“Temple” Ye “Ọbọn̄” Mfịn

“Yak ọbọn̄ odu ke otu mmọ; ke ini mmọ ẹdụkde, yak enye odụk: ndien ke ini mmọ ẹwọn̄ọde, yak mmọ ẹwọn̄ọ (ọtọ kiet).”—EZEKIEL 46:10.

1, 2. Ewe ata akpanikọ an̄wam nnyịn ndifiọk ekese se n̄kukụt temple eke Ezekiel ọwọrọde an̄wan̄a?

NDUSỤK rabbi eke eset iketịmke ima n̄wed Ezekiel. Nte Talmud ọdọhọde, ndusụk mmọ ẹma ẹkam ẹkere edisio n̄wed emi mfep ke otu n̄wed ẹnamde Edisana N̄wed Abasi. N̄kukụt temple oro ama enen̄ede ọsọn̄ mmọ ndikabade ndien ẹkedọhọ ke enye ọsọn̄ akan ukeme owo ndifiọk. N̄kukụt Ezekiel aban̄ade temple Jehovah ama akpa nditọ ukpepn̄kpọ Bible eken idem. Nso kaban̄a nnyịn?

² Tọn̄ọ ẹkefiak ẹwụk edisana utuakibuot, Jehovah amada ediwak ikike eke spirit ọdiọn̄ ikọt esie, esịnede mbufiọk kaban̄a se temple Abasi eke spirit ọwọrọde—ndutịm Jehovah ebietde eke temple kaban̄a edisana utuakibuot.a Ata akpanikọ emi an̄wam nnyịn ndifiọk ekese se n̄kukụt temple eke Ezekiel ọwọrọde. Ẹyak nnyịn inen̄ede itịn̄ enyịn idụn̄ọde ikpehe inan̄ oro ke n̄kukụt emi—temple, itie oku, ọbọn̄, ye isọn̄ oro. Nso ke mmọ ẹmi ẹwọrọ mfịn?

Temple Oro ye Afo

3. Nso ke nnyịn ikpep ito n̄kokon̄ dek ye mme n̄kpọ oro ẹkapde ke ibibene ke mme inuaotop temple?

³ Da nte ke nnyịn inam isan̄ ikanade temple eke n̄kukụt emi. Nnyịn imesịm inyụn̄ idọk udịghi ukot itiaba ikesịm kiet ke otu ikpọ inuaotop esie. Ke esịt inuaotop emi, nnyịn imese enyọn̄ ye uten̄e. Dek ọkọm esie okon̄ akan mita 30! Ẹti nnyịn ke ntem nte ke mme idaha kaban̄a edidụk ndutịm utuakibuot Jehovah ẹkokon̄. Un̄wana ẹtode window ẹnam mme eyop ẹmi ẹkapde ke ibibene, ẹmi N̄wed Abasi owụtde nte ẹdade ẹban̄a edinen ido, ẹsem. (Psalm 92:12; Ezekiel 40:14, 16, 22) Edisana ebiet emi enyene mbon oro ẹnende ke n̄kan̄ ido uwem ye ke n̄kan̄ eke spirit. Nte ekemde ye emi, oyom nnyịn ika iso inen man otodo Jehovah enyịme utuakibuot nnyịn.—Psalm 11:7.

