They Did Jehovah’s Will

Ẹtoro Jesus nte Messiah ye Edidem!

UYOM uyom otuowo ẹmi ẹdụkde Jerusalem ke Nisan 9, 33 E.N., ama anam ediwak mbon Judea ẹdu ke n̄kpaidem. Okposụkedi mîkedịghe esen n̄kpọ ndikụt mme owo ẹbụn̄ọde ẹdụk obio oro mbemiso Passover, isenowo ẹmi ẹma ẹnyene ukpụhọde. Akpan owo ke otu mmọ ekedi eren emi akawatde ke abak ass. Eren oro ekedi Jesus Christ, ndien mme owo ke ẹkebịri ọfọn̄idem ye ndakeyop ẹnọ enye nte mmọ ẹfioride ete: “Hosanna enyene Eyen David: itoro enyene Enye emi edide ke enyịn̄ Jehovah; Hosanna ke ata enyọn̄.” Ke ẹkụtde otuowo, emi ama edemede ediwak owo ẹmi ẹkedude ke Jerusalem ndidiana ye otu mbonisan̄ ẹmi.—Matthew 21:7-9; John 12:12, 13.

Idem okposụkedi ẹketorode enye idahaemi, Jesus ama ọfiọk ete ke idomo ke ẹna ẹbet imọ. Kamse, ke usen ition kpọt, ẹyewot enye kpa ke obio emi! Ih, Jesus ama ọfiọk ete ke Jerusalem ekedi obio ntịme, ndien enye ama odiomi ndinam isan̄ an̄wan̄wa ndụk obio oro ye oro ke ekikere esie.

Prọfesi eke Eset Osu

Ke 518 M.E.N., Zechariah ama ebem iso etịn̄ aban̄a Jesus ndinam isan̄ ubọn̄ ubọn̄ ndụk Jerusalem. Enye ekewet ete: “Sio n̄kpo idara, O adiaha Jerusalem: sese, edidem fo eyedi ke ọtọ fo; enye enen, onyụn̄ enịm idem ke andinyan̄a; enye edi sụn̄-sụn̄, onyụn̄ odoro ke abak ass, eyen uman ass. . . . Ndien enye ayatan̄a emem ọnọ mme idụt, onyụn̄ ada ubọn̄ ọtọn̄ọde ke inyan̄ kiet tutu esịm inyan̄ eken, onyụn̄ ọtọn̄ọde ke akpa tutu esịm ke mme utịt ererimbot.”—Zechariah 9:9, 10.

Ntre Jesus ndinam isan̄ ndụk Jerusalem ke Nisan 9 ama osu prọfesi Bible. Emi ikedịghe mbabuat edinam edi ẹketịm enye ye ntịn̄enyịn. Ke mbemiso, ke adan̄aemi akam odude ke edem obio Jerusalem, Jesus ama eteme owo iba ke otu mbet esie ete: “Ẹka ẹkodụk ke obio-in̄wan̄ emi asakde iso ese mbufo, ndien idaha oro mbufo ẹyekụt ass emi ẹyịride, ye eyen esie ye enye; ẹtat mmọ, ẹda ẹsọk Mi. Ndien owo ekededi ama ọdọhọ n̄kpọ ye mbufo, ẹbọrọ ẹte, Ọbọn̄ ke oyom mmọ; ekem idaha oro enye ọyọnọ mmọ ẹdi.” (Matthew 21:1-3) Edi ntak emi Jesus okoyomde ndiwat ke ass ndụk Jerusalem, ndien nso ke edinam otuowo ọkọwọrọ?

Etop Aban̄ade Itie Edidem

Ndise emi ẹkụtde ke enyịn esiwak ndinyene odudu n̄kan ikọ emi ẹtịn̄de-tịn̄. Ntem, ke ndusụk idaha Jehovah ama esinam mme prọfet esie ẹnanam etop mmọ ẹwụt man anam etop prọfesi mmọ enyene odudu. (1 Ndidem 11:29-32; Jeremiah 27:1-6; Ezekiel 4:1-17) Usụn̄ nneme oro ẹtịmde ẹkụt ke enyịn mi ama esịn n̄kpọ ke usụn̄ oro owo mîkemeke ndifre idem ke ekikere mme andikụt ẹmi ẹkedide ata mbon isọn̄esịt. Ke ukem usụn̄ oro, Jesus ama ọnọ okopodudu etop ebe ke ndiwat ke ass ndụk obio Jerusalem. Didie?

