‘Ndikụt Pearl Kiet Emi Okponde Ekọm-Urua’

“Obio Ubọn̄ Heaven akpa unyan̄a, mbon unyan̄a ẹnyụn̄ ẹda enye ke nsọn̄ubọk ẹnyene.”—MATTHEW 11:12.

1, 2. (a) Ewe ọsọn̄urua n̄kpọ oro ọsọn̄de ndikụt ke Jesus akasiak ke n̄ke esie kiet aban̄ade Obio Ubọn̄? (b) Nso ke Jesus eketịn̄ ke n̄ke esie aban̄ade pearl emi okponde ekọmurua?

NTE odu n̄kpọ emi afo enen̄erede ada ke ọsọn̄urua tutu afo enyịme ndiyak kpukpru se enyenede ẹtak man enyene n̄kpọ oro? Okposụkedi mme owo ẹsidọhọde ke imenen̄ede isịn idem man isịm utịtmbuba mmimọ—edide okụk, uwọrọetop, odudu, m̀mê akamba itie—ọsọsọn̄ owo ndikụt n̄kpọ oro enen̄erede ọsọn̄ urua tutu enye enyịme ndiyak kpukpru se enye enyenede ẹtak man enye enyene n̄kpọ oro. Ke n̄ke esie kiet oro anamde owo ekere n̄kpọ, emi enye okotopde aban̄a Obio Ubọn̄ Abasi, Jesus Christ ama etịn̄ aban̄a ọsọn̄urua n̄kpọ oro ọsọn̄de ndikụt.

² Jesus okotop n̄ke emi ọnọ mme mbet esie kpọt, kpa n̄ke oro aban̄ade pearl kiet emi okponde ekọmurua. Jesus ọkọdọhọ ete: “Obio Ubọn̄ Heaven ebiet owo-urua eke oyomde ndiye pearl; ndien ke enye ama okụt pearl kiet emi okponde ekọm-urua, aka akanyam kpukpru se enyenede, edep pearl oro.” (Matthew 13:36, 45, 46) Nso ke Jesus okoyom mbon oro ẹkekpan̄de utọn̄ ẹnọ enye ẹkpep ẹto n̄ke emi? Ndien didie ke nnyịn ikeme ndibọ ufọn nto n̄ke Jesus emi?

Pearl Emi Okponde Ekọmurua

3. Ntak emi ẹkedade ndiye pearl ke ata ọsọn̄urua n̄kpọ ke eset?

³ Toto ke eset, ẹda pearl nte n̄kpọmbana ufọk oro ọsọn̄de urua. N̄wed kiet ọdọhọ ke ewet n̄wed owo Rome oro Akamba Pliny, ọkọdọhọ ke pearl ekedi “n̄kpọuto oro ọsọn̄de urua akan kpukpru n̄kpọuto.” Ke mîbietke gold, silver, m̀mê ediwak ọsọn̄urua itiat eken, mme odu uwem n̄kpọ ẹnam pearl. Ẹtịm ẹdiọn̄ọ ke ndusụk n̄kọp ẹkeme ndinam n̄kpri mben̄e itiat ẹkabade ndiye pearl ebe ke ndision̄o mmọn̄ibọk mfụk mmọ nnyụn̄ nnam mmọ ẹdiana kiet. Ke eset, ẹkesida nye-n̄kan pearl akpan akpan ẹto Ididuot Inyan̄, Itụn̄ Inyan̄ibom Persia, ye Inyan̄ibom India—emi ẹkenen̄erede ẹyom usụn̄ ẹkpọn̄ idụt Israel. Eyịghe idụhe Jesus eketịn̄de aban̄a “owo-urua eke oyomde ndiye pearl.” Ama enen̄ede oyom ẹsịn ọkpọsọn̄ ukeme mbemiso ẹkekemede ndikụt nti pearl.

4. Nso akpan n̄kpọ idu ke n̄ke Jesus aban̄ade owo urua emi oyomde pearl?

⁴ Idem okposụkedi ndiye pearl ẹdide ọsọn̄urua n̄kpọ ke anyan ini idahaemi, ana in̄wan̄-in̄wan̄ nte ke ekọmurua mmọ ikakam idịghe akpan n̄kpọ oro Jesus eketịn̄de aban̄a ke n̄ke esie. Ke n̄ke emi, Jesus ikemenke Obio Ubọn̄ Abasi idomo ye pearl emi okponde ekọmurua, edi ekemen odomo ye “owo-urua eke oyomde ndiye pearl” ye nte enye akanamde n̄kpọ ke ama okokụt ediye pearl. Owo urua, m̀mê anam mbubehe emi okoyomde pearl ikebietke anyam ufọkurua oro mîtịmke inyene ifiọk iban̄a pearl. Enye ama enyene ifiọk m̀mê ukeme ndidiọn̄ọ n̄kpatan̄a n̄kpọ oro ẹnamde pearl oro ọsọn̄de urua. Enye ama ọdiọn̄ọ ata eti pearl ke ini okokụtde, ndien owo ikekemeke ndibian̄a enye ke ndinyam idiọk pearl nnọ enye.

5, 6. (a) Nso idi akpan n̄kpọ oro anade ẹfiọk ẹban̄a owo urua oro ke n̄ke Jesus? (b) N̄ke oro aban̄ade n̄kpọuto oro edịbede ayararede nso aban̄a owo urua oro?

⁵ Enyene n̄kpọ efen oro anade ẹfiọk ẹban̄a owo urua emi. Owo urua emi mînyeneke ifiọk iban̄a pearl ekeme ndibem iso ntie n̄kere ekọmurua oro enye edinyamde pearl man otodo enye ọfiọk nte imọ ididepde pearl inyam idia udori. Enye ekeme ndikere n̄ko m̀mê mbon udep ẹdu oro ẹdibọde imọ pearl emi idep man ikpekeme ndisọsọp nnyam enye. Ke ikọ efen, se ibehede enye edi ndisọsọp nnam udori, idịghe ndidep pearl oro nnyene. Edi idịghe se ikebehede owo urua ke n̄ke Jesus edi oro. Enye ikoyomke udori. Ke akpanikọ, enye ama enyịme ndiyak ‘kpukpru se enye ekenyenede’ ẹtak—eyedi kpukpru inyene esie—man enyene se enye okoyomde.

