. N̄kpọ eketie didie ke ini Isaiah ibuot 34 okosude ke eyomfịn?
3 Ini ama odu ke ntọn̄ọ ntọn̄ọ isua ikie emi, emi nsụhọ Israel eke spirit ke isọn̄ mîkenyeneke iwụk ke nditan̄a utọ etop oro ifịk ifịk. Mmọ ikokopke idatesịt ọyọhọ ọyọhọ ke utịbe un̄wana Abasi. Ke nditịm ntịn̄, mmọ ẹkedu ke akwa ekịm. Ini ewe ekedi oro? Ndien nso ke Jehovah Abasi akanam aban̄a oro?
4 Ekedi ke ini Ekọn̄ Ererimbot I, ndondo oro ẹma ẹkewụk Obio Ubọn̄ Messiah Abasi ke heaven ke 1914. Mme idụt, ye un̄wam mme ọkwọrọ ederi ufọkabasi ke nsio nsio idụt, ẹma ẹyat esịt ye kiet eken. (Ediyarade 11:17, 18) Nte ededi, Abasi ikadaha ye ọsọn̄ibuot Christendom ye otu mme ọkwọrọ ederi esie ẹmi ẹmenerede idem ke enyọn̄ kpa nte enye mîkadaha ye atan̄ idem idụt Edom. Ntem, Christendom, kpa mbiet Edom, odu ke idaha ndikụt edisu eke Isaiah ibuot 34 ke eyomfịn. Edisu emi ebede ke nsinsi nsobo enyene nsọn̄ọ kpa nte akpa edisu esie ke idem Edom.—Ediyarade 18:4-8, 19-21.
5. Nso edisu ke Isaiah ibuot 35 enyene ke ini nnyịn?
5 Nso kaban̄a ibuot 35 eke prọfesi Isaiah oro, ye nsọn̄uyo emi enye odoride ke idatesịt? Enyeoro n̄ko emenyene edisu ke ini nnyịn. Didie ke edi ntre? Enye ama osu ke edikafiak ntan̄ Israel eke spirit mbok ke ẹma ẹkedu ke ndamban̄a ntan̄mfep. Ẹyak nnyịn idụn̄ọde mme akpan n̄kpọ ke se inen̄erede idi mbụk ukara Abasi eke ndondo emi, ẹtịbede ke eyouwem ediwak owo oro ẹsụk ẹdude uwem.
6. Ntak ẹkemede ndidọhọ ke nsụhọ Israel eke spirit ẹma ẹdidu ke idaha ntan̄mfep?
6 Ke ekpri udomo ini ke ẹmende ẹdomo ke ini Ekọn̄ Ererimbot I, nsụhọ Israel eke spirit ikasanake ofụri ofụri ikonyụn̄ idaha ikekem ye uduak Abasi. Ndusụk mmọ ẹma ẹnyene ndo ẹto mme nsunsu ukpepn̄kpọ ẹnyụn̄ ẹbiat idaha mmọ ebe ke nditre ndida ata san̄asan̄a nnọ Jehovah ke ini ẹdude ke idak mfịghe ndinọ idụt oro ẹn̄wanade ekọn̄ ibetedem. Ke mme isua ekọn̄ oro, mmọ ẹma ẹsobo kpukpru orụk ukọbọ, idem ẹdoride ukpan ke mme n̄wed Bible mmọ ke ediwak ebiet. Ke akpatre, ẹma ẹdori ndusụk mme ọwọrọiso nditọete ikọ ẹnyụn̄ ẹsịn mmọ ke ufọk-n̄kpọkọbi ke nsunsu edori ikọ. Ke ikerede ifiak edem, isọn̄ke ndikụt nte ke ikọt Abasi, ke ndusụk usụn̄ifiọk, ẹkedu ke idaha ntan̄mfep, utu ke ndidu ke ifụre. (Men John 8:31, 32 domo.) Mmọ ẹma ẹnen̄ede ẹtre ndikụt usụn̄ ke n̄kan̄ eke spirit. (Ephesus 1:16-18) Mmọ ẹma ẹtre nditịn̄ ikọ man ẹtoro Abasi, ndien nte utịp mmọ ikosion̄oke mfri ke n̄kan̄ eke spirit. (Isaiah 32:3, 4; Rome 14:11; Philippi 2:11) Nte afo omokụt nte emi ebietde idaha oro mme Jew eset ẹkedude ke ntan̄mfep ke Babylon?
