Ubiereikpe Jehovah Ke Idem Mme Nsunsu Andikpep
“N̄kụt ata n̄kpọ ndidien ke mme prọfet Jerusalem; ke ẹsịn ẹfịbe, ke ẹsan̄a ke nsu . . . Kpukpru mmọ ẹtie ye ami nte Sodom, mme andidụn̄ enye ẹnyụn̄ ẹbiet Gomorrah.”—JEREMIAH 23:14.
1. Ntak emi owo oro esịnde idem ke ukpepn̄kpọ Abasi obiomde ata ndodobi mbiomo?
OWO ekededi oro esịnde idem ke ukpepn̄kpọ Abasi obiom ata akamba mbiomo. James 3:1 odụri owo utọn̄ ete: “Nditọete mi, ediwak ke otu mbufo ẹkûdi mme anditeme sia ẹfiọkde ẹte, ikpe nnyịn ẹmi idide mme anditeme ẹyesọn̄ akan.” Ih, mme andikpep Ikọ Abasi ẹdu ke idak ata akamba mbiomo ndinam ibat oro ẹnyịmede ẹkan nte ẹdide ye mme Christian ke ofụri ofụri. Nso ke emi ediwọrọ ọnọ mmọ oro ẹdide mme nsunsu andikpep? Ẹyak nnyịn idụn̄ọde idaha oro okodude ke eyo Jeremiah. Nnyịn iyekụt nte enye akadade aban̄a se itịbede mfịn.
2, 3. Nso ubiereikpe ke Jehovah ọkọnọ ebe ke Jeremiah ke ebuana ye mme nsunsu andikpep eke Jerusalem?
2 Ke 647 M.E.N., kpa ọyọhọ isua ukara 13 eke Edidem Josiah, ẹma ẹnọ Jeremiah utom nte prọfet Jehovah. Jehovah ama ayat esịt ye Judah, ntre enye ama ọdọn̄ Jeremiah nditan̄a emi. Mme nsunsu prọfet Jerusalem, m̀mê mme andikpep, ẹkenam “ata n̄kpọ ndidien” ke enyịn Abasi. Idiọkn̄kpọ mmọ ama okpon tutu Abasi emen Jerusalem ye Judah odomo ye Sodom ye Gomorrah. Jeremiah ibuot 23 etịn̄ ọnọ nnyịn aban̄a emi. Jer 23 Ufan̄ikọ 14 ọdọhọ ete:
3 “N̄kụt ata n̄kpọ ndidien ke mme prọfet Jerusalem; ke ẹsịn efịbe, ke ẹsan̄a ke nsu; mmọ ẹnyụn̄ ẹsọn̄ọ mme idiọkowo ubọk, ndien owo ndomokiet ikabakede ikpọn̄ idiọkido esie; kpukpru mmọ ẹtie ye ami nte Sodom, mme andidụn̄ enye ẹnyụn̄ ẹbiet Gomorrah.”
4. Didie ke idiọk uwụtn̄kpọ ido uwem oro mme andikpep ke Jerusalem ẹkenịmde ebiet eke Christendom mfịn?
4 Ih, mme prọfet, m̀mê mme andikpep ẹmi, ke idemmọ ẹma ẹnim ata ndiọi uwụtn̄kpọ ido uwem ndien, nte utịp, ẹma ẹsịn udọn̄ ẹnọ mme owo ndinam kpa ntre. Kamse mme idaha oro ẹdude ke Christendom mfịn! Nte mmọ ibietke mbon eyo Jeremiah? Mfịn mme ọkwọrọ ederi ẹyak mme ẹsịn efịbe ye mme adan̄ ukemuduot ẹdu ke otu mmọ ndien ẹkam ẹyak mmọ ẹkwọrọ ikọ ke mme edinam ufọkabasi. Nte eyịghe ndomokiet odu nte ke ata ediwak mme andibuana ke ufọkabasi oro ẹsịnde enyịn̄ ẹdu oburobụt uwem n̄ko?
