Nso ke Iyịre ye Iyak Ẹwọrọ Ẹnọ Fi?
“Ẹyak ẹnọ mbufo ndifiọk ndịben̄kpọ Obio Ubọn̄ Heaven.” —MATTHEW 13:11.
1, 2. Ntak emi nnyịn ikpenyenede udọn̄ ke n̄ke Jesus?
NTE afo emesima ndifiọk ndịben̄kpọ m̀mê ndisiak n̄ke? Nso edieke ndinam ntre akpan̄wamde fi nditịm n̄kụt udeme fo ke uduak Abasi? Ye inemesịt, afo emekeme ndinyene utọ ifet ikike oro ebe ke n̄ke oro Jesus okotopde. Emi ama otịmede ekikere ediwak owo oro ẹkekopde onyụn̄ otịmede ekikere anana-ibat mmọ efen ọtọn̄ọde ke ini oro, edi afo emekeme ndifiọk enye.
2 Tịmfiọk se Jesus eketịn̄de ke Matthew ibuot 13 aban̄a ntak emi enye ekesidade n̄ke. Mbet esie ẹkebụp ẹte: “Nsinam Afo etịn̄de ikọ ye mmọ ke n̄ke?” (Matthew 13:10) Ih, ntak emi Jesus ekesidade n̄ke oro n̄wakn̄kan owo mîdifiọkke? Enye ọkọbọrọ ke Mt 13 ufan̄ikọ 11 osịm 13 ete: “Ẹyak ẹnọ mbufo ndifiọk ndịben̄kpọ Obio Ubọn̄ Heaven, edi iyakke inọ mmọ. . . . Mmọdo ntịn̄de ikọ nnọ mmọ ke n̄ke: koro ke edise, mmọ ikwe n̄kpọ; ye ke edikop, mmọ ikopke inyụn̄ ifiọkke nte ọwọrọde.”
3. Didie ke edidiọn̄ọ mme n̄ke Jesus ekeme ndida ufọn nsọk nnyịn?
3 Jesus ndien ama ada Isaiah 6:9, 10 edibuan, emi etịn̄de aban̄a mme owo ẹmi ẹkedide inan ye nnan ke n̄kan̄ eke spirit. Nte ededi, iyomke nnyịn itie ntre. Edieke nnyịn ifiọkde inyụn̄ inamde n̄kpọ iban̄a mme n̄ke esie, nnyịn imekeme ndinen̄ede n̄kop inemesịt—kemi ye ke anana-utịt ini iso. Jesus ọnọ nnyịn ufiop ufiop un̄wọn̄ọ emi: “Ọfọfọn ọnọ enyịn mbufo, koro mmọ ẹkụtde n̄kpọ; onyụn̄ ọfọfọn ọnọ utọn̄ mbufo, koro mmọ ẹkopde ikọ.” (Matthew 13:16) Un̄wọn̄ọ oro amabuana kpukpru n̄ke Jesus, edi ẹyak nnyịn iwụk ntịn̄enyịn ke ibio ibio n̄ke aban̄ade iyịre, oro ẹwetde ke Matthew 13:47-50.
N̄ke Oro Enyenede se Ọwọrọde Ntotụn̄ọ Ntotụn̄ọ
4. Nso ke Jesus okobụk ke n̄ke, nte ẹwetde ke Matthew 13:47-50?
4 “Obio Ubọn̄ Heaven ebiet iyịre eke ẹduọkde ke inyan̄, emi onyụn̄ omụmde kpukpru orụk iyak; ke ini ọyọhọde, ẹdụri enye ẹdọk ke esụk, ẹsụhọde ẹtetie, ẹtan̄ se ifọnde ẹdọn̄ ke n̄kpọ, edi ẹduọn̄ọ se mîfọnke. Ntre ke edidi ke akpatre ini eyo emi; mme angel ẹyewọn̄ọ ẹdi ẹdidianade mme oburobụt owo ẹsio ke ndinen owo, ẹnyụn̄ ẹduọn̄ọ mmọ ke akwa ikan̄ eke asakde. Do ke editua eyet ye edita edet ẹyedu.”