7, 8. Nso utọ edifiak n̄wụk ke nsụhọ eke eyomfịn ẹkesobo?
7 Edi nte Abasi eyekpọn̄ mme asan̄autom esie eke eyomfịn ke utọ idaha oro? Baba, enye ama ebiere ndifiak n̄wụk mmọ, ke n̄kemuyo ye se ẹkebemde iso ẹtịn̄ ebe ke Isaiah. Ntem prọfesi emi ke Isa ibuot 35 emenyene san̄asan̄a edisu ke ini nnyịn, ye edifiak nnam nsụhọ Israel eke spirit ẹnyene uforo ye nsọn̄idem ke paradise eke spirit. Ke Mme Hebrew 12:12, Paul ama abuan Isaiah 35:3 ke ndamban̄a usụn̄, ọsọn̄ọde nte ke nnyịn ndibuan ikpehe prọfesi Isaiah emi ke usụn̄ eke spirit enen.
8 Ke ini ukụre ekọn̄ oro, nsụhọ Israel eke spirit oro ẹyetde aran ẹma ẹwọrọ ke ntan̄mfep, yak idọhọ ntre. Jehovah Abasi akada Jesus Christ, Akamba Cyrus, afak mmọ. Ntem, nsụhọ emi ama ekeme ndinam utom edifiak mbọp, emi ebietde utom oro nsụhọ mme Jew eset ẹkenamde, ẹmi ẹkefiakde ẹnyọn̄ idụt mmọ ndifiak mbọp ataata temple ke Jerusalem. N̄ko-n̄ko, nditọ Israel eke spirit ẹmi ke eyomfịn ẹma ẹkeme nditọn̄ọ ndidiọn̄ nnyụn̄ nsion̄o awawa paradise eke spirit ndi, kpa ndamban̄a in̄wan̄ Eden.
9. Didie ke n̄kpọ ebietde enyeoro ẹketịn̄de ẹban̄a ke Isaiah 35:1, 2, 5-7 okotịbe ke ini nnyịn?
9 Ye se ẹnemede ke enyọn̄ emi ke ekikere, ẹyak nnyịn ikere inikiet efen iban̄a Isaiah ibuot 35, inyụn̄ ibem iso ise Isa 35 ufan̄ikọ 1 ye 2. Se iketiede nte edi desat ke akpanikọ ama ọtọn̄ọ ndisehe nnyụn̄ n̄n̄wụm mfri nte unaisọn̄ Sharon eset. Ekem, se Isa 35 ufan̄ikọ 5 osịm 7. Ẹmetat enyịn ifiọk nsụhọ, emi ediwak mmọ ẹsụk ẹdude uwem ẹnyụn̄ ẹsịnde ifịk ke utom Jehovah. Mmọ ẹma ẹkeme ndikụt se n̄kpọ oro okotịbede ke 1914 ye ke oro ebede ọwọrọde ke usụn̄ ọfọnde akan. Oro n̄ko ama enyene odudu ke idem ediwak nnyịn emi inamde “akwa otu owo,” emi inamde utom ọtọkiet idahaemi ye nsụhọ.—Ediyarade 7:9.
Nte Afo Edi Ubak Edisu Oro?
10, 11. (a) Didie ke afo etiene enyene ebuana ke edisu eke Isaiah 35:5-7? (b) Didie ke mme ukpụhọde ẹmi ẹtụk fi?
10 Da idemfo ke uwụtn̄kpọ. Mbemiso okosobode ye Mme Ntiense Jehovah, nte afo ama esikot Bible kpukpru ini? Ke edide ama esikot, ifiọk ifan̄ ke afo ekenyene? Afo idahaemi ọmọfiọk, ke uwụtn̄kpọ, akpanikọ aban̄ade idaha mme akpan̄kpa. Ndusụk afo emekeme ndida owo oro enyenede udọn̄ ke ibuot nneme emi n̄ka mme itien̄wed oro ẹdotde ke Genesis ibuot 2, Ecclesiastes ibuot 9, ye Ezekiel ibuot 18, ọkọrọ ye ediwak itien̄wed efen. Ih, ekeme ndidi se Bible ekpepde aban̄a ediwak ibuot nneme ẹn̄wan̄a fi. Ke nditịn̄ ibio ibio, Bible an̄wan̄a fi, ndien afo emekeme ndinam ediwak ikpehe esie an̄wan̄a mbon efen, nte afo ye unana eyịghe anamde.
