“Ẹda Kpukpru Ọyọhọ Mbak Duop Ẹdisịn ke Ufọk Unịmn̄kpọ”
“Ẹda emi ẹdomo mi, . . . m̀mê ami ndiberekede window heaven nnọ mbufo.”—MALACHI 3:10.
1. (a) Ke ọyọhọ isua ikie ition M.E.N., nso ikot ke Jehovah ọkọnọ ikọt esie? (b) Ke akpa isua ikie E.N., nso ikosụn̄ọ ito Jehovah ndidi ke temple ndikpe ikpe?
KE ỌYỌHỌ isua ikie ition M.E.N., nditọ Israel ikanamke akpanikọ inọ Jehovah. Mmọ ikọnọhọ ọyọhọ mbak duop ẹkenyụn̄ ẹda mme unam oro mîdotke edi temple nte uwa. Edi, Jehovah ama ọn̄wọn̄ọ ete ke edieke mmọ ẹdidade ofụri ọyọhọ mbak duop ẹdisịn ke ufọk unịmn̄kpọ, ke imọ iyen̄wan̄a edidiọn̄ inọ mmọ tutu akaha. (Malachi 3:8-10) N̄kpọ nte isua 500 ke ukperedem, Jehovah, emi Jesus akadade ke ibuot nte angel ediomi Esie, ama edi temple ke Jerusalem ndikpe ikpe. (Malachi 3:1) Israel nte idụt ikodotke, edi ẹma ẹdiọn̄ mbon oro ẹkefiakde ẹtiene Jehovah uwak uwak. (Malachi 3:7) Ẹma ẹyet mmọ aran ndikabade ndi nditọ Jehovah eke spirit oro ẹyetde aran, obufa edibotn̄kpọ, kpa “Israel Abasi.”—Galatia 6:16; Rome 3:25, 26.
2. Ini ewe ke akana Malachi 3:1-10 enyene udiana edisu, ndien ẹkot nnyịn idinam nso ke ebuana ye emi?
2 Ke se ikperede ndidi isua 1,900 ke emi ama ekebe, ke 1914, ẹma ẹdori Jesus ke ebekpo nte Edidem Obio Ubọn̄ Abasi eke heaven, ndien ama ekem ini ikọ odudu spirit Abasi ke Malachi 3:1-10 ndinyene edisu ọyọhọ ikaba. Ke ebuana ye aduai-owo idem n̄kpọntịbe emi, ẹkot mme Christian mfịn ndida ofụri ọyọhọ mbak duop ndisịn ke ufọk unịmn̄kpọ. Edieke nnyịn inamde ntre, nnyịn n̄ko iyedara mme edidiọn̄ tutu akaha.
3. Anie ekedi angel oro ọkọdiọn̄de usụn̄ ọnọ Jehovah (a) ke akpa isua ikie? (b) mbemiso akpa ekọn̄ ererimbot?
3 Kaban̄a enye ndidi temple, Jehovah ọkọdọhọ ete: “Sese, ami nyedọn̄ angel mi, ndien enye eyebem mi iso ọdiọn̄ usụn̄.” (Malachi 3:1) Nte edisu emi eke akpa isua ikie, John Andinịm Owo Baptism ama edi ebịne Israel ọkwọrọde edikabade esịt ke mme idiọkn̄kpọ. (Mark 1:2, 3) Nte utom edidiọn̄ usụn̄ ama odu ke ebuana ye edifiak ndi Jehovah ọyọhọ ikaba ke temple esie? Ih. Ke ediwak isua mbemiso akpa ekọn̄ ererimbot, Nditọ Ukpepn̄kpọ Bible ẹma ẹbiọn̄ọde ke ererimbot ẹkpepde edisana ukpepn̄kpọ Bible ẹnyụn̄ ẹyararede mme nsu oro ẹsuenede Abasi, utọ nte mme ukpepn̄kpọ Abasi-Ita-ke-Kiet, ye hell ikan̄. Mmọ n̄ko ẹma ẹtọt ẹban̄a edidi utịt Ini Mme Gentile ke 1914. Ediwak owo ẹma ẹkpan̄ utọn̄ ẹnọ mme ọnọ-un̄wana akpanikọ ẹmi.—Psalm 43:3; Matthew 5:14, 16.