5. Nso utọ mbụme ẹdemede kaban̄a se n̄ke iyịre ọwọrọde?
5 Eyedi afo emesikụt mme owo ẹdade iyịre ẹkọ iyak, ke nsụhọde n̄kaha ke senima m̀mê ke television, ntre n̄ke Jesus isọn̄ke ndikụt. Edi nso kaban̄a ọyọhọ ntọt ye se enye ọwọrọde? Ke uwụtn̄kpọ, Jesus ọkọdọhọ ete ke n̄ke emi aban̄a “Obio Ubọn̄ Heaven.” Edi, ke akpanikọ ikọ esie ikọwọrọke ite ke “kpukpru orụk” owo, se ifọnde ye se mîfọnke, m̀mê ndiọi, ẹyedu ke Obio Ubọn̄. N̄ko, mmanie ẹnam utom ukọiyak oro? Ndi utom ukọiyak ye edisat emi ama ada itie ke eyo Jesus, mîdịghe nte ẹnịm enye n̄kukụre ẹnọ eyo nnyịn, kpa “akpatre ini eyo emi”? Nte afo omokụt idemfo ke n̄ke emi? Didie ke afo ekeme ndifep ndidu ke otu mbon oro ẹtuan̄ade ẹnyụn̄ ẹtade edet?
6. (a) Ntak emi nnyịn ikpenyenede ọkpọsọn̄ udọn̄ ke ndidiọn̄ọ n̄ke iyịre? (b) Nso idi ukpọhọde ke ndidiọn̄ọ enye?
6 Mme utọ mbụme oro ẹwụt nte ke n̄ke emi nte ededi idịghe mmemmem n̄kpọ. Nte ededi, kûfre ete: “Ọfọfọn ọnọ enyịn mbufo, koro mmọ ẹkụtde n̄kpọ; onyụn̄ ọfọfọn ọnọ utọn̄ mbufo, koro mmọ ẹkopde ikọ.” Ẹyak nnyịn ise m̀mê imekeme ndidụn̄ọde n̄kụt se enye ọwọrọde man utọn̄ nnyịn ẹdikabade ẹdobi enyịn nnyịn ẹdinyụn̄ ẹtre ndikụt se enye ọwọrọde. Ke akpanikọ, nnyịn imenyenyene akpan ukpọhọde ndida n̄kpọhọde se enye ọwọrọde. Ibuotikọ oro ekebemde iso ama etịn̄ aban̄a nte Jesus ọkọnọde mme ọkọiyak mbon Galilee ikot ndikpọn̄ utom oro nnyụn̄ nnam utom eke spirit nte “mme ọkọ owo.” (Mark 1:17) Enye ama asian mmọ ete: “Tọn̄ọ kemi [mbufo] ẹyekọ owo.”—Luke 5:10.
7. Nso ke Jesus eketịn̄ aban̄a ke ini enye eketịnde aban̄a iyak?
7 Ke n̄kemuyo ye oro, iyak eke n̄ke emi ada aban̄a mme owo. Ntem, ke ini Mt 13 ufan̄ikọ 49 etịn̄de aban̄a edibahade ndiọi n̄kpọn̄ nti, enye itịn̄ke iban̄a ndinen m̀mê ndiọi odu-uwem n̄kpọ ẹmi ẹdude ke inyan̄ibom, edi etịn̄ aban̄a ndinen owo m̀mê ndiọi owo. Ukem ntre, Mt 13 ufan̄ikọ 50 ikpenyeneke ndinam nnyịn ikere iban̄a mme unam oro ẹdude ke inyan̄ oro ẹtuan̄ade m̀mê ẹtade edet. Baba. N̄ke emi aban̄a editan̄ mme owo mbok ọtọkiet ye ẹdibahade mmọ ke ukperedem, emi edide ata akpan n̄kpọ, nte utịp owụtde.
8. (a) Nso ke nnyịn ikeme ndikpep mban̄a utịp oro ẹdinọde iyak oro mîfọnke? (b) Ke ikerede iban̄a se ẹketịn̄de ẹban̄a iyak oro mîfọnke, nso ke nnyịn ikeme ndibiere mban̄a Obio Ubọn̄?
