Nte Afo Emeti?

Nte afo omokụt nte mme nsiondi Enyọn̄-Ukpeme eke ndondo emi ẹnyenede ata ufọn ẹnọ fi? Do ntak mûdaha mme mbụme ẹtienede mi udomo ibuot uti n̄kpọ fo use:

◻ Ewe mbụme iba ẹn̄wam ediwak Christian ẹmi ẹnyenede ndinam ubiere kaban̄a utom ẹsịm ọkpọkpọ ubiere?

Akpa akpan mbụme edi: Ndi Bible obiom utom idịbi udia ke idemesie? Ọyọhọ mbụme iba edi: Ndi ndinam utom emi ayanam owo edi andibuana ke edinam oro ẹbiomde ikpe?—4/15, page 28.

◻ Ke usụn̄ ewe ke ‘ẹkenam edibotn̄kpọ edide owo osụk idem ọnọ ikpîkpu n̄kpọ’? (Rome 8:20)

Ẹma ẹnam nnyịn ‘isụk idem inọ ikpîkpu n̄kpọ’ ke ntak edinam akpa ete ye eka nnyịn, Adam ye Eve. “[Ikotoho] ke edinyịme esịt” nnyịn m̀mê nte utịp ọkpọkpọ edimek owo kiet ke emi eketịbe. Nnyịn ikadada enye imana. Ke mbọm, okposụkedi akpasarade ete ye eka nnyịn ke emi ẹkekemede ndinọ sụk unana mfọnmma, idiọkn̄kpọ, ye n̄kpa, Jehovah ama osụk ayak mmọ ẹnyene nditọ. N̄kpa ama ebe esịm kpukpru owo, ntre ke usụn̄ifiọk oro Abasi ‘ama anam edibotn̄kpọ edide owo osụk idem ọnọ ikpîkpu n̄kpọ.’—5/1, page 5.

◻ Ntak owụtde ifiọk ndidọhọ nte ke “n̄kpọ mbubiam” ‘ayada ke edisana ebiet’ ke ini iso? (Matthew 24:15)

Ke idaha eke eset, ẹkebuan ‘n̄kpọ mbubiam ndida ke edisana ebiet’ ye en̄wan mbon Rome ke idak Etubom Gallus ke 66 E.N. Mbiet en̄wan oro eke eyomfịn—ntọn̄ọ akwa ukụt—osụk odu ke iso. (Matthew 24:21) Ntre “n̄kpọ mbubiam nsobo” idaha kan̄a ke edisana ebiet.—5/1, page 16, 17.

◻ Didie ke ete ye eka oro ẹnamde utom ẹkeme ndinyene ini nnọ nditọ mmọ?

Eka oro akpade mba ke utom usen okụrede ekeme ndidọhọ nditọ ẹtiene imọ ẹtem udia. Ete emi enyenede ekese n̄kpọ ndinam ke utịturua ekeme ndinam ndusụk utom esịtufọk ẹmi ye nditọ esie.—5/15, page 6.

◻ Nso ke ana mbon oro ‘ẹsan̄ade ke usụn̄ Jehovah’ ẹnam? (Jeremiah 7:23)

Ndisan̄a ke usụn̄ Jehovah oyom nsọn̄ọnda—ubiere ndinam n̄kpọ esie ikpọn̄. Enye oyom edinịm ke akpanikọ—ọyọhọ mbuọtidem nte ke mme un̄wọn̄ọ Jehovah ẹdi se ẹkemede ndiberi edem ndien ke ẹyesu. Ndisan̄a ke usụn̄ Jehovah oyom nsụkibuot—ndinịm mme mbet esie ye unana edifebede nnyụn̄ mmụm n̄kokon̄ idaha esie n̄kama. (Psalm 11:7)—5/15, page 14.