4. Mmanie ke owo mîyakke ẹbe ẹdụk temple, ndien nso ke emi ekpep nnyịn?

⁴ Ubet ukpeme ita ẹdu ke n̄kan̄ enyịnusụn̄ kiet kiet. Ndi mbon ukpeme ẹyeyak nnyịn ibe idụk esịt temple? Jehovah asian Ezekiel ete ke esenowo eke “mînaha mbobi ke esịt” inyeneke ndidụk. (Ezekiel 40:10; 44:9) Nso ke oro ọwọrọ? Abasi enyịme sụk mbon oro ẹmade ibet esie ẹnyụn̄ ẹdude uwem nte ekemde ye mmọ nte mme andituak ibuot. (Jeremiah 4:4; Rome 2:29) Enye ada utọ mbon oro odụk ke tent esie eke spirit, ufọk utuakibuot esie. (Psalm 15:1-5) Tọn̄ọ nte ẹkefiak ẹwụk edisana utuakibuot ke 1919, esop Jehovah eke isọn̄ ọsọn̄ọ omụm mme ibet ido uwem esie akama onyụn̄ anam mmọ ẹn̄wan̄a ke adiana ke adiana. Owo iyakke mbon oro ẹkoide-koi ẹsịn ndisụk ibuot ẹka iso ẹbuana ye ikọt esie. Mfịn, edinam edisio mme anamidiọk oro mîkabakede esịt mfep emi ọkọn̄ọde ke Bible an̄wam ndinam utuakibuot nnyịn asana onyụn̄ eden̄i.—1 Corinth 5:13.

5. (a) Mme mbiet n̄kpọ ewe ẹdu ke n̄kukụt Ezekiel ye n̄kukụt John oro ẹwetde ke Ediyarade 7:9-15? (b) Ke n̄kukụt Ezekiel, mmanie ke esien 12 oro ẹtuakde ibuot ke an̄wa okụre ẹda ẹban̄a?

⁵ Enyịnusụn̄ emi ada ekesịm an̄wa okụre emi mme owo ẹtuakde ibuot ẹnọ ẹnyụn̄ ẹtorode Jehovah. Emi anam nnyịn iti n̄kukụt apostle John aban̄ade “akwa otuowo” ẹmi ẹtuakde ibuot ẹnọ Jehovah “uwemeyo ye okoneyo ke temple Esie.” Eyop ẹdu ke n̄kukụt mbiba. Ke n̄kukụt Ezekiel ẹda mmọ ẹbana mme ibibene enyịnusụn̄. Ke n̄kukụt John mme andituak ibuot ẹkama ndakeyop ke ubọk, adade aban̄a idatesịt mmọ ke nditoro Jehovah ye ke ndidara Jesus nte Edidem mmọ. (Ediyarade 7:9-15) Ke udọn̄ikọ n̄kukụt Ezekiel, esien Israel 12 ada aban̄a “mme erọn̄ en̄wen.” (John 10:16; men Luke 22:28-30 domo.) Ndi afo n̄ko edi kiet ke otu mbon oro ẹnyenede idatesịt ke nditoro Jehovah ebe ke nditan̄a Obio Ubọn̄ esie?

6. Nso ikedi uduak mme ubet udia ke an̄wa okụre, ndien emi ekeme nditi mbon oro ẹdide eke akwa otuowo mban̄a ewe ifetutom?

⁶ Nte nnyịn isan̄ade ikanade an̄wa okụre, nnyịn imokụt ubet udia 30 ẹmi mme owo ẹtiede ẹta mme uwa unyịmesịt mmọ. (Ezekiel 40:17) Mfịn, mbon oro ẹbuanade ke otu mme erọn̄ en̄wen iwaha mme uwa unam, edi mmọ isan̄ake ubọk ubọk idi ke temple eke spirit. (Men Exodus 23:15 domo.) Apostle Paul ekewet ete: “Yak nnyịn iwa uwa ekọm inọ Abasi kpukpru ini ke enyịn̄ Jesus, kpa mfri n̄kpọk-inua eke ẹkponode enyịn̄ Esie. Ẹkûfre ndinam eti n̄kpọ ndinyụn̄ mfọn ido ye owo; koro orụk uwa emi enemde Abasi esịt.” (Mme Hebrew 13:15, 16; Hosea 14:2) Edi akwa ifet ndiwa orụk uwa oro nnọ Jehovah.—Mme N̄ke 3:9, 27.