⁶ Ata ediwak mbonurua ẹkeme ndikere ke se owo urua oro ke n̄ke Jesus akanamde ikowụtke ifiọk ndomokiet. Ata anam mbubehe isisịnke okụk ke utọ mbubehe oro ekemede nditak do. Edi owo urua oro ke n̄ke Jesus ama enyene se enye akadade ke ọsọn̄urua. Enye ikoyomke udori ekededi, edi okoyom ndinyene idatesịt ye uyụhọ ẹtode edinyene n̄kpọ emi enen̄erede ọsọn̄ urua. Ẹnam akpan n̄kpọ emi an̄wan̄a ke n̄ke efen oro Jesus okotopde, emi ebietde n̄ke pearl eke okponde ekọmurua. Enye ọkọdọhọ ete: “Obio Ubọn̄ Heaven ebiet inyene [“n̄kpọuto,” NW] eke edịbede ke in̄wan̄; emi owo kiet okụtde, emen, edịp; ndien ke idatesịt esie, aka akanyam kpukpru se enye enyenede, edep in̄wan̄ oro.” (Matthew 13:44) Ih, idatesịt oro otode edikụt nnyụn̄ nda n̄kpọuto oro nnyene akanam owo oro anyam kpukpru se enye ekenyenede. Ndi mme owo oro ẹtiede ntre ẹdu mfịn? Ndi odu n̄kpọuto oro odotde utọ n̄waidem oro?

Mbon Oro Ẹkefiọkde nte Obio Ubọn̄ Oro Okponde Ekọmurua

7. Didie ke Jesus okowụt ke imenen̄ede ifiọk nte Obio Ubọn̄ oro okponde ekọmurua?

⁷ Jesus eketịn̄ aban̄a “Obio Ubọn̄ Heaven” ke n̄ke oro enye okotopde. Enye ama enen̄ede ọfiọk nte Obio Ubọn̄ oro okponde ekọmurua. Mme mbụk Gospel ẹnen̄ede ẹwụt ke emi edi akpanikọ. Ke ama akana baptism ke 29 E.N., Jesus ama “ọtọn̄ọ ndikwọrọ, ndinyụn̄ ndọhọ, ete, Ẹkabade esịt; koro Ubọn̄ Heaven ke ekpere.” Enye ama ekpep mme owo n̄kpọ aban̄a Obio Ubọn̄ oro ke isua ita ye ubak. Enye ama asan̄a ke ofụri idụt oro, “asan̄a ke ikpọ obio ye obio-in̄wan̄, ọkwọrọ onyụn̄ obụk eti mbụk Ubọn̄ Abasi.”—Matthew 4:17; Luke 8:1.

8. Nso ke Jesus akanam man owụt se Obio Ubọn̄ oro edinamde?

⁸ Ebede ke ndinam ediwak utịben̄kpọ ke ofụri idụt oro—esịnede edinam mbon udọn̄ọ ẹkop nsọn̄idem, edinọ mbon ọbiọn̄ udia, edinam oyobio odobo, ye edikam nnam mme akpan̄kpa ẹset—Jesus okowụt n̄ko se Obio Ubọn̄ Abasi edinamde. (Matthew 14:14-21; Mark 4:37-39; Luke 7:11-17) Ke akpatre, enye ama anam akpanikọ ọnọ Abasi ye Obio Ubọn̄ Esie ke ndinọ uwem esie, akpade n̄kpa usụn̄ Abasi ke eto ndutụhọ. Kpa nte owo urua oro ekenyịmede ndiyak kpukpru se enye ekenyenede ẹtak man enyene “pearl kiet emi okponde ekọm-urua,” Jesus okodu uwem onyụn̄ akpa ke ntak Obio Ubọn̄ Abasi.—John 18:37.

9. Ewe ọsọn̄urua edu ke akpa mme mbet Jesus ẹkenyene?

⁹ Jesus ikowụkke ntịn̄enyịn ke Obio Ubọn̄ oro kpọt, edi enye n̄ko ama atan̄ ekpri otu mme anditiene enye obok. Mmọ n̄ko ẹkedi mbon oro ẹkenen̄erede ẹfiọk nte Obio Ubọn̄ oro okponde ekọmurua. Andrew emi ekedide mbet John Andinịm Owo Baptism ke mbemiso, ama esịne ke otu mmọ. Ke ẹma ẹkekop ikọ ntiense John nte ke Jesus ekedi “Eyen-erọn̄ Abasi,” Andrew ye mbet John efen, eyedi kiet ke otu nditọ Zebedee emi ẹkekotde n̄ko John, ẹma ẹtiene Jesus iwiwa ẹnyụn̄ ẹkabade ẹdi mme andinịm ke akpanikọ. Edi iketreke do. Andrew ama adaha iwiwa ebịne Simon eyeneka esie onyụn̄ ọdọhọ enye ete: “Nnyịn imokụt Messiah.” Esisịt ini ke oro ebede, Simon (emi ẹkedide ẹdidiọn̄ọ nte Cephas, m̀mê Peter) ọkọrọ ye Philip ye ufan esie Nathanael ẹma ẹdifiọk n̄ko ke Jesus edi Messiah. Ke akpanikọ, Nathanael ama ọdọhọ Jesus ye nduaidem ete: “Afo edi Eyen Abasi; Afo edi Edidem Israel.”—John 1:35-49.

Ama Edemede Mmọ Udọn̄ Ndinam N̄kpọ

10. Didie ke mme mbet ẹkenam n̄kpọ ke ini Jesus akafiakde osobo ye mmọ?

¹⁰ Ẹkeme ndimen nduaidem oro Andrew, Peter, John, ye enye oro mbon en̄wen ẹkekopde ke ini mmọ ẹkedide ẹdifiọk Messiah ẹdomo ye nduaidem oro owo urua oro okokopde ke ini enye okokụtde pearl oro okponde ekọmurua. Nso ke mmọ ẹkenam? Mme Gospel itin̄ke kpukpru se mmọ ẹkenamde ke akpa ini oro mmọ ẹkesobode ye Jesus. Etie nte ediwak mmọ ẹma ẹfiak ẹtọn̄ọ mme mbubehe mmọ. Nte ededi, ke n̄kpọ nte ufan̄ ọfiọn̄ itiokiet esịm isua kiet ẹma ẹkebe, Jesus ama afiak osobo ye Andrew, Peter, John, ye James eyeneka John nte mmọ ẹkesụk ẹkọde iyak ke Inyan̄ Galilee.a Ke okụtde mmọ, Jesus ama ọdọhọ ete: “Ẹtiene Mi, ndien nyanam mbufo ẹdi mme ọkọ-owo.” Mmọ ẹkenam n̄kpọ didie? Mbụk Matthew etịn̄ nte Peter ye Andrew ẹkenamde n̄kpọ ete: “Ndien ndo-ndo oro mmọ ẹdaha ẹkpọn̄ iyịre, ẹtiene Enye.” Nnyịn ikot ntem iban̄a nte James ye John ẹkenamde n̄kpọ, ite: “Ndien ndo-ndo oro mmọ ẹdaha ẹkpọn̄ ubom ye ete mmọ, ẹtiene Enye.” Mbụk Luke adian ete ke mmọ ẹma “ẹkpọn̄ kpukpru n̄kpọ, ẹtiene Jesus.”—Matthew 4:18-22; Luke 5:1-11.