11 Nte ededi, nnyịn kiet kiet iyenam ọfọn ndibụp, ite, ‘Didie ke n̄kasan̄a ndikpep kpukpru se mfiọkde emi mban̄a akpanikọ Bible? Mbemiso n̄kekpepde n̄kpọ ye ikọt Jehovah, ndi mma mfiọk kpukpru itien̄wed oro ẹsụk ẹsiakde mi? Ndi mma mfiọk se mmọ ẹwọrọde nnyụn̄ nsịm nnennen ubiere kaban̄a se mmọ ẹdọhọde?’ Ekeme ndidi in̄wan̄în̄wan̄ ibọrọ ke mme mbụme ẹmi edi baba. Owo ndomokiet ikpọbọhọ utọ ikọ oro ke iyatesịt, edi nte ido edide ẹkeme nditịn̄ nte ke afo ekedi nnan kaban̄a mme itien̄wed ẹmi ye se mmọ ẹwọrọde. Nte idịghe ntre? Mmọ ẹma ẹdu do ke Bible, edi afo ukûkemeke ndikụt mmọ m̀mê ndifiọk se mmọ ẹwọrọde. Didie, ndien, ke ẹketat fi enyịn ke n̄kan̄ eke spirit? Ekebe ke se Jehovah akanamde ke ndisu Isaiah 35:5 ke idem nsụhọ oro ẹyetde aran. Ndien ekem, ẹma ẹtat fi enyịn. Afo udụhe aba ke ekịm eke spirit. Afo emekeme ndikụt n̄kpọ.—Men Ediyarade 3:17, 18 domo.
12. (a) Ntak emi nnyịn ikemede ndidọhọ ke idịghe ini utịbe utịbe ukọkudọn̄ọ ikpọkidem edi emi? (b) Didie ke idaha oro akabuanade Brọda F. W. Franz anam an̄wan̄a usụn̄ nte Isaiah 35:5 osude ke ini nnyịn?
12 Ifịk ifịk nditọ ukpepn̄kpọ Bible ye eke mme edinam Abasi ke ediwak isua ikie ẹmi ẹfiọk ẹte ke idahaemi idịghe ini inọ utịbe utịbe ukọkudọn̄ọ ikpọkidem ke mbụk. (1 Corinth 13:8-10) Ntre nnyịn idorike enyịn ndikụt Jesus Christ atatde nnan enyịn ke ndiwụt nte ke imọ idi Messiah, Prọfet Abasi. (John 9:1-7, 30-33) M̀mê enye ndikaiso nnam kpukpru mbon inan ẹfiak ẹkop ikọ. Nte Frederick W. Franz, kiet ke otu mbon oro ẹyetde aran ye etieibuot Watch Tower Society ini oro, ekekperede isua 100 ke emana, enye ama ekpere ndikabade nnan ndien ekenyene ndisikama n̄kpọ un̄wam ukopikọ. Ke ediwak isua enye ikesikwe n̄kpọ ikot; edi, anie ekpekere ke enye ekedi nnan m̀mê inan ke usụn̄ifiọk eke Isaiah 35:5? Usọp enyịn eke spirit esie ekedi edidiọn̄ ọnọ ikọt Abasi ke ofụri isọn̄.
13. Nso edikpụhọde m̀mê edifiak n̄wụk ke ikọt Abasi eke eyomfịn ẹkenyene?
13 Mîdịghe nso kaban̄a edeme fo? Ekeme ndidi ikọt Abasi oro ẹyetde aran ẹma ẹkụbi inua ke ini ntan̄mfep mmọ eke spirit. Edi ndondo oro Abasi okokpụhọrede idaha oro, edeme mmọ ẹma ẹtọn̄ọ ndisio n̄kpo idara kaban̄a se mmọ ẹkefiọkde ẹban̄a Obio Ubọn̄ Abasi oro ẹkewụkde ye mme un̄wọn̄ọ esie kaban̄a ini iso. Ekeme ndidi mmọ ẹma ẹn̄wam nditat fi edeme n̄ko. Adan̄a didie ke afo eketịn̄ akpanikọ Bible ọnọ mbon en̄wen ke ini edem? Ekeme ndidi afo ama ekere ke ndusụk ini ete, ‘Mmama ukpepn̄kpọ, edi ndikemeke ndika n̄kenyene nneme ye isenowo.’ Nte ededi, nte idịghe akpanikọ nte ke “edeme imụm” ke ‘osio n̄kpo idara’ idahaemi?—Isaiah 35:6.
14, 15. Didie ke ediwak owo ẹsan̄a ke “Usụn̄ Edisana Ido” ke ini nnyịn?