7. Ndidomo temple oro ọnọ nnyịn nsọn̄ọ aban̄a nso?

⁷ Ezekiel aka iso ese nte angel odomode temple eke n̄kukụt emi. (Ezekiel 40:3) Ukem ntre, ẹma ẹdọhọ apostle John ẹte: “Kodomo temple Abasi, ye itie-uwa, ye mmọ ẹmi ẹtuakde ibuot ẹnọ Abasi ke esịt.” (Ediyarade 11:1) Nso ke edidomo emi ọwọrọ? Ke idaha mbiba ẹmi, enye nte an̄wan̄ade anam n̄kpọ nte ubiọn̄, idiọn̄ọ nte ke n̄kpọ ndomokiet ikemeke ndikpan Jehovah ndinam mme uduak esie ẹban̄ade edisana utuakibuot. Kpasụk ntre mfịn, nnyịn imekeme ndinyene mbuọtidem nte ke n̄kpọ ndomokiet—ọkpọkọm ikan̄îkan̄ ukọbọ otode mme okopodudu ukara—ikemeke ndikpan edifiak n̄wụk edisana utuakibuot.

8. Mmanie ẹdụk mme inuaotop ẹkesịm esịt okụre, ndien mme inuaotop ẹmi ẹti nnyịn ẹban̄a nso?

⁸ Nte nnyịn isan̄ade ibe ke an̄wa okụre, nnyịn imokụt nte ke inuaotop ita ẹdu ẹdade ẹsịm esịt okụre; mme inuaotop esịt okụre ẹsak iso ẹse eke an̄wa okụre ẹnyụn̄ ẹnyene ukem udomo. (Ezekiel 40:6, 20, 23, 24, 27) Mme oku kpọt ẹkeme ndidụk esịt okụre. Mme inuaotop esịt okụre ẹti nnyịn ẹte ke ana mbon oro ẹyetde aran ẹda ekekem ye mme idaha ye ibet Abasi, edi kpa ukem mme idaha ye ibet oro ẹkara kpukpru ata Christian. Edi nso idi utom mme oku, ọwọrọde nso mfịn?

Mme Anam-Akpanikọ Oku

9, 10. Didie ke “mme oku edidem,” ẹmi otu oku akadade aban̄a ke n̄kukụt Ezekiel, ẹnọ ukpep ke n̄kan̄ eke spirit?

⁹ Mbemiso eyo mme Christian, mme oku ẹma ẹnam ọkpọsọn̄ utom ke temple. Ndiwot mme unam uwa, ndiwa mmọ ke itieuwa, ye ndimen nsan̄a nnọ mme ekemmọ oku ye mme owo ekedi ọkpọsọn̄ utom. Edi mmọ ẹma ẹnyene akpan utom en̄wen. Jehovah okowụk kaban̄a mme oku ete: “Yak mmọ ẹnyụn̄ ẹtịm ẹsian ikọt mi n̄kpọ Abasi ye n̄kpọ owo, ẹnyụn̄ ẹteme mmọ ẹdiọn̄ọ se idehede dehe, ye se isanade sana.”—Ezekiel 44:23; Malachi 2:7.

¹⁰ Nte afo omowụt esịtekọm aban̄a ọkpọsọn̄ utom ye utom nsụhọdeidem oro otu “mme oku edidem,” ẹnamde ke ntak edisana utuakibuot? (1 Peter 2:9) Ukem nte mme oku Levi eset oro, mmọ ẹda usụn̄ ke ndinọ ukpep eke spirit, ẹn̄wamde mme owo ndifiọk se idide edisana inyụn̄ idide se Abasi enyịmede ye se mîdịghe. (Matthew 24:45) Utọ ukpep oro, otode mme n̄wed ẹkọn̄ọde ke Bible onyụn̄ otode mme mbono esop Christian ye ikpọ mbono, an̄wam ediwak miliọn owo nditie ke emem ye Abasi.—2 Corinth 5:20.