8 Fiọk ete ke ẹyetop iyak oro mîfọnke, oro edi, ndiọi owo, ẹdọn̄ ke akwa ikan̄ emi asakde, ke ebiet emi mmọ ẹdituan̄ade ẹnyụn̄ ẹta edet. Ke ebiet efen Jesus akabuan utọ editua ye edita edet oro ye edidu ke ebiet ọwọrọde ọkpọn̄ Obio Ubọn̄. (Matthew 8:12; 13:41, 42) Ke Matthew 5:22 ye Mt 18:9, enye ama akam asiak “hell [“Gehenna,” New World Translation] emi asakde ikan̄,” adade aban̄a nsinsi nsobo. Nte oro iwụtke nte edide akpan n̄kpọ ndidiọn̄ọ se n̄ke emi ọwọrọde nnyụn̄ nnam n̄kpọ nte odotde? Kpukpru nnyịn imọfiọk ite ke ndiọi owo idụhe idinyụn̄ idụhe ke Obio Ubọn̄ Abasi. Ntre, ke ini Jesus ọkọdọhọde ke “Obio Ubọn̄ Heaven ebiet iyịre,” anaedi ikọ esie ọkọwọrọ ete ke se iban̄ade Obio Ubọn̄ Abasi, odu n̄kpọ oro ebietde iyịre oro ẹduọkde ndimụm nsio nsio orụk iyak.
9. Didie ke mme angel ẹbuana ke n̄ke iyịre?
9 Ke ẹma ẹkeduọk iyịre ẹnyụn̄ ẹmụm iyak, utom edisat eyedu. Mmanie ke Jesus ọkọdọhọ nte ẹbuanade? Matthew 13:49 anam ẹdiọn̄ọ mme ọkọiyak oro ẹdide mme andisat mi nte mme angel. Ntem Jesus eketịn̄ ọnọ nnyịn aban̄a mme angel ndise enyịn ke n̄kpọutom emi odude ke isọn̄ oro ẹdade ẹdiọn̄ọ mme owo—ndusụk ẹfọn ẹnyụn̄ ẹdot ndidu ke Obio Ubọn̄ heaven, mmọ eken ẹwụtde nte mîdotke ndibọ ikot oro.
Ukọiyak—Ini Ewe?
10. Ke nso ke nnyịn ikeme ndibiere nte ke utom ukọiyak ama odu ke anyan ikpehe ini?
10 Udọn̄ikọ oro an̄wam nnyịn ndidiọn̄ọ ini emi ẹtin̄de ẹban̄a. Esisịt ini mbemiso emi, Jesus ama otop n̄ke aban̄ade edisuan eti n̄kpasịp, edi ekem ẹma ẹsuan ndiọi n̄kpasịp ke in̄wan̄ oro, emi adade aban̄a ererimbot. Enye ama anam an̄wan̄a ke Matthew 13:38 ete ke eti n̄kpasịp akada aban̄a “nditọ Obio Ubọn̄ Heaven; idiọk n̄kpasịp ẹdi nditọ andidiọk.” Mmọemi ẹma ẹkọri ọtọkiet ke ediwak isua ikie, tutu osịm ke ini ukpen̄e ke akpatre ini eyo emi. Ekem ẹma ẹbahade ndiọi n̄kpasịp ẹnyụn̄ ẹfọp nte ini akade. Ke imende emi idomo ye n̄ke iyịre, nnyịn ikụt ite ke edimụm mme edibotn̄kpọ ke iyịre ekenyene ndikaiso ke anyanini.—Matthew 13:36-43.