Ke mme ini Bible ẹkesiwat ass ẹka mme edinam itie ubọn̄. Ke uwụtn̄kpọ, Solomon ama awat “mule” ete esie, emi ekedide mbuaha uduot ayara ass, ke ini ẹkedade enye ẹka ndiyet aran nte edidem. (1 Ndidem 1:33-40) Ntre Jesus ndiwat ke ass ndụk Jerusalem ọkọwọrọ ke enye okowụt idem esie nte edidem.a Nte otuowo ẹkenamde n̄kpọ ama anam etop emi enyene odudu. Otu oro, emi nte eyịghe mîdụhe ẹkesịnede ediwak mbon Galilee, ẹma ẹbri ọfọn̄idem mmọ ẹnọ Jesus—edinam etide owo aban̄a an̄wan̄wa ntọt ẹkenọde ẹban̄a itie ubọn̄ Jehu. (2 Ndidem 9:13) Mmọ nditịn̄ mban̄a Jesus nte “Eyen David” ọsọn̄ọ unen itie ukara esie oro ekemde ye ibet. (Luke 1:31-33) Ndien mmọ ndikama ndakeyop nte an̄wan̄ade okowụt nsụkibuot mmọ nnọ odudu edidem esie.—Men Ediyarade 7:9, 10 domo.

Ntre mbonisan̄ oro ẹkedụkde Jerusalem ke Nisan 9 ẹma ẹnọ in̄wan̄în̄wan̄ etop nte ke Jesus ekedi Messiah ye Edidem oro Abasi emekde. Nte ededi, idịghe kpukpru owo ẹkenem esịt ndikụt ẹwụtde Jesus ke usụn̄ emi. Mme Pharisee akpan akpan ẹkekere ke enen̄ede ọdiọk ndinọ Jesus utọ ubọn̄ ubọn̄ ukpono oro. Mmọ nte eyịghe mîdụhe ẹma ẹdọhọ ke uyo iyatesịt ẹte: “Andikpep, kpan mbet Fo ete ẹkûtịn̄ ntre.” Jesus ama ọbọrọ ete: “Ndọhọ mbufo nte, Edieke mme mmọ ẹmi ẹkpedopde uyo, mme itiat ẹkpesio n̄kpo.” (Luke 19:39, 40) Ih, Obio Ubọn̄ Abasi ekedi ibuotikọ ukwọrọikọ Jesus. Enye ama atan̄a etop emi uko uko edide mme owo ẹma ẹkop m̀mê ikokopke.

Ukpepn̄kpọ Odude ọnọ Nnyịn

Ama oyom ọkpọsọn̄ uko man Jesus odụk Jerusalem ke ido oro prọfet Zechariah ekebemde iso etịn̄. Enye ama ọfiọk ete ke ndinam ntre imọ ikada iyatesịt mme asua inọ idem. Mbemiso enye ọkọdọkde ke heaven, Jesus ama ọdọn̄ mme anditiene enye ete ẹkwọrọ eti mbụk Obio Ubọn̄ Abasi ẹnyụn̄ ‘ẹnam kpukpru mme idụt ẹdi mbet.’ (Matthew 24:14; 28:19, 20) Ndinam utom emi oyom uko n̄ko. Idịghe kpukpru owo ẹnem esịt ndikop etop emi. Ndusụk owo inyeneke udọn̄ iban̄a enye, ke adan̄aemi mmọ eken ẹbiọn̄ọde enye. Ndusụk ukara ẹmedori ukpan ke utom ukwọrọikọ mîdịghe ẹtre enye ofụri ofụri.

Edi, Mme Ntiense Jehovah ẹfiọk ẹte ke ana ẹkwọrọ eti mbụk Obio Ubọn̄ Abasi oro ẹma ẹkewụk mi, edide mme owo ẹkpan̄ utọn̄ m̀mê ẹtre ndinam ntre. (Ezekiel 2:7) Nte mmọ ẹkade iso ndinam utom unyan̄a uwem emi, un̄wọn̄ọ Jesus emi ọsọn̄ọ mmọ idem: “Sese, Ami ndodu ye mbufo kpukpru ini, tutu esịm utịt ererimbot.”—Matthew 28:20.

[Mme Ikọ idakisọn̄]