4. Mbụme ewe ke ekenyene ndibọrọ ke usen Ọbọn̄?
4 Isua 1914 ama ọtọn̄ọ se Bible okotde “usen Ọbọn̄.” (Ediyarade 1:10) Ikpọ n̄kpọntịbe ẹkenyene ndida itie ke usen oro, esịnede edidiọn̄ọ enyeemi “asan̄autom emi anamde akpanikọ, onyụn̄ enyenede ọniọn̄” edide ye edimek enye ndidi “andikara kpukpru se [Eteufọk] enyenede.” (Matthew 24:45-47) Ko ke edem ke 1914, ediwak tọsịn ufọkederi ẹma ẹdọhọ nte idide Christian. Ewe otu ke Eteufọk, kpa Jesus Christ, edidiọn̄ọ nte asan̄autom emi anamde akpanikọ onyụn̄ enyenede ọniọn̄? Ẹkenyene ndibọrọ mbụme oro ke ini Jehovah edide ke temple.
Ndidi Temple eke Spirit
5, 6. (a) Ke ewe temple ke Jehovah ekedi ndikpe ikpe? (b) Nso ubiereikpe ke Christendom ọkọbọ oto Jehovah?
5 Nte ededi, temple ewe ke enye ekedi? Nte an̄wan̄ade ikedịghe ataata temple ke Jerusalem. Ẹma ẹsobo akpatre ke otu temple oro ko ke edem ke 70 E.N. Nte ededi, Jehovah enyene n̄kponn̄kan temple emi eke Jerusalem oro akadade aban̄a. Paul ama etịn̄ aban̄a n̄kponn̄kan temple emi onyụn̄ owụt nte enye okponde ke akpanikọ, ye edisana ebiet ke heaven ye okụre mi ke isọn̄. (Mme Hebrew 9:11, 12, 24; 10:19, 20) Edi akwa temple eke spirit emi ke Jehovah ekedi ndikpe ikpe.—Men Ediyarade 11:1; 15:8 domo.
6 Ini ewe ke emi okotịbe? Nte ekemde ye uyarade oro ẹkụtde, ke 1918.a Nso ikedi utịp? Amaedi Christendom, Jehovah okokụt esop oro ubọk ọyọhọde ye iyịp, idiọk ndutịm ido ukpono oro onịmde idemesie nte n̄wan akpara ke ererimbot emi, adiande idem ye mbon inyene onyụn̄ efịkde mme ubuene, ẹkpepde ukpepn̄kpọ mme okpono ndem utu ke ndinanam edisana utuakibuot. (James 1:27; 4:4) Ebede ke Malachi, Jehovah ama odụri owo utọn̄ ete: “Ami nyesan̄a n̄kpere mbufo ke ikpe, nnyụn̄ nnịm owowo ntiense mban̄a mbiaidiọn̄ ye mme esịn efịbe, ye mmọ eke ẹn̄wọn̄ọde nsu, ye mmọ eke ẹtụkde anamutom ke utịp esie, ẹtụk ebeakpa ye eyenakpa.” (Malachi 3:5) Christendom amanam kpukpru emi ye se idiọkde ikan oro. Ke 1919 ẹma ẹkụt in̄wan̄în̄wan̄ nte ke Jehovah ama obiom enye ikpe nsobo ọkọrọ ye nsụhọ Akwa Babylon eken, kpa akwa ufọk nsunsu ido ukpono. Ọtọn̄ọde ke ini oro kaiso, ẹma ẹnọ mme enyene nti esịt ikot ete: “Mbufo ikọt Mi, ẹwọn̄ọ ke esịt.”—Ediyarade 18:1, 4.