11. Nso ikeme ndidi ntak oro mme mbet ẹkeyerede ikot Jesus ye unana ubiatini?

¹¹ Ndi mme mbet ndikeyere ikot oro inikiet inikiet ọkọwọrọ ke mmọ ẹkenam ubiere ye unana editie n̄kere? Baba-o! Idem okposụkedi mmọ ẹkefiakde ẹketiene ubon mmọ ẹkọ iyak ke Jesus ama ekebem iso osobo ye mmọ, eyịghe idụhe nte ke se mmọ ẹkekụtde ẹnyụn̄ ẹkopde ke ini mmọ ẹkedude ye Jesus ẹma ẹnen̄ede ẹtụk esịt ye ekikere mmọ. Eyedi n̄kpọ nte isua kiet oro ekebede tọn̄ọ nte mmọ ẹkesobo ye Jesus ama ekem mmọ ndida ntie n̄kere m̀mê akpana itiene enye. Edi ini ama ekem mmọ ndinam ubiere. Ndi mmọ ẹma ẹnam n̄kpọ nte owo urua oro, emi ekenen̄erede okop idatesịt ke ini okokụtde pearl emi okponde ekọmurua tutu, nte Jesus ọdọhọde, ‘enye adaha onyụn̄ ọsọp’ akanam kpukpru se enye ekemede man edep pearl oro? Ih. Se mmọ ẹkekụtde ẹnyụn̄ ẹkopde ẹma ẹdemede mmọ udọn̄. Mmọ ẹma ẹdifiọk ke ini ama ekem mmimọ ndinam n̄kpọ. Ntem, nte mme mbụk Gospel ẹsiande nnyịn, mmọ ẹma ẹkpọn̄ kpukpru n̄kpọ ye unana ubiatini, ẹnyụn̄ ẹkabade ẹdi mme anditiene Jesus.

12, 13. (a) Ediwak owo oro ẹkekopde ikọ Jesus ẹkenam n̄kpọ didie? (b) Jesus eketịn̄ nso aban̄a mme anam-akpanikọ mbet esie, ndien nso ke ikọ esie ọwọrọ?

¹² Mme anam-akpanikọ mbet emi ẹkekpụhọde didie ntem ye ndusụk mbon oro ẹkesiakde ke mbụk Gospel emi ke ukperedem! Odu ediwak owo oro Jesus akanamde idem ọsọn̄ m̀mê oro enye ọkọnọde udia edi oro ẹkekade iso ke mme mbubehe mmọ. (Luke 17:17, 18; John 6:26) Ndusụk mmọ ẹma ẹkam ẹsịn ikot oro Jesus ọkọnọde mmọ ndikabade ndi mme anditiene imọ. (Luke 9:59-62) Nte ini akakade, Jesus ama etịn̄ ikọ oro owụtde ke mme anam-akpanikọ mbet imọ ẹkedi isio ke ndidọhọ ete: “Ọtọn̄ọde ke mme usen John Baptist tutu esịm emi, Obio Ubọn̄ Heaven akpa unyan̄a, mbon unyan̄a ẹnyụn̄ ẹda enye ke nsọn̄ubọk ẹnyene.”—Matthew 11:12.

¹³ Nso ke ikọ emi “akpa unyan̄a” ọwọrọ? Vine’s Expository Dictionary of Old and New Testament Words ọdọhọ ntem aban̄a ikọedinam Greek oro ẹdade ikọ emi ẹto ete: “Ikọedinam emi ọwọrọ ndisịn ọkpọsọn̄ ukeme nnam n̄kpọ.” Eyen ukpepn̄kpọ Bible oro Heinrich Meyer etịn̄ aban̄a ufan̄ikọ oro ete: “Ke usụn̄ emi ke ẹtịn̄ ẹban̄a ọkpọsọn̄ udọn̄, ukeme ye unyan̄a oro n̄kpọ mîbiọn̄ọke emi ẹnyenede ẹban̄a Obio Ubọn̄ Messiah emi asan̄ade ekpere . . . Udọn̄ oro ẹnyenede ẹban̄a Obio Ubọn̄ mi enen̄ede okpon (tutu owo ikemeke aba nditetie mbet enye).” Ukem nte owo urua oro, mme mbet Jesus emi ẹma ẹsọsọp ẹkụt n̄kpọ oro ekenen̄erede ọsọn̄ urua, ndien mmọ ẹma ẹnyịme ndiyak kpukpru se mmọ ẹkenyenede ẹtak ke ntak Obio Ubọn̄.—Matthew 19:27, 28; Philippi 3:8.

Mbon En̄wen Ẹtiene Ẹyom Pearl Oro Okponde Ekọmurua

14. Didie ke Jesus eketịm mme apostle idem ọnọ utom edikwọrọ Obio Ubọn̄, ndien nso ikedi utịp?

¹⁴ Nte Jesus akakade iso ke utom ukwọrọikọ esie, enye ama ekpep onyụn̄ an̄wam mbon en̄wen ẹyom Obio Ubọn̄. Enye ekebem iso emek owo 12 ke otu mme mbet esie onyụn̄ okot mmọ mme apostle, m̀mê mbon oro enye osiode ọdọn̄. Jesus ama ọnọ mme apostle emi ekese item ke nte mmọ ẹkenyenede ndinam utom ukwọrọikọ mmọ onyụn̄ asian mmọ mme n̄kpọ-ata ye nsọn̄ọn̄kpọ oro mmọ ẹdisobode. (Matthew 10:1-42; Luke 6:12-16) Ke n̄kpọ nte isua iba oro ẹkebede, mmọ ẹma ẹsan̄a ye Jesus nte enye ọkọkwọrọde ikọ ke ofụri idụt oro, ẹnyụn̄ ẹnen̄ede ẹmehe ye enye. Mmọ ẹma ẹkop mme ikọ esie, ẹkụt mme utom odudu oro enye akanamde, ẹnyụn̄ ẹkụt uwụtn̄kpọ oro enye ekenịmde. (Matthew 13:16, 17) Nte eyịghe mîdụhe, kpukpru n̄kpọ emi ẹma ẹnen̄ede ẹtụk mmọ, ndien ukem nte owo urua oro, mmọ ẹma ẹsịn ifịk ẹnyụn̄ ẹda ofụri esịt mmọ ẹyom Obio Ubọn̄.