5. Ntak emi oburobụt idaha Christendom ọdiọkde akan eke Sodom ye Gomorrah?
5 Jehovah ekemen mme andidụn̄ Jerusalem okodomo ye mbon Sodom ye Gomorrah. Edi oburobụt idaha Christendom ọdiọk akan eke Sodom ye Gomorrah. Ih, enye ototịm enyene nduduọhọ ke enyịn Jehovah akan. Mme andikpep esie ẹbiat mme ibet ido uwem Christian. Ndien emi edi ntak mbiara idaha ido uwem emi kpukpru orụk abian̄a abian̄a etabi ndinam se idiọkde odude. Idaha ido uwem emi atara asuana tutu edise idiọkn̄kpọ mfịn nte se mîkwan̄ake.
‘Ndisan̄a ke Nsu’
6. Nso ke Jeremiah eketịn̄ aban̄a idiọkido mme prọfet Jerusalem?
6 Idahaemi tịmfiọk se Jer 23 ufan̄ikọ 14 etịn̄de aban̄a mme prọfet Jerusalem. Mmọ ‘ẹkesan̄a ke nsu.’ Ndien utịt utịt ikpehe Jer 23 ufan̄ikọ 15 ọdọhọ ete: “Koro [nsọn̄ibuot, NW] otode mme prọfet Jerusalem osịm ofụri isọn̄.” Ekem Jer 23 ufan̄ikọ 16 adian ete: “Ntem ke Jehovah mme udịm ọdọhọ, ete, Mbufo ẹkûkop ikọ mme prọfet ẹmi ẹtịn̄de prọfesi ẹnọ mbufo: mmọ ẹsịn mbufo ẹdama idat: ẹtịn̄ n̄kukụt eke otode mmọ ke esịt, itoho Jehovah ke inua.”
7, 8. Ntak emi mme ọkwọrọ ederi Christendom ẹtiede nte mme nsunsu prọfet Jerusalem, ndien didie ke emi otụk mme aka ufọkabasi?
7 Ukem nte mme nsunsu prọfet Jerusalem, mme ọkwọrọ ederi Christendom n̄ko ẹsan̄a ke nsu, ẹsuande ukpepn̄kpọ mbon nsọn̄ibuot, kpa mme ukpepn̄kpọ oro mîdụhe ke Ikọ Abasi. Nso idi ndusụk nsunsu ukpepn̄kpọ ẹmi? Ukpọn̄ ikpaha ke nsinsi, Abasi-Ita-ke-Kiet, purgatory, ye hell ikan̄ ndida ntụhọde mme owo ke nsinsi. Mmọ n̄ko ẹdebe utọn̄ mbon oro ẹkopde se mmọ ẹtịn̄de ebe ke ndikwọrọ se mme owo ẹmade ndikop. Mmọ ẹtịn̄ ẹfiak ẹtịn̄ nte ke afanikọn̄ ndomokiet idisịmke Christendom sia enye enyenede emem Abasi. Edi mme ọkwọrọ ederi ẹtịn̄ “n̄kukụt eke otode mmọ ke esịt.” Enye edi nsu. Mbon oro ẹnịmde mme utọ nsu ẹmi ke akpanikọ ẹdia ibọk n̄kpa ke n̄kan̄ eke spirit. Ẹmebian̄a mmọ ẹda ẹka nsobo mmọ!
8 Kere ban̄a se Jehovah etịn̄de aban̄a mme nsunsu andikpep ẹmi ke Jer 23 ufan̄ikọ 21: “Ami n̄kọdọn̄ke mme prọfet oro utom, ndien mmọ ẹfen̄e, n̄kọdọhọke ye mmọ, ndien mmọ ẹtịn̄ prọfesi.” Ntre mfịn, Abasi ikọdọn̄ke mme ọkwọrọ ederi utom, m̀mê mmọ ndikpep mme akpanikọ esie. Nso idi utịp? Enyene-ndịk unana ifiọk Bible odu ke otu mme aka ufọkabasi koro mme etubom mmọ ẹbọk mmọ ke mme akwaifiọk owo eke ererimbot.
9, 10. (a) Nso utọ ndap ke mme nsunsu andikpep eke Jerusalem ẹkedaba? (b) Didie ke mme ọkwọrọ ederi Christendom ukem ntre ẹkpep “nsunsu ndap”?