7. Anie ke Jesus ọkọdiọn̄ọ nte asan̄autom esie emi anamde akpanikọ onyụn̄ enyenede ọniọn̄?
7 Anie, ndien, ekedi asan̄autom emi anamde akpanikọ onyụn̄ enyenede ọniọn̄? Ke akpa isua ikie, enye ọkọtọn̄ọ ye ekpri otu oro ẹkenyịmede utom unọ ikọ ntiense eke John Andinịm Owo Baptism ye eke Jesus, kpa angel ediomi oro. Ke isua ikie nnyịn emi, ekedi ibat ibat tọsịn owo ẹkenyịme utom udiọn̄ usụn̄ oro Nditọ Ukpepn̄kpọ Bible ẹkenamde ke mme isua oro ẹkedade ẹkesịm 1914. Mmọemi ẹma ẹyọ n̄kpọsọn̄ idomo ke ini akpa ekọn̄ ererimbot oro, edi mmọ ẹma ẹwụt nte ke esịt mmimọ okodu ye Jehovah.
Utom Edinam Asana
8, 9. Ko ke edem ke 1918, ke mme ewe usụn̄ ke okoyom ẹnam asan̄autom emi anamde akpanikọ onyụn̄ enyenede ọniọn̄ asana, ndien nso un̄wọn̄ọ ke Jehovah akanam kaban̄a emi?
8 Ama akam oyom ẹnam otu emi asana, nte ededi. Ndusụk mbon oro ẹkediande idem ye mmọ ẹma ẹwọn̄ọde ẹdi mme asua mbuọtidem ẹkenyụn̄ ẹnyene ndidi se ẹsiode ẹfep. (Philippi 3:18) Mmọ eken ikonyịmeke ndibiom mbiomo emi asan̄ade ye edinam n̄kpọ Jehovah ẹnyụn̄ ẹfiọrọ ẹkpọn̄ usụn̄. (Mme Hebrew 2:1) Ke ẹsiode oro ẹfep, mme edinam eke Babylon ẹkesụk ẹdodu oro okoyomde ẹsio ẹfep. Ke n̄kan̄ ndutịm n̄ko akana ẹnam asan̄autom oro anamde akpanikọ onyụn̄ enyenede ọniọn̄ asana. Ẹkenyene ndikpep mban̄a nnennen idaha aban̄ade edida san̄asan̄a n̄kpọn̄ ererimbot emi nnyụn̄ nda nsịn ke edinam. Ndien nte ererimbot akakabarede ọdiọk akan, ama oyom mmọ ẹn̄wana ọkpọsọn̄ en̄wan ndinam mme esop ẹsana ẹbọhọ ndek eke ido uwem ye eke spirit.—Men Jude 3, 4 domo.
9 Ih, ama oyom edinam asana, edi Jehovah ke ima ama ọn̄wọn̄ọ un̄wọn̄ọ aban̄a Jesus emi ẹdoride ke ebekpo ete: “Enye onyụn̄ etie etem silver onyụn̄ anam asana: onyụn̄ anam nditọ Levi ẹsana, onyụn̄ ọdiọn̄ mmọ nte gold ye silver, man mmọ ẹwa uwa ẹnọ Jehovah nte enende.” (Malachi 3:3) Ọtọn̄ọde ke 1918, Jehovah, ebede ke angel ediomi emi, ama osu un̄wọn̄ọ esie onyụn̄ anam ikọt esie ẹsana.
10. Nso orụk uwa ke ikọt Abasi ẹkeda ẹdi, ndien nso ikot ke Jehovah ọkọnọ mmọ?
10 Nditọete Christ oro ẹyetde aran ye akwa otuowo ẹmi ke ukperedem ẹkedidianade ye mmọ ke utom Jehovah kpukpru mmọ ẹma ẹbọ ufọn ẹto Jehovah ndinam n̄kpọ nte anditem ye andidụhọde silver. (Ediyarade 7:9, 14, 15) Nte esop mmọ ẹma ẹwa, ndien ke ẹsụk ẹwa uwa ke edinen ido. Ndien uwa mmọ “eyenem Jehovah esịt, kpa nte ke mme usen eset, ye ke eyo oko.” (Malachi 3:4) Ekedi mmọemi ke Jehovah ọkọnọ ikot ke prọfesi ete: “Ẹda kpukpru ọyọhọ mbak duop ẹdisịn ke ufọk unịmn̄kpọ, man udia odu ke ufọk mi, ndien ẹda emi ẹdomo mi, Jehovah mme udịm ọdọhọ, m̀mê ami ndiberekede window heaven nnọ mbufo, nnyụn̄ n̄n̄wan̄a nti n̄kpọ nnọ mbufo, tutu akaha.”—Malachi 3:10.
