Uwem ye Utom Jesus

Uwụtn̄kpọ Usọrọ Ndọ

EBEDE ke uwụtn̄kpọ iba, Jesus amayarade mme scribe ye ikpọ oku, ndien mmọ ẹyom ndiwot enye. Edi Jesus ikûreke ye mmọ. Enye akaiso etịn̄ uwụtn̄kpọ efen efen ọnọ mmọ, ọdọhọde ete:

“Obio Ubọn̄ Heaven ebiet edidem kiet, emi anamde udia-ndọ ọnọ eyen esie; enye onyụn̄ ọdọn̄ ikọt esie ẹdidọhọ mmọemi ekekotde ẹdi udia: ndien mmọ inyịmeke ndidi.”

Jehovah Abasi edi Edidem emi anamde udia-ndọ ọnọ Eyen esie, Jesus Christ. Ke akpatre, n̄wanndọ esie edide mme anditiene enye owo 144,000 oro ẹyetde aran ẹyediana ye enye ke heaven. Mme andidu ke idak ukara Edidem oro ẹdi nditọ Israel, emi, ke ẹma ẹkeda edisịn ke Ibet ediomi ke 1513 B.C.E., ẹkebọde ifet edikabade ndi “obio oku.” Ntre, ke ini edinam oro, ẹma ẹbemiso ẹnọ mmọ ikot edidụk udia-ndọ.

Nte ededi, akpa ikot oro ẹkenọde ọsọk mbon oro ẹkekotde ikeberekede tutu osịm utịt utịt 29 C.E., ke ini Jesus ye mme mbet esie (ifụn edidem) ẹketọn̄ọde utom ukwọrọ Obio Ubọn̄ mmọ. Edi ata nditọ Israel ẹmi ẹkebọde ikot oro ifụn ẹmi ẹkenọde ọtọn̄ọde ke 29 C.E. tutu osịm 33 C.E. ikenyịmeke ndidi. Ntre Abasi ama ọnọ mme owo oro ẹkekotde ke idụt oro ifet efen efen, nte Jesus anamde an̄wan̄a ete:

“Enye ọtọn̄ọ ntak ọdọn̄ ikọt esie efen, ete, Edọhọ mmọ oro ẹkekotde ẹte, Sese, mmanam udia mma; ẹwot enan̄ mi ye mme unam eke ẹsehede, ẹnyụn̄ ẹnam kpukpru n̄kpọ ẹma: ẹdi udia-ndọ.” Ọyọhọ iba ye akpatre ikot oro ẹnọde esọk mbon oro ẹkekotde ọkọtọn̄ọ ke Pentecost eke 33 C.E., ke ini ẹken̄wan̄ade edisana spirit ẹduọk mme anditiene Jesus ke idem. Ikot emi ama akaiso tutu osịm 36 C.E.

Ata ediwak nditọ Israel oro, nte ededi, ikeyereke ikot emi. Jesus anam an̄wan̄a ete, “Edi mmọ ikereke, ẹnyụn̄ ẹdaha ẹdụk ke afan̄ mmọ, kiet aka in̄wan̄ esiemọ, efen aka urua: ndien mmọemi ẹsụkde ẹmụm ikọt esie, ẹnam mmọ ido usuene, ẹnyụn̄ ẹwot mmọ.” Jesus akaiso ete, “Edi edidem ayat esịt, onyụn̄ osio mbonekọn̄ esie ọdọn̄, ete ẹsobo mbio obom oro, ẹnyụn̄ ẹfọp obio mmọ ke ikan̄.” Emi akada itie ke 70 C.E., ke ini mbon Rome ẹkewụride Jerusalem, ndien ẹma ẹwot mme owotowo oro.

Jesus ndien anam an̄wan̄a se ikadade itie adan̄aoro ete: “Ekem enye [edidem] ọdọhọ ikọt esie ete, Ẹma ẹnam udia-ndọ ẹma, edi mmọemi ẹkekotde idotke. Mbufo ẹka ndien ke n̄wan̄a usụn̄ ẹkekot kpukpru mmọ eke ẹdikụtde ẹdidi udia-ndọ.” Ifụn oro ẹma ẹnam emi, ndien “ubet udia ọyọhọ ye mmọemi ẹtiede ke okpokoro.”

Utom editan̄ isenowo oro ẹkekotde ke n̄wan̄a usụn̄ ọkọtọn̄ọ ke 36 C.E. Cornelius, etubom mbonekọn̄ Rome ye ubon esie ẹkedi akpa mbon oro mîdịghe Jew oro mîkanaha mbobi, oro ẹketan̄de ẹbok. Utom editan̄ mbon oro mîdịghe Jew mi mbok, ẹmi kpukpru mmọ ẹdade itie mbon oro ẹkesịnde ikot oro ke akpa, amakaiso tutu edisịm ọyọhọ isua ikie-20 emi.

Edi ke ọyọhọ isua ikie-20 emi ke ẹyọhọ ubet ndọ. Jesus obụk se idade itie adan̄aoro, ọdọhọde ete: “Ke adan̄aemi edidem odụkde ndise mmọemi ẹtiede, enye okụt owo do eke mîsịneke ọfọn̄idem-ndọ: onyụn̄ ọdọhọ enye ete, Ufan, afo anam didie odụk mi ke mûsịneke ọfọn̄idem-ndọ? Edi enye inyeneke se ọbọrọde. Ekem edidem ọdọhọ ikọt esie ete, Ẹbọp enye ubọk ye ukot, ẹnyụn̄ ẹtop enye ọduọk ke ekịm ke esien; do ke editua eyet ye edita edet eyedu.”

Owo oro mîsịneke ọfọn̄idem-ndọ mi ada aban̄a mme abian̄a abian̄a Christian eke Christendom. Akananam Abasi idiọn̄ọke mmọemi nte mbon oro ẹnyenede eti n̄kpọ eke ẹdade ẹdiọn̄ọ mmọ nte nditọ Israel eke spirit. Akananam Abasi iyetke mmọ aran ke edisana spirit nte mme adaudeme Obio Ubọn̄ nnyene. Ntre ẹtop mmọ ẹduọk ke ekịm ke esien ke ebiet mmọ ẹdikụtde nsobo.

Jesus ada uwụtn̄kpọ esie okosịm utịt ke ndidọhọ: “Koro mmọ eke ẹkotde ẹwak, edi mmọ eke ẹmekde iwakke.” Ih, ẹma ẹkot ediwak owo ke idụt Israel ndidi mme andibuana ke otu an̄wanndọ Christ, edi n̄kpasịp ibat ibat nditọ Israel eke obụk ke ẹkemek. Ata ediwak isenowo ke otu owo 144,000 ẹmi ẹbọde utịp eke heaven idịghe nditọ Israel. Matthew 22:1-14; Exodus 19:1-6; Ediyarade 14:1-3.

◆ Mmanie ke ẹkebemiso ẹkot ẹdi udia-ndọ, ndien ini ewe ke ẹkenam ikot oro osịm mmọ?

◆ Ini ewe ke ẹkenọ akpa ikot osịm mbon oro ẹkekotde, ndien mmanie ẹdi ifụn oro ẹdade ke ndisuan ikot oro?

◆ Ini ewe ke ẹkenọ ọyọhọ ikot iba, ndien ke oro ebede mmanie ke ẹkekot?

◆ Owo oro mîsịneke ọfọn̄idem-ndọ ada aban̄a mmanie?

◆ Mmanie ẹdi ediwak mbon oro ẹkotde, ye ekpri ibat oro ẹmekde?