15. Jesus ọkọdọhọ ke nso ikedi akpan ntak oro mme anditiene imọ ẹkpedatde esịt?

¹⁵ Ke adianade ye apostle 12 oro, Jesus ama “enịm owo ata ye duop en̄wen, onyụn̄ ọdọn̄ mmọ ẹsan̄a iba iba ẹbem Enye iso, ẹka ẹkedụk ke kpukpru obio ye ebiet, eke Enye ke Idem Esie oyomde ndika.” Enye ama asian mmọ n̄ko mme idomo ye nsọn̄ọn̄kpọ oro mmọ ẹdisobode onyụn̄ ọdọhọ mmọ ẹsian mme owo ẹte: “Ubọn̄ Abasi ama asan̄a ekpere mbufo.” (Luke 10:1-12) Esịt ama enen̄ede adat mbet 70 oro ke ini mmọ ẹkenyọn̄de ẹdi ẹdisian Jesus ẹte: “Ọbọn̄, kpa mme demon ẹsụk ibuot ẹnọ nnyịn ke enyịn̄ Fo.” Eyedi idem ama akpa mmọ, ke ini Jesus akasiande mmọ ete ke mmọ ẹyenyene n̄kponn̄kan idatesịt ke ini iso ke ntak ifịk oro mmọ ẹnyenede ẹban̄a Obio Ubọn̄. Enye ọkọdọhọ mmọ ete: “Ẹkûdat esịt koro mme spirit ẹsụkde ibuot ẹnọ mbufo; edi ẹdat esịt koro ẹma ẹwet enyịn̄ mbufo ke heaven.”—Luke 10:17, 20.

16, 17. (a) Nso ke Jesus ọkọdọhọ mme anam-akpanikọ apostle esie ke akpatre okoneyo oro enye okodude ye mmọ? (b) Nso idatesịt ye nsọn̄ọ ke ikọ Jesus ọkọnọ mme apostle?

¹⁶ Ke akpatre okoneyo oro Jesus okodude ye mme apostle, ke Nisan 14, 33 E.N., enye ama ọtọn̄ọ edinam oro ẹkedide ẹdidiọn̄ọ nte Udia Mbubịteyo Ọbọn̄ onyụn̄ ọdọhọ mmọ ẹsinịm enye. Jesus ama ọdọhọ apostle 11 oro ẹkedude ye enye mbubịteyo oro ete: “Mbufo ẹdi mmọ emi ẹkesọn̄ọde ẹda ye Ami ke idomo Mi; kpa nte Ete Mi ekenịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo nte ẹdia n̄kpọ ẹnyụn̄ ẹn̄wọn̄ n̄kpọ ke okpokoro Mi ke Obio Ubọn̄ Mi; mbufo ẹyenyụn̄ ẹtie ke ebekpo ẹkpe ikpe ẹnọ mme esien Israel duopeba.”—Luke 22:19, 20, 28-30.

¹⁷ Anaedi mme apostle ẹkekop idatesịt ye uyụhọ didie ntem ke ini Jesus eketịn̄de mme ikọ oro ọnọ mmọ! Ẹma ẹnọ mmọ n̄kponn̄kan ukpono ye ifet oro akanam owo mînọhọ owo efen ekededi. (Matthew 7:13, 14; 1 Peter 2:9) Ukem nte owo urua oro, mmọ ẹma ẹyak ekese n̄kpọ ẹtak mmimọ man ẹtiene Jesus ẹyom Obio Ubọn̄. Ke emi, ẹma ẹn̄wọn̄ọ ẹnọ mmọ ẹte ke n̄waidem oro mmọ ẹkenamde ikedịghe ikpîkpu.

18. Ke ẹsiode apostle 11 oro ẹfep, mmanie n̄ko ẹdibọ ufọn ẹto Obio Ubọn̄ Abasi?

¹⁸ Idịghe sụk mme apostle oro ẹkedude ye Jesus ke okoneyo oro ẹkenyene ndibọ ufọn nto Obio Ubọn̄ oro. Jehovah akaduak ndida owo 144,000 nsịn ke ediomi Obio Ubọn̄ nte mmọ emi ẹditienede Jesus Christ ẹkara ke utịbe utịbe Obio Ubọn̄ eke heaven. Ke adianade do, apostle John ama okụt ke n̄kukụt, ‘akwa otu owo, eke baba owo kiet mîkemeke ndibat, ẹdade ke iso ebekpo ye ke iso Eyen-erọn̄, ẹnyụn̄ ẹfiori ke ọkpọsọn̄ uyo, ẹte, Yak edinyan̄a enyene Abasi nnyịn emi etiede ke ebekpo, onyụn̄ enyene Eyen-erọn̄.’ Mmọ emi ẹdi mbon oro ẹdidude ke isọn̄ ke ini ukara Obio Ubọn̄ oro.b—Ediyarade 7:9, 10; 14:1, 4.

19, 20. (a) Nso ifet ebererede ọnọ mme owo ẹtode kpukpru idụt? (b) Ewe mbụme ke ẹdineme ke ibuotikọ oro etienede?

¹⁹ Esisịt ini mbemiso Jesus ọkọdọkde ke heaven, enye ama ọnọ mme anam-akpanikọ anditiene enye ewụhọ emi: “Ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu esịm utịt ererimbot.” (Matthew 28:19, 20) Ntem, mme owo ẹtode kpukpru idụt ẹyekabade ẹdi mme mbet Jesus Christ. Kpa nte esịt owo urua oro okowụhọde ke ediye pearl, esịt mmọ n̄ko ediwụhọ ke Obio Ubọn̄—edide utịp mmọ edidu ke heaven m̀mê ke isọn̄.

²⁰ Mme ikọ Jesus ẹma ẹwụt ke utom edinam mbet ayaka iso “tutu esịm utịt ererimbot.” Ntre, ke eyo nnyịn, ndi mme owo ẹdu oro ẹbietde owo urua oro okoyomde ndiye pearl, emi ẹnyịmede ndiyak kpukpru se mmọ ẹnyenede ẹtak man ẹyom Obio Ubọn̄ Abasi? Ẹyeneme mbụme emi ke ibuotikọ oro etienede.