11. Didie ke utom ukọiyak ofụri ererimbot ọkọtọn̄ọ ke akpa isua ikie?
11 Nte ekemde ye n̄ke Jesus, ẹkenyene ndimụm iyak ye unana edisasat, oro edi, iyịre oro omụm nti iyak ye iyak oro mîfọnke. Ke adan̄aemi mme apostle ẹkesụk ẹdude uwem, mme angel oro ẹdade usụn̄ ke utom ukọiyak ẹkeda esop Christian edide eke Abasi ndimụm “iyak” ẹmi ẹkekabarede ẹdi mme Christian oro ẹyetde aran. Afo emekeme ndidọhọ ete ke mbemiso Pentecost eke 33 E.N., Jesus ama omụm mbet 120 ke ọkọ ndimụm mme owo. (Utom 1:15) Edi ndondo oro ẹketọn̄ọde esop mme Christian oro ẹyetde aran, utom ukọiyak ẹdade n̄kpọutom edide iyịre ama ọtọn̄ọ, ndien ẹma ẹmụm ediwak tọsịn nti iyak. Ọtọn̄ọde ke 36 E.N., utom ukọiyak ama atara osịm mmọn̄ ofụri ererimbot, nte ẹkedade mme Gentile ẹdisịn ke Ido Ukpono Christ ẹnyụn̄ ẹkabarede ẹdi mme andibuana ke esop Christ oro ẹyetde aran.—Utom 10:1, 2, 23-48.
12. Nso ikọtọn̄ọ ke mme apostle ẹma ẹkekpan̄a?
12 Ke ediwak isua ikie ke mme apostle ẹma ẹkebe ẹfep, ndusụk Christian ẹma ẹdu ẹmi ẹkekade iso ẹn̄wana ndiyom nnyụn̄ mmụm akpanikọ Abasi n̄kama. Ke nsụhọde n̄kaha ndusụk ke otu mmọemi ẹma ẹnyene unyịme Abasi, ndien enye ama eyet mmọ aran ke edisana spirit. Edi, n̄kpa mme apostle ama osio odudu ukpan oro okodude, anamde nsọn̄ibuot oro atarade asuana ọtọn̄ọ. (2 Thessalonica 2:7, 8) Esop kiet ama adaha ada oro nte mîdotke ọkọdọhọde ke idi esop Abasi. Enye ke nsu ọkọdọhọ ke idi edisana idụt oro ẹyetde aran ke spirit Abasi ndikara ye Jesus.
13. Ntak ẹkemede ndidọhọ ke Christendom ama enyene ubọk ke edinam iyịre?
13 Nte afo emekere ke mme anana-mbuọtidem oro ẹkedọhọde nte idide eke Ido Ukpono Christ ẹma ẹnyene udeme ekededi ke n̄ke iyịre? Ọfọn, ntak odu ndibọrọ, ih, mmọ ẹma ẹnyene. Ndamban̄a iyịre oro ama esịne Christendom. Edi akpanikọ, ke ediwak emana Ufọkederi Catholic ama odomo ndikpan Bible ndisịm mme ọsọ owo. Edi, ke ediwak isua ikie ẹmi ẹbede mme andibuana ke Christendom ẹma ẹnyene akpan udeme ke edikabade, edifiak nsion̄o, ye edisuan Ikọ Abasi. Ke ukperedem mme ufọkederi ẹma ẹtọn̄ọ mîdịghe ẹnọ mme n̄ka umịn̄ Bible ibetedem, ẹmi ẹkekabarede Bible ẹsịn ke mme usem nsannsan idụt. Mmọ n̄ko ẹma ẹsion̄o mme isụn̄utom ẹdide mbiaibọk usọbọ ye mme andikpep ẹdọn̄, ẹmi ẹkekamade udia ye mme n̄kpọ obụkidem ẹkọ mme Christian. Emi ama atan̄ ata ekese iyak oro mîfọnke, ẹmi mîkenyeneke unyịme Abasi obok. Edi ke nsụhọde n̄kaha enye ama emen ediwak miliọn owo oro mîkedịghe mme Christian owụt Bible ye orụk Ido Ukpono Christ kiet, okposụkedi ẹkedide mbiara.
