“Idiọn̄ọ Emi Otode ke Heaven”
UTO eset kiet emi aban̄ade nte eyo etiede ọdọhọ ete: “Ikpaenyọn̄ ama oyịbe ke okoneyo, mme awat inyan̄ ẹdat esịt,/Ikpaenyọn̄ ama oyịbe ke usenubọk, mme awat inyan̄ ẹnọ idem item.” Ke ediwak isua ikie ẹmi ẹbede, mme awat inyan̄ ẹberi edem ke mme utọ idiọn̄ọ oro. Mfịn, esida mme satellite, mme ukpepn̄kpọ ẹban̄ade eyo oro ẹkamade kọmputa ẹkpep, Doppler radar, ye mme usụn̄ ntaifiọk eken ndibemiso mfiọk nte eyo editiede. Se ẹsibemde iso ẹtịn̄ ẹnịm ẹsiwak ndidu ke n̄kemuyo ye uto emi ẹsụk ẹkotde ẹto mi.
Mme asua Jesus Christ ẹmi ẹkedide mbon ido ukpono inikiet ko ẹma ẹbụp enye “idiọn̄ọ emi otode ke heaven,” kpa ediwụt esen esen uyarade nte ke enye ekedi Messiah. Enye ọkọdọhọ ete, “Ke ini mbubịteyo mbufo ẹte, Usen eyefọn, koro enyọn̄ oyịbe; ke ini usenubọk n̄ko, mbufo ẹte, Usen eyediọk, koro enyọn̄ oyịbe onyụn̄ okpụk. Mbufo ẹmefiọk ndidiọn̄ọ iso ikpaenyọn̄, edi mbufo ikemeke ndifiọk idiọn̄ọ ini. Emana eke ẹdiọkde ẹnyụn̄ ẹsan̄ade ẹsịn efịbe ẹyom idiọn̄ọ; ndien idinọhọ mmọ baba idiọn̄ọ kiet, ibọhọke idiọn̄ọ Jonah.”—Matthew 16:1-4.
Mme asua Jesus ẹma ẹkeme ndibemiso ntịn̄ nte eyo editiede edi ikekemeke ndifiọk mme n̄kpọ eke spirit. Ke uwụtn̄kpọ, nso kaban̄a “idiọn̄ọ Jonah”? Ke ama okodu usen ita ke idịbi akamba iyak, Jonah prọfet Abasi ama ọkwọrọ ikọ ke Nineveh ndien ke ntre ama akabade edi idiọn̄ọ ọnọ ibuot obio Assyria oro. Eyo Jesus ẹma ẹnyene “idiọn̄ọ Jonah” ke ini Christ okodude usen ita ke udi ndien ekem ẹnamde eset. Mme mbet esie ẹma ẹtan̄a uyarade n̄kpọntịbe oro, ndien ntem Jesus ekedi idiọn̄ọ ọnọ emana oro.—Matthew 12:39-41.
Ke idaha efen, mme mbet Jesus ẹma ẹbụp enye ẹban̄a “idiọn̄ọ” ‘edidu,’ esie eke ini iso ke odudu Obio Ubọn̄. Ke ibọrọ, enye ama ọnọ ntan̄ndian idiọn̄ọ esịnede nsio nsio ikpehe, esịnede mme anana-mbiet ekọn̄, ikpọ unyekisọn̄, unana udia, ye edikwọrọ mban̄a Obio Ubọn̄ Abasi eke heaven oro ẹma ẹkewowụk.—Matthew 24:3-14.
Nte afo ọmọfiọk idiọn̄ọ edidu Christ nte Edidem eke heaven oro enyịn mîkwe? Mme ikpehe esie ke ẹsu ke emana emi. (Matthew 24:34) Ndien nso kaban̄a ini iso? Bible itịn̄ke nte utịt editịm n̄kpọ emi ekperede ikpọn̄îkpọn̄ edi n̄ko ebemiso etịn̄ aban̄a un̄wọn̄ọ obufa usen oro Abasi ọn̄wọn̄ọde emi ke mîbịghike edisierede n̄wan̄a n̄wan̄a onyụn̄ ayama ọnọ ubonowo.—2 Peter 3:13.