Uwem ke Utom Jesus

Omokụre Utom ke Temple

JESUS ke etịn̄ akpatre ikọ esie ke temple. Ke akpanikọ, enye ke ada utom esie ke isọn̄ osịm utịt, ibọhọke mme n̄kpọntịbe ẹban̄ade ikpe ye ediwot oro ẹwotde enye usen ita ke ukperedem. Idahaemi enye akaiso ke edisua nnọ oro enye asuade ọnọ mme scribe ye mme Pharisee.

Utịm ikata en̄wen enye ofiori ete: “Eyedọdiọk ọnọ mbufo, mme scribe ye mme Pharisee, mbon mbubịk!” Akpa, enye ọkọdọhọ ke ọdọdiọk ọnọ mmọ koro mmọ “ẹyetde edem cup ye usan asana, edi esịt mmọ ẹyọhọ ye un̄wo ye unana ufat ke idem.” Ntre enye ọnọ item ete: “Bemiso yet esịt cup ye usan asana, man edem esie onyụn̄ akabade asana n̄ko.”

Udiana enye ọdọhọ ke ọdọdiọk ọnọ mme scribe ye mme Pharisee ke ntak mbubiam ye ndek eke esịt idem oro mmọ ẹdomode ndida enyọn̄ enyọn̄ ifiopesịt ndịp. Enye ọdọhọ ete, “Mbufo [ẹbiet] udi eke ẹyetde ndom, eke ẹyede ndise edem edem, edi ke esịt esịt ẹyọhọde ye mme okpo mme akpan̄kpa ye kpukpru ndek.”

Ke akpatre, ẹyarade mbubịk ido mmọ ke mmọ ndinyịme ndibot mme udi nnọ mme prọfet nnyụn̄ mbana mme udi ẹmi man mme owo ẹkụt utom imaesịt mmọ. Kpa ye oro, Jesus ayarade nte ke mmọ ẹdi “nditọ mmọemi ẹkewotde mme prọfet.” Ke akpanikọ, owo ekededi emi edeide-dei ayarade mbubịk ido mmọ odu ke afanikọn̄!

Ke akade iso, Jesus etịn̄ ata ọkpọsọn̄ ikọ ubiomikpe. Enye ọdọhọ ete: “Mbufo mme urụkikọt, mbufo nditọ ibọm, ẹdisan̄a didie ẹbọhọ ikpe [“Gehenna,” NW]?’ Gehenna edi itịghede odude nte itie uduọn̄ọ mbio ke Jerusalem. Ntre Jesus ọdọhọ ete ke mmọ nditiene idiọk usụn̄ mmọ, mme scribe ye mme Pharisee ẹyekụt nsinsi nsobo.

Kaban̄a mbon oro enye okosiode ọdọn̄ nte mme andida ke ibuot esie, Jesus ọdọhọ ete: “Mbufo ẹyewot, ẹyenyụn̄ ẹkọn̄ ndusụk mmọ ke [eto]; mbufo eyenyụn̄ ẹmia ndusụk mmọ ke synagogue mbufo, enyụn̄ ẹkọbọ ẹbịne mmọ ke obio ke obio: man ofụri edinen iyịp emi ẹduọkde ke isọn̄ ọkpọkọbọ mbufo, ọtọn̄ọde ke iyịp edinen Abel, tutu osịm iyịp Zechariah, eyen Barachiah [emi ẹkotde Jehoiada ke 2 Chronicles], emi mbufo ẹkewotde ke afan̄ emi odude ke ufọt temple ye itieuwa. Ke akpanikọ, kpukpru n̄kpọ emi ẹyesịm emana emi.”

