Bible etịn̄ ediwak n̄kpọ aban̄a Obio Ubọn̄ Abasi. Obio Ubọn̄ oro ke Jehovah Abasi edida inam n̄kpọ ọfọn ama ke isọn̄ emi nte enye okoyomde. Nso idi Obio Ubọn̄ Abasi? Inam didie idiọn̄ọ ke Obio Ubọn̄ oro ama ọtọn̄ọ? Nso ke enye anam? Nso ke enye edinam ke ini iso? Ke ukpepn̄kpọ emi ye ukpepn̄kpọ iba oro etienede, iyokụt ibọrọ ofụri mbụme oro.

1. Nso idi Obio Ubọn̄ Abasi, ndien anie idi Edidem esie?

Obio Ubọn̄ Abasi edi ukara emi Jehovah Abasi ọkọtọn̄ọde. Jesus Christ edi Edidem esie; enye etie ke heaven akara. (Matthew 4:17; John 18:36) Bible ọdọhọ ke Jesus “ayakara . . . nte Edidem ke nsinsi.” (Luke 1:32, 33) Jesus edikara kpukpru owo ke isọn̄ sia enye edi Edidem Obio Ubọn̄ Abasi.

2. Jesus akara ye mmanie?

Jesus ikarake ikpọn̄. Mme owo emi ẹtode “kpukpru esien ye usem ye obio ye idụt . . . ẹyekara isọn̄ nte ndidem.” (Ediyarade 5:9, 10) Owo ifan̄ iditiene Christ ikara? Ediwak miliọn owo ẹkabade ẹdi mme Christian tọn̄ọ Jesus ekedi isọn̄. Edi owo 144,000 kpọt ke otu mmọ ẹdika heaven iketiene Jesus ikara. (Kot Ediyarade 14:1-4.) Kpukpru mme Christian eken ẹdidu uwem mi ke isọn̄, ukara Abasi ama edisịm ofụri isọn̄.​—Psalm 37:29.

3. Nso ye nso inam ukara Abasi ọfọn akan ukara owo?

Ediwak owo emi ẹmade nti n̄kpọ isikemeke inam nti n̄kpọ emi mmọ ẹyomde mmọ ẹma ẹda ukara. Ndusụk ini mbon emi ẹsibọde mmọ ukara nte ini akade ẹsiyom ufọn eke idemmọ kpọt. Edi idụhe owo emi edibọde Jesus ukara. “Obio ubọn̄ eke owo mîdisoboke ifep tutu amama” ke Abasi ọnọ enye akara. (Daniel 2:44) Jesus edikara ofụri isọn̄; enye idinyụn̄ inamke asari. Enye enen̄ede ama mme owo onyụn̄ ọfọn ido; enye isinyụn̄ ikpehe ukwan̄ikpe. Enye eyekpep kpukpru owo ndida owo nte owo​—mma mme owo, mfọn ido, nnyụn̄ ntre asari.​—Kot Isaiah 11:9.

4. Ukara Abasi eyedisịm ofụri isọn̄

Jesus Christ enyene odudu akan kpukpru mme andikara. Kot Matthew 28:18, ekem ẹbọrọ mbụme emi ẹnyụn̄ ẹneme ẹban̄a enye:

• Nso inam odudu Jesus okpụhọde ye odudu mme andikara mi ke isọn̄?

Ẹsima ndikpụhọ ukara owo, ndien ediwak mmọ ẹsinyụn̄ ẹkara ndusụk itie kpọt ke isọn̄. Nso kaban̄a ukara Obio Ubọn̄ Abasi? Kot Daniel 7:14, ekem ẹbọrọ mbụme emi ẹnyụn̄ ẹneme ẹban̄a mmọ:

• Nso inam enem fi ndidiọn̄ọ ke tutu amama n̄kpọ ndomokiet idinamke ukara Abasi?

• Nso inam enem fi ndidiọn̄ọ ke ukara Abasi eyedisịm ofụri isọn̄?

5. Ntak emi anade ẹtre ukara owo

Ntak emi ọfọnde Obio Ubọn̄ Abasi edida itie ukara owo? Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.

VIDIO: Nso Idi Obio Ubọn̄ Abasi?​—Ekpri Esie (1:41)

• N̄kpọ etie didie tọn̄ọ mme owo ẹketọn̄ọ ndikara?

Kot Ecclesiastes 8:9, ekem ẹbọrọ mbụme emi ẹnyụn̄ ẹneme ẹban̄a mmọ:

• Ndi emekere ke ọfọn ukara Abasi edida itie ukara owo? Nso inam ọdọhọ ntre?