Mme Uwa ye Ọyọhọ Mbak Duop
11. Ntak emi mme uwa nte ekemde ye ndutịm Ibet Moses mîdịghe se ẹyomde aba?
11 Ke eyo Malachi ikọt Abasi ẹkeda ataata uwa ye ọyọhọ mbak duop ẹdi, utọ nte ibokpot, mfri, ye ufene. Idem ke eyo Jesus, mme anam-akpanikọ nditọ Israel ẹma ẹwa ataata uwa ke temple. Nte ededi, ke n̄kpa Jesus ebede kpukpru oro ẹma ẹkpụhọde. Ẹma ẹbiat Ibet ẹfep, esịnede ewụhọ ndinọ san̄asan̄a n̄kpọ ke uwa ye ọyọhọ mbak duop. (Ephesus 2:15) Jesus ama osu ntịn̄nnịm uwụtn̄kpọ ẹban̄ade mme uwa ke idak Ibet. (Ephesus 5:2; Mme Hebrew 10:1, 2, 10) Ke ewe usụn̄, ndien, ke mme Christian ẹkeme ndida mme uwa ye ọyọhọ mbak duop ndi?
12. Nso orụk enọ ye uwa eke spirit ke mme Christian ẹnọ?
12 Ye mmọ, mme uwa ẹnen̄ede ẹdi ke uduot eke spirit. (Men Philippi 2:17; 2 Timothy 4:6 domo.) Ke uwụtn̄kpọ, Paul ama etịn̄ aban̄a utom ukwọrọikọ nte uwa ke ini enye ọkọdọhọde ete: “Yak nnyịn iwa uwa ekọm inọ Abasi kpukpru ini ke enyịn̄ Jesus, kpa mfri n̄kpọkinua eke ẹkponode enyịn̄ Esie.” Enye ama anyan ubọk owụt orụk uwa eke spirit efen ke ini enye akakpakde ete: “Ẹkûfre ndinam eti n̄kpọ ndinyụn̄ mfọn ido ye owo; koro orụk uwa emi enemde Abasi esịt.” (Mme Hebrew 13:15, 16) Ke ini mme ete ye eka ẹsịnde udọn̄ ẹnọ nditọ mmọ ndidụk utom usiakusụn̄, ẹkeme ndidọhọ ke mmọ ẹwa mmọ ẹnọ Jehovah, kpa nte Jephthah akawade adiaha esie nte “edifọp uwa” ọnọ Abasi, emi ọkọnọde enye edikan.—Judges 11:30, 31, 39.
13. Ntak mîyomke mme Christian ẹnọ ataata ọyọhọ mbak duop ke udori okụk emi mmọ ẹbọde?
13 Nso kaban̄a ọyọhọ mbak duop, nte ededi? Nte obiomo mme Christian ndisio ọyọhọ mbak duop nnịm ke udori n̄kpọ obụkidem mmọ nnyụn̄ nyak enye nnọ esop Jehovah, nte mme ufọkederi Christendom ẹnamde? Baba, owo iyomke oro. Idụhe itien̄wed Abasi ndomokiet oro ọnọde mme Christian utọ ewụhọ oro. Ke ini Paul ọkọbọde mme etịbe oro ẹkenọde mbon oro ẹdude ke unana ke Judea, enye ikasiakke san̄asan̄a mbahade oro ẹkpenyenede ndinọ. Utu ke oro, enye ọkọdọhọ ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) Ke nditịn̄ mban̄a mbon oro ẹdude ke akpan utom ukwọrọikọ, Paul ama owụt ete ke adan̄aemi ẹkedade mme enọ imaesịt ẹn̄wam ndusụk owo nte odotde, imọ ima iben̄e idem ndinam utom nnyụn̄ n̄n̄wam idem imọ. (Utom 18:3, 4; 1 Corinth 9:13-15) Owo ikọdọhọke ẹnọ ọyọhọ mbak duop kaban̄a uduak emi.
14. (a) Ntak emi edida ọyọhọ mbak duop ndi mîdaha inọ nnyịn ndiyak idem nnyịn nnọ Jehovah? (b) Nso ke ọyọhọ mbak duop ada aban̄a?
