Edidiọn̄ Jehovah Ofori Owo
“Ufọn [“edidiọn̄,” “NW”] Jehovah ofori owo, enye inyụn̄ idianke afanikọn̄ ke esịt.”—MME N̄KE 10:22.
1-3. Ke adan̄aemi ediwak owo ẹkerede ẹban̄a mme n̄kpọ obụkidem, nso akpanikọ aban̄ade inyene obụkidem ke kpukpru owo ẹkpenyene ndifiọk?
NDUSỤK owo akananam itreke nditịn̄ mban̄a okụk—m̀mê unana okụk. Ke edide n̄kpọ mfụhọ ọnọ mmọ, ke mme isua ndondo emi mmọ ẹmenyene ekese ndineme mban̄a. Ke 1992 idem mme idụt uforo Edem Usoputịn ẹma ẹkụt iduọ ke mbubehe, ndien ikpọ owo ukara ọkọrọ ye mme ọsọ owo ẹma ẹkụt nte mmọ mînyeneke utom aba. Ediwak owo ẹma ẹyịk m̀mê mmimọ tutu amama iyefiak ikụt ini uforo oro enyenede nsọn̄ọnda.
2 Nte akwan̄a ndikere mban̄a mfọnọn̄kpọ obụkidem nnyịn? Baba, ke ndusụk udomo enye akam edi ndammana n̄kpọ. Ke ukem ini oro, isọn̄ akpanikọ odu oro anade nnyịn idiọn̄ọ iban̄a inyene. Ke ofụri ofụri, kpukpru inyene obụkidem ẹto Andibot. Enye edi “Abasi Jehovah, . . . emi ebride isọn̄, ye se itịbede ke esịt; emi adade ibifịk ọnọ kpukpru owo ẹmi ẹdude ke esịt, ada spirit ọnọ kpukpru mmọemi ẹsan̄ade ke esịt.”—Isaiah 42:5.
3 Okposụkedi Jehovah mîsibemke-bemiso imek owo emi edidide enyene n̄kpọ owo ye owo emi edidide ubuene, kpukpru nnyịn imenyene ibat ndinam ke usụn̄ nte nnyịn ikamade sededi udeme oro nnyịn inyenede ito “isọn̄, ye se itịbede ke esịt.” Edieke nnyịn ikamade inyene nnyịn ndida n̄kara mbon en̄wen, Jehovah eyekot nnyịn idinam ibat. Ndien owo ekededi oro anamde n̄kpọ ọnọ inyene utu ke ndinam nnọ Jehovah eyekụt ete ke “owo eke ọbuọtde idem ke inyene esie eyeduọ.” (Mme N̄ke 11:28; Matthew 6:24; 1 Timothy 6:9) Inyene obụkidem oro mîsan̄ake ye esịt oro osụkde idem ọnọ Jehovah inyeneke baba ufọn ndomokiet.—Ecclesiastes 2:3-11, 18, 19; Luke 16:9.
Uforo Oro Edide Akpan N̄kpọ Akan
4. Ntak emi uforo eke spirit ọfọnde akan akpakịp n̄kpọ obụkidem?
4 Ke adianade ye uforo n̄kpọ obụkidem, Bible etịn̄ aban̄a uforo n̄kpọ eke spirit. Emi nte an̄wan̄ade edi orụk oro ọfọnde akan. (Matthew 6:19-21) Uforo n̄kpọ eke spirit anam enyene itie ebuana oro ọnọde uyụhọ ye Jehovah emi ekemede ndibịghi ke nsinsi. (Ecclesiastes 7:12) Akande oro, mme asan̄autom Abasi ẹmi ẹforode ke n̄kan̄ eke spirit itabake nti edidiọn̄ eke n̄kpọ obụkidem. Ke obufa ererimbot, inyene eke spirit edisan̄a kiet ye uforo eke n̄kpọ obụkidem. Mme anam-akpanikọ ẹyenyene ifụre eke n̄kpọ obụkidem oro owo mînyeneke ito idot idot umia mbuba m̀mê editaba nsọn̄idem ye inemesịt, nte esiwakde ndidi mfịn. (Psalm 72:16; Mme N̄ke 10:28; Isaiah 25:6-8) Mmọ ẹyekụt ẹte ke kpukpru usụn̄ “ufọn Jehovah ofori owo, enye inyụn̄ idianke afanikọn̄ ke esịt.”—Mme N̄ke 10:22.
