12. (a) Nso ke Daniel akanam ndondo oro enye okopde aban̄a obufa ibet oro? (b) Mmanie ẹkese Daniel, ndien ntak-a?

¹² Ikebịghike Daniel ama ọdiọn̄ọ aban̄a ibet oro akpande edibọn̄ akam. Inikiet inikiet, enye ama odụk ufọk esie onyụn̄ aka ke ubet enyọn̄ esie, ke ebiet emi window akanade in̄wan̄ owụt n̄kan̄ Jerusalem.b Do Daniel ama ọtọn̄ọ ndibọn̄ akam nnọ Abasi “nte enye akam esinamde.” Ekeme ndidi Daniel ama ekere ke imọ ikodu ikpọn̄, edi mbon odu oro ke ẹkese enye. Inikiet inikiet, mmọ ẹma “ẹsop idem,” nte eyịghe mîdụhe ye ukem nduaidem oro mmọ ẹkenyenede ke ini ẹkekade ẹbịne Darius. Idahaemi mmọ ẹma ẹda enyịn mmọ ẹkụt—Daniel ama “anam n̄kpeubọk ke iso Abasi esie.” (Daniel 6:10, 11) Ikpọ owo ye mbọn̄ ẹma ẹnyene kpukpru uyarade oro mmọ ẹkeyomde ndidori Daniel ikọ ke iso edidem.