Nso ke Bible Etịn̄ Aban̄a Ndiọi Udọn̄ọ?
Se Bible etịn̄de
Bible ama etetịn̄ ke ndiọi udọn̄ọ (emi atarade asuana ke nsio nsio ebiet) oyodu ke mme utịt usen. (Luke 21:11) Ndusụk owo ẹkere ke Abasi ada ndiọi udọn̄ọ emi amia nnyịn ufen. Ihih, ndiọi udọn̄ọ emi idịghe ufen Abasi. Ke akpanikọ, Abasi ọmọn̄ ọsọsọp ada Obio Ubọn̄ esie etre kpukpru udọn̄ọ ke ererimbot emi.
Ndi Bible ama ọdọhọ ke ndiọi udọn̄ọ oyodu?
Kpa ye oro Bible ọkọdọhọde ke “ndiọi udọn̄ọ” ye “udọn̄ọ n̄kpa” oyodu, enye ikasiakke akpan enyịn̄ udọn̄ọ nte COVID-19, AIDS, m̀mê udọn̄ọ efiomnsa. (Luke 21:11; Ediyarade 6:8) Kpukpru emi ẹdi idiọn̄ọ utịt ini emi ẹnyụn̄ ẹkotde “mme akpatre usen.”—2 Timothy 3:1; Matthew 24:3.
Ndi akanam Abasi ada udọn̄ọ amia mme owo ufen?
Bible ọdọhọ ke enyene ini ifan̄ emi Abasi akadade udọn̄ọ amia mme owo ufen. Ke uwụtn̄kpọ, enye ama ọtọ ndusụk owo akpamfia. (Numbers 12:1-16; 2 Ndidem 5:20-27; 2 Chronicle 26:16-21) N̄kpata owo ifan̄ emi Abasi ọkọtọde idiọk udọn̄ọ mi ẹkebọ ufen idiọkn̄kpọ mmọ. Edi ndiọi udọn̄ọ eyo emi okpụhọde ye enye oro. Ndiọi udọn̄ọ eyo emi etie nte edịm, ibọn̄ke ọkọm kiet, idiọn̄ọke m̀mê owo edi akwaowo m̀mê edi eyenọwọn̄ emi mîdiọn̄ọke idiọkn̄kpọ.
Ndi emekere ke ndiọi udọn̄ọ emi edi ufen Abasi?
Ihih, idịghe. Kpa ye oro ndusụk owo ẹkerede ke Abasi ada ndiọi udọn̄ọ emi amia nnyịn ufen, Bible itịn̄ke utọ ikọ oro. Ntak emi idọhọde ntre?
Se inamde itịn̄ ntre edi ke toto ke eset tutu esịm emi, idụhe owo emi mîsidọn̄ọke. Ndusụk ikọt Abasi ẹma ẹkam ẹsidọn̄ọ. Ke uwụtn̄kpọ, “uyịre uyịre udọn̄ọ” ama esifịna Timothy emi ekedide ata owo Abasi. (1 Timothy 5:23) Edi Bible idọhọke ke Abasi akamia enye ufen. Ntre n̄ko ke edi mfịn ke ini ikọt Abasi ẹdọn̄ọde. Idịghe Abasi amia mmọ ufen, onyụn̄ edi ke idu ke idiọk ererimbot emi afan̄ikọn̄ mîsisioho owo eto. N̄kpọ ekeme nditịbe nnọ owo ekededi ini ekededi.—Ecclesiastes 9:11.
Emi iwọrọke ke Abasi idimiaha mme idiọkowo ufen, edi ini Abasi ikemke kan̄a. Bible akam ọdọhọ ke “usen edinyan̄a edi emi”—oro edi, ini emi Abasi ọnọde mme owo ndisan̄a n̄kpere enye man ẹnyene edinyan̄a. (2 Corinth 6:2) Usụn̄ kiet emi Abasi anamde emi edi ndinam ikọt esie “ẹkwọrọ eti mbụk obio ubọn̄” esie ẹnọ mme owo ke ofụri ererimbot.—Matthew 24:14.
Ndi ndiọi udọn̄ọ eyetre tutu amama?
Ih, eyetre. Bible ọdọhọ ke ini ke edi emi owo ndomokiet mîdidọn̄ọke aba. Abasi ọyọkọk kpukpru udọn̄ọ ke Obio Ubọn̄ esie. (Isaiah 33:24; 35:5, 6) Ufen, ubiak ye n̄kpa idinyụn̄ idụhe aba. (Ediyarade 21:4) Enye ayanam mbon emi ẹkpan̄ade ẹset ẹdidu ata inem uwem ke isọn̄ emi ọfọnde ama, inyụn̄ idọn̄ọke aba tutu amama.—Psalm 37:29; Utom 24:15.
Mme itie Bible emi ẹtịn̄de n̄kpọ aban̄a udọn̄ọ
Matthew 4:23: “[Jesus] asan̄a akanade ofụri Galilee, ekpep n̄kpọ ke mme synagogue mmọ onyụn̄ ọkwọrọ eti mbụk obio ubọn̄ onyụn̄ ọkọk kpukpru orụk udọn̄ọ ye kpukpru orụk ndiọkidem ke otu mme owo.”
Nso ke emi owụt? Jesus akada mme utịben̄kpọ emi enye akanamde ọfọi owụt se imọ idinamde inọ ofụri ubonowo ke Obio Ubọn̄ Abasi.
Luke 21:11: “Ndiọi udọn̄ọ . . . ẹyenyụn̄ ẹdu.”
Nso ke emi owụt? Emi owụt ke ererimbot emi ọmọn̄ esesịm utịt.
Ediyarade 6:8: ‘Sese! ntọn̄ntọn̄ enan̄-mbakara; ndien andidoro enye ke edem ekere N̄kpa. Udi onyụn̄ etiene enye ke edem. Ẹnyụn̄ ẹnọ mmọ odudu ẹte ẹda udọn̄ọ n̄kpa ẹwot mme owo.’
Nso ke emi owụt? Prọfesi emi aban̄ade mme awat enan̄-mbakara inan̄ ke Ediyarade owụt ke ndiọi udọn̄ọ oyodu ke eyo nnyịn emi.