9 N̄ko-n̄kọ, mme ọkwọrọ ederi mfịn ẹtịbi nsunsu idotenyịn ẹdi. Tịmfiọk Jer 23 ufan̄ikọ 25: “Mmokop uyo mme prọfet ẹmi ẹtịn̄de nsunsu ọ-prọfesi ke enyịn̄ mi, ete, ‘Mmadaba ndap, mmadaba ndap.’” Nso utọ ndap ke mmọ ẹdi? Jer 23 Ufan̄ikọ 32 asian nnyịn ete: “Jehovah ọdọhọ ete, Sese, mmọn̄ nnam ikọ ye mmọ eke ẹtịn̄de nsunsu ndap, ẹnyụn̄ ẹbụkde mmọ, ẹnyụn̄ ẹnamde ikọt mi ẹdue ke nsu mmọ ye ke use mmọ; ndien ami ndọn̄ke mmọ, nnyụn̄ n̄wụkke mmọ; ndien mmọ ididorike mbio ẹmi baba udori. Ke edi uyo Jehovah ọdọhọ.”
10 Nso nsunsu ndap, m̀mê idotenyịn, ke mme ọkwọrọ ederi ẹkpep? Kamse, nte ke n̄kukụre idotenyịn owo kaban̄a emem ye ifụre mfịn edi Edidiana M’idụt. Ke mme isua ndondo ẹmi mmọ ẹkekot EM “akpatre idotenyịn kaban̄a edidianakiet ye emem,” “n̄kon̄n̄kan ndutịm kaban̄a emem ye unenikpe,” “akpan idotenyịn oro ẹkụtde ke enyịn kaban̄a emem ererimbot.” Nso utọ abian̄a! N̄kukụre idotenyịn ubonowo edi Obio Ubọn̄ Abasi. Edi mme ọkwọrọ ederi ikwọrọke inyụn̄ ikpepke akpanikọ aban̄ade ukara eke heaven oro, emi ekedide akpan ibuotikọ ukwọrọikọ Jesus.
11. (a) Nso idiọk utịp ke mme nsunsu andikpep eke Jerusalem ẹkenyene ke enyịn̄ Abasi? (b) Ke mîbietke otu Jeremiah, nso ke mme andikpep nsunsu ido ukpono mfịn ẹnam kaban̄a enyịn̄ Abasi?
11 Jer 23 Ufan̄ikọ 27 etịn̄ n̄kpọ efen efen ọnọ nnyịn. “Ẹmi ẹkerede ẹte ke mmimọ iyenam ikọt mi ẹfre enyịn̄ mi ke ndap mmọ eke mmọ ẹtịn̄de kiet ye kiet, kpa nte Baal ekesịnde [mme ete] mmọ ẹfre enyịn̄ mi.” Mme nsunsu prọfet ke Jerusalem ẹma ẹnam mme owo ẹfre enyịn̄ Abasi. Nte mme andikpep nsunsu ido ukpono mfịn inamke kpa ntre? Ke ọdiọkde akan, mmọ ẹdịp enyịn̄ Abasi, kpa Jehovah. Mmọ ẹkpep ẹte ke ufọn idụhe ndikot enye, mmọ ẹnyụn̄ ẹsio enye ẹfep ke mme edikabade Bible mmọ. Mmọ ẹnen̄ede ẹbiọn̄ọ owo ekededi oro ekpepde mme owo nte ke enyịn̄ Abasi edi Jehovah. Edi otu Jeremiah, kpa nsụhọ mme Christian oro ẹyetde aran, ọkọrọ ye nsan̄a mmọ, ẹmenam kpa nte Jesus akanamde. Mmọ ẹkpep ediwak miliọn owo ẹban̄a enyịn̄ Abasi.—John 17:6.
Ndiyarade Ndudue Mmọ
12. (a) Ntak emi mme andikpep nsunsu ido ukpono ẹnyenede akwa ubiomikpe iyịp? (b) Nso ikedi udeme mme ọkwọrọ ederi ke mme ekọn̄ ererimbot iba oro?