14. Didie ke ndusụk utom oro mme ufọkederi Christendom ẹkenamde akan̄wam ke utom edikọ nyom nti iyak?
14 Ye kpukpru emi, mme anam-akpanikọ oro ẹkesuanade ẹkenyụn̄ ẹsọn̄ọde ẹyịre ke Ikọ Abasi ẹma ẹsịn̄ede idemmọ nte ẹkekeme. Ke ini ekededi, mmọ ẹma ẹnam ata esop Abasi oro ẹyetde aran ke isọn̄. Ndien nnyịn imekeme ndinịm ke akpanikọ nte ke mmọ n̄ko ke ẹkemụm iyak, m̀mê owo, ẹmi Abasi edisede ediwak mmọ nte nti edinyụn̄ eyetde mmọ aran ke spirit esie. (Rome 8:14-17) Nti mbon oro ẹdọhọde nte idide eke Ido Ukpono Christ mi ẹma ẹkeme ndida akpanikọ Bible nsọk ediwak owo oro ẹkenamde ẹkabade ẹdi Christian ke ntak udia ye n̄kpọ obụkidem m̀mê oro ẹkenyenede esisịt ifiọk Bible ẹto N̄wed Abasi ẹmi mme n̄ka umịn̄ Bible eke Christendom ẹkekabarede ẹsịn ke usem mmọ. Ke akpaniko, edimụm nti iyak ama akaiso, idem okposụkedi n̄wakn̄kan ibat oro Christendom okomụmde mîkọfọnke ke enyịn Abasi.
15. Ke in̄wan̄în̄wan̄ usụn̄, nso ke iyịre eke n̄ke oro ada aban̄a?
15 Ntre iyịre ada aban̄a n̄kpọutom eke isọn̄ emi ọdọhọde nte idide esop Abasi onyụn̄ omụmde iyak. Enye esịne Christendom ye esop mme Christian oro ẹyetde aran, eke ukperedem emi akade iso ndimụm nti iyak, ke idak ndausụn̄ mme angel oro enyịn mîkwe, ke n̄kemuyo ye Matthew 13:49.
Ini Nnyịn Edi Akpan Ini
16, 17. Ntak emi ini emi nnyịn idude uwem edide akpan n̄kpọ ntre ke edinam n̄ke Jesus aban̄ade iyịre?
16 Ẹyak nnyịn kemi ikere iban̄a ini oro abuanade. Ke ediwak isua ikie, n̄kpọutom edide iyịre mi ama omụm nti iyak ye ediwak iyak oro mîfọnke, m̀mê ndiọi owo. Ekem ini ama edisịm emi mme angel ẹkebuanade ke ndinam akpa utom edibahade. Ini ewe? Ọfọn, Mt 13 ufan̄ikọ 49 etịn̄ in̄wan̄în̄wan̄ ete ke edidi ke “akpatre ini eyo emi.” Emi ekem ye se Jesus eketịn̄de ke n̄ke aban̄ade erọn̄ ye ebot ete: “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie: Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot.”—Matthew 25:31, 32.
17 Ntem, ke n̄kemuyo ye Matthew 13:47-50, akpa utom edibahade ke idak ndausụn̄ mme angel omodu ke edinam tọn̄ọ nte “akpatre ini eyo emi” ọkọtọn̄ọ ke 1914. Emi ama akabade ana in̄wan̄în̄wan̄ akpan akpan ke 1919 ebede, ke ini ẹkesanade nsụhọ mbon oro ẹyetde aran ẹyak ke n̄kpọkọbi m̀mê ntan̄mfep eke spirit oro mmọ ẹkedude ke ibio ini, ẹnyụn̄ ẹkabarede ẹdi n̄kpọutom oro okụtde unen akan ke ndinam utom ukọiyak mma.
18. Didie ke ẹketan̄ nti iyak ẹdọn̄ ke n̄kpọ udọn̄ iyak?
18 Nso ikenyene nditịbe nnọ nti iyak oro ẹkebaharede mi? Mt 13 Ufan̄ikọ 48 ọdọhọ ke mme angel ẹdide mme ọkọiyak ye mme andibahade ẹma “ẹtan̄ se ifọnde ẹdọn̄ ke n̄kpọ, edi ẹduọn̄ọ se mîfọnke.” N̄kpọ udọn̄ iyak oro ẹdi iko ẹmi ẹkpemede-kpeme n̄kpọ, ẹmi ẹdọn̄de iyak. Nte emi otịbe ke eyo nnyịn? Ata mfọn mfọn. Nte ẹmụmde ndamban̄a nti iyak ye uwem, ẹdọn̄ mmọ ke esop mme Christian akpanikọ. Mme esop ẹbietde n̄kpọ udọn̄ iyak mi ẹmen̄wam ndikpeme nnyụn̄ ntịm mmọ nnịm nnọ utom Abasi, nte afo unyịmeke ntre? Edi, owo ekeme ndikere ete, ‘Kpukpru ẹmi ẹnen ẹnyụn̄ ẹfọn, edi nso ke enye enyene ndinam ye uwem mi eke idahaemi ye eke ini iso?’