5. Nso un̄wọn̄ọ ke Jesus ọkọnọ aban̄a mme n̄kpọ obụkidem?
5 Idem mfịn mbon oro ẹdade mme n̄kpọ eke spirit ke akpan n̄kpọ ẹnyene ndusụk ifụre adan̄a nte mme n̄kpọ obụkidem ẹbuanade. Edi akpanikọ, mmọ ẹsinam utom man ẹnyene okụk ẹkpe se mmọ ẹdepde ẹnyụn̄ ẹnọ ubon mmọ udia. Mîdịghe ndusụk mmọ ẹkeme nditaba utom mmọ ke ini mbubehe ọduọde. Edi mme utọ ekikere oro ikanke mmọ ubọk. Utu ke oro, mmọ ẹnịm un̄wọn̄ọ Jesus ke akpanikọ ke ini enye ọkọdọhọde ete: “Ẹkûtịmede esịt ẹbụp ẹte, Nso ke nnyịn ididia? Nso ke nnyịn idin̄wọn̄? Nso ke nnyịn idisịne? . . . Koro Ete mbufo ke heaven ọmọfiọk ete kpukpru n̄kpọ ẹmi ẹnana mbufo. Ẹkam ebemiso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.”—Matthew 6:31-33.
Inyene eke Spirit Mfịn
6, 7. (a) Tịn̄ ban̄a ndusụk ikpehe uforo eke spirit ikọt Abasi. (b) Prọfesi ewe isu mfịn, ndien mme mbụme ewe ke emi edemede?
6 Ntem, ikọt Jehovah ẹma ẹmek ndinam Obio Ubọn̄ edi akpa n̄kpọ ke uwem mmọ, ndien didie ke ẹdiọn̄ mmọ ntem! Mmọ ẹmekụt unen ke utom unam mbet mmọ. (Isaiah 60:22) Mmọ ẹdi mbon oro Jehovah ekpepde, ẹmi ẹdarade anana-utịt udịm udịm nti n̄kpọ eke spirit ẹmi ẹnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47; Isaiah 54:13) N̄ko-n̄ko, spirit Jehovah omodu ye mmọ, obotde mmọ esịn ke inem inem otu nditọete ofụri ererimbot.—Psalm 133:1; Mark 10:29, 30.
7 Emi ke akpanikọ edi uforo eke spirit, kpa n̄kpọ oro okụk mîkemeke ndidep. Enye edi edemede-owo udọn̄ edisu un̄wọn̄ọ Jehovah: “Mbufo ẹda kpukpru ọyọhọ mbak duop ẹdisịn ke ufọk unịmn̄kpọ, man udia odu ke ufọk mi, ndien ẹda emi ẹdomo mi, Jehovah mme udịm ọdọhọ, m̀mê ami ndiberekede window heaven nnọ mbufo, nnyụn̄ n̄n̄wan̄a nti n̄kpọ nnọ mbufo, tutu akaha.” (Malachi 3:10) Nnyịn mfịn imokụt nte un̄wọn̄ọ emi osude. Nte ededi, ntak emi Jehovah, kpa Enyeemi kpukpru inyene otode, oyomde mme asan̄autom esie ẹda mbak kiet ke itie duop, m̀mê ọyọhọ mbak duop ẹdi-e? Mmanie ẹbọ ufọn ẹto ọyọhọ mbak duop? Man ibọrọ mme mbụme ẹmi, kere ntak emi Jehovah eketịn̄de mme ikọ ẹmi ebe ke Malachi ke ọyọhọ isua ikie ition M.E.N.