11. (a) Didie ke n̄kukụt Ezekiel okodori nsọn̄uyo ke nte edinịm idem asana edide akpan n̄kpọ ọnọ mme oku? (b) Ke ukperedem ini, didie ke ẹnam mbon oro ẹyetde aran ẹsana ke usụn̄ eke spirit?

¹¹ Nte ededi, ana mme oku ẹnam se ikande edikpep mbon en̄wen ndisana; ana mmọ ke idemmọ ẹsana. Ntem, Ezekiel ama ebem iso okụt ndutịm edinam mme oku Israel ẹsana. (Ezekiel 44:10-16) Ukem ntre, mbụk owụt ete ke 1918, Jehovah ama etie ‘nte andinam asana’ ke temple esie eke spirit, odụn̄ọrede otu oku oro ẹyetde aran. (Malachi 3:1-5) Ẹma ẹyak mbon oro ẹkụtde ke ẹsana ke n̄kan̄ eke spirit m̀mê mbon oro ẹkekabarede esịt ẹkpọn̄ akani ukpono ndem ẹka iso ke ifetutom mmọ ke temple eke spirit. Edi, ukem nte owo efen ekededi, owo kiet kiet ke otu mbon oro ẹyetde aran ekeme ndidehe—ke n̄kan̄ eke spirit m̀mê ke n̄kan̄ ido uwem. (Ezekiel 44:22, 25-27) Mmọ ẹkenyene ndinam utom ọkpọsọn̄ ndikpeme idem ke “idiọk-n̄kpọ emi odude ke ererimbot.”—James 1:27; men Mark 7:20-23 domo.

12. Ntak emi nnyịn ikpowụtde esịtekọm iban̄a utom mbon oro ẹyetde aran?

¹² Nnyịn owo kiet kiet imekeme ndibụp, ‘Ndi ami mmowụt esịtekọm ke uwụtn̄kpọ oro mbon oro ẹyetde aran ẹnịmde ke ediwak isua utom mmọ eke edinam akpanikọ? Ndi ami mmekpebe mbuọtidem mmọ?’ Ọfọn mbon oro ẹdide eke akwa otuowo ẹti ẹte ke mbon oro ẹyetde aran ididụhe ye mmọ mi ke isọn̄ kpukpru ini. Kaban̄a mme oku oro ke n̄kukụt Ezekiel, Jehovah ọkọdọhọ ete: “Mbufo ẹkûnọ mmọ [isọn̄] ẹnyene ke Israel: ami ndi se mmọ ẹdidade ẹnyene.” (Ezekiel 44:28) Ukem ntre, mbon oro ẹyetde aran inyeneke nsinsi itie ke isọn̄. Mmọ ẹnyene inyene eke heaven, ndien mbon oro ẹdide eke akwa otuowo ẹda nte ke edi ifet ndinọ mmọ ibetedem nnyụn̄ nsịn udọn̄ nnọ mmọ ke adan̄aemi mmọ ẹsụk ẹdude mi ke isọn̄.—Matthew 25:34-40; 1 Peter 1:3, 4.

Ọbọn̄—Anie ke Enye Edi?

13, 14. (a) Ntak emi anade ọbọn̄ edi owo otode otu mme erọn̄ en̄wen? (b) Anie ke ọbọn̄ ada aban̄a?