14 Nte an̄wan̄ade, ye mme Christian ọyọhọ mbak duop edi uyarade, m̀mê ada aban̄a, n̄kpọ. Sia enye edide ọyọhọ mbak duop ndien nọmba duop esiwak ndida nnọ n̄kemn̄kem n̄kpọ isọn̄ ke Bible, nte ọyọhọ mbak duop ada ọnọ nnyịn ndiyak ofụri idem nnyịn nnọ Jehovah? Baba. Ke ini nnyịn iyakde idem nnyịn inọ Jehovah inyụn̄ iyararede emi ke mmọn̄ baptism, oro edi ini emi nnyịn iyakde ofụri idem nnyịn inọ enye. Ọtọn̄ọde ke ini oro nnyịn iyakde idem nnyịn inọ, nnyịn inyeneke n̄kpọ ndomokiet oro mîdịghe eke Jehovah. Nte ededi, Jehovah esinyịme mme owo ẹnọ inyene mmọ. Ntre ọyọhọ mbak duop ada ọnọ udeme n̄kpọ oro edide eke nnyịn emi nnyịn idade isọk Jehovah, m̀mê oro idade inam n̄kpọ ke utom Jehovah, nte idiọn̄ọ ima oro nnyịn inyenede inọ enye ye edidiọn̄ọ oro nnyịn idiọn̄ọde akpanikọ oro nte ke nnyịn inyene enye. Ọyọhọ mbak duop eke eyomfịn inyeneke ndidi sụk mbahade n̄kpọ kiet ke itie duop. Ke ndusụk idaha enye eyesụhọde akan oro. Ke mme idaha en̄wen enye eyewak akan. Owo kiet kiet esida se esịt esie ọdọhọde enye ada edi ye se mme idaha esie ẹyakde.
15, 16. Nso ke ọyọhọ mbak duop nnyịn eke spirit abuana?
15 Nso isịne ke ọyọhọ mbak duop eke spirit emi? N̄kpọ kiet edi, nnyịn inọ Jehovah ini ye odudu nnyịn. Ini oro nnyịn idade isịn ke ndidụk mme mbonoesop, ke ndidụk ikpọ ye n̄kpri mbono, ke utom an̄wautom, kpukpru emi ẹdi n̄kpọ oro inọde Jehovah—kpa ubak ọyọhọ mbak duop nnyịn. Ini ye odudu oro nnyịn isịnde ke ndida n̄kese mbon udọn̄ọ inyụn̄ in̄wamde mbon en̄wen—n̄ko, kpukpru edi ubak ọyọhọ mbak duop nnyịn. Ndin̄wam ke ndibọp mme Ufọkmbono Obio Ubọn̄ ye ke ndibuana ke utom edise mban̄a nnyụn̄ nnam ufọkmbono asana edi kpa ubak esie.
16 Ọyọhọ mbak duop nnyịn n̄ko esịne mme okụk oro nnyịn itịpde. Ye n̄wọrọnda n̄kọri oro esop Jehovah enyenede ke mme isua ndondo emi, mme mbiomo ke okụk ke okpon. Ẹyom mbufa Ufọkmbono Obio Ubọn̄, ọkọrọ ye mbufa ufọk n̄kọk itieutom ye mbufa Ufọkmbono, adianade ye edise mban̄a mbon oro ẹma ẹkebọbọp. Ndise mban̄a ubiatokụk mbon oro ẹnọde idemmọ unyịme unyịme ndinam akpan utom—ediwak ini ẹnamde akwa ọkpọkpọ n̄waidem man ẹnam oro—n̄ko onịm akwa n̄kpọ-ata. Ke 1991 se ẹkebiatde ke ndise mban̄a mme isụn̄utom, mme esenyịn oro ẹsan̄ade-san̄a, ye mme akpan asiakusụn̄ ikpọn̄îkpọn̄ ama ọdọk osịm se ikande miliọn dollar 40, kpukpru emi edide se ẹkenyenede ẹto mme etịbe imaesịt.