◻ Nso idi akpan utom inan̄ oro “mme enọ ke owo” ẹkemede ndinam? (Ephesus 4:8)

Mmọ ẹkeme ndinen̄ede nnyịn ke mbọm, ẹda ima ẹnam nnyịn ikọri, ẹtịp ẹsịn ke nnyịn ndidiana kiet ye esop, ẹnyụn̄ ẹkpeme nnyịn uko uko. (Ephesus 4:12-14)—6/1, page 14.

◻ Nso ke nnyịn ikeme ndikpep nto Paul ndidụk nsan̄a ye n̄kpọ nte owo ikie oro ẹsiakde ke Utom ye ke mme leta esie?

Kpukpru ini nnyịn ikpenyene ndinam utom ye esop Abasi, ye esop n̄kann̄kụk nnyịn, ye mme ekemmọ andinịm ke akpanikọ. Nnyịn imoyom un̄wam, ibetedem, ye ndọn̄esịt mmọ ke mme ini mfọnọn̄kpọ ye ke mme ini afanikọn̄.—6/1, page 31.

◻ Ewe ikpehe n̄kọkibuot ita ke ẹkeme ndida n̄n̄wam mbon en̄wen ẹkere ẹban̄a Andibot?

Nnennen idaha oro ẹkụtde ke akaka ekondo, ntọn̄ọ uwem ke isọn̄, ye nte mfre owo edide san̄asan̄a ke usụn̄ oro owo mîkemeke ndifan̄a, ye nsio nsio ukeme esie.—6/15, page 18.

◻ Ntak emi ndifiọk se ọkpọkpọ enyịn̄ Andibot ọwọrọde edide akpan n̄kpọ ntre?

Enyịn̄ Abasi ọwọrọ “Enye Anam Akabade Edi” onyụn̄ ọsọn̄ọ etịn̄ nte ke enye aduak onyụn̄ anam. Ebede ke nnyịn ndifiọk nnyụn̄ nda enyịn̄ esie, nnyịn imekeme nditịm mfiọk nte ke enye osu mme un̄wọn̄ọ onyụn̄ osu uduak esie ifịk ifịk.—6/15, page 21.

◻ Didie ke ẹkeme ndibuan nditọ ke ukpepn̄kpọ Bible ubon?

Ke ebiet ẹkemede, nam ndutịm man eyen kiet kiet enyene Bible ye n̄wed ukpepn̄kpọ esie. Ẹkeme ndidọhọ ekpri eyen anam ndise emi odude ke n̄wed ukpepn̄kpọ an̄wan̄a, ẹnyụn̄ ẹkeme ndibabak nnọ eyenọwọn̄ itien̄wed Abasi oro edikotde. Ẹkeme ndidọhọ eyen oro okponde etịn̄ mme ifet oro ẹkemede ndida se ẹkpepde nsịn ke edinam.—7/1, page 15.

◻ Nso idi ndusụk utịtmbuba oro ubon ekemede ndisịn ke nditịm idem nnọ mme mbono esop?

(1) Owo kiet kiet ke ubon ndidu ke mben̄eidem ndibọrọ mbụme ke mme mbono esop; (2) owo kiet kiet ndinam n̄kpọ mban̄a edinọ ibọrọ ke mme ikọ idemesie; (3) ndisịn itien̄wed Abasi ke ibọrọ; ye (4) edidụn̄ọde se ẹkpepde ye ekikere edida nsịn ke edinam ọkpọkpọ.—7/1, page 20.

◻ Nso idi ukpọhọde eti ndọ?

Man ẹberede usụn̄ ẹnọ ẹnyụn̄ ẹnyene akwa idatesịt oro otode eti ndọ, akpan n̄kpọ kiet edi eti nneme. Emi esịne edibuana mme ntụk ye ekikere. Ndien eti nneme esịne mme n̄kpọ oro ẹbọpde-bọp, ẹnamde ẹfiak ẹkop nsọn̄idem, ẹnyenede eti ido, ẹdotde ukpono, ẹnyụn̄ ẹnọde ndọn̄esịt. (Ephesus 4:29-32; Philippi 4:