¹³ Idahaemi mbụme oro aduaide owo idem edemede. Anie, ndien, ke ọbọn̄ ada aban̄a? Sia ẹtịn̄de ẹban̄a enye nte owo kiet ye nte otu, nnyịn imekeme ndibiere nte ke enye ada aban̄a otu irenowo. (Ezekiel 44:3; 45:8, 9) Edi mmanie? Ke akpanikọ idịghe mbon oro ẹyetde aran. Ke n̄kukụt oro, enye anam utom ọtọkiet ye mme oku, edi enye idịghe kiet ke otu mmọ. Ke mîbietke otu oku, ẹnọ enye isọn̄ ada enyene ndien ke ntre enyene ini iso mi ke isọn̄, idịghe ke heaven. (Ezekiel 48:21) Ke adianade do, Ezekiel 46:10 ọdọhọ ete: “Yak ọbọn̄ odu ke otu mmọ; ke ini mmọ [mme esien oro mîdịghe eke oku] ẹdụkde [an̄wa okụre temple], yak enye odụk: ndien ke ini mmọ ẹwọn̄ọde, yak mmọ ẹwọn̄ọ (ọtọ kiet).” Enye idụkke esịt okụre edi atuak ibuot ke an̄wa okụre, asan̄ade ye mme owo odụk onyụn̄ ọwọrọ ke temple. Mme n̄kpọ ẹmi ẹbiere nte ke ọbọn̄ emi esịne ke akwa otuowo eke mme erọn̄ en̄wen.

¹⁴ Nte an̄wan̄ade, ọbọn̄ emi enyene ndusụk mbiomo ke otu ikọt Abasi. Ke an̄wa okụre, enye etie ke etehe Inuaotop Edem Usiahautịn. (Ezekiel 44:2, 3) Emi ediwụt itie edise enyịn, ukem nte eke nyobiowo Israel ẹmi ẹketiede ke inuaotop obio ẹbiere ikpe. (Ruth 4:1-12; Mme N̄ke 22:22) Mmanie ke otu mme erọn̄ en̄wen ẹkama ifet edise enyịn mfịn? Mbiowo ẹmi ẹnyenede idotenyịn eke isọn̄ ẹmi ẹmekde ke edisana spirit. (Utom 20:28) Ntre ke ẹtịm otu mbọn̄ idem idahaemi ẹnọ idotenyịn ndinam utom ke ukperedem ke ifet edise enyịn ke obufa ererimbot.

15. (a) Didie ke n̄kukụt Ezekiel esịn un̄wana ke itie ebuana ke ufọt mbiowo ẹmi ẹdide eke akwa otuowo ye otu oku oro ẹyetde aran? (b) Nso ndausụn̄ ke mbiowo oro ẹyetde aran ẹnọ ke esop Abasi eke isọn̄?

¹⁵ Nte ededi, nso idi itie ebuana mfịn ke ufọt otu mme oku oro ẹyetde aran ye utọ nyobiowo oro, ẹmi nte ubak akwa otuowo, ẹnamde utom idahaemi ke mme ifet edise enyịn? N̄kukụt Ezekiel ọnọ ekikere ete ke mbiowo ẹmi oro ẹdide mme andibuana ke akwa otuowo ẹnyene utom edinọ ibetedem ye eke nsụkibuot, ke adan̄aemi mbon oro ẹyetde aran ẹdade usụn̄ ke n̄kan̄ eke spirit. Didie ke edi ntre? Ti, ẹkenọ mme oku ke n̄kukụt oro mbiomo edinọ mme owo ukpep ke mme n̄kpọ eke spirit. Ẹkedọhọ mmọ n̄ko ẹte ẹnam utom nte mme ebiereikpe. Adianade do, ẹkenọ mme Levi “ẹnam utom ukpeme” ke mme inuaotop temple. (Ezekiel 44:11, 23, 24) Nte an̄wan̄ade, ọbọn̄ ekenyene ndinyịme mme utom ye ndausụn̄ mme oku. Do, odot nte mbon oro ẹyetde aran ẹda iso ke edisana utuakibuot ke eyomfịn. Ke uwụtn̄kpọ, ẹmek mme andibuana ke Otu Ukara eke Mme Ntiense Jehovah ẹsion̄o ke otu mmọ. Utọ mme anam-akpanikọ mbiowo oro ẹnọ otu mbọn̄ oro ẹwọn̄ọde ẹdi ukpep ke ediwak iduọk isua, ẹtịmde mbon oro ẹdibuanade ke otu emi idem ẹben̄e usen emi ẹdiyakde ofụri odudu ẹnọ mmọ ke obufa ererimbot Abasi oro edide.

