Mme Mbụme Ẹtode Mme Andikot

Nnyịn ima idara ndikpep mme prọfesi Daniel nte ẹkenemede ke “Enyọn̄-Ukpeme.” Ntak, ndien, emi usenọfiọn̄ eke mme ini ita ye ubak ke Ediyarade 11:3 okpụhọde ye eke n̄wed “Ata-Utịt Ediyarade”?

Ih, Enyọn̄-Ukpeme eke November 1, 1993, ama owụt ekpri edinen̄ede kaban̄a usenọfiọn̄ oro Ediyarade 11:3 osude ke eyomfịn. Ntak-⁠a?

Ẹyak nnyịn ibemiso ise Ediyarade 11:2, emi utịt utịt oro asiakde “ọfiọn̄ aba ye iba.” Nnyịn ikaiso ke Edi 11 ufan̄ikọ 3: “Nyenyụn̄ mmen odudu nnọ ntiense Mi iba, ndien mmọ ẹyesịne ọfọn̄ikpo ẹtịn̄ nte prọfet ke tọsịn usen kiet ye usen ikie iba ye ata.” Ini ewe ke oro akada itie?

Ọfọn, Mme Ntiense Jehovah ke anyanini ẹma ẹfiọk ẹte ke prọfesi emi okosu ke idem mme Christian oro ẹyetde aran ke spirit ke utịt “ini mme Gentile” ke 1914 ebede. (Luke 21:24; 2 Corinth 1:​21, 22) Ke etịn̄de aban̄a emi, Ediyarade​—⁠Ubọn̄ Ubọn̄ Ata-Utịt Esie Emekpere!a (1991) ọdọhọ ke page 164 ete: “Ikpehe ini eke isua ita ye ubak oro ẹkenịmde idiọn̄ọ ama odu ke ini n̄kpọsọn̄ ufen eke ikọt Abasi ekedide ukem ye mme n̄kpọntịbe ẹketịn̄de prọfesi ẹban̄a mi​—⁠ọtọn̄ọde ke ini akpa ekọn̄ ererimbot akasiahade ke utịt utịt isua 1914 onyụn̄ akaiso tutu ke ntọn̄ọ ntọn̄ọ isua 1918.”

Tịmfiọk ete ke usenọfiọn̄ oro ẹwụtde ekedi “ini akpa ekọn̄ ererimbot akasiahade ke utịt utịt isua 1914 [tutu osịm] ntọn̄ọ ntọn̄ọ isua 1918.” Emi ekem ye usenọfiọn̄ oro ẹsiwakde ndinọ, utọ nte ke “Then Is Finished the Mystery of God,” page 261-⁠264, (1969).b

Nte ededi, Enyọn̄-Ukpeme ọkọkọn̄ọ ke mme prọfesi ke Daniel, kpa n̄wed oro utịm ikaba asiakde ikpehe ini oro edide ukem ye enyeoro ẹkesiakde ke ukperedem ke Ediyarade​—⁠isua 3 1/2, m̀mê ọfiọn̄ 42. Ke nditịn̄ nnennen nnennen, Daniel 7:25 ọdọhọ ete ke ẹyekọbọ edisana ikọt Abasi “ke ini ye ke ini iba ye ubak ini,” m̀mê ini 3 1/2. Ke ukperedem, Daniel 12:7 ebemiso etịn̄ aban̄a “ini, ye ini iba, ye ubak ini,” m̀mê ini 3 1/2, emi edisịmde utịt ke ‘edisuan odudu edisana mbio mma.’

Ntre nnyịn inyene mme prọfesi oro ẹtịn̄de n̄kpọ ẹban̄a ikpehe ini oro edide ukem ke Daniel 7:25, Daniel 12:7, ye Ediyarade 11:​2, 3, ọkọrọ ye ke Ediyarade 13:⁠5. Mme n̄wed nnyịn ẹwụt ke kpukpru ẹmi ẹkesu ke ikpehe ini 1914-1918. Edi ke ẹnemede ẹban̄a mme prọfesi ẹmi kiet kiet san̄asan̄a, mme usenọfiọn̄ ntọn̄ọ ye utịt ẹsikpụhọde esisịt.

Nte ededi, Enyọn̄-Ukpeme eke November 1, 1993, ama obụp ete: “Didie ke kpukpru mme prọfesi ẹmi ẹbietde kiet eken mi ẹkesu?” Ih, ẹkediọn̄ọ mme prọfesi eke ini 3 1/2 ẹsiakde ke Daniel 7:25, Daniel 12:7, ye Ediyarade 11:3 nte “mme prọfesi ẹmi ẹbietde kiet eken.” Ntem, mmọ ẹyekem kaban̄a ntọn̄ọ ye utịt mmọ.

Kaban̄a utịt, magazine emi ama owụt nte edikọbọ ikọt Abasi emi ẹyetde aran (Daniel 7:25) okosịmde utịt ke June 1918 ke ini ‘ẹkebierede n̄kpọkọbi uwak isua ke ntak nsunsu edori ikọ’ ẹnọ J. F. Rutherford ye mme akama utom Watch Tower Bible and Tract Society eken. N̄kpọntịbe oro ke akpanikọ ekedi ‘edisuan odudu edisana mbio mma,’ nte ẹketịn̄de ke Daniel 12:⁠7.

Ke itọn̄ọde ke June 1918 ibat ifiak edem eyeda nnyịn edisịm December 1914 nte ntọn̄ọ ini 3 1/2. Ke utịt utịt ọfiọn̄ 1914 oro, ikọt Abasi oro ẹyetde aran ke isọn̄ ẹma ẹdiọn̄ọ ibuotikọ n̄wed Abasi eke isua emi ekedide: “‘Nte mbufo ẹmekeme ndin̄wọn̄ cup Mi?’​—⁠Matthew 20:​20-⁠23.” Ibuotikọ oro ọkọtọtde enye ama ọtọt ete: “Anie ọdiọn̄ọ m̀mê ndusụk san̄asan̄a idomo ẹyedu, cup ndutụhọ m̀mê eke esuene, ọnọ mme anam akpanikọ anditiene Eyenerọn̄ ke 1915!” Nte Daniel 7:25 ekebemde iso etịn̄ aban̄a ikpehe ini 3 1/2 emi, ‘ẹma ẹsobo edisana ikọt Ata Edikon̄.’ Mme idụt ke ẹkebuana ke Ekọn̄ Ererimbot I, anamde edi mmemmem ọnọ mmọ ndikọbọ nte mîdotke. Ubiere edi: Kpukpru prọfesi mbita ẹmi ẹbietde kiet eken​—⁠Daniel 7:25, 12:7, ye Ediyarade 11:3⁠—​ẹkesu ke isua 3 1/2, m̀mê ọfiọn̄ 42, ọtọn̄ọde ke December 1914 osịm June 1918.

Emi anam esisịt edinen̄ede ke usenọfiọn̄ oro Ediyarade 11:3 osude an̄wan̄a. Edinen̄ede emi edi n̄kpọ emi nnyịn ikemede ndinyene ke ekikere nte ikpepde inyụn̄ idade n̄wed Ata-Utịt Ediyarade inam n̄kpọ ke ini iso.

[Mme Ikọ idakisọn̄]