Uwem ye Utom Jesus

Ẹda Uwụtn̄kpọ In̄wan̄ Vine Ẹyarade Mmọ

JESUS odu ke temple. Enye ndisụk ntịmede ekikere mme adaiso ido ukpono oro ẹkeyomde ndidiọn̄ọ m̀mê anie ọnọ enye odudu ndinam mme n̄kpọ ẹmi, edi emi. Mbemiso mmọ ẹbọhọde ndutịme oro mmọ ẹkedude, Jesus obụp ete: “Edi mbufo ẹse didie?” Ndien ekem ke ndida uwụtn̄kpọ enye owụt mmọ orụk owo ẹmi mmọ ẹnen̄erede ẹdi.

Jesus obụk ete, “Owo kiet ekenyene nditọiren iba; enye onyụn̄ etiene akpan ete, Eyen mi, ka kanam utom ke in̄wan̄ vine mi mfịn. Ndien enye ọbọrọ ete, N̄ka ete; edi ikaha. Ete etiene udọ ọdọhọ enye kpasụk ntre. Edi enye ọbọrọ ete, N̄kaha; edi ama ekem, enye atua n̄kpọfiọk, aka. Anie ke otu mmọ mbiba anam se ete esie oyomde?” ntre ke Jesus obụp.

Mme asua esie ẹbọrọ ẹte, “Udọ.”

Ntem Jesus anam an̄wan̄a ete: “Ke akpanikọ ke ndọhọ mbufo nte, mme publican ye mme akpara ẹbem mbufo iso ẹdụk ke Obio Ubọn̄ Abasi.” Mme publican ye mme akpara, nte ido edide, ke akpa ẹma ẹsịn ndinam n̄kpọ Abasi. Edi ekem, nte udọ akanamde, mmọ ẹma ẹkabade esịt ẹnyụn̄ ẹnam n̄kpọ esie. Ke n̄kan̄ eken, mme adaiso ido ukpono, nte akpan akanamde, ẹkedọhọ ke inam n̄kpọ Abasi, edi, nte Jesus owụtde: “John [Andinịm owo baptism] akasan̄a ke usụn̄ edinen ido etiene mbufo, ndien mbufo inịmke enye ke akpanikọ; edi mme publican ye mme akpara ẹnịm enye ke akpanikọ; ndien ke ini mbufo ẹkụtde, ituaha n̄kpọfiọk ke ukperedem, man mbufo nde ẹnịm enye ke akpanikọ.”

Jesus ndien owụt ete ke edikpu oro mme adaiso ido ukpono ẹkpude mi idịghe n̄kukụre ke ndifụmi ndinam n̄kpọ Abasi. Baba, edi ke mmọ ẹnen̄erede ẹdi ubi ubi, ndiọi owo. Jesus obụk ete, “Owo kiet okodu emi edide eteufọk. Enye onyụn̄ ọtọ in̄wan̄ vine, onyụn̄ ọbọp ọkọ akan enye okụk, onyụn̄ otịbi obube unyịmi wine ke esịt, onyụn̄ ọbọp tower, onyụn̄ ayak enye ọnọ mme ekpeme-in̄wan̄, ndien adaha aka idụt efen. Edi ke adan̄aemi ini mbun̄wụm ekperede, enye osio mme isụn̄utom ọdọn̄ ke ọtọ mme ekpeme-in̄wan̄, ẹte ẹbọ mbun̄wụm imọ. Ndien mme ekpeme-in̄wan̄ ẹmụm mme isụn̄utom esie, ẹmia kiet, ẹnyụn̄ ẹwot efen, ẹnyụn̄ ẹtọn̄ọ efen ke itiat. Enyene-in̄wan̄ ọtọn̄ọ ntak osio mme isụn̄utom efen ọdọn̄ ẹmi ẹwakde ẹkan mme ẹbemiso: ndien ẹnam ye mmọ oro kpasụk ntre.”

“Mme isụn̄utom” oro ẹdi mme prọfet oro “eteufọk,” kpa Jehovah Abasi, okosiode ọdọn̄ ke ọtọ “mme ekpeme-in̄wan̄” ke “in̄wan̄ vine” esie. Mme ekpeme-in̄wan̄ ẹmi ẹdi mme ọwọrọiso owo oro ẹdade ke ibuot idụt Israel, kpa idụt emi Bible anamde ẹdiọn̄ọ nte “in̄wan̄ vine” Abasi.