16. Nte ekemde ye Isaiah 32:1, 2, didie ke ana kpukpru mbiowo ẹnam n̄kpọ?

¹⁶ Nso orụk mme esenyịn ke mbon oro ẹdibuanade ke otu emi ẹdi, ẹmi ẹdude ke udịm ndibọ ikpọ mbiomo nte otu mbọn̄? Ntịn̄nnịm ikọ odude ke Isaiah 32:1, 2 ọdọhọ ete: “Sese, edidem kiet ayakama obio nte enende; ama edi mbọn̄, mmọ n̄ko ẹyeda ubọn̄ ke eti ido. Ndien owo kiet ayakabade ebiet ọtọ udịbe ofụm, ye etehe ubọhọ edịm; ebiet akpa mmọn̄ ke edisat isọn̄, ebiet mfụt akwa itiat ke isọn̄ n̄kpa-mba.” Ntịn̄nnịm ikọ emi ke osu mfịn, nte mbiowo Christian—mbon oro ẹyetde aran ye mme erọn̄ en̄wen—ẹnamde n̄kpọ ndikpeme otuerọn̄ mbiọn̄ọ mme utọ “edịm” nte ukọbọ ye unana nsịnudọn̄.

17. Didie ke mme Christian ekpemerọn̄ ẹkpese idemmọ, ndien didie ke otuerọn̄ ẹkpese mmọ?

¹⁷ Owo idaha ikọ oro “ọbọn̄” nte udorienyịn̄ ndida mmenede mme owo itie. Utu ke oro, enye etịn̄ aban̄a mbiomo oro ẹdoride enyịn irenowo ẹmi ndibiom ke ndise mban̄a erọn̄ Abasi. Jehovah ọnọ ọkpọsọn̄ ntọt ete: “Yak ekem ye mbufo, mbọn̄ Israel; mbufo ẹsion̄o n̄kanubọk ye utụk ẹfep, ẹnyụn̄ ẹkpe edinen ikpe.” (Ezekiel 45:9) Ọfọn kpukpru mbiowo mfịn ẹnam utọ item oro. (1 Peter 5:2, 3) Ke n̄kan̄ eken, otuerọn̄ ẹfiọk ẹte ke Jesus ọnọ mme ekpemerọn̄ ẹmi nte “mme enọ ke owo.” (Ephesus 4:8, NW) Ẹwụt se inamde mmọ ẹdot ke Ikọ Abasi eke odudu spirit. (1 Timothy 3:1-7; Titus 1:5-9) Ke ntre mme Christian ẹtiene ndausụn̄ mbiowo.—Mme Hebrew 13:7.

18. Nso idi ndusụk utom oro otu mbọn̄ eke ini iso ẹnamde idahaemi, ndien nso ididi utom mmọ ke ini iso?

¹⁸ Ke mme ini Bible ndusụk mbọn̄ ẹma ẹnyene ekese odudu, mbon eken esisịt. Mfịn, mbiowo oro ẹdide eke akwa otuowo ẹnyene ntatara nsio nsio mbiomo. Ndusụk ẹnam utom ke esop kiet; mbon en̄wen ẹsika ẹkese ediwak esop nte mme esenyịn oro ẹsan̄ade-san̄a; mbon en̄wen ẹse ẹban̄a ofụri idụt nte mme andibuana ke Kọmiti N̄kọk Itieutom; mbon en̄wen ẹn̄wam nsio nsio kọmiti Otu Ukara nnennen nnennen. Ke obufa ererimbot, Jesus eyemek “mbọn̄ ke ofụri ererimbot” man ẹda usụn̄ ke otu mme andituak ibuot nnọ Jehovah ke isọn̄. (Psalm 45:16) Nte eyịghe mîdụhe enye edimek ediwak ke otu ẹmi osion̄o ke otu mme anam-akpanikọ mbiowo mfịn. Sia irenowo ẹmi ẹwụtde idahaemi ke mmimọ imodot, enye eyemek ndinọ ediwak mmọ ifetutom oro ẹkam ẹkponide ẹkan ke ini iso ke ini enye ediyarade utom otu mbọn̄ ẹmi ke obufa ererimbot.