Ọyọhọ Mbak Duop ye Mme Uwa
8. Nte ekemde ye Ibet ediomi, uforo n̄kpọ obụkidem nditọ Israel ọkọkọn̄ọ ke nso?
8 Ke eyo Malachi ikọt Abasi ikoforoke. Ntak mîkoforoke-e? Ke ubak ubak emi ekenyene n̄kpọ ndinam ye mme uwa ye ọyọhọ mbak duop. Ko ke ini oro, Israel okodu ke idak ediomi Ibet Moses. Ke ini Jehovah akanamde ediomi oro, enye ama ọn̄wọn̄ọ ete ke edieke Israel edinamde udeme mmọ, imọ iyediọn̄ mmọ ke n̄kan̄ eke spirit ye eke obụkidem. Ke editịm ntịn̄, mfọnọn̄kpọ ke Israel ọkọkọn̄ọ ke edinam akpanikọ mmọ.—Deuteronomy 28:1-19.
9. Ke eyo Israel eset, ntak emi Jehovah okoyomde Israel ọnọ ọyọhọ mbak duop onyụn̄ ọnọ mme uwa?
9 Ubak mbiomo Israel ke idak Ibet oro ekedi ndida mme uwa ndi ke temple nnyụn̄ nnọ ọyọhọ mbak duop. Ẹma ẹsifọp ndusụk uwa ofụri ofụri ke itieuwa Jehovah, ke adan̄aemi ẹkesibaharede ndusụk eken ẹnọ mme oku ye mbon oro ẹnọde uwa oro, ẹwade san̄asan̄a mbak ẹnọ Jehovah. (Leviticus 1:3-9; 7:1-15) Kaban̄a ọyọhọ mbak duop, Moses ama asian nditọ Israel ete: “Kpukpru ubak kiet ke itie duop ke ofụri isọn̄, edide n̄kpasịp in̄wan̄, onyụn̄ edide mfri eto, ẹnyene Jehovah: enye edi edisana n̄kpọ Jehovah.” (Leviticus 27:30) Ẹkenọ mme Levite ẹmi ẹkedide mme anamutom ke ataya utuakibuot ọyọhọ mbak duop ndien ke ukperedem ẹnọ ke temple. Ke n̄kan̄ eken, mme Levite oro mîkedịghe mme oku ẹkenyene ndinọ mme oku ubon Aaron ubak duop ke se mmọ ẹbọde. (Numbers 18:21-29) Ntak emi Jehovah okoyomde Israel ẹnọ ọyọhọ mbak duop? Akpa, man mmọ ẹkpekeme ndiwụt esịtekọm oro mmọ ẹnyenede ẹban̄a eti ido Jehovah ke ataata usụn̄. Ndien ọyọhọ iba, man mmọ ẹkpekeme nditịp n̄kpọ nsịn ke ndin̄wam mme Levite, ẹmi ẹkesịnde idem ke mme mbiomo mmọ, esịnede edikpep Ibet. (2 Chronicles 17:7-9) Ke usụn̄ emi n̄ko ẹma ẹnọ edisana utuakibuot un̄wam, ndien kpukpru owo ẹma ẹbọ ufọn.
10. Nso ikotịbe ke ini Israel okokpude ndinọ ọyọhọ mbak duop ye mme uwa?
10 Okposụkedi mme Levite ẹkedade ọyọhọ mbak duop ye mme uwa ẹnam n̄kpọ ke ukperedem, mmọ ẹkenen̄ede ẹdi enọ oro ẹnọde Jehovah ndien ke ntre ẹkenyene ndidi enyeoro ọfọnde, odotde enye ndibọ. (Leviticus 22:21-25) Nso ikotịbe ke ini nditọ Israel ẹkekpude ndida ọyọhọ mbak duop mmọ ndi m̀mê ke ini mmọ ẹkedade uwa oro mîfọnke ẹdi? Ufen ndomokiet oro ẹketịn̄de ẹnịm ikodụhe ke Ibet, edi mme utịp ẹma ẹdu. Jehovah ama etre ndinọ edidiọn̄ esie, ndien mme Levite, emi owo mînọhọ un̄wam ke n̄kpọ obụkidem mi, ẹma ẹkpọn̄ utom temple mmọ man ẹkese ẹban̄a idemmọ. Ntre, kpukpru nditọ Israel ẹma ẹbọ ufen.