Sia “mme ekpeme-in̄wan̄” oro ẹmiade ẹnyụn̄ ẹwotde “mme isụn̄utom” emi, Jesus anam an̄wan̄a ete: “Edi ke ukperedem enye ọdọn̄ eyen esie ke ọtọ mmọ ete, Mmọ ẹyeten̄e eyen mi. Edi ke ini mme ekpeme-in̄wan̄ ẹkụtde eyen oro mmọ ẹneme ke otu idemmọ ẹte, Emi edi andidia-ufọk; ẹkam ẹyak iwot enye, inyụn̄ idia n̄kpọ-akpa esie. Ndien mmọ ẹmụm enye, ẹbịn ẹsio ke in̄wan̄ vine, ẹnyụn̄ ẹwot enye.”

Idahaemi, ke etịn̄de ikọ ọnọ mme adaiso ido ukpono oro, Jesus obụp ete: “Ke ini enyene-in̄wan̄ oro edidide, nso ke edinam mme ekpeme-in̄wan̄ oro?”

Mmọ ẹbọrọ ẹte, “Enye eyeda idiọk nsobo osobo mme idiọkowo oro, onyụn̄ ayak in̄wan̄ vine oro ọnọ mme ekpeme-in̄wan̄ efen, ẹmi ẹdinọde enye mbun̄wụm ke edikem ini.”

Mme adaiso ido ukpono oro ke ntre ye unana edifiọk ẹbiere ikpe ẹnọ idemmọ, sia mmọ ẹsịnede ke otu nditọ Israel ẹdide “mme ekpeme-in̄wan̄” ke “in̄wan̄ vine” Jehovah edide idụt Israel. Mbun̄wụm oro Jehovah oyomde oto mme utọ ẹkpeme-in̄wan̄ oro edi mbuọtidem ke Eyen esie, kpa ata Messiah. Sia mmọ ẹkpude ndision̄o utọ mbun̄wụm oro, Jesus odụri mmọ utọn̄ ete: “Nte akanam mbufo ikotke n̄wed [Psalm 118:22, 23], ẹte, Itiat emi mme ọbọpufọk ẹsịnde amakabade edi etubom inụk: Emi oto Jehovah, nnyịn inyụn̄ ise enye ke utịbe? Mmọdo ndọhọ mbufo nte, Ẹyebọ mbufo Obio Ubọn̄ Abasi, ẹyak ẹnọ idụt emi edin̄wụmde mfri esie. Ndien owo eke ediduọde ke itiat emi eyenuaha mbak mbak: edi owo ekededi eke itiat emi ediduọde ọtọ enye, eyekọk enye nte obu.”

Mme scribe ye mme akwa oku idahaemi ẹdidiọn̄ọ ẹte ke Jesus etịn̄ aban̄a mmimọ, ndien mmọ ẹyom ndiwot enye, kpa “andidia-ufọk” oro odotde. Ntre ẹyebọ mmọ ifet ẹdidi mme andikara ke Obio Ubọn̄ Abasi nte idụt, ndien ẹyesiak obufa idụt edide ‘mme ekpeme-in̄wan̄ vine,’ kpa kiet oro edision̄ode mbun̄wụm emi ẹdotde.

Sia mme adaiso ido ukpono ẹfehede otuowo enyịn, oro ẹdade Jesus nte prọfet, mmọ idomoke ndiwot enye ke itie emi. Matthew 21:28-46; Mark 12:1-12; Luke 20:9-19; Isaiah 5:1-7.

◆ Mmanie ke nditọ iba oro ke akpa uwụtn̄kpọ Jesus ẹda ẹban̄a?

◆ Mmanie ke “eteufọk,” “in̄wan̄ vine,” “mme ekpeme-in̄wan̄,” “mme isụn̄utom,” Ye “andidia-ufọk” ẹda ẹban̄a ke ọyọhọ uwụtn̄kpọ iba?

◆ Nso iditịbe inọ ‘mme ekpeme-in̄wan̄ vine,’ ndien mmanie ẹdida itie mmọ?