19, 20. (a) Ntak edide akpan n̄kpọ mfịn ndinyene ifiọk mban̄a n̄ke emi? (b) Nso akpan utom ukọiyak ke ẹnam toto ke 1919?
19 Se ẹketopde n̄ke ẹban̄a mi ikenyeneke nditịbe ke mme isua ikie ẹmi ẹkedude ke ufọt ini mme apostle ye 1914 kpọt. Ke ufan̄ ini oro, n̄kpọutom edide iyịre ama omụm nsunsu ye ata mbon oro ẹkedọhọde nte idide eke Ido Ukpono Christ. Ih, enye okomụm iyak oro mîfọnke ye nti iyak. N̄ko-n̄ko, utom edibahade oro mme angel ẹnamde iketreke ko ke edem ke 1919. Baba, iketreke. Ke ndusụk idaha n̄ke iyịre emi enyene n̄kpọ ndinam tutu edisịm eyo nnyịn. Amabuana nnyịn n̄ko ye n̄kpet n̄kpet ini iso nnyịn. Edi akpan n̄kpọ nnyịn ndifiọk usụn̄ ye ntak edide ntre edieke nnyịn iyomde mme ikọ ẹmi ẹdi akpanikọ ke n̄kan̄ nnyịn: “Ọfọfọn ọnọ enyịn mbufo, koro mmọ ẹkụtde n̄kpọ; onyụn̄ ọfọfọn ọnọ utọn̄ mbufo, koro mmọ ẹkopde ikọ” ẹnyụn̄ ẹfiọkde se ọwọrọde.—Matthew 13:16.
20 Eyedi afo ọmọfiọk ete ke 1919 ama ekebe nsụhọ oro ẹyetde aran ẹma ẹsịn idem ke utom ukwọrọikọ ke edidianakiet ye mme angel, ẹmi ẹkekade iso ndikama ndamban̄a iyịre ndụri iyak ndọk obot, man ẹsat nti ẹsion̄o ke mbon oro mîfọnke. Ibat ndụn̄ọde ọtọn̄ọde ke ini oro owụt nte ke edimụm nti iyak man ẹyet aran ke spirit Abasi ama akaiso nte ẹkedade ndamban̄a iyịre ẹmụm mme akpatre owo ke otu 144,000. (Ediyarade 7:1-4) Edi etisịm ufọt ufọt iduọk isua 1930, edimụm nti iyak akpan akpan man ẹyet aran ke edisana spirit ama etre. Nte esop nsụhọ oro ẹyetde aran ekenyene nditop iyịre nduọk, yak idọhọ, nnyụn̄ nsụhọde ntetie, ẹbetde utịp mmọ eke heaven? N̄wan̄ansa-o!
Ebuana Fo ke Utom Ukọiyak
21. Ewe utom ukọiyak efen odu ke ini nnyịn? (Luke 23:43)
21 N̄ke Jesus aban̄ade iyịre okowụk ntịn̄enyịn ke nti iyak oro ẹdinọde itie nte utịp ke Obio Ubọn̄ heaven. Edi, ke ẹsiode n̄ke oro ẹfep, odu ndamban̄a utom ukọiyak efen oro akade iso ke akamba udomo, kpa nte ẹkewụtde ke ibuotikọ oro ekebemde iso. Utom ukọiyak emi idịghe kaban̄a nti iyak oro ẹyetde aran ẹmi ẹsiakde ke n̄ke Jesus, edi edi kaban̄a ndamban̄a iyak oro ẹdimụmde ye uwem ẹnyụn̄ ẹnọde utịbe utịbe idotenyịn uwem ke paradise isọn̄.—Ediyarade 7:9, 10; men Matthew 25:31-46 domo.