12 Otu Jeremiah amayarade mme ọkwọrọ ederi ndien ndien nte ẹdide mme nsunsu andikpep ẹmi ẹdade otuerọn̄ mmọ ẹka ntatara usụn̄ nsobo. Ih, nsụhọ amanam an̄wan̄a ntak emi mme adaba ndap oro ẹdotde ndibọ ndot ndot ubiereikpe Jehovah. Ke uwụtn̄kpọ, mme asan̄autom Jehovah ẹsiwak nditịn̄ mban̄a Ediyarade 18:24, emi ọdọhọde ete ke ẹma ẹkụt iyịp “kpukpru mmọemi owo ẹkewotde ke isọn̄” ke Akwa Babylon. Kere ban̄a kpukpru ekọn̄ oro ẹsin̄wanade ke ntak usua ido ukpono. Ubiomikpe iyịp emi odorode mme nsunsu andikpep ke idem okpon didie ntem! Mme ukpepn̄kpọ mmọ ẹmetọ ubahade ẹmenyụn̄ ẹnam usua oro ẹsuade mme owo ke nsio nsio ido ukpono ye idụt ototịm okpon. Kaban̄a Ekọn̄ Ererimbot I, n̄wed oro, Preachers Present Arms ọdọhọ ete: “Mme ọkwọrọ ederi ẹma ẹnọ ekọn̄ oro n̄wọrọnda ima mmọ ke n̄kan̄ eke spirit ye odudu. . . . Ufọkabasi ke ntre ama ototịm esịn idem ke ndutịm ekọn̄ oro.” Ukem oro ke ekedi ke Ekọn̄ Ererimbot II. Mme ọkwọrọ ederi ẹma ẹnọ mme idụt oro ẹken̄wanade ekọn̄ ọyọhọ ibetedem ẹnyụn̄ ẹdiọn̄ udịmekọn̄ mmọ. Ekọn̄ ererimbot iba ẹma ẹtọn̄ọ ke Christendom emi ekemmọ mbon ido ukpono ẹkewotde kiet eken. Mme n̄ka ererimbot ye eke ido ukpono ke esịt Christendom ẹmekaiso ndinam ẹduọk iyịp tutu osịm mfịn emi. Nso enyene-ndịk utịp ke mme nsunsu ukpepn̄kpọ mmọ ẹnyene ntem!
13. Didie ke Jeremiah 23:22 owụt nte ke mme ọkwọrọ ederi Christendom inyeneke itie ebuana ndomokiet ye Jehovah?
13 Mbọk tịmfiọk Jeremiah ibuot 23, ufan̄ikọ 22: “Ekpedi nte mmọ ẹkedade ke odu mi, ẹnyụn̄ ẹnamde ikọt mi ẹkop ikọ mi, mmọ ẹkpekabade mmọ ndien ẹsio ke idiọkusụn̄ mmọ, ye ke idiọkido mmọ.” Edieke mme prọfet ido ukpono Christendom ẹkpedude ke otu nsan̄a Jehovah, ke n̄kpet n̄kpet itie ebuana ye enye nte asan̄autom emi anamde akpanikọ onyụn̄ enyenede ọniọn̄ odude, do mmọ n̄ko ẹkpedu uwem ekekem ye mme idaha Abasi. Mmọ n̄ko ẹkpenam mme owo ke Christendom ẹkop ikọ Abasi. Utu ke oro, mme nsunsu andikpep eyomfịn ẹmenam mme anditiene mmọ ẹdi mme nnan nnan asan̄autom Asua Abasi, Satan kpa Devil.