17. Nso ke nnyịn ikpakam inọ nte ọyọhọ mbak duop eke spirit nnyịn?
17 Nso ke nnyịn ikpakam inọ nte ọyọhọ mbak duop eke spirit nnyịn? Jehovah inịmke udomo. Edi, ekikere ediyak idem nnọ, ata ima ẹnyenede ẹnọ Jehovah ye nditọete, ọkọrọ ye usọp usọp ekikere oro otode ifiọk oro inyenede nte ke uwem mme owo ẹdu oro ẹnyenede ndinyan̄a, esịn udọn̄ ọnọ nnyịn ndida ofụri ọyọhọ mbak duop nnyịn ndi. Ẹdemede nnyịn ndinam n̄kpọ Jehovah ke n̄kponn̄kan udomo nte ikekeme. Edieke nnyịn inyenede ndinọ idem nnyịn ye inyene nnyịn mmen̄e mmen̄e m̀mê ke mfụhọ esịt, emi ekpedi ukem ye nnyịn nditụk Abasi.—Men Luke 21:1-4 domo.
Ẹdiọn̄ Tutu Akaha
18, 19. Didie ke ẹkediọn̄ ikọt Jehovah ke ndida ofụri ọyọhọ mbak duop mmọ ndi?
18 Toto ke 1919, ikọt Jehovah ke ntatubọk ẹmeda ini, odudu, ye okụk mmọ ẹnam n̄kpọ ke ntatubọk ẹban̄a udọn̄ oro odude kaban̄a utom ukwọrọikọ. Mmọ ke akpanikọ ẹma ẹda ofụri ọyọhọ mbak duop ẹdisịn ke ufọk unịmn̄kpọ. Nte utịp, Jehovah omosu un̄wọn̄ọ esie onyụn̄ an̄wan̄a edidiọn̄ ọduọk tutu akaha. Ẹkụt emi ke ata utịbe usụn̄ ke ibat n̄kọri oro odude. Ọtọn̄ọde ke mbon oro ẹyetde aran tọsịn ifan̄ ẹmi ẹkenamde n̄kpọ Jehovah ke ini enye ekedide temple esie ke 1918, mmọ ẹmekọri tutu mfịn mbon oro ẹyetde aran ọkọrọ ye nsan̄a mmọ, kpa mme erọn̄ en̄wen, ẹmewak ke ibat ẹkan miliọn inan̄ ke nsio nsio idụt 211. (Isaiah 60:22) Ẹmediọn̄ mmọ n̄ko ye n̄kaiso n̄kọri ke ifiọk akpanikọ. Ẹma ẹtotịm ẹnam ntịn̄nnịm ikọ ẹsọn̄ọ ẹkan ẹnọ mmọ. Ẹma ẹsọn̄ọ mbuọtidem mmọ ke edisu mme uduak Jehovah. (2 Peter 1:19) Mmọ ẹnen̄ede ẹdi mbon oro ‘Jehovah etemede.’—Isaiah 54:13.
19 Ebede ke Malachi, Jehovah ama ebemiso etịn̄ aban̄a edidiọn̄ efen efen ete: “Ndien mme abak Jehovah ẹneme kiet ye kiet: ndien Jehovah akpan̄ utọn̄, onyụn̄ okop, mmọ ẹnyụn̄ ẹwet n̄wed editi ke iso esie ẹnọ mme abak Jehovah ye mme ẹkere enyịn̄ esie.” (Malachi 3:16) Ke kpukpru esop oro ẹdọhọde nte idide eke Christian, Mme Ntiense Jehovah ikpọn̄îkpọn̄ ẹkere enyịn̄ esie ẹnyụn̄ ẹnam ẹtoro enye ke otu mme idụt. (Psalm 34:3) Mmọ ẹkop inemesịt didie ntem ndinyene nsọn̄ọ nte ke Jehovah eti edinam akpanikọ mmọ!
20, 21. (a) Nso itie ebuana oro ẹdiọn̄de ke mme ata Christian ẹdara? (b) Kaban̄a Ido Ukpono Christ, nso ukpụhọde ikabade ina in̄wan̄în̄wan̄ ikan?