“Mbufo Ẹtịm Ẹkere Usụn̄ Mbufo”
11, 12. (a) Nso ikotịbe ke ini Israel ekefrede ndinịm Ibet? (b) Nso utom ke Jehovah ọkọdọn̄ Israel ke ini enye okosion̄ode mmọ ke Babylon efep?
11 Ke ini mbụk Israel, ndusụk mmọ ẹkedi nti uwụtn̄kpọ ke ndidomo ndinịm Ibet, esịnede edinọ ọyọhọ mbak duop. (2 Chronicles 31:2-16) Ke ofụri ofụri, nte ededi, idụt oro ama efre enyịn. Ndien ndien mmọ ẹma ẹbiat ediomi oro ye Jehovah, tutu enye ayak ẹkan mmọ ke akpatre ndien, ke 607 M.E.N., ẹtan̄ mmọ ẹka Babylon.—2 Chronicles 36:15-21.
12 Oro ekedi ọkpọsọn̄ ntụnọ, edi ke isua 70 ẹbede Jehovah ama afiak atan̄ mmọ ọnyọn̄ ke isọn̄ emana mmọ. Ediwak ke otu prọfesi ẹban̄ade Paradise ke Isaiah ẹkenyene ndinyene akpa edisu mmọ ke ntan̄mfep oro ama ekebe. (Isaiah 35:1, 2; 52:1-9; 65:17-19) Edi, akpan ntak oro akanamde Jehovah ada ikọt esie afiak ọnyọn̄, ikedịghe ndifiak n̄wụk paradise eke isọn̄, edi ekedi ndifiak mbọp temple nnyụn̄ n̄wụk utuakibuot akpanikọ. (Ezra 1:2, 3) Edieke Israel ẹkekopde uyo Jehovah, mmọ ẹkpekenyene ndikụt mme ufọn n̄kpọ eke obụkidem, ndien edidiọn̄ Jehovah akpakanam mmọ ẹforo ke n̄kan̄ eke spirit ye ke n̄kan̄ eke obụkidem. Nte ekemde, ke ndondo oro mmọ ẹsịmde isọn̄ emana mmọ ke 537 M.E.N., mme Jew ẹma ẹbọp itieuwa ke Jerusalem ẹnyụn̄ ẹtọn̄ọ utom ke temple. Nte ededi, mmọ ẹma ẹsobo ọkpọsọn̄ ubiọn̄ọ ẹnyụn̄ ẹtre utom. (Ezra 4:1-4, 23) Nte utịp, Israel ikenyeneke edidiọn̄ Jehovah.
13, 14. (a) Nso iketiene ke ini Israel okokpude ndibọp temple? (b) Didie ke ẹkebọp temple ke akpatre, edi nso n̄kaiso edifiak nnam idiọk ke n̄kan̄ Israel ke ẹtọt ẹban̄a?
13 Ke isua 520 M.E.N., Jehovah ama anam prọfet Haggai ye Zechariah ẹdaha ẹda man ẹkpak nditọ Israel ẹte ẹfiak ẹkenam utom ubọp temple. Haggai okowụt ete ke idụt oro ke ẹkebọ ufen nsọn̄ọn̄kpọ obụkidem onyụn̄ ada emi akabuan ye unana ifiopesịt mmọ kaban̄a ufọk Jehovah. Enye ọkọdọhọ ete: “Jehovah mme udịm ọdọhọ kemi, ndien, ete, Mbufo ẹtịm ẹkere usụn̄ mbufo. Mbufo ẹtetọ ediwak n̄kpọ ke isọn̄, ndien ẹkụt esisịt; ẹdia n̄kpọ, edi ikemke: ẹn̄wọn̄, edi iyụhọke; ẹsịne n̄kpọ ke idem, edi ikopke ufiop; anamutom ke utịp onyụn̄ esịn utịp ke ekpat eke otịbede ndudu. Ntem ke Jehovah mme udịm ọdọhọ, ete, Mbufo ẹtịm ẹkere usụn̄ mbufo. Mbufo ẹdọk ke obot ẹda eto ẹdi, ẹnyụn̄ ẹbọp ufọk emi, ndien enye eyenem mi esịt, nyenyụn̄ nda ukpono, Jehovah ọdọhọ.”—Haggai 1:5-8.