[Mme Ikọ idakisọn̄]

Ndiyom ‘Pearl Emi Okponde Ekọm-Urua’ Mfịn

“Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.”—MATTHEW 24:14.

1, 2. (a) Ifiọk oro mme Jew eyo Jesus ẹkenyenede ẹban̄a Obio Ubọn̄ Abasi okokpon adan̄a didie? (b) Nso ke Jesus akanam man mme owo ẹnen̄ede ẹfiọk se Obio Ubọn̄ Abasi edide, ndien nso ikedi utịp?

OBIO Ubọn̄ Abasi ekedi ibuot nneme oro eketịmde edemede mme Jew udọn̄ ke ini Jesus ekedide isọn̄. (Matthew 3:1, 2; 4:23-25; John 1:49) Nte ededi, ke ntọn̄ọ ntọn̄ọ, ata ediwak mmọ iketịmke ifiọk adan̄a nte ukara Obio Ubọn̄ emi editarade ye nte enye edikopde odudu; mmọ ikonyụn̄ ifiọkke ke enye edidi ukara eke heaven. (John 3:1-5) Idem ndusụk mbon oro ẹkekabarede ẹdi mme anditiene Jesus iketịmke ifiọk se Obio Ubọn̄ Abasi edide m̀mê se akanade mmọ ẹnam man ẹkabade ẹdi nsan̄a mme andikara ye Christ.—Matthew 20:20-22; Luke 19:11; Utom 1:6.

² Nte ini akakade, Jesus ama ada ime ekpep mme mbet esie ediwak n̄kpọ, esịnede n̄ke aban̄ade pearl oro okponde ekọmurua, oro ikenemede ke ibuotikọ oro ekebemde iso, owụtde nte edide akpan n̄kpọ ndisịn ifịk nyom Obio Ubọn̄ heaven. (Matthew 6:33; 13:45, 46; Luke 13:23, 24) Anaedi emi ama enen̄ede otụk mmọ esịt koro ikebịghike mmọ ẹma ẹkabade ẹdi mbon oro ẹkenyenede ifịk ye uko nditan̄a eti mbụk Obio Ubọn̄ tutu esịm utịt ererimbot, ndien n̄wed Utom enen̄ede ọsọn̄ọ emi.—Utom 1:8; Colossae 1:23.

3. Nso ke Jesus eketịn̄ aban̄a Obio Ubọn̄ ke ebuana ye eyo nnyịn?

³ Ndien nso kaban̄a mfịn? Ẹkwọrọ mme edidiọn̄ oro ẹdinyenede ke Paradise isọn̄ ke ini ukara Obio Ubọn̄ ẹnọ ediwak miliọn owo. Ke akwa ntịn̄nnịm ikọ esie aban̄ade “akpatre ini eyo emi,” Jesus ama etịn̄ in̄wan̄-in̄wan̄ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:3, 14; Mark 13:10) Enye ama anam an̄wan̄a n̄ko ete ke ẹyenam akwa utom emi kpa ye ọkpọsọn̄ ubiọn̄ọ ye mme n̄kpọ-ata, ye idem ukọbọ. Nte ededi, enye ama etịn̄ ikọ ndọn̄esịt emi ete: “Ẹyenyan̄a owo eke edimede ime tutu esịm akpatre.” (Matthew 24:9-13) Kpukpru emi oyom orụk n̄waidem ye nsịnifịk emi owo urua oro ke n̄ke Jesus ekenyenede. Ndi mme owo ẹdu mfịn emi ẹnyenede orụk mbuọtidem ye ifịk oro ke ndiyom Obio Ubọn̄?

Idatesịt Otode Edikụt Akpanikọ

4. Nso utịp ke akpanikọ Obio Ubọn̄ enyene ke idem mme owo mfịn?

⁴ Owo urua oro ke n̄ke Jesus ama enen̄ede okop idatesịt ke ini enye okokụtde se enye ekekerede ke edi ‘pearl emi okponde ekọm-urua.’ Idatesịt oro ama onụk enye ndinam kpukpru se enye ekekemede man edep pearl oro. (Mme Hebrew 12:1) Mfịn, akpanikọ aban̄ade Abasi ye Obio Ubọn̄ esie esidụri mme owo ada onyụn̄ edemede mmọ udọn̄. Emi anam nnyịn iti se Brọda A. H. Macmillan ekewetde ke n̄wed oro Faith on the March aban̄a ọkpọkpọ ndụn̄ọde oro enye akanamde man ọfiọk Abasi ye uduak Esie kaban̄a ubonowo. Enye ọkọdọhọ ete: “Kpukpru isua, ediwak tọsịn owo ke ẹka iso ndiyom se ami mma n̄kokokụt. Ndien mmọ ẹkam ẹdi mme owo nte nnyịn, koro mmọ ẹto kpukpru idụt, orụk, ẹdu ke nsio nsio idaha ke uwem, n̄kpri ye ikpọ. Akpanikọ isatke owo. Enye ododụri kpukpru orụk owo ada.”

5. Nso eti utịp ke ẹkụt ke ibatutom isua utom 2004?

⁵ Ẹkụt nte mme ikọ oro ẹdide akpanikọ, koro kpukpru isua, eti mbụk Obio Ubọn̄ Abasi onụk ediwak tọsịn mbon oro ẹnyenede esịt akpanikọ ndiyak uwem mmọ nnọ Jehovah nnyụn̄ nnam uduak esie. Isua utom 2004, emi ọkọtọn̄ọde ke September 2003 esịm August 2004, owụt emi. Ke ọfiọn̄ 12 oro ẹkebede, owo 262,416 ẹkeyarade uyakidem mmọ ẹnọ Jehovah an̄wan̄wa ke ndina baptism. Emi akada itie ke idụt 235 oro Mme Ntiense Jehovah ẹnịmde ukpepn̄kpọ Bible 6,085,387 kpukpru urua man ẹn̄wam mme owo oro ẹdude ke nsio nsio idaha ke uwem ẹnyụn̄ ẹtode ediwak obio, esien, ye usem ẹbọ ọnọ-uwem akpanikọ otode N̄wed Abasi.—Ediyarade 7:9.