14 Mme Jew eset ẹmi ẹkesion̄ode ke Babylon ẹkenyene ndinam anyan isan̄ mfiak nnyọn̄ obio emana mmọ. Oro ada aban̄a nso ke ini nnyịn? Ọfọn, se Isaiah 35:8: “Ọkpọ-usụn̄ eyedu do, ye usụn̄, ndien enye eyekere [Usụn̄ Edisana Ido, NW]; baba edidehe n̄kpọ kiet idinyụn̄ isan̄ake ke esịt ibe.”
15 Toto nte ẹkesio mmọ ke ntan̄mfep eke spirit, nsụhọ oro ẹyetde aran, emi ediwak miliọn erọn̄ en̄wen ẹdianade ye mmọ idahaemi, ẹma ẹwọrọ ke Akwa Babylon ẹsan̄a ke ndamban̄a ọkpọusụn̄, kpa edisana usụn̄ edisana ido oro adade owo ekesịn ke paradise eke spirit. Nnyịn imesịn ofụri ukeme ndidot ndisan̄a nnyụn̄ n̄kaiso ndu ke Ọkpọusụn̄ Edisana Ido emi. Kere ban̄a idemfo. Nte mme idaha ido uwem fo ye mme edumbet oro afo ọsọn̄ọde eyịre itịmke ikon̄ idahaemi ikan ini oro afo okodude ke ererimbot? Nte afo usịnke ukeme oro okponde akan ndinam ekikere ye eduuwem fo ekekem ye eke Abasi?—Rome 8:12, 13; Ephesus 4:22-24.
16. Mme idaha ewe ke nnyịn ikeme ndidara nte nnyịn isan̄ade ke Usụn̄ Edisana Ido?
16 Nte afo akade iso asan̄a ke Usụn̄ Edinen Ido emi, afo nte ido edide ọmọbọhọ ndịk mme owo oro ẹbietde unam. Edi akpanikọ, ke ererimbot afo enyene ndikpeme mbak mme asua ye mbon idiọkitọn̄ ẹdita fi ke ndamban̄a usụn̄. Ata ediwak owo ẹsisọn̄ ido ke ini ẹnamde n̄kpọ ye mbon en̄wen. Nso ukpụhọde ke oro edi ntem ke otu ikọt Abasi! Do afo odu ke n̄kann̄kụk oro enyenede ukpeme. Nte ededi, ekemmọ mme Christian fo idịghe mfọnmma owo; ndusụk ini owo ekeme ndinam ndudue m̀mê anam se idiọkde. Edi afo ọmọfiọk ete ke nditọete fo ikohokoi idomo ndinọ fi unan m̀mê ndita fi. (Psalm 57:4; Ezekiel 22:25; Luke 20:45-47; Utom 20:29; 2 Corinth 11:19, 20; Galatia 5:15) Utu ke oro, mmọ ẹwụt udọn̄ ke idemfo; mmọ ẹmen̄wam fi; mmọ ẹyom ndinam utom ye afo.
17, 18. Ke nso usụn̄ifiọk ke paradise odu idahaemi, ndien nso utịp ke emi enyene ke idem nnyịn?
17 Ntre nnyịn imekeme ndise Isaiah ibuot 35, inyenede edisu idahaemi eke Isa 35 ufan̄ikọ 1 osịm 8 ke ekikere. Ndi inaha in̄wan̄în̄wan̄ nte ke nnyịn imokụt se ẹkotde ke nnennen usụn̄ paradise eke spirit? Baba, enye idịghe mfọnmma—idịghe kan̄a. Edi enye ke akpanikọ edi paradise, koro mi nnyịn imekeme, nte ẹtịn̄de ke Isa 35 ufan̄ikọ 2, ndibem iso n̄kụt ‘ubọn̄ Jehovah, ye uyai Abasi nnyịn.’ Ndien nso idi utịp? Isa 35 Ufan̄ikọ 10 ọdọhọ ete: “Ndien mmọ eke Jehovah akafakde ẹyefiak ẹdi ke Zion ẹkwọ ikwọ, [ndien idatesịt ke ini emi mînyeneke utịt, NW] onyụn̄ ayara mmọ ke ibuot: mbre ye idatesịt ẹyesịm mmọ, mfụhọ ye eseme ẹyefen̄e.” Ke akpanikọ, nnyịn ndiwọrọ ke nsunsu ido ukpono ye nnyịn ndibịne utuakibuot akpanikọ ke idak mfọn Abasi edi n̄kpọ oro akamade idatesịt.