Isọn̄ Ikọt Abasi Mfịn

19. Nso ke isọn̄ eke n̄kukụt Ezekiel ada aban̄a?

¹⁹ N̄kukụt Ezekiel n̄ko owụt isọn̄ Israel oro ẹfiakde ẹwụk. Nso ke ikpehe n̄kukụt enye emi ada aban̄a? Mme ntịn̄nnịm ikọ edifiak n̄wụk eken ẹma ẹbem iso ẹtịn̄ ẹte ke isọn̄ oro, Israel, edidi paradise ukem nte Eden. (Ezekiel 36:34, 35) Mfịn, nnyịn imenyene “isọn̄” emi ẹfiakde ẹwụk, ndien enye edi Eden ke usụn̄ifiọk kiet. Ke ukem usụn̄ oro, nnyịn imesiwak nditịn̄ mban̄a paradise eke spirit nnyịn. Enyọn̄-Ukpeme ama akabade “isọn̄” nnyịn nte “ikpehe edinam” eke ndimek ikọt Abasi.b Ke ebiet ekededi oro asan̄autom Jehovah okpodude, enye odu ke isọn̄ oro ẹfiakde ẹwụk adan̄a nte enye odomode ndimụm utuakibuot akpanikọ n̄kama ebe ke ndisan̄a ke nde-ikpat Christ Jesus.—1 Peter 2:21.

20. Nso edumbet ke nnyịn ikeme ndikpep nto “edisana udeme” ke n̄kukụt Ezekiel, ndien didie ke nnyịn ikeme ndida edumbet emi nsịn ke edinam?

²⁰ Nso kaban̄a ikpehe isọn̄ oro ẹkotde “edisana udeme”? Emi ekedi se mme owo ẹketịpde man ẹda ẹn̄wam mme oku ye obio. Ukem ntre, akana “ofụri mbio-obio” ẹtịp ubak isọn̄ ẹnọ ọbọn̄. Nso ke emi ọwọrọ mfịn? Nte ededi, iwọrọke ite ke ana ẹda otu mme ọkwọrọ ederi ẹmi ẹsibọde okụk ọfiọn̄ ẹfịk ikọt Abasi. (2 Thessalonica 3:8) Utu ke oro, ibetedem oro ẹnọde mbiowo mfịn enen̄ede edi eke spirit. Enye esịne edin̄wam ke utom oro ẹsụk ẹnamde ke ubọk ye ediwụt edu edidianakiet ye nsụkibuot. Edi, nte ekedide ke eyo Ezekiel, “ẹnọ Jehovah” etịbe emi, idịghe owo ekededi. (Sịghisịghi ubọkn̄wed edi eke nnyịn.)—Ezekiel 45:1, 7, 16.

21. Nso ke nnyịn ikeme ndikpep nto edibahade isọn̄ oro ke n̄kukụt Ezekiel?

²¹ Idịghe ọbọn̄ ye mme oku kpọt ke ẹnọ itie ke isọn̄ oro ẹfiakde ẹwụk. Edideme isọn̄ oro owụt ete ke owo kiet kiet ke esien 12 enyene ata udeme esie. (Ezekiel 47:13, 22, 23) Ntre mme andibuana ke akwa otuowo inyeneke itie ke paradise eke spirit mfịn kpọt edi ẹyebọ udeme isọn̄ n̄ko ke ini mmọ ẹnyenede itie ke ikpehe Obio Ubọn̄ Abasi eke isọn̄.