6. Nso idi ntak n̄kaiso n̄kọri oro ẹnyenede ke mme isua emi ẹbede?

⁶ Nso ikanam ẹkeme ndinam kpukpru emi? Eyịghe idụhe nte ke Jehovah odụri “mbon oro ẹnyenede eti esịt” mi ọnọ idemesie. (John 6:65; Utom 13:48, NW) Nte ededi, owo ikemeke ndifụmi edu n̄waidem ye ọkpọsọn̄ ukeme mbon oro ẹsịnde idem ke ndiyom Obio Ubọn̄. Brọda Macmillan ama ewet ke ini enye ekedide isua 79 ete: “Toto ke akpa ini oro n̄kọfiọkde mme un̄wọn̄ọ oro ẹkenamde ẹnọ n̄kpakpa ubonowo, idotenyịn mi ke mme un̄wọn̄ọ Bible oro osụk etie nte eketiede ke ntọn̄ọ. Toto ke ini oro, mma mbiere ndifiọk n̄kpọ efen efen oro Bible ekpepde man n̄keme ndin̄wam mme owo oro ẹtiede nte ami, emi ẹyomde ndifiọk Ata Ọkpọsọn̄ Abasi, Jehovah, ye nti uduak esie kaban̄a ubonowo.”

7. Ewe ifiọkutom owụt idatesịt ye ifịk emi mbon oro ẹkụtde akpanikọ Bible ẹnyenede?

⁷ Mme asan̄autom Jehovah mfịn ẹnyene ukem edu nsịnifịk oro. Da Daniela emi otode Vienna, Austria, ke uwụtn̄kpọ. Enye ọkọdọhọ ete: “Abasi edi ata akpan ufan mi toto ke ini n̄kedide ekpri eyenọwọn̄. Mma nsiyom ndifiọk enyịn̄ ‘Abasi’ man n̄kpada enye nte ata owo. Edi n̄kedi ndifiọk enyịn̄ esie ke ini n̄kedide isua 17, kpa ini emi Mme Ntiense Jehovah ẹkedide ufọk mi. Mmọ ẹma ẹsian mi kpukpru n̄kpọ oro n̄koyomde ndifiọk mban̄a Abasi. Mma n̄kụt akpanikọ ke akpatre, ndien esịt ekenem mi didie ntem! Mma nnen̄ede n̄kop nduaidem tutu ntọn̄ọ ndikwọrọ ikọ nnọ kpukpru owo.” Ikebịghike, mme ekemmọ nsan̄a ufọkn̄wed ẹma ẹsak enye nsahi ke ntak emi enye ekenen̄erede enyene udọn̄ aban̄a ukwọrọikọ. Daniela aka iso ete: ‘Nte ededi, ami n̄kada ke emi osu ntịn̄nnịm ikọ Bible, koro mma n̄kpep ke Jesus ọkọdọhọ ke ẹyesua ẹnyụn̄ ẹkọbọ mme anditiene imọ ke ntak enyịn̄ imọ. Mma nnen̄ede n̄kop inemesịt ye n̄kpaidem.’ Ikebịghike, Daniela ama ayak uwem esie ọnọ Jehovah, ana baptism, onyụn̄ ọtọn̄ọ ndibịne utịtmbuba edidụk utom isụn̄utom. Ke Daniela ama ọkọdọ ndọ, enye ye Helmut, ebe esie, ẹma ẹtọn̄ọ ndikwọrọ ikọ nnọ mbon Africa, mbon China, mbon Philippine, ye mbon India oro ẹdụn̄de ke Vienna. Daniela ye Helmut ẹnam utom idahaemi nte mme isụn̄utom ke ufọt edem usụk ye edem usoputịn Africa.

Mmọ Ikpaha Mba

8. Nso idi eti usụn̄ kiet oro ediwak owo ẹwụtde ima oro mmọ ẹmade Abasi ẹnyụn̄ ẹsọn̄ọde ẹda ẹnọ Obio Ubọn̄ esie?

⁸ Ke akpanikọ, utom isụn̄utom edi kiet ke otu usụn̄ oro ikọt Jehovah mfịn ẹwụtde ima oro mmọ ẹmade Abasi ẹnyụn̄ ẹsọn̄ọde ẹda ẹnọ Obio Ubọn̄ esie. Ukem nte owo urua oro ke n̄ke Jesus, mbon oro ẹnamde utom emi ẹnyịme ndika mme nsannsan ebiet ke ntak Obio Ubọn̄. Nte ededi, mme isụn̄utom emi ikaha nsannsan ebiet man ẹkeyom eti mbụk Obio Ubọn̄, edi mmọ ẹkam ẹdada eti mbụk emi ẹsọk mme owo oro ẹdụn̄de ke nsannsan ikpehe ererimbot, ẹkpepde ẹnyụn̄ ẹn̄wamde mmọ ndikabade ndi mme mbet Jesus Christ. (Matthew 28:19, 20) N̄kpọ esinen̄ede ọsọn̄ ye mmọ ke ndusụk idụt. Edi mmọ ẹsinyene akpakịp edidiọn̄ ke ntak ime mmọ.

9, 10. Mme aduai-owo-idem ifiọkutom ewe ke mme isụn̄utom ẹnyene ke mme utọ nsannsan ebiet nte Central African Republic?

⁹ Da Central African Republic ke uwụtn̄kpọ, emi ibat mbon oro ẹkedụkde Editi n̄kpa Christ isua oko ekedide 16,184, awakde n̄kpọ nte utịm ikatiaba akan ibat mme asuanetop Obio Ubọn̄ ke idụt oro. Sia ediwak ikpehe ke idụt oro mînyeneke ikan̄ ilektrik, mme owo ẹsiwak nditie ke an̄wa ke mfụt eto nnam utom mmọ eke usen ke usen. Ntre mme isụn̄utom ẹsinam utom mmọ kpasụk ntre—nditie ke an̄wa ke mfụt eto nnịm mme ukpepn̄kpọ Bible. Okposụkedi an̄wa esibịtde, un̄wana esinyụn̄ odude, nditie ke an̄wa enyene ufọn en̄wen. Mme owo mi ẹnen̄ede ẹma Bible, ntre enen̄ede edi ọsọ n̄kpọ ndikop mme owo ẹnemede n̄kpọ ẹban̄a ido ukpono. Ediwak ini, mbon oro ẹsisan̄ade ẹbe ẹsinyene udọn̄ ke se ẹnemede ndien ẹsikam ẹwaha ẹditiene ẹbuana ke ukpepn̄kpọ Bible.