18 Idatesịt oro enyenede ebuana ye utuakibuot akpanikọ akaiso ndikọri, nte idịghe ntre? Afo omokụt mbon oro ẹnyenede udọn̄ obufa ẹnamde ukpụhọde ẹnyụn̄ ẹsọn̄ọde ẹda ke akpanikọ Bible. Afo omokụt mme uyen ẹkọride ẹwọrọ owo ẹnyụn̄ ẹnamde n̄kọri eke spirit ke esop. Ẹma ẹnịm baptism, emi afo okokụtde ẹnịmde mme owo emi afo ọdiọn̄ọde baptism. Nte oro idịghe ntak idatesịt, ntak akwa idatesịt, mfịn? Ih, nso n̄kpọ idatesịt ke edi ntem ndinyene mbon efen ẹdianade ye nnyịn ke ifụre eke spirit ye mme idaha paradise nnyịn!
Edisu Oro Osụk Odude ke Iso!
19. Nso eti idotenyịn ke Isaiah ibuot 35 ọnọ nnyịn?
19 Kan̄a kemi nnyịn imeneme Isaiah ibuot 35 kaban̄a akpa edisu esie ye mme Jew ẹmi ẹkefiakde ẹnyọn̄ ye kaban̄a edisu eke spirit oro akade iso mfịn. Edi idịghe utịt edi oro. Ekese efen efen ke osụk odu. Enye enyene ebuana ye un̄wọn̄ọ Bible oro aban̄ade edifiak n̄wụk ataata paradise ke isọn̄.—Psalm 37:10, 11; Ediyarade 21:4, 5.
20, 21. Ntak owụtde ifiọk onyụn̄ ekemde ye N̄wed Abasi ndinịm ke akpanikọ nte ke edisu efen eyesụk odu ke Isaiah ibuot 35?
20 Ikpodụhe ke n̄kemuyo Jehovah ndinọ in̄wan̄în̄wan̄ editịn̄ mban̄a paradise ntem ndien ekem anam mme edisu esie edi ke mme n̄kpọ eke spirit kpọt. Emi, nte ededi, idịghe ndidọhọ nte ke mme edisu eke spirit inyeneke se ẹwọrọde. Idem edieke ẹkpewụkde ataata paradise, emi ikpoyụhọke nnyịn edieke mme owo ẹmi ẹdide oburobụt ke n̄kan̄ eke spirit, mme owo ẹmi ẹnamde n̄kpọ nte ndiọi unam ẹkpedude ẹkan nnyịn ẹkụk ke ediye n̄kann̄kụk oro ọyọhọde ye mme unam oro ẹtiede emem emem. (Men Titus 1:12 domo.) Ih, ana eke spirit ebem iso edi, koro enye edi akpan n̄kpọ akan.
21 Edi, Paradise oro edide ikụreke ke mme ikpehe eke spirit oro nnyịn idarade idahaemi idinyụn̄ idarade ikan oro idem ke ini iso. Nnyịn imenyene eti ntak ndidori enyịn mban̄a ataata edisu eke mme utọ prọfesi nte Isaiah ibuot 35. Ntak-a? Ọfọn, ke Isa ibuot 65, Isaiah ama ebemiso etịn̄ aban̄a “mbufa enyọn̄ ye obufa isọn̄.” Apostle Peter ama abuan itien̄wed oro ke ini etịn̄de aban̄a se iditienede usen Jehovah. (Isaiah 65:17, 18; 2 Peter 3:10-13) Peter okowụt nte ke mme n̄kpọ oro Isaiah eketịn̄de ẹdida itie ke ini “obufa isọn̄” edidide ata idem n̄kpọ. Oro abuana mme n̄kpọ oro ekemede ndidi afo ememehe ke esịt—edibọp ufọk nnyụn̄ ndụn̄ ke esịt; editọ in̄wan̄ vine nnyụn̄ ndia mfri mmọ; owo ndikop inem utom ubọk esie ke anyan ini; wolf ye eyenerọn̄ ndidu ọtọkiet; ndien unan ndomokiet idụhe ke ofụri isọn̄. Ke ikọ efen, anyan uwem, ufọk oro enyenede ifụre, akpakịp udia, utom oro ọnọde uyụhọ, ye emem ke otu unam ye ke ufọt unam ye mme owo.
22, 23. Nso ntak ndikop idatesịt edidu ke edisu eke Isaiah ibuot 35 ke ini iso?