22. Ewe idara idara utịp ke nnyịn ikeme ndinyene, ndien nso idi ukpụhọde usụn̄ efen?
22 Edieke afo enyenede idotenyịn oro, do afo emekeme ndidat esịt nte ke Jehovah amayak anyan̄a-uwem utom ukọiyak akaiso tutu osịm emi. Emi amanam afo ekeme ndinyene utịbe utịbe idotenyịn. Idotenyịn? Ih, oro edi ikọ oro odotde ndida, sia utịp edisan̄ade ekekem ye nnyịn ndikaiso nnam akpanikọ nnọ Enyeemi ọnọde ukeme ukọiyak oro osụk akade iso ndausụn̄. (Zephaniah 2:3) Otode ke n̄ke oro ti ete ke idịghe kpukpru iyak oro iyịre omụmde ẹbọ eti utịp. Jesus ọkọdọhọ ete ke ẹyebahade mbon oro mîfọnke, m̀mê ndiọi owo, ẹkpọn̄ nti owo. Ye nso utịp? Ke Matthew 13:50, Jesus ama etịn̄ aban̄a idiọk utịp oro enyenede mbon oro mîfọnke, m̀mê ndiọi iyak. Ẹyetop mmọemi ẹsịn ke ikan̄ oro asakde, emi ọwọrọde nsinsi nsobo.—Ediyarade 21:8.
23. Nso inam utom ukọiyak mfịn edi akpan n̄kpọ ntre?
23 Ye nti iyak oro ẹyetde aran, ọkọrọ ye ndamban̄a iyak oro ẹdidude uwem ke isọn̄, ubọn̄ ubọn̄ ini iso odu ọnọ mmọ. Ye eti ntak, ndien, mme angel ke ẹkụt ẹte ke utom ukọiyak oro okụtde unen ke akaiso ke ofụri ererimbot kpa ke idem idahaemi. Ndien nso utom umụm ndamban̄a iyak ke ẹnam ntem! Afo eyenen ke ndidọhọ, ke n̄kan̄ kiet ete, ke emi akam edi utịbe utịbe umụm iyak nte eke ataata iyak oro mme apostle ẹkemụmde ke ini mmọ ẹkeduọkde iyịre mmọ ke ndausụn̄ Jesus.
24. Nso ke nnyịn ikpoyom ndinam kaban̄a utom ukọiyak eke spirit?
24 Nte afo ke abuana ifịk ifịk adan̄a nte ekekeme ke anyan̄a-uwem utom ukọiyak eke spirit emi? Inamke n̄kpọ adan̄a nte ebuana nnyịn owo kiet kiet atarade okosịm idahaemi, nnyịn owo kiet kiet imekeme ndibọ ufọn ke ndise se ẹnamde ke ofụri ererimbot ke akwa utom ukọiyak ye unyan̄a-uwem emi akade iso idahaemi. Ndinam ntre ekpenyene ndidemede nnyịn nnọ ifịk oro akam okponde akan ke ndiduọk iyịre man imụm n̄kpọ ke mme usen ẹmi ẹdide ke iso!—Men Matthew 13:23; 1 Thessalonica 4:1 domo.
Nte Afo Emeti Akpan N̄kpọ Ẹmi?
◻ Nso ke orụk iyak iba oro ke n̄ke Jesus aban̄ade iyịre ẹda ẹban̄a?
◻ Ke nso usụn̄ifiọk ke mme ufọkederi Christendom ẹkebuana ke edinam iyịre?
◻ Ntak emi utom ukọiyak oro adade itie ke eyo nnyịn edide akpan n̄kpọ ntre-e?
◻ N̄ke iyịre akpada nnyịn owo kiet kiet usụn̄ ndinam nso orụk edidụn̄ọde idem?
[Ndise ke page 18]
Utom ukọiyak amada itie ke Inyan̄ Galilee ke ediwak isua ikie
[Ebiet Ẹdade N̄kpọ Ẹto]
Pictorial Archive (Near Eastern History) Est.