¹⁰ Ntem, ke ini isụn̄utom kiet eketiede ke an̄wa enịm ukpepn̄kpọ Bible, akparawa kiet emi okodụn̄de ke efak oro odude nsakiso ama edi ebịne isụn̄utom emi onyụn̄ edidọhọ ke sia Mme Ntiense mîkawahake idise imọ, ke imọ ikpama isụn̄utom oro edi ufọk imọ edikpep Bible ye imọ n̄ko. Isụn̄utom oro ama enen̄ede enem esịt ndiwaha mbịne enye, ndien akparawa oro ke anam usọp usọp n̄kọri. Ke idụt oro, mme bodisi ẹsiwak ndidọhọ Mme Ntiense oro ẹkade isan̄ ẹtuak ẹda, idịghe man ẹnọ mmọ ufen m̀mê ẹdia mmọ isop, edi man ẹbụp m̀mê mmọ ẹnyene mbufa nsiondi magazine Enyọn̄-Ukpeme ye Awake! mîdịghe man ẹkọm Mme Ntiense kaban̄a ibuotikọ oro ekenen̄erede enem mmọ.

11. Okposụkedi ẹkesinyenede mme mfịna, didie ke mme isụn̄utom oro ẹma ẹkenam utom ẹbịghi ẹse utom mmọ?

¹¹ Ediwak mbon oro ẹkedụkde utom isụn̄utom ke isua 40 m̀mê 50 emi ẹkebede ke ẹsụk ẹsọn̄ọ ẹda ẹnam utom emi. Nso uwụtn̄kpọ mbuọtidem ye ifịk ke mmọ ẹdi ntem ẹnọ kpukpru nnyịn! Ebe ye n̄wan kiet ẹmenam utom isụn̄utom ọtọkiet ke idụt ita ke se iwakde ibe isua 42. Ebe ọdọhọ ete: “Nnyịn imesinyene mfịna. Ke uwụtn̄kpọ, nnyịn ima idọn̄ọ utoenyịn ke isua 35. Kpa ye oro, nnyịn ituaha n̄kpọfiọk ke ndikedi mme isụn̄utom.” N̄wan esie adian do ete: “Ekese n̄kpọ ẹdu ndiwụt esịtekọm mban̄a kpukpru ini. Utom ukwọrọikọ enen̄ede akama idatesịt, onyụn̄ emem utom nditọn̄ọ mme ukpepn̄kpọ Bible. Ke ini okụtde nditọ ukpepn̄kpọ Bible ẹdide mme mbono esop ẹnyụn̄ ẹmehede ye kiet eken, emi esitie nte mboho ubon.”

Mmọ Ẹbat “Kpukpru N̄kpọ ke Ntakurua”

12. Didie ke owo enen̄ede owụt ke imada Obio Ubọn̄ ke ọsọn̄urua n̄kpọ?

¹² Ke ini owo urua oro okokụtde pearl oro okponde ekọmurua, enye ama “aka akanyam kpukpru se enyenede, edep pearl oro.” (Matthew 13:46) Mbon oro ẹnen̄erede ẹda Obio Ubọn̄ ke ọsọn̄urua ẹsinyịme ndiyak mme n̄kpọ oro ẹkemede ndida nte n̄kpọuto ẹtak mmimọ ke ntak Obio Ubọn̄. Apostle Paul emi ekenyenede ifet ndibuana ye Christ ke ukara Obio Ubọn̄, ọkọdọhọ ete: “Ke akpanikọ mbat kpukpru n̄kpọ ke ntak-urua, man mbọ akan ifiọk Christ Jesus Ọbọn̄ mi: emi n̄kayakde kpukpru n̄kpọ ẹtak kaban̄a Enye, mmonyụn̄ nsịn mmọ ke mbio, man mbọ Christ nda nnyene.”—Philippi 3:8.

13. Didie ke owo kiet ke Czech Republic okowụt ima oro enye amade Obio Ubọn̄?

¹³ Kpasụk ntre, ediwak owo mfịn ẹnyịme ndinam ikpọ ukpụhọde ke uwem mmọ man ẹbọ mme edidiọn̄ Obio Ubọn̄. Ke uwụtn̄kpọ, ke October 2003, etubom ufọkn̄wed kiet ke Czech Republic, emi edide owo isua 60 ama okụt n̄wed un̄wam ukpep Bible oro Ifiọk Oro Adade Osịm Nsinsi Uwem. Ke ama okokot n̄wed oro, enye ama ọsọsọp osobo ye Mme Ntiense Jehovah ke n̄kann̄kụk esie man mmọ ẹkpep enye Bible. Enye ama enen̄ede anam n̄kọri eke spirit, ndien ikebịghike ama ọtọn̄ọ ndidụk kpukpru mbono esop. Nte ededi, nso kaban̄a utịtmbuba esie ndikabade ndi andikara akwa obio ndien ekem akabade edi owo akwa ufọkmbet? Enye ama emek ndibịne utịtmbuba efen—kpa mbuba uwem, nte anditan̄a Obio Ubọn̄. Enye ọkọdọhọ ete: “Mma nnịm ediwak n̄wed Bible nnọ nditọ ufọkn̄wed mi.” Enye ama ayarade uyakidem esie ọnọ Jehovah ebe ke ndibụhọ ke mmọn̄ ke akamba mbono ke July 2004.

14. (a) Nso ke eti mbụk Obio Ubọn̄ onụk ediwak miliọn owo ẹnam? (b) Mme mbụme ewe ke nnyịn owo kiet kiet ikpobụp idem nnyịn?

¹⁴ Ediwak miliọn owo ke ofụri ererimbot ẹnam n̄kpọ ẹban̄a eti mbụk Obio Ubọn̄ ke ukem usụn̄ oro. Mmọ ẹwọrọ ke idiọk ererimbot emi, ẹsio akani owo ẹduọk, ẹkpọn̄ n̄kani ufan mmọ, ẹnyụn̄ ẹtre ndibịne mme ubọkọkọ ererimbot. (John 15:19; Ephesus 4:22-24; James 4:4; 1 John 2:15-17) Ntak emi mmọ ẹnamde kpukpru emi? Koro mmọ ẹnen̄ede ẹma mme edidiọn̄ Obio Ubọn̄ Abasi ẹkan n̄kpọ ekededi ke editịm n̄kpọ emi. Ndi ntre ke afo ada eti mbụk Obio Ubọn̄? Ndi ọdọn̄ fi ndinam mme ukpụhọde oro ẹyomde man usụn̄ uwem fo, mme n̄kpọ oro afo adade ke ọsọn̄urua, ye mme utịtmbuba fo ẹdu ke n̄kemuyo ye mme n̄kpọ oro Jehovah oyomde? Ndinam ntre ayada akpakịp edidiọn̄ ọsọk fi, idem idahaemi ye ke ini iso.