14. Nso okopodudu uyarade ke ẹkenọ mme ọkwọrọ ederi Christendom ke 1958?
14 Ediyarade oro otu Jeremiah ayararede mme ọkwọrọ ederi omokop odudu. Ke uwụtn̄kpọ, ke Mbono Edisana Uduak Ofụri Ererimbot eke Mme Ntiense Jehovah eke 1958 ke New York City, udiana etieibuot Watch Tower Society ama etịn̄ ikọ oro ubak ubak ọkọdọhọde ete: “Ye unana nneminua m̀mê ndimen̄e, nnyịn idọhọ ke edi ukwan̄ ido ukpono, nsunsu ido ukpono; edi ntak kpukpru ubiatibet, nsọn̄ibuot, usua, en̄wan, asari, . . . ye idat idat ndutịme emi asua owo oro enyịn mîkwe, Satan kpa Devil adade ke edem. Mbon oro ẹnen̄erede ẹdi ntak kaban̄a idaha ererimbot emi ẹdi mme anditeme ye mme adaiso ido ukpono; ndien mmọ oro ẹtịmde ẹnyene nduduọhọ ẹkan ke otu mmọemi ẹdi mme ọkwọrọ ederi ido ukpono Christendom. . . . Ke kpukpru isua ẹmi ẹma ẹkebe ọtọn̄ọde ke Ekọn̄ Ererimbot I, itie ebuana oro Christendom enyenede ye Abasi ebiet eke Israel ke eyo Jeremiah. Ih, Christendom asak iso ese nsobo oro enyenede ndịk onyụn̄ akamade nsobo akan enyeoro Jeremiah okokụtde otịbede ọnọ Jerusalem.”
Ubiereikpe Mme Nsunsu Andikpep
15. Mme ọkwọrọ ederi ẹtịn̄ nso prọfesi ẹban̄a emem? Nte mmọ ẹyesu?
15 Kpa ye ntọt emi, didie ke mme ọkwọrọ ederi ẹnam n̄kpọ toto ke ini oro? Kpa nte Jer 23 ufan̄ikọ 17 ọtọtde: “Mmọ ẹsụk ẹdọhọ ye mmọ eke ẹsịnde mi ke ndek, ẹte, Jehovah ọdọhọ, ete, Mbufo ẹyenyene emem; ẹnyụn̄ ẹdọhọ kpukpru owo eke ẹsan̄ade ke itụn esịt mmọ, ẹte, ‘Baba idiọkn̄kpọ kiet idisịmke mbufo.’” Nte emi edi akpanikọ? Baba! Jehovah eyeyarade mme nsu eke prọfesi mme ọkwọrọ ederi ẹmi. Enye idinamke se mmọ ẹtịn̄de ke enyịn̄ esie osu. Nte ededi, nsunsu un̄wọn̄ọ emem ye Abasi oro mme ọkwọrọ ederi ẹn̄wọn̄ọde edi ata abian̄a!
16. (a) Nso idi idaha ido uwem ererimbot emi, ndien mmanie ẹtiene ẹnyene nduduọhọ? (b) Nso ke otu Jeremiah anam aban̄a mme idiọk idaha ido uwem ererimbot emi?
16 Nte afo emekere ete, ‘Nso, mme nsunsu ukpepn̄kpọ mme ọkwọrọ ederi ndibian̄a mi? Tutu amama!’ Ọfọn, kûnen̄ede unyene mbuọtidem ntre! Ti ete ke mme nsunsu ukpepn̄kpọ mme ọkwọrọ ederi ẹmesịn udọn̄ ẹnọ abian̄a abian̄a, idaha ido uwem oro enyenede ndịk. Mme ukpepn̄kpọ nnam-se-mmade mmọ ẹkpere ndidọhọ ke n̄kpọ ekededi enen, inamke n̄kpọ m̀mê mmọ ẹdiọk adan̄a didie. Ndien usụhọde idaha ido uwem emi asuana ọyọhọ kpukpru ikpehe unọ idem inemesịt, senima, TV, mme magazine, ye ikwọ. Do, ana nnyịn inen̄ede idu ke ukpeme, mbak odudu usụhọde idaha ido uwem emi ke n̄kari atapde owo mi edikara nnyịn. Mme video ye ikwọ oro ẹsabarede oro ẹkeme nditap n̄kparawa owo. Ti ete ke edu mme owo mfịn ndinyịme kpukpru n̄kpọ edi nnennen utịp otode nsunsu ukpepn̄kpọ mme ọkwọrọ ederi ye edikpu oro mmọ ẹkpude ndimụm ndinen idaha Abasi n̄kama. Otu Jeremiah ke an̄wana ye mme oburobụt ekikere ẹmi ke onyụn̄ an̄wam mme asan̄autom Jehovah ndisịn idiọkido oro ofụkde Christendom.
