2. N̄kpọ etie didie toto ke 1914, mme owo ẹnyụn̄ ẹdu uwem didie?

Mbet Jesus ẹma ẹbụp Jesus isan̄ kiet ẹte: “Nso idinyụn̄ idi idiọn̄ọ edidu fo ye eke akpatre ini editịm n̄kpọ emi?” (Matthew 24:3) Jesus ama etịn̄ se iditịbede ẹma ẹmek imọ Edidem Obio Ubọn̄ Abasi ke heaven. Enye ama asiak ekọn̄ ye akan̄ ye unyekisọn̄ esịn ke otu mme n̄kpọ oro. (Kot Matthew 24:7.) Bible ama etịn̄ ke nte mme owo ẹdidude uwem ke “mme akpatre usen” ayanam uwem ‘ọsọn̄ ndiyọ.’ (2 Timothy 3:1-5) Mme n̄kpọ Jesus ọkọdọhọde do ke eyetịbe, ye nte ẹkedọhọde ke mme owo ẹdidu uwem, ọkọtọn̄ọ ndinen̄ede ntịbe ke 1914.

3. Nso inam edi ukara Abasi ọkọtọn̄ọ ke heaven n̄kpọ ọdọdiọk akan akpa ke ererimbot?

Ke ẹma ẹkemek Jesus Edidem Obio Ubọn̄ Abasi ke heaven, enye ama an̄wana ekọn̄ ye Satan ye mme demon esie. Ekọn̄ oro ama ọsọn̄ akan Satan. Bible ọdọhọ ke ẹma “ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.” (Ediyarade 12:9, 10, 12) Satan ayat esịt etieti sia enye ọdiọn̄ọ ke eke imọ okokụre ama. Ifụtesịt oro ke enye akada ọtọn̄ọ ndinam mfịna ye ufen ọyọhọ ererimbot. Omokụt do se inamde n̄kpọ ọdiọk ntem ke ererimbot! Edi ukara Abasi eyedinam kpukpru n̄kpọ afiak ọfọn ama.