6. Mbon emi ẹkarade Obio Ubọn̄ Abasi ẹnen̄ede ẹdiọn̄ọ nte n̄kpọ etiede ye nnyịn

Jesus edi Edidem nnyịn; enye ekeme “nditua nnyịn mbọm ke mmemidem nnyịn” sia enye ama odu mi ke isọn̄. (Mme Hebrew 4:15) Jehovah emek owo 144,000, iren ye iban, “osion̄o ke kpukpru esien ye usem ye obio ye idụt” ete ẹditiene Jesus ẹkara.​—Ediyarade 5:9.

• Ndi enem fi ndidiọn̄ọ ke Jesus ye kpukpru mbon emi ẹditienede enye ikara ẹnen̄ede ẹdiọn̄ọ nte n̄kpọ etiede ye nnyịn? Nso inam ọdọhọ ntre?

7. Ibet Obio Ubọn̄ Abasi enen̄ede ọfọn akan ibet ukara owo

Ukara ẹsibọp ibet emi mmọ ẹkerede ke ọyọfọn ye mbon emi mmọ ẹkarade onyụn̄ an̄wam mmọ. Obio Ubọn̄ Abasi onyụn̄ enyene ibet emi anade mbon emi ẹsụkde ibuot ẹnọ ukara Abasi ẹtiene. Kot 1 Corinth 6:9-11, ekem ẹbọrọ mbụme emi ẹnyụn̄ ẹneme ẹban̄a mmọ:

• Ekere ke ererimbot editie didie ini kpukpru owo ẹdisinamde se Abasi ọdọhọde?a

• Ndi emekere ke Jehovah odot ndinịm ibet nnọ mbon oro ẹdude ke ukara esie? Nso inam ọdọhọ ntre?

• Nso iwụt ke owo emi mîsinịmke ibet Abasi ekeme ndikpụhọde?​—Se ufan̄ikọ 11.

SE IKPEPDE

Ukara Abasi ke heaven ke ẹkot Obio Ubọn̄ Abasi; ukara oro eyedisịm isọn̄ emi.

Se M̀mê Emeti

• Mmanie ikara Obio Ubọn̄ Abasi?

• Nso ye nso inam ukara Abasi ọfọn akan kpukpru ukara owo?

• Nso ye nso ke Jehovah oyom mbon emi ẹdude ke ukara esie ẹnam?

KPEP N̄KPỌ EN̄WEN

Se se Jesus eketịn̄de aban̄a ebiet emi Obio Ubọn̄ Abasi odude.

“Ndi Obio Ubọn̄ Abasi Odu Owo ke Esịt?” (Odu ke jw.org)

Nso inam Mme Ntiense Jehovah ẹma ndisụk ibuot nnọ ukara Abasi ẹkan ndisụk ibuot nnọ ukara owo?

Mmọ Ẹda Ẹnọ Obio Ubọn̄ Abasi (1:43)

Se se Bible etịn̄de aban̄a owo 144,000, emi Jehovah emekde ete ẹditiene Jesus ẹkara.

“Mmanie Ẹdika Heaven?” (Odu ke jw.org)

Nso ikanam n̄wan kiet ke ufọk-n̄kpọkọbi okụt ke Abasi kpọt edinam ufịk etre ererimbot?

“Nte N̄kasan̄ade Ndiọn̄ọ Se Idinamde Ufịk Etre” (g-E 11/11)

Ukara Abasi ama ọtọtọn̄ọ ke heaven. Ibịghike ukara oro eyedi edinam n̄kpọ ọfọn ke isọn̄. Yak ineme ndusụk nti n̄kpọ emi editịbede ke Obio Ubọn̄ Abasi.

1. Nso idinam ufịk etre inyụn̄ inam emem odu ke isọn̄ ke Obio Ubọn̄ Abasi?

Jesus edi Edidem Obio Ubọn̄ Abasi; enye oyosobo kpukpru ndiọi owo ye ukara owo ke ini ekọn̄ Armageddon. (Ediyarade 16:14, 16) Ini oro ke itie Bible emi ọdọhọde ke “ayak esisịt, idiọkowo ididụhe aba” edisu ke kpukpru itie. (Psalm 37:10) Ke ukara Abasi, Jesus ayanam n̄kpọ man okụt ete ke ufịk etre, ke emem onyụn̄ odu ke ofụri isọn̄.​—Kot Isaiah 11:4.

2. N̄kpọ editie didie ẹma ẹnam uduak Abasi ke ofụri isọn̄?

“Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi” ukara Abasi ama edi edisịm isọn̄. (Psalm 37:29) Kere nte uwem editiede ini kpukpru owo ke isọn̄ ẹdimade Jehovah, ẹma mbon en̄wen, ẹnyụn̄ ẹnam nti n̄kpọ kpukpru ini! Owo ididọn̄ọke aba; owo idikpaha aba.