14 Ke ẹbọde nsịnudọn̄ ẹto Haggai ye Zechariah, nditọ Israel ẹma ẹtịm ẹkere usụn̄ mmọ, ndien ẹma ẹbọp temple. N̄kpọ nte isua 60 ke ukperedem, nte ededi, Nehemiah ama ekese Jerusalem onyụn̄ okụt ete ke Israel ẹma ẹfiak ẹfre enyịn ẹban̄a Ibet Jehovah. Enye ama enen̄ede n̄kpọ emi. Edi ke edifiak n̄ka ọyọhọ ikaba, enye ama okụt ete ke mme n̄kpọ ẹma ẹfiak ẹdiọk. Enye ọtọt ete: “Ekem ami ndifiọk nte ke ikọnọhọ mme Levite udeme mmọ: ndien mme Levite, ye mme ọkwọ-ikwọ ẹmi ẹnamde utom, ẹma ẹfen̄e ẹka in̄wan̄ mmọ.” (Nehemiah 13:10) Ẹma ẹnen̄ede mfịna emi, ndien “ofụri Judah ẹda ọyọhọ mbak ibokpot, ye eke obufa wine, ye eke aran, duop, ẹdibon ke ufọk unịmn̄kpọ.”—Nehemiah 13:12.
Nditụk Jehovah
15, 16. Ewe edikpu ke Jehovah, ebede ke Malachi, akasua ọnọ Israel?
15 Etie, nte prọfesi oro Malachi eketịn̄de ekedi ke ukem ikpehe ini emi, ndien prọfet oro asian nnyịn ekese aban̄a unana edinam akpanikọ Israel. Enye ewet mme ikọ oro Jehovah eketịn̄de ọnọ Israel ete: “Edieke ami ndide ete, ukpono mi odu m̀mọ̀n̄? Edieke ami nnyụn̄ ndide andinyene, uten̄e mi odu m̀mọ̀n̄? Ntem ke Jehovah mme udịm ọdọhọ mbufo mme oku ẹmi ẹsede enyịn̄ mi ke ndek.” Nso ikakwan̄a? Jehovah anam an̄wan̄a ete: “Ke ini mbufo ẹdade nnan ẹdi ẹdiwa, nte idiọkke? Ndien ke ini mbufo ẹdade mbụn̄ọ ye eke ọdọn̄ọde udọn̄ọ ẹdi, nte idiọkke?”—Malachi 1:6-8.
16 Ke in̄wan̄în̄wan̄ usụn̄ emi, Malachi owụt nte ke adan̄aemi nditọ Israel ẹkedade mme uwa ẹdi, mbon oro mîkọfọnke ẹkewụt ata idiọk unana ukpono. Malachi ama ewet n̄ko ete: “Toto ke eyo mme ete mbufo, mbufo ẹmekabade ẹkpọn̄ mme ewụhọ mi, inyụn̄ inịmke: mbufo ẹkabade ẹtiene mi, ndien ami nyekabade ntiene mbufo, Jehovah mme udịm ọdọhọ.” Nditọ Israel ẹma ẹkere se ikedide akpan n̄kpọ oro mmọ ẹkenyenede ndinam, ntre mmọ ẹma ẹbụp ẹte: “Nnyịn idida nso ifiak?” Jehovah ama ọbọrọ ete: “Nte owo okpotụk Abasi, koro mbufo ẹtụkde mi?” Didie ke Israel okotụk Jehovah, kpa Enyeemi enyenede kpukpru inyene? Jehovah ama ọbọrọ ete: “Ke ọyọhọ mbak n̄kpọ duop ye ke edimenede uwa.” (Malachi 3:7, 8) Ih, ke nditre ndida ọyọhọ mbak duop ye uwa mmọ ndi, Israel ke okotụk Jehovah!
17. Nso uduak ke ọyọhọ mbak duop ye mme uwa ẹkeyọhọ ke Israel, ndien nso un̄wọn̄ọ ke Jehovah akanam aban̄a ọyọhọ mbak duop?
17 Mbụk n̄kpọntịbe eset emi owụt nte ọyọhọ mbak duop ye mme uwa ẹkedide akpan n̄kpọ ke Israel. Mmọ ẹkedi edinanam n̄wụt esịtekọm oro andinọ ekenyenede. Ndien mmọ ẹma ẹnọ utuakibuot akpanikọ un̄wam ke n̄kan̄ n̄kpọ obụkidem. Ntem, Jehovah ama akaiso ndisịn udọn̄ nnọ Israel ete: “Mbufo ẹda kpukpru ọyọhọ mbak duop ẹdisịn ke ufọk unịmn̄kpọ.” Ke owụtde se iditienede edieke mmọ ẹnamde emi, Jehovah ama ọn̄wọn̄ọ ete: “[Nye]n̄wan̄a nti n̄kpọ nnọ mbufo tutu akaha.” (Malachi 3:10) Edidiọn̄ Jehovah eyenam mmọ ẹforo.
“Ọbọn̄” Emekpe Ikpe
18. (a) Edidi anie ke Jehovah ọkọtọt aban̄a? (b) Edidi temple akada itie ini ewe, anie ke emi akabuana, ndien nso ikedi utịp inọ Israel?
18 Jehovah ebe ke Malachi ama ọtọt n̄ko ete ke imọ iyedi ndikpe ikpe nnọ ikọt esie. “Sese, ami nyedọn̄ angel mi, ndien enye eyebem mi iso ọdiọn̄ usụn̄: ndien ọbọn̄ emi mbufo ẹyomde, kpa angel ediomi emi enemde mbufo esịt, eyebuat mbufo ke temple esie ke idaha kiet. Sese, enye ke edi.” (Malachi 3:1) Ini ewe ke un̄wọn̄ọ edidi temple akada itie? Ke Matthew 11:10, Jesus ama okot oto prọfesi Malachi aban̄ade angel emi edidiọn̄de usụn̄ onyụn̄ ada enye etịn̄ aban̄a John Andinịm Owo Baptism. (Malachi 4:5; Matthew 11:14) Ntre ke 29 E.N., ini ikpe ama edisịm! Anie ekedi ọyọhọ angel iba, kpa angel ediomi oro editienede Jehovah, kpa “Ọbọn̄,” ika temple? Edi Jesus ke idemesie ndien ke idaha iba enye ama edi ke temple ke Jerusalem onyụn̄ anam enye asana ke utịbe utịbe usụn̄, ebịnde mme idiọk okpụhọ-okụk osion̄o do. (Mark 11:15-17; John 2:14-17) Kaban̄a ini ikpe eke akpa isua ikie emi, Jehovah ama obụp ebe ke prọfesi ete: “Anie ekeme ndiyọ usen edidi esie? Anie owo ekeme ndida ke ini enye ayararede idemesie?” (Malachi 3:2) Ke akpanikọ, Israel ikadaha. Ẹma ẹkese mmọ, ẹkụt ẹte ke mmọ idotke, ndien ke 33 E.N., ẹma ẹtop mmọ ẹduọk nte edimek idụt Jehovah.—Matthew 23:37-39.