17. (a) Nte Jeremiah eketịn̄de, nso ubiereikpe ikenyene ndidoro idiọk Jerusalem ke idem? (b) Nso iditịbe inọ Christendom ke mîbịghike?
17 Nso ubiereikpe ke mme nsunsu andikpep Christendom ẹdibọ ẹto Jehovah, kpa akwa Ebiereikpe? Jer 23 Ufan̄ikọ 19, 20, 39, ye Jer 23:40 ọbọrọ ete: “Sese, oyobio Jehovah ọwọrọ ke iyatesịt, kpa ibụmede ibụmede oyobio: eyebụmede ọtọ mme idiọkowo ke ibuot. Iyatesịt Jehovah idikabakede, tutu enye anam, onyụn̄ ama uduakesịt esie. . . . Ami nyefre mbufo taktak, nnyụn̄ nsio mbufo ke obio emi n̄kọnọde mbufo ye mme ete mbufo ke iso mi nduọk: nyenyụn̄ nnịm mbufo ke n̄kpọ nsinsi bụt, ye nsinsi esuene, eke owo mîdifreke.” Kpukpru oro ẹketịbe ẹnọ idiọk Jerusalem ye temple esie, ndien idahaemi ukem afanikọn̄ emi eyesọp ndisịm idiọk Christendom.
Nditan̄a “Mbiomo Jehovah”
18, 19. Nso “mbiomo Jehovah” ke Jeremiah ọkọtọt Judah, ọnọde nso ekikere?
18 Ntre, nso idi mbiomo emi otu Jeremiah ye nsan̄a esie ẹnyenede? Jer 23 Ufan̄ikọ 33 asian nnyịn ete: “Ndien ke ini mbio obio ẹmi m̀mê prọfet m̀mê oku obụpde fi, ete, ‘Nso idi mbiomo Jehovah?’ afo n̄ko eyedọhọ mmọ ete, ‘“O nso mbiomo—ke mbufo ẹdi! Ndien ami nyenyụn̄ n̄kpọn̄ mbufo,” Jehovah ọdọhọ.’”—NW.
19 Ikọ Hebrew oro adade ọnọ “mbiomo” ọwọrọ n̄kpọ iba. Enye ekeme ndida nnọ ndodobi ubiereikpe Abasi mîdịghe ada ọnọ n̄kpọ oro efịkde owo onịm onyụn̄ anamde idem emem owo. Mi ikọ oro “mbiomo Jehovah” ada ọnọ n̄kpọsọn̄ prọfesi—kpa ubiereikpe oro nte ke Jerusalem odot nsobo. Nte mme owo ẹma ẹma ndikop utọ n̄kpọsọn̄ utịn̄ikọ prọfesi oro ẹtode Jehovah do emi Jeremiah ekesitịn̄de ọnọ mmọ ndien ndien? Baba, mme owo ẹma ẹsisak Jeremiah nsahi ete, ‘Nso prọfesi (mbiomo) ke afo enyene idahaemi? Nnyịn imọfiọk ite ke prọfesi fo edidi mbiomo efen oro anamde idem emem owo!’ Edi nso ke Jehovah ọkọdọhọ mmọ? Emi: “O nso mbiomo—ke mbufo ẹdi! Ndien ami nyenyụn̄ n̄kpọn̄ mbufo.” Ih, mme owo ẹmi ẹkedi mbiomo ẹnọ Jehovah, ndien enye ọmọn̄ edisio mmọ efep mbak ẹdidi mbiomo ẹnọ enye aba.