Sia Zechariah akasuade ọnọ mbọn̄ Israel uko uko, “mmọ [ẹma] ẹdụk odu ẹban̄a enye, ẹnyụn̄ ẹtọn̄ọ enye ke itiat ke okụre ufọk Jehovah, ke uyo edidem.” Edi, nte Jesus ekebemde iso etịn̄, Israel eyekpe isop ke ofụri iyịp utọ ndinen owo oro ẹkeduọkde. Mmọ ẹma ẹkpe isop oro isua 37 ke ukperedem, ke 70 C.E., ke ini udịmekọn̄ mbon Roman ẹkewụride Jerusalem ndien mme Jew ẹwakde ẹbe million kiet ẹma ẹtak.

Nte Jesus ekerede aban̄a enyenendịk n̄kpọntịbe emi, enye ofụhọ. “Jerusalem, Jerusalem,” ntre ke enye ofiori inikiet efen. “Adan̄a ediwak ini didie ke n̄koyom ndibon nditọ fo ọtọkiet, kpa nte unen obonde nditọ esie ke idak mba esie, ndien mbufo ikonyịmeke. Sese, ẹyak ufọk mbufo ẹkpọn̄ ẹnọ mbufo nte ndon.”

Jesus adian do ete: “Mbufo idikwe Mi aba, tutu mbufo ẹdọhọ ete, Itoro enyene Enyeemi edide ke enyịn̄ Jehovah.” Usen oro edidi edidu Christ ke ini enye edide ke Obio Ubọn̄ esie eke heaven ndien mme owo ẹmekụt enye ke enyịn mbuọtidem.

Idahaemi Jesus asan̄a aka ebiet emi enye ekemede ndikụt mme usịn-etịbe ke temple ye otuowo ẹsịnde okụk ke esịt mmọ. Mme enyene n̄kpọ owo ẹsịn ediwak okụk. Edi ekem ubuene ebeakpa asan̄a edi onyụn̄ esịn okụk iba ẹdide ata ekpri ekọmurua.

Ke okotde mme mbet esie, Jesus ọdọhọ ete: “Ke akpanikọ ke ndọhọ mbufo nte, ubuene ebeakpa emi ama esịn akan kpukpru mmọemi ẹkesịnde okụk ke usịn-etịbe.” Anaedi mmọ ẹyịk nte emi ekpedide ntre. Ntem Jesus anam an̄wan̄a ete: “Koro kpukpru mmọ ẹkesiode n̄kpọ ke nyọhọ-nsụhọ mmọ esịn; edi enye ama osio kpukpru se enye enyenede ke unana esie ọnọ, kpa ofụri se enye akpadade odu uwem.” Ke ama eketịn̄ n̄kpọ emi ama, Jesus ọwọrọ ke temple nte akpatre ini.

Ke ẹdude ke n̄kpaidem ke ntak ubom ye uyai temple emi, mme mbet esie ẹdọhọ ẹte: “Andikpep, sese, itiat emi ye mme ufọk emi ẹmekpon adan̄a didie.” Ke akpanikọ, ẹdọhọ ẹte ke itiat oro ama akan ikpat 35 ke uniọn̄, akan ikpat 15 ke ubom, onyụn̄ akan ikpat 10 ke ukon̄!

Jesus ọbọrọ ete, “Nte omokụt ikpọ ufọk ẹmi? Idikpọn̄ke itiat kiet ke enyọn̄ itiat efen eke mîdidorokede enye iduọk.”

Ke ama eketịn̄ n̄kpọ ẹmi ama, Jesus ye mme apostle esie ẹbe Itịghede Kidron ẹnyụn̄ ẹdọk Obot Olive. Do mmọ ẹkeme ndisụk enyịn nse ediye temple oro. Matthew 23:25-24:3; Mark 12:41-13:3; Luke 21:1-6; 2 Chronicles 24:20-22.

◆ Nso ke Jesus anam ke akpatre isan̄ oro enye akade temple?

◆ Didie ke ẹyarade mbubịk mme scribe ye mme Pharisee?

◆ “Ikpe [Gehenna]” ọwọrọ nso?

◆ Ntak emi Jesus ọdọhọde ke ebeakpa oro esịn okụk akan mme enyene n̄kpọ owo?