3. Nso iditịbe ke Obio Ubọn̄ Abasi ẹma ẹsobo ndiọi owo ẹma?

Jesus ayakara isọn̄ ke isua 1,000 ẹma ẹsobo ndiọi owo ẹma. Enye ye owo 144,000 oro ẹditienede enye ikara ẹyeda ini oro ẹnam mme owo ẹfọn ẹma. Isua 1,000 oro etikụre, n̄kpọ ọyọfọn ama ke ofụri isọn̄​—mme owo ẹyekop ata inemesịt sia kpukpru owo ẹdidu uwem nte Jehovah ọdọhọde. Ini oro ndien ke Jesus edifiak ikpọn̄ ukara inọ Jehovah Ete esie. ‘Ẹyenam enyịn̄ Jehovah asana’ ke ofụri enyọn̄ ye isọn̄. (Matthew 6:9, 10) Etisịm ini oro, kpukpru owo ke enyọn̄ ye isọn̄ ẹyenen̄ede ẹkụt ke Jehovah edi eti Andikara oro amade mbon emi enye akarade. Jehovah Abasi oyosobo Satan ye mme demon esie, ye owo ekededi emi mîsụkke ibuot inọ ukara Abasi. (Ediyarade 20:7-10) Ukara Abasi ayanam n̄kpọ ọfọn ama ke nsinsi nsinsi.

SỊN IDEM KPEP

4. Ukara owo ididụhe ke Obio Ubọn̄ Abasi

‘Owo akara owo tutu ọnọ enye unan.’ (Ecclesiastes 8:9) Jehovah Abasi ayanam ufịk etre Obio Ubọn̄ esie ama edisịm ofụri isọn̄ emi.

Kot Daniel 2:44 ye 2 Thessalonica 1:6-8, ekem ẹbọrọ mbụme emi ẹnyụn̄ ẹneme ẹban̄a mmọ:

• Nso ke Jehovah ye Jesus Eyen esie ẹdinam ukara owo ye mbon emi ẹdade ẹnọ ukara owo?

• Nso ke afo ọdiọn̄ọ aban̄a Jehovah ye Jesus, emi anamde fi enịm ke se mmọ ẹdinamde eyenen onyụn̄ ọfọn?

5. Jesus odot ndikara

Jesus edi Edidem Obio Ubọn̄ Abasi. Enye ayanam ata ediwak nti n̄kpọ ọnọ mme owo mi ke isọn̄. Se VIDIO emi ke oyokụt nte Jesus okowụtde ke Abasi ama ọnọ imọ odudu ndin̄wam mme owo, ke esinyụn̄ enenem imọ ndinam oro.

VIDIO: Jesus Ama Owụt Se Iditịbede ke Obio Ubọn̄ Abasi (1:13)

Se Jesus akanamde ini enye okodude mi ke isọn̄ owụt se iditịbede Obio Ubọn̄ Abasi ama edisịm isọn̄. Ke otu mme n̄kpọ oro ẹbatde mi, ewe ye ewe inen̄ede idọn̄ fi ndikụt? Kot mme itie Bible emi ẹtịn̄de mme n̄kpọ oro ke page oro etienede.

6. Obio Ubọn̄ Abasi eyenem tutu

VIDIO: Nte Ini Iso Editiede (4:38)

Kot Psalm 145:16, ekem ẹbọrọ mbụme emi ẹnyụn̄ ẹneme ẹban̄a enye:

• Etie fi didie ndidiọn̄ọ ke Jehovah ọyọnọ kpukpru mme odu-uwem n̄kpọ kpukpru se mmọ ẹyomde?

SE IKPEPDE

Ukara Abasi ayanam se Abasi oyomde. Ukara Abasi ayanam ofụri isọn̄ ọfọn ama onyụn̄ enen̄ede eye ọnọ ata ikọt Abasi, ndien mmọ ẹyedu uwem ke nsinsi.

Se M̀mê Emeti

• Nso ke edinam Obio Ubọn̄ Abasi ama edi man enyịn̄ Abasi asana?

• Nso iwụt ke se Abasi ọn̄wọn̄ọde ke Bible eyetịbe ke Obio Ubọn̄ Abasi?

• Nso ye nso ke afo enen̄ede oyom ndikụt ke Obio Ubọn̄ Abasi?

KPEP N̄KPỌ EN̄WEN

Se se Armageddon edide.

“Nso Idi Ekọn̄ Armageddon?” (Odu ke jw.org)

Se se iditịbede ke ini emi Jesus okokotde “akwa ukụt.”—Matthew 24:21.

“Nso Idi Akwa Ukụt” (Odu ke jw.org)

Se nte ubon ẹkemede nditie ntre nneme mban̄a se iditịbede ke Obio Ubọn̄ Abasi.

Kere Nte Odude ke Paradise (1:50)

Se ibuotikọ emi, “Enyene Mme N̄kpọ Emi Ẹkesụk Ẹfịnade Mi,” ke oyokụt se ikan̄wamde owo emi ekesisọn̄de ibuot ye ukara.

“Bible Okpụhọde Mme Owo” (Enyọn̄-Ukpeme, January 1, 2012)