22 Nte idotenyịn oro inamke fi ọyọhọ ye idatesịt? Enye ekpenyene ndinam, koro oro edi usụn̄ nte Abasi okobotde nnyịn ndidu uwem. (Genesis 2:7-9) Ntre, nso ke prọfesi oro ke Isaiah ibuot 35 emi nnyịn inemede iban̄a mi ọwọrọ? Emi ọwọrọ ke nnyịn imenyene ntak efen efen ndisio n̄kpo idara. Ataata desat ye nsatisọn̄ ẹyesehe, anamde nnyịn ikop idatesịt. Do mme owo ẹmi ẹnyenede awawa enyịn, m̀mê nsan̄nsan̄ enyịn, m̀mê mme uduot eken, edi emi ẹdide nnan idahaemi, ẹyekeme ndikụt usụn̄. Mme ekemmọ Christian nnyịn ẹmi ẹdide inan, m̀mê idem ndusụk ke otu nnyịn oro mîkopke n̄kpọ ọfọn, ẹyekop n̄kpọ mfọn mfọn. Nso n̄kpọ idara ke edidi ntem ndida ukeme oro n̄kop nte ẹkotde ẹnyụn̄ ẹnamde Ikọ Abasi an̄wan̄a, ọkọrọ ye edikop uyom ofụm oro enyen̄ede mme eto, imam eyenọwọn̄, ikwọ inuen!
23 Emi n̄ko ediwọrọ nte ke mbụn̄ọ, esịnede mbon oro ewan̄kọ omụmde idahaemi, ẹyesan̄a isan̄ ye unana ubiak. Nso ubọhọ ke emi edidi ntem! Adan̄aoro ataata idịm eyesiaha odụk desat. Nnyịn iyekụt inyụn̄ ikop uyom mbufụt mmọn̄. Nnyịn iyekeme ndisan̄a do nnyụn̄ ntụk awawa mbiet ye mme eto n̄kukịp. Enye ke akpanikọ edidi Paradise oro ẹfiakde ẹwụk. Nso kaban̄a idatesịt ndidu n̄kpere ekpe m̀mê utọ unam oro ye unana ndịk? Iyomke nnyịn itọn̄ọ nditịn̄ mban̄a oro, koro kpukpru nnyịn imadada ikụt inyụn̄ idara idaha oro.
24. Ntak emi afo ekemede ndinyịme ye ikọ oro odude ke Isaiah 35:10?
24 Isaiah ọn̄wọn̄ọ ọnọ nnyịn ete: “Ndien mmọ eke Jehovah akafakde ẹyefiak ẹdi ke Zion ẹkwọ ikwọ, [ndien idatesịt ke ini emi mînyeneke utịt, NW] onyụn̄ ayara mmọ ke ibuot.” Ntre nnyịn imekeme ndinyịme nte ke nnyịn imenyene ntak ndisio n̄kpo idara. Idatesịt ke se Jehovah anamde kan̄a ọnọ ikọt esie ke paradise eke spirit nnyịn, ye idatesịt ke se nnyịn idoride enyịn ndinyene ke ataata Paradise oro ekperede ndidi mi. Kaban̄a mbon oro ẹkopde idatesịt—kaban̄a nnyịn—Isaiah ewet ete: “Mbre ye idatesịt ẹyesịm mmọ, mfụhọ ye eseme ẹyefen̄e.”—Isaiah 35:10.
Nte Afo Ama Ọnọ Ntịn̄enyịn?
◻ Nso edisu ọyọhọ ikaba ke Isaiah ibuot 35 ekenyene?
◻ Nso ke n̄kan̄ eke spirit ibiet mme utịbe utịbe ukpụhọde oro Isaiah ekebemde iso etịn̄ aban̄a?
◻ Didie ke afo etiene abuana ke edisu prọfesi emi?
◻ Ntak emi nnyịn ikemede ndidọhọ ke Isaiah ibuot 35 anam nnyịn iyọhọ ye idotenyịn kaban̄a ini iso?
[Ndise ke page 15]
Ufọk-n̄kpọkọbi emi odude ke Efak Raymond ke Brooklyn, New York, emi ẹkekọbide mme ọwọrọiso nditọete itiaba ke June 1918
[Ndise ke page 16]
Okposụk ekekperede ndidi nnan ke utịt utịt isua uwem esie, enyịn eke spirit Brọda Franz okosụk ọsọsọp
[Mme Ndise ke page 17]
N̄kọri eke spirit edi ntak ndidat esịt