Idọk Ekpere Utịt

15. Nso ke ẹkebem iso ẹtịn̄ nte ikọt Abasi ẹdinamde ke mme akpatre usen emi?

¹⁵ Andiwet psalm ekewet ete: ‘Ikọt fo ẹyenọ idem mmọ ke ima-esịt ke usen odudu fo.’ Mbon oro ẹnọde idemmọ mi ẹsịne ‘mme uyen emi ẹbietde mbara’ ye ‘akamba udịm iban emi ẹkwọrọde’ eti mbụk. (Psalm 68:11; 110:3) Nso idi utịp nsịnifịk ye n̄waidem ikọt Jehovah—iren ye iban, n̄kpri ye ikpọ—ke mme akpatre usen emi?

16. Nọ uwụtn̄kpọ aban̄ade nte mme asan̄autom Abasi ẹsịnde ukeme ndin̄wam mbon en̄wen ẹkpep ẹban̄a Obio Ubọn̄.

¹⁶ Asiakusụn̄ kiet, m̀mê anditan̄a Obio Ubọn̄ ofụri ini, ke India ama ekere nte ẹkpen̄wamde se iwakde ibe inan miliọn iba oro ẹdude ke idụt oro, ẹkpep ẹban̄a Obio Ubọn̄. (Isaiah 35:5) Enye ama ebiere ndibọ ukpep usem idiọn̄ọ ke ufọkn̄wed kiet ke Bangalore. Enye ama abuana idotenyịn Obio Ubọn̄ ye ediwak inan oro ẹkedude ke ufọkn̄wed oro enye ọkọbọde ukpep, ama onyụn̄ ọtọn̄ọ mme otu ukpepn̄kpọ Bible. Ke ufan̄ urua ifan̄, ediwak owo ẹma ẹtọn̄ọ ndidụk mbono esop ke Ufọkmbono Obio Ubọn̄. Ke ukperedem, ke usọrọ udianndọ kiet, asiakusụn̄ oro ama osobo akparawa kiet emi edide inan emi otode Calcutta. Akparawa emi ama enyene ediwak mbụme onyụn̄ enyene ọkpọsọn̄ udọn̄ ndifiọk ekese n̄kpọ mban̄a Jehovah. Nte ededi, mfịna ama odu. Akana akparawa emi afiak ọnyọn̄ Calcutta, emi oyomde usụn̄ ke n̄kpọ nte kilomita 1,600, ọkọtọn̄ọ akamba ufọkn̄wed, ndien Ntiense ndomokiet oro ọkọfiọkde usem idiọn̄ọ ikodụhe do. Akparawa emi ama enen̄ede ekpek ete esie ayak imọ ika n̄wed ke Bangalore utu ke Calcutta man otodo enye ekeme ndika iso ke ukpepn̄kpọ Bible esie. Enye ama enen̄ede anam n̄kọri eke spirit, ndien ke isua kiet ebede, enye ama ayak uwem esie ọnọ Jehovah. Enye n̄ko ama ekpep ediwak inan Bible, esịnede ufan ini uyen esie. Idahaemi ọfis n̄kọk itieutom ke India ke anam ndutịm ọnọ mme asiakusụn̄ ndikpep usem idiọn̄ọ man ẹn̄wam mme inan do.

17. Tịn̄ se inen̄erede inọ fi nsịnudọn̄ ke ibatutom isua utom 2004 oro ẹdude ke page 19 esịm 22.

¹⁷ Ke magazine emi, afo oyokụt ibatutom isua utom 2004 eke Mme Ntiense Jehovah ke ofụri ererimbot ke page 19 esịm 22. Da ini dụn̄ọde enye, ndien afo oyokụt uyarade oro owụtde ke ikọt Jehovah ke ofụri isọn̄ ke ẹnen̄ede ẹsịn idem ẹyom ‘pearl emi okponde ekọm-urua’ mfịn.

“Ẹbem Iso Ẹyom Obio Ubọn̄”

18. Nso ke Jesus mîketịn̄ke ke n̄ke oro aban̄ade owo urua oro oyomde ndiye pearl, ndien ntak-a?

¹⁸ Ke ifiakde ibịne n̄ke Jesus oro aban̄ade owo urua oro oyomde ndiye pearl, nnyịn imokụt ke Jesus iketịn̄ke n̄kpọ ndomokiet iban̄a nte owo urua oro edikemede ndinyene n̄kpọ udu uwem ke ama akanyam kpukpru se enye ekenyenede. Ndusụk owo ẹkeme ndibụp nte enende ẹte: ‘Owo urua emi edida m̀mọ̀n̄ udia, edisịnen̄kpọ, ye ebietidụn̄ ke emi enye ama akanyam kpukpru se akpadade odu uwem? Nso ufọn ke pearl oro ọsọn̄de urua mi edinam ọnọ enye?’ Mme owo ẹkeme ndikere ke mme mbụme oro ẹdi nti mbụme. Edi, nte Jesus ikesịnke udọn̄ inọ mme mbet esie ite: “Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ emi ẹnọ mbufo”? (Matthew 6:31-33) Akpan n̄kpọ emi n̄ke oro owụtde edi ke oyom ẹtuak ibuot ẹnọ Abasi ke ofụri esịt ẹnyụn̄ ẹsịn ifịk ẹnam n̄kpọ Obio Ubọn̄ esie. Ndi enyene se ikemede ndikpep nto emi?

19. Nso akpan n̄kpọ ke nnyịn ikeme ndikpep ke n̄ke Jesus aban̄ade pearl emi okponde ekọmurua?

¹⁹ Edide nnyịn ikpep iban̄a utịbe utịbe eti mbụk emi idahaemi m̀mê imoyom Obio Ubọn̄ emi inyụn̄ isian mbon en̄wen mme edidiọn̄ esie ke anyan ini idahaemi, ana ofụri ntịn̄enyịn ye udọn̄ nnyịn ẹwụhọ ke Obio Ubọn̄. Nnyịn idu uwem ke ndiọkeyo, edi nnyịn imenyene nti ntak ndinịm ke se nnyịn ibịnede edi ata idem n̄kpọ oro owo mîkemeke ndimen ndomo ye n̄kpọ ndomokiet—ukem nte pearl oro owo urua oro okokụtde. Mme n̄kpọntịbe ererimbot ye mme ntịn̄nnịm ikọ Bible oro ẹsude ẹnen̄ede ẹwụt ke nnyịn idu uwem ke “akpatre ini eyo emi.” (Matthew 24:3) Ukem nte owo urua oro okoyomde ndiye pearl, ẹyak nnyịn isịn ifịk iyom Obio Ubọn̄ Abasi inyụn̄ idat esịt iban̄a ifet oro inyenede nditan̄a eti mbụk.—Psalm 9:1, 2.