22. (a) Obio oro ke n̄kukụt Ezekiel ada aban̄a nso? (b) Nso ke nnyịn ikeme ndikpep nto obio oro ndinyene inuaotop ke kpukpru n̄kan̄?

²² Ke akpatre, nso ke obio eke n̄kukụt oro ada aban̄a? Enye idịghe obio eke heaven, koro enye odude ke ufọt isọn̄ oro edide “n̄kpọ kpukpru owo” (oro mîkedịghe edisana). (Ezekiel 48:15-17) Ntre ana enye edi n̄kpọ isọn̄. Ọfọn, nso idi obio? Nte enye inọhọ ekikere iban̄a mme owo ẹmi ẹsopde idem ọtọkiet nte otu ẹnyụn̄ ẹnamde ndutịm ye esop? Ih. Ntem, etie nte obio oro ada aban̄a ndutịm eke isọn̄ oro edinyenede ufọn ọnọ kpukpru mbon oro ẹdimade edinen n̄kaowo eke isọn̄. Enye edinam n̄kpọ ọyọhọ ọyọhọ ke “obufa isọn̄” oro edide. (2 Peter 3:13) Mme inuaotop obio ndidu ke kpukpru edem, kiet enyenede esien kiet kiet, enen̄ede anam an̄wan̄a nte ke obio ana in̄wan̄. Mfịn, ikọt Abasi idụhe ke idak ndedịbe ndutịm. Ana nditọete irenowo ẹmi ẹkamade utom ẹdi se ẹkemede ndisan̄a n̄kpere; kpukpru owo ẹtịm ẹfiọk mme edumbet oro ẹdade mmọ usụn̄. Akpanikọ oro nte ke mme owo ẹtode kpukpru esien ẹtọ in̄wan̄ ke isọn̄ oro ẹdade ẹn̄wam obio oro eti nnyịn ete ke mme erọn̄ en̄wen ẹn̄wam mme ndutịm oro ẹnamde ẹnọ ikọt Abasi ke ofụri ererimbot, idem ke mme n̄kpọ eke obụk.—Ezekiel 48:19, 30-34.

23. Nso ke nnyịn idineme ke ibuotikọ oro etienede?

²³ Nte ededi, nso kaban̄a akpa oro ọfiọrọde oto edisana ebiet temple? Se oro adade aban̄a mfịn ye ke ini iso edidi ibuot nneme ọyọhọ ita ye akpatre ibuotikọ ke udịm ibuotikọ ẹmi.

[Mme Ikọ idakisọn̄]

Mme Akpan N̄kpọ Ndida Nnam Ndụn̄ọde

◻ Nso ke temple oro ke n̄kukụt Ezekiel ada aban̄a?

◻ Mmanie ke mme oku ẹmi ẹnamde utom ke temple ẹda ẹban̄a?

◻ Nso idi otu mbọn̄, ndien nso idi ndusụk utom esie?

◻ Nso idi isọn̄ ke n̄kukụt Ezekiel, ndien ke nso usụn̄ ke ẹbahade enye ẹnọ esien 12?

◻ Nso ke obio ada aban̄a?

[Ndise/Ndise obio ke page 15]

(Ama oyom ndikụt nte enye enen̄erede etie, se n̄wed)

Udeme isọn̄ nte ẹwụtde ke n̄kukụt Ezekiel

ESIEN DUOPEBA

Akwa Inyan̄

Inyan̄ Galilee

Akpa Jordan

Inyan̄ Inụn̄

DAN

ASHER

NAPHTALI

MANASSEH

EPHRAIM

REUBEN

JUDAH

ỌBỌN̄

BENJAMIN

SIMEON

ISSACHAR

ZEBULUN

GAD

[Ndise]

NDITAT EDISANA UDEME

A. “Jehovah Odu Do” (Jehovah- Shammah); B. eti isọn̄ obio

Udeme Mme Levite

Edisana Ebiet Jehovah

Udeme Mme Oku

B A B