20 Nsụhọ oro ẹyetde aran ẹdi san̄asan̄a ikọt Jehovah, ndien akwa otuowo, ẹmi ẹbụn̄ọde ẹdi ndibuana ye mmọ, ẹtiene mmọ ẹnyene mme edidiọn̄ ẹtode edisana utuakibuot. (Zechariah 8:23) Ebede ke Malachi, Jehovah ọn̄wọn̄ọ ete: “Ndien Jehovah mme udịm ọdọhọ ete, Mmọ ẹyedi ata inyene mi ke usen emi ami ndoride; ndien nyetua mmọ mbọm, kpa nte owo atuade eyen esie eke anamde n̄kpọ ọnọ enye mbọm.” (Malachi 3:17) Nso edidiọn̄ ke edi ntem nte ke Jehovah enyene utọ ima ima edikere mban̄a oro ọnọ mmọ!
21 Ke akpanikọ, ekese ukpụhọde ke ufọt mme ata ye nsunsu Christian ẹtotịm ẹwọrọ ẹwụt idem. Nte ikọt Jehovah ẹdomode ndidu uwem ekekem ye mme edumbet esie, Christendom ọmọbụhọ ntotụn̄ọ ntotụn̄ọ ke okpụk ndek ererimbot emi. Ke akpanikọ, mme ikọ Jehovah ẹdi akpanikọ ete: “Mbufo ẹyetọn̄ọ ntak ẹkụt nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.”—Malachi 3:18.
22. Nso mme edidiọn̄ ke nnyịn ikeme ndidori enyịn ndidara edieke nnyịn ikade iso ndida ofụri ọyọhọ mbak duop nnyịn ndi?
22 Ibịghike, usen unamibat eyedi ọnọ mme nsunsu Christian. “Sese, usen oro ke edi, ke asak nte usan̄uyo: ndien kpukpru mbon iseri, ye kpukpru mme anamidiọk ẹyekabade ẹdi ẹtak nnyanyan̄a: ndien usen eke edidide eyeta mmọ, Jehovah mme udịm ọdọhọ, emi mîdisụhọke orụn̄ mîdinyụn̄ isụhọke n̄kọk inọ mmọ.” (Malachi 4:1) Ikọt Jehovah ẹfiọk ẹte ke enye eyekpeme mmọ ke ini oro, kpa nte enye ekekpemede idụt eke spirit esie ko ke edem ke 70 E.N. (Malachi 4:2) Mmọ ẹkop inemesịt didie ntem ndinyene utọ un̄wọn̄ọ oro! Ntem, tutu ini oro ẹyak nnyịn owo kiet kiet iwụt esịtekọm ye ima oro nnyịn inyenede inọ Jehovah ebe ke ndida ofụri ọyọhọ mbak duop ndisịn ke ufọk unịmn̄kpọ. Do nnyịn imekeme ndinyene mbuọtidem nte ke enye eyekaiso ndidiọn̄ nnyịn tutu akaha.
[Mme Ikọ idakisọn̄]
a Kaban̄a ntọt efen efen, se Enyọn̄-Ukpeme eke June 15, 1987, page 14-20.
Nte Afo Emekeme Ndinam An̄wan̄a?
◻ Ke eyomfịn, ini ewe ke Jehovah ekedi ke temple ye angel ediomi esie?
◻ Anie edi asan̄autom emi anamde akpanikọ onyụn̄ enyenede ọniọn̄, ndien nso edinam asana ke mmọ ẹkeyom ke 1918 ama ekebe?
◻ Nso orụk uwa eke spirit ke mme ata Christian ẹda ẹsọk Jehovah?
◻ Ọyọhọ mbak duop oro ẹdọhọde mme Christian ẹda ẹdisịn ke ufọk unịmn̄kpọ edi nso?
◻ Nso mme edidiọn̄ ke ikọt Abasi ẹdara ke ndinọ ọyọhọ mbak duop eke spirit?
[Ndise ke page 15]
Ọyọhọ mbak duop nnyịn eke spirit esịne ndinọ ukeme ye inyene nnyịn ẹda ẹbọp mme Ufọkmbono Obio Ubọn̄
[Ndise ke page 16]
Ke ntak emi Jehovah ọdiọn̄de ikọt esie, ẹyom akwa utom ubọp n̄kpọ esịnede Mme Ufọkmbono Obio Ubọn̄ ye Mme Ufọkmbono