20. Nso idi “mbiomo Jehovah” mfịn?
20 Nso idi “mbiomo Jehovah” mfịn? Enye edi ọkpọsọn̄ prọfesi oro otode Ikọ Abasi. Enye ọyọhọ ye ubiomikpe, ọtọtde nsobo Christendom oro asan̄ade ekpere. Amaedi ikọt Jehovah, nnyịn imenyene ndodobi mbiomo nditan̄a “mbiomo Jehovah” emi. Nte utịt asan̄ade ekpere, ana nnyịn itịn̄ inọ kpukpru owo nte ke mbon nsọn̄ibuot Christendom ẹdi “mbiomo,” ih, “O nso mbiomo!” ke ẹdi ẹnọ Jehovah Abasi, ye nte ke ibịghike enye eyebiomode idemesie “mbiomo” emi efep ebe ke ndiyak Christendom okụt nsobo.
21. (a) Ntak emi ẹkesobode Jerusalem ke 607 M.E.N.? (b) Ke ẹma ẹkesobo Jerusalem, nso ikotịbe inọ mme nsunsu prọfet ye ata prọfet Jehovah, ọnọde nnyịn nso nsọn̄ọ mfịn?
21 Ẹma ẹnọ ubiereikpe Jehovah ke eyo Jeremiah ke ini mbon Babylon ẹkesobode Jerusalem ke 607 M.E.N. Nte ẹkebemde iso ẹtịn̄, oro ekedi ‘esuene ye emiom’ ọnọ ọnọ mme ọsọn̄ibuot nditọ Israel oro mîkanamke akpanikọ do. (Jeremiah 23:39, 40) Emi okowụt mmọ nte ke Jehovah, emi mmọ ẹketrede ndiwụt ukpono nnọ enye ndien ndien, ama ayak mmọ ke akpatre ọnọ mme utịp idiọk edinam mmọ. Ẹma ẹkụbi mme ọsọn̄ enyịn nsunsu prọfet mmọ inua ke akpatre. Edi, inua Jeremiah ama akaiso nditịn̄ prọfesi. Jehovah ikọkpọn̄ke enye. Ke ukem usụn̄ emi, Jehovah idikpọn̄ke otu Jeremiah ke ini ọkpọsọn̄ ubiere esie edidade okosụn̄ọ ke ndisobo uwem mme ọkwọrọ ederi Christendom ye mmọ oro ẹnịmde mme nsu mmọ ke akpanikọ.
22. Ubiereikpe Jehovah ẹdida Christendom okosịm nso utọ idaha?
22 Ih, itie ndon, Jerusalem oro owo mîkodụn̄ke ke 607 M.E.N. ebede edi ukem ukem nte ido ukpono Christendom editiede ke ẹma ẹkebọ enye ofụri inyene esie ẹnyụn̄ ẹsuene enye an̄wan̄wa. Emi edi ubiereikpe emi odotde emi Jehovah ebierede ọnọ mme nsunsu andikpep. Ubiereikpe oro idikpụhọ. Kpa nte kpukpru etop ntọt eke odudu spirit emi Jeremiah ọkọnọde okosude ke eyo edem, kpa ntre ke mmọ ẹdidi akpanikọ ke edisu mmọ eke eyomfịn. Ntre akpakam nnyịn itie nte Jeremiah. Ẹyak nnyịn itan̄a etop prọfesi mbiomo Jehovah inọ mme owo ye unana ndịk, man mmọ ẹfiọk ntak emi ọyọhọ udomo edinen ubiereikpe esie edidorode kpukpru mme nsunsu andikpep ido ukpono ke idem!
Mme Mbụme Ndụn̄ọde
◻ Didie ke Jerusalem eset ọkọdiọk ke idaha ekikere Jehovah?
◻ Ke nso mme usụn̄ ke Christendom ‘asan̄a ke nsu’?
◻ Didie ke ẹkeyarade nduduọhọ oro mme ọkwọrọ ederi eyomfịn ẹnyenede?
◻ Nso “mbiomo Jehovah” ke ẹtan̄a idahaemi?
[Ndise ke page 8]
Mme prọfet Jerusalem ẹma ẹnam “ata n̄kpọ ndidien”
[Ndise ke page 9]
“Ẹtịn̄ n̄kukụt eke otode mmọ ke esịt”
[Ndise ke page 10]
Jerusalem ke nsobo esie ama ekebe owụt akpatre itie Christendom