19. Ke nso usụn̄ ke nsụhọ ẹkefiak ẹtiene Jehovah ke akpa isua ikie, ndien nso edidiọn̄ ke mmọ ẹkebọ?
19 Nte ededi, Malachi ama ewet n̄ko ete: “[Jehovah] onyụn̄ etie etem silver onyụn̄ anam asana: onyụn̄ anam nditọ Levi ẹsana, onyụn̄ ọdiọn̄ mmọ nte gold ye silver, man mmọ ẹwa uwa ẹnọ Jehovah nte enende.” (Malachi 3:3) Ke n̄kemuyo ye emi, ke adan̄aemi ẹketopde n̄wakn̄kan mbon oro ẹkedọhọde ke inam n̄kpọ Jehovah ke akpa isua ikie ẹduọk, ẹma ẹnam ndusụk mmọ ẹsana ẹnyụn̄ ẹdi ẹbịne Jehovah, ẹwade mme uwa oro enye onyịmede. Mmanie? Mbon oro ẹkenyịmede Jesus, kpa angel ediomi. Ke Pentecost eke 33 E.N., owo 120 ke otu mbon ẹmi ẹkenyịmede mi ẹma ẹsop idem ke ubet enyọn̄ ke Jerusalem. Ke ẹbọde nsịnudọn̄ ẹto edisana spirit, mmọ ẹma ẹtọn̄ọ ndinọ enọ uwa ke edinen ido, ndien ibat mmọ ama ọkọri usọp usọp. Ibịghike, mmọ ẹma ẹsuana ẹyọhọ ofụri Obio Ukara Rome. (Utom 2:41; 4:4; 5:14) Ntre, nsụhọ ẹma ẹfiak ẹtiene Jehovah.—Malachi 3:7.
20. Ke ini ẹkesobode Jerusalem ye temple esie, nso ikotịbe inọ obufa Israel Abasi?
20 Nsụhọ Israel emi, ẹmi ẹkedide ẹdisịne, yak idọhọ, mme Gentile ẹmi ẹkedade-da ẹdisịn ke ekpat eto edide Israel, ekedi obufa “Israel Abasi,” kpa idụt oro mme Christian oro ẹyetde aran ke spirit ẹnamde. (Galatia 6:16; Rome 11:17) Ke 70 E.N., kpa “usen oro . . . asak[de] nte usan̄uyo” ama edikem ọnọ Israel eke obụk ke ini mbonekọn̄ Rome ẹkesobode Jerusalem ye temple esie. (Malachi 4:1; Luke 19:41-44) Nso ikotịbe inọ Israel eke spirit Abasi? Jehovah ama owụt mmọ “mbọm, kpa nte owo atuade eyen esie eke anamde n̄kpọ ọnọ enye mbọm.” (Malachi 3:17) Esop Christian oro ẹyetde aran ama anam ntịn̄nnịm ntọt Jesus. (Matthew 24:15, 16) Mmọ ẹma ẹbọhọ, ndien edidiọn̄ Jehovah ama akaiso ndinam mmọ ẹforo ke n̄kan̄ eke spirit.
21. Mme mbụme ewe ẹban̄ade Malachi 3:1 ye 10 ẹsụhọ?
21 Emi owụt unen Jehovah didie ntem! Nte ededi, didie ke Malachi 3:1 osu mfịn? Ndien didie ke Christian akpanam n̄kpọ aban̄a nsịnudọn̄ oro ke Malachi 3:10 ndida ofụri ọyọhọ mbak duop ndisịn ke ufọk unịmn̄kpọ? Ẹyeneme ẹban̄a emi ke ibuotikọ efen.
Nte Afo Emekeme Ndinam An̄wan̄a?
◻ Ke ofụri ofụri, anie edi Enyeemi kpukpru inyene otode?
◻ Ntak emi uforo n̄kpọ eke spirit ọfọnde akan inyene obụkidem?
◻ Nso uduak ke ọyọhọ mbak duop ye mme uwa ẹkeyọhọ ke Israel?
◻ Ini ewe ke Jehovah, kpa “Ọbọn̄,” ekedi ke temple ndikpe ikpe nnọ Israel, ndien ye nso utịp?
◻ Mmanie ẹkefiak ẹtiene Jehovah ke enye ama ekedi ke temple esie ke akpa isua ikie E.N.?
[Ndise ke page 10]
Jesus, kpa angel ediomi emi adade ke ibuot Jehovah, ama edi ke temple ndikpe ikpe ke akpa isua ikie E.N.