Usen Jehovah Oro Enyenede Ndịk Emekpere
“Ẹwet n̄wed editi ke iso esie ẹnọ mme abak Jehovah ye mme ẹkere enyịn̄ esie.”—MALACHI 3:16.
1, 2. Ewe enyene-ndịk usen ke Malachi ekebemiso ọnọ ntọt aban̄a?
ENYENE-NDỊK n̄kpọ! Nte eyo ekesierede ke August 6, 1945, ẹma ẹsobo akwa obio kiet ke isọrọ kiet. N̄kpọ nte owo 80,000 ẹma ẹkpan̄a! Ediwak tọsịn owo ke mme itie duop ẹma ẹda unan idiọk idiọk! Ikan̄ oro asakde idat idat! Bọmb nuclear ama anam utom esie. N̄kpọ eketie didie ye Mme Ntiense Jehovah ke ini nsobo oro? Ntiense kiet kpọt okodu ke Hiroshima—emi ẹkekụkde ẹsịn ke ufọk-n̄kpọkọbi ke ntak nsọn̄ọnda Christian esie. Ufọk-n̄kpọkọbi oro ama owụre ofụri ofụri, edi eyenete nnyịn ikadaha unan. Nte enye eketịn̄de, bọmb atọm ama otop enye osio ke ufọk-n̄kpọkọbi—eyedi emi ekedi n̄kukụre eti n̄kpọ emi bọmb oro akanamde.
2 Okposụkedi uyom bọmb oro ekenyenede ndịk, enye idịghe n̄kpọ ndomokiet ke ẹmende ẹdomo ye “akwa ye ndịk ndịk usen Jehovah” emi akam odude ke iso. (Malachi 4:5) Oh, ih, mme usen ẹmi ẹkenyenede ndịk ẹma ẹdu ke ini edem, edi usen Jehovah enyeemi eyekan kpukpru mmọ.—Mark 13:19.
3. Nso ukpụhọde ke ẹnyene ndikụt ke ufọt “kpukpru obụk owo” ye ubon Noah adade okosịm Ukwọ?
3 Ke eyo Noah “kpukpru owo [ẹma ẹbiat] usụn̄ mmọ ke isọn̄,” ndien Abasi ama ọdọhọ ete: “Utịt kpukpru obụk owo emedi ke iso mi, koro oto mmọ afai ọyọhọ ke isọn̄; ndien, sese, ami mmọn̄ nsobo mmọ ye isọn̄.” (Genesis 6:12, 13) Nte ẹwetde ke Matthew 24:39, Jesus ọkọdọhọ ete ke mme owo ‘ikọfiọkke tutu ukwọ edi edimen mmọ kpukpru efep.’ Edi anam-akpanikọ Noah, “ọkwọrọ edinen ido,” ọkọrọ ye ubon esie oro akabakde Abasi, ẹma ẹbọhọ Ukwọ oro.—2 Peter 2:5.
4. Nso ntọt uwụtn̄kpọ ke Sodom ye Gomorrah ẹnọ?
4 “Kpasụk ntre n̄ko,” Jude 7 obụk ete, “Sodom ye Gomorrah ye n̄kpet n̄kpet obio eken, ẹmi ẹkenyụn̄ ẹtienede mmọ ẹsịn idem ke use ye ido eke mîkemke, [ẹkedi] uwụtn̄kpọ, mmọ ẹnyụn̄ ẹkụt ufen nsinsi ikan̄.” Mbon unana uten̄e Abasi oro ẹma ẹtak ke ntak ndek ndek mbubiam usụn̄uwem mmọ. Yak mme idụt unam idan̄ eke ererimbot eyomfịn emi ẹkpeme idem! Tịmfiọk, nte ededi, ete ke ẹma ẹnyan̄a Lot emi akabakde Abasi ye nditọiban esie ke ini nsobo oro, idem kpa nte ẹdikpemede mme andituak ibuot nnọ Jehovah ke ini akwa ukụt oro asan̄ade ekpere usọp usọp.—2 Peter 2:6-9.
5. Nso ke nnyịn ikeme ndikpep nto mme ubiereikpe oro ẹkebierede ẹnọ Jerusalem?
5 Ndien kere ban̄a mme ntọt uwụtn̄kpọ oro ẹkenọde ke ini Jehovah akadade mbonekọn̄ oro ẹkedade en̄wan ẹdụk ndisobo Jerusalem, kpa ubọn̄ ubọn̄ obio oro inikiet ekedide “idatesịt ofụri isọn̄.” (Psalm 48:2) Mme n̄kpọ mmọn̄eyet ẹmi eketịbe, akpa ke 607 M.E.N. ndien n̄ko ke 70 E.N., koro mbon oro ẹkedọhọde ke idi ikọt Abasi ẹkekpọn̄de utuakibuot akpanikọ. Ke inemesịt, mme anam-akpanikọ asan̄autom Jehovah ẹma ẹbọhọ. Ẹtịn̄ ẹban̄a nsobo eke 70 E.N. (oro ẹwụtde ke isọn̄ isọn̄) nte “ukụt, eke orụk oro akanam mîdụhe toto Abasi ọkọtọn̄ọ ndibot n̄kpọ tutu osịm emi.” Enye ama emen ọsọn̄ibuot editịm n̄kpọ mme Jew efep ofụri ofụri, ndien ke akpanikọ ke afan̄ oro ‘idinyụn̄ idụhe aba.’ (Mark 13:19) Edi idem nsobo ubiereikpe Abasi emi ekedi sụk uwụtn̄kpọ “akwa ukụt” oro edịghede ofụri editịm n̄kpọ ererimbot emi kemi.—Ediyarade 7:14.
6. Ntak emi Jehovah esiyakde nsobo ada itie?
6 Ntak emi Abasi akpayakde mme enyene-ndịk afanikọn̄, ye ekese uwem ẹtakde, ẹtịbe? Ke se iban̄ade Noah, Sodom ye Gomorrah, ye Jerusalem, Jehovah ekebiere ikpe ọnọ mbon oro ẹkebiatde usụn̄ mmọ ke isọn̄, ẹmi ẹkebiatde ediye ekondo emi ye ataata usabaden̄kpọ ye mbiara ido uwem, ẹmi ke nsọn̄ibuot ẹkewọn̄ọrede ẹkpọn̄, m̀mê ẹsịnde, utuakibuot akpanikọ. Mfịn nnyịn idu ke mben ọyọhọ ubiereikpe nsobo oro edifụkde ofụri ererimbot.—2 Thessalonica 1:6-9.
“Ke Ukperedem Ini”
7. (a) Mme ubiereikpe Abasi eke eset ẹkedi prọfesi ẹnyande ubọk ẹwụt nso? (b) Nso ubọn̄ ubọn̄ idotenyịn idu ke iso?
7 Mme nsobo eke ini edem oro ẹkedi prọfesi ẹnyande ubọk ẹwụt enyene-ndịk akwa ukụt oro ẹtịn̄de ẹban̄a ke 2 Peter 3:3-13. Apostle oro ọdọhọ ete: “Ke akpa itie, ẹfiọk emi ẹte, ke ukperedem ini mbon nsahi ẹyeda nsahi ẹdi; mmọ ẹyesan̄a ke mme idiọkitọn̄ mmọ.” Ekem, ke owụkde ntịn̄enyịn ke eyo Noah, Peter ewet ete: “Mmọn̄ ke ẹkeda ẹfụk ẹnyụn̄ ẹsobo ererimbot emi okodude adan̄aoro. Edi amaedi ikpaenyọn̄ ye isọn̄ ẹmi ẹdude kemi, ikọ Abasi okomụm mmọ onịm ọnọ ikan̄; ekpeme mmọ ẹnịm ẹnọ usen eke Abasi edikpede ikpe ye mmọemi mîbakke Enye, edinyụn̄ osobo mmọ.” Ke etienede n̄kponn̄kan ke otu kpukpru ukụt oro, ukara Obio Ubọn̄ Messiah oro ẹkebetde ke anyanini eyebiọn̄ọde—“obufa enyọn̄ ye obufa isọn̄ . . . ; ndien edi do ke edinen ido edidụn̄.” Nso idara idara idotenyịn ke emi edi ntem!
8. Didie ke mme n̄kpọntịbe ererimbot ẹsan̄a ẹka utịt?
8 Ke ọyọhọ isua ikie 20 nnyịn emi, mme n̄kpọntịbe ererimbot ẹmekaiso ẹsan̄a ẹbịne utịt. Okposụkedi nsobo Hiroshima mîkedịghe usen ndụn̄ọde Abasi, enye ekeme ndisịne ke otu “n̄kpọndịk” oro Jesus eketịn̄de ke prọfesi aban̄a utịt ini. (Luke 21:11) Enye ama ọtọn̄ọ ndịghe nuclear oro osụk ofụmede nte oyobio obubịt enyọn̄ ndidịghe ubonowo. Ntre, ibuotikọ kiet ke The New York Times eke November 29, 1993, okot ete: “Mme Ikan̄ Ẹkeme Nditre Ndinyene Ufọn edi N̄kpọekọn̄ Nuclear ke Ẹsụk Ẹnanam Utom.” Kan̄a kemi, ekọn̄ ofụri ererimbot, eke orụk, ye eke ekpụk ke ẹkaiso ndinyene idiọk utịp. Ke mme ekọn̄ ini edem ata ediwak mbon unọmọ ekedi ke otu mbonekọn̄. Mfịn, ẹtọt mbahade 80 eke ikie ke otu mbon unọmọ ekọn̄ nte ẹdide mbio obio, ke adianade ye ediwak miliọn owo oro ẹfen̄ede ẹkpọn̄ obio mmọ nte mbonitọk ekọn̄.
9. Didie ke mme adaiso ido ukpono ẹwụt itie ufan ye ererimbot?
9 Mme adaiso ido ukpono ẹsiwak ndiwụt, ẹnyụn̄ ẹkaiso ndiwụt, ‘itie ufan ye ererimbot’ ebe ke ndisịn idem ifịk ifịk ke mme ekọn̄ ye mme edinam ukpụhọ ukara oro ẹduọkde iyịp. (James 4:4) Ndusụk mmọ ẹma ẹdiana kiet ye mme ọdiọk itọn̄ ikpọ mbonurua ererimbot nte mmọemi ẹbotde akpakịp n̄kpọekọn̄ ẹnyụn̄ ẹsiakde mme n̄ka unyam n̄kpọsọn̄ ibọk. Ke uwụtn̄kpọ, ke ọtọtde aban̄a ediwot emi ẹkewotde owo South America emi ekedide adaiso ke unyam n̄kpọsọn̄ ibọk, The New York Times ọkọdọhọ ete: “Ke odịpde mbubehe unyam n̄kpọsọn̄ ibọk esie ke edem mbubehe uforo oro ẹdọhọde ke ibet onyịme ye ekikere uwụt mfọnido, enye ama odiomi edinam radio onyụn̄ esiwak ndisan̄a ye mme oku Roman Catholic.” The Wall Street Journal ama ọtọt ete ke adianade ye edibiat uwem ediwak miliọn mbon oro ẹkabarede ẹdi mme ẹnyene mbumehe n̄kpọsọn̄ ibọk, adaiso unyam n̄kpọsọn̄ ibọk oro ke idemesie ama ada usụn̄ ke ndiwot ediwak tọsịn owo. The Times eke London ọkọdọhọ ete: “Mme owot owo ẹsiwak ndikpe okụk man ẹnịm san̄asan̄a Mass ndinọ ekọm . . . kpa ke ukem ini oro edinam ubụk mbon oro mmọ ẹwotde adade itie ke ebiet en̄wen.” Nso utọ idiọkido ke emi edi ntem!
10. Didie ke nnyịn ikpese mme idaha ererimbot oro ẹsụk ẹdiọkde-diọk ẹkaiso?
10 Anie ọfiọk m̀mê nso utọ nsobo ke mbon oro demon ẹnọde odudu ẹdikeme ndisụk nda nnọmọ isọn̄ emi? Nte 1 John 5:19 ọdọhọde, “ofụri ererimbot onyụn̄ esịne ke ubọk andidiọk,” Satan kpa Devil. Mfịn edi n̄kpọ “mbọm [ọnọ] isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” (Ediyarade 12:12) Ke inemesịt, nte ededi, N̄wed Mbon Rome 10:13 ọsọn̄ọ ọnọ nnyịn ete ke “owo ekededi eke edisemede okot enyịn̄ Jehovah eyebọhọ.”
Abasi Emekpere ke Ikpe
11. Mme ewe idaha ke Israel ẹkenam Malachi etịn̄ prọfesi?
11 Kaban̄a n̄kpet n̄kpet ini iso ubonowo, prọfesi Malachi anam se iyomde nditịbe an̄wan̄a. Ẹsiak Malachi akpatre ke otu anyan udịm mme prọfet Hebrew eset. Israel ama okụt nsobo Jerusalem ke 607 M.E.N. Edi isua 70 ke ukperedem Jehovah ama owụt mbọm mbọm ima-mfọnido ke ndifiak nda idụt oro nnyọn̄ ke isọn̄ esie. Ke ufan̄ isua ikie, nte ededi, Israel ama afiak oyo odụk nsọn̄ibuot ye idiọkido. Mme owo oro ẹma ẹsuene enyịn̄ Jehovah, ẹfụmi ndinen mbet esie, ẹnyụn̄ ẹsabade temple esie ke ndida mme unam ẹmi ẹdide nnan, mbụn̄ọ, ẹnyụn̄ ẹdọn̄ọde ndiwa uwa. Mmọ ẹma ẹsion̄o iban uyen mmọ ndọ man ẹkpekeme ndidọ iban isenidụt.—Malachi 1:6-8; 2:13-16.
12, 13. (a) Nso edinam asana ikedi se ẹyomde kaban̄a otu oku oro ẹyetde aran? (b) Didie ke akwa otuowo ẹbọ ufọn n̄ko ẹto edinam asana emi?
12 Ama oyom utom edinam asana. Ẹtịn̄ ẹban̄a emi ke Malachi 3:1-4. Ukem nte Israel eset, ama oyom ẹnam Mme Ntiense Jehovah eyomfịn ẹsana, ntre utom edinam asana oro Malachi etịn̄de aban̄a ekeme ndinyene n̄kpọ ndinam ye mmọ. Nte akpa ekọn̄ ererimbot akasan̄ade ekpere utịt esie, ndusụk ke otu Nditọ Ukpepn̄kpọ Bible, nte ẹkediọn̄ọde Mme Ntiense adan̄aoro, ikadaha ata san̄asan̄a ke mme mbubehe ererimbot. Ke 1918, Jehovah ama ọdọn̄ “angel ediomi” Esie, Christ Jesus, aka ndutịm temple Esie eke spirit ndikanam ekpri otu mme andituak ibuot nnọ Enye ẹsana ẹbọhọ mme ndo ererimbot emi. Ke nditịn̄ ke prọfesi, Jehovah ama obụp ete: “Anie ekeme ndiyọ usen edidi [isụn̄utom oro]? Anie owo ekeme ndida ke ini enye ayararede idemesie? Koro enye ebietde ikan̄ usọ gold, onyụn̄ ebiet [suọp] mme ọdiọn̄-ọfọn̄: enye onyụn̄ etie etem silver onyụn̄ anam asana: onyụn̄ anam nditọ Levi [otu oku oro ẹyetde aran] ẹsana, onyụn̄ ọdiọn̄ mmọ nte gold ye silver, man mmọ ẹwa uwa ẹnọ Jehovah nte enende.” Nte mbon oro ẹnamde ẹsana, mmọ ẹmenam kpasụk ntre!
13 Otu oku oro ẹyetde aran do ẹdi n̄kpasịp 144,000. (Ediyarade 7:4-8; 14:1, 3) Edi, nso kaban̄a mme Christian eken oro ẹyakde idem ẹnọ mfịn? Ke ẹwakde ẹsịm ediwak miliọn idahaemi, mmọemi ẹnam “akwa otuowo” oro n̄ko anade ẹnam ẹsana ẹbọhọ mme usụn̄ ererimbot, ‘ẹyetde ọfọn̄idem mmọ ẹnam afia ke iyịp Eyenerọn̄.’ (Ediyarade 7:9, 14) Ntem, ebede ke ndiwụt mbuọtidem ke uwa ufak Eyenerọn̄ oro, Christ Jesus, mmọ ẹkeme ndinyene edisana idaha ke iso Jehovah. Ẹn̄wọn̄ọ ndinọ mmọ ubọhọ mbe ofụri akwa ukụt oro, kpa usen Jehovah oro enyenede ndịk.—Zephaniah 2:2, 3.
14. Mme ikọ ewe ke ikọt Abasi ẹkpenyene ndinam mfịn nte mmọ ẹkade iso ndikọri obufa edu?
14 Adianade ye nsụhọ oku, ana akwa otuowo emi ẹnam n̄kaiso ikọ Abasi ẹmi: “Ami nyesan̄a n̄kpere mbufo ke ikpe, nnyụn̄ nnịm owowo ntiense mban̄a mbia idiọn̄ ye mme esịn efịbe, ye mmọ eke ẹn̄wọn̄ọde nsu, ye mmọ eke ẹtụkde anamutom ke utịp esie, ẹtụk ebeakpa ye eyenakpa, ẹmi ẹnyụn̄ ẹfịkde esenowo, ndien mîbakke mi . . . Koro ami ndide Jehovah n̄kpụhọkede.” (Malachi 3:5, 6) Baba, mme idaha oro Jehovah onịmde ikpụhọkede, ntre ke uten̄e Jehovah, ana ikọt esie mfịn ẹfehe ẹkpọn̄ kpukpru orụk ukpono ndem ẹnyụn̄ ẹtịn̄ akpanikọ, ẹnam akpanikọ, ẹnyụn̄ ẹfọn ido nte mmọ ẹkade iso ndikọri edu Christian.—Colossae 3:9-14.
15. (a) Nso ikot oro owụtde mbọm ke Jehovah ọnọ? (b) Didie ke nnyịn ikpefep ‘nditụk’ Jehovah?
15 Jehovah ọnọ ikot osịm owo ekededi emi ekemede ndidi ama ọwọn̄ọde ọkpọn̄ ndinen usụn̄ esie, ọdọhọde ete: “Mbufo ẹkabade ẹtiene mi, ndien ami nyekabade ntiene mbufo.” Edieke mmọemi ẹbụpde ẹte: “Nnyịn idida nso ifiak?” enye ọbọrọ ete: ‘Mbufo ke ẹtụk mi.’ Ndien ke ndibọrọ mbụme oro ẹkefiakde ẹbụp: “Nnyịn ikotụk fi ke nso?” Jehovah ọdọhọ ke mmọ ẹketụk imọ ebe ke nditre ndida ata mfọnn̄kan n̄kpọ mmọ ndi nte uwa kaban̄a utom temple esie. (Malachi 3:7, 8) Ke ima ikakabade idi ubak ikọt Jehovah, nnyịn ke akpanikọ ikpenyene ndisịn mfọnn̄kan ikpehe odudu, ukeme, ye inyene obụkidem nnyịn ke utom Jehovah. Ntem, utu ke nditụk Abasi, nnyịn ‘ikaiso ndiyom Obio Ubọn̄ ye edinen ido Esie.’—Matthew 6:33.
16. Nso nsịnudọn̄ ke nnyịn ikụt ke Malachi 3:10-12?
16 Akwa utịp odu ọnọ kpukpru mbon oro ẹsịnde mme ibụk ibụk usụn̄uwem uma inyene ererimbot emi, nte Malachi 3:10-12 owụtde: “Ẹda emi ẹdomo mi, Jehovah mme udịm ọdọhọ, mme ami ndiberekede window heaven nnọ mbufo, nnyụn̄ n̄n̄wan̄a nti n̄kpọ nnọ mbufo, tutu akaha.” Ye kpukpru mbon oro ẹwụtde esịtekọm, Jehovah ọn̄wọn̄ọ uforo ye mbun̄wụm eke spirit. Enye adian do ete: “Kpukpru mme idụt ẹyenyụn̄ ẹbat ẹte ke ọfọn ye mbufo: koro mbufo ẹyedi isọn̄ inemesịt.” Nte oro idịghe ntre ke otu ediwak miliọn ikọt Abasi oro ẹwụtde esịtekọm ke ofụri isọn̄ mfịn?
Mbon Nsọn̄ọnda ke N̄wed Uwem
17-19. (a) Didie ke ndutịme odude ke Rwanda otụk nditọete nnyịn do? (b) Ye nso ekikere ke kpukpru mme anam-akpanikọ mbon ẹmi ẹsan̄a ẹka iso iso?
17 Ke nde emi, nnyịn imekeme nditịn̄ mban̄a nsọn̄ọnda nditọete nnyịn iren ye iban ke Rwanda. Mmọ kpukpru ini ẹsida mfọnn̄kan uwa eke spirit ẹdi ke ufọk utuakibuot eke spirit Jehovah. Ke uwụtn̄kpọ, ke Mbono District “Ukpepn̄kpọ Abasi” mmọ ke December 1993, mme asuanetop Obio Ubọn̄ mmọ ẹdide owo 2,080 ẹma ẹnyene ofụri mme andidụk ẹdide owo 4,075. Mbufa Mme Ntiense 230 ẹkena baptism, ndien ke otu mmọemi, se ikperede ndisịm owo 150 ẹma ẹsịn enyịn̄ ke utom usiakusụn̄ unọ un̄wam ke ọfiọn̄ oro eketienede.
18 Ke ini usua eke ekpụk akasiahade ke April 1994, ẹma ẹwot Mme Ntiense 180 ke nsụhọde n̄kaha, esịnede esenyịn obio ke Kigali, kpa ibuot obio, ye ofụri ubon esie. Mme akabade n̄wed itiokiet ke ọfis Watch Tower Society ke Kigali, emi inan̄ ke otu mmọ ẹdide mbon Hutu ndien iba ẹdide mbon Tutsi, ẹma ẹkaiso ndinam utom ke ediwak urua ke idak n̄kpọsọn̄ ndịghe, tutu mbon Tutsi ẹkenyene ndifehe, n̄kukụre ẹdide se ẹkewotde mmọ ke itie ukpeme obio. Ke akpatre, ke ẹmende se ikosụhọde ke otu ukwakutom kọmputa mmọ, owo inan̄ oro ẹkesụhọde ẹma ẹfehe ẹka Goma, ke Zaire, emi mmọ ke edinam akpanikọ ẹkekade iso ndikabade Enyọn̄-Ukpeme nsịn ke usem Kinyarwanda.—Isaiah 54:17.
19 Mme Ntiense ẹdide mbonitọk ekọn̄ mi, okposụkedi ẹdude ke idiọk idaha, ẹma ẹsibem iso kpukpru ini ẹyom udia eke spirit utu ke mme n̄kpọ obụkidem. Ye akwa n̄waidem, ima ima nditọete ke ediwak idụt ẹma ẹkeme ndida mme n̄kpọ nsọk mmọ. Ebede ke ikọ oro mmọ ẹtịn̄de ye edinam n̄kpọ ke nde ke nde ke idak n̄kpọsọn̄ idaha, mbonitọk ekọn̄ ẹmi ẹmenọ utịbe utịbe ikọ ntiense. Mmọ ke akpanikọ ẹkaiso ndida mfọnn̄kan n̄kpọ mmọ ndi ke utuakibuot Jehovah. Mmọ ẹmewụt ukem ekikere Paul oro ẹtịn̄de ke N̄wed Mbon Rome 14:8: “Edieke nnyịn idude uwem, ke idu inọ Ọbọn̄; onyụn̄ edieke ikpade, ke ikpa inọ Ọbọn̄.”
20, 21. (a) Enyịn̄ mmanie ke owo mîwetke isịn ke n̄wed editi Jehovah? (b) Enyịn̄ mmanie ẹdu ke n̄wed oro, ndien ntak-a?
20 Jehovah esinịm n̄wetnnịm n̄kpọ aban̄ade kpukpru mbon oro ẹsọn̄ọde ẹda ẹnam n̄kpọ ẹnọ enye. Prọfesi Malachi akaiso ete: “Ndien mme abak Jehovah ẹneme kiet ye kiet: ndien Jehovah akpan̄ utọn̄, onyụn̄ okop, mmọ ẹnyụn̄ ẹwet n̄wed editi ke iso esie ẹnọ mme abak Jehovah ye mme ẹkere enyịn̄ esie.”—Malachi 3:16.
21 Edi akpan n̄kpọ didie ntem mfịn ete iwụt mbak Abasi ke ndikpono enyịn̄ Jehovah! Ke ndinam ntre, nnyịn idinyeneke ubiomikpe, nte mbon oro ẹmade ndinọ mme ndutịm ererimbot emi ibetedem ẹdinyenede. Ediyarade 17:8 obụk ete ke owo “[iwetke] enyịn̄ mmọ isịn ke n̄wed uwem.” Nte owụtde ifiọk, akakan enyịn̄ oro ẹwetde ke n̄wed uwem Jehovah edi eke Akpan Isụn̄utom uwem, Eyen Abasi, Jesus Christ. Matthew 12:21 ọdọhọ ete: “Ndien mme Gentile ẹyedori enyịn ke enyịn̄ Esie.” Uwa ufak Jesus edi ubiọn̄ nsinsi uwem ọnọ kpukpru mbon oro ẹwụtde mbuọtidem ke enye. Nso ifet ke edi ntem ndidi se ẹdiande enyịn̄ nnyịn kiet kiet ye enyịn̄ Jesus ke n̄wed oro!
22. Nso ukpụhọde ke ẹdikụt ke ini Jehovah ebierede ikpe?
22 N̄kpọ editie didie ye mme asan̄autom Abasi ke ini ikpe? Jehovah ọbọrọ ke Malachi 3:17, 18 ete: “Nyetua mmọ mbọm, kpa nte owo atuade eyen esie eke anamde n̄kpọ ọnọ enye mbọm. Ndien mbufo ẹyetọn̄ọ ntak ẹkụt nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.” Kpukpru owo ẹyekụt ubahade oro in̄wan̄în̄wan̄: mme idiọkowo, ẹbaharede ẹnịm ẹnọ nsinsi edisịbe mfep, ndien ndinen owo, ẹnọde unyịme ndinyene nsinsi uwem ke ikpehe Obio Ubọn̄. (Matthew 25:31-46) Ntem akwa otuowo eke mbon mbieterọn̄ ẹyebọhọ akwa ye usen Jehovah oro enyenede ndịk.
Nte Afo Emeti?
◻ Mme ubiereikpe ewe ke Jehovah ọkọnọ ke mme ini Bible?
◻ Didie ke mme idaha mfịn ẹbiet mmọ oro ẹkedude ke eset?
◻ Nso edinam asana ida itie ke ndisu prọfesi Malachi?
◻ Enyịn̄ mmanie ke ẹwet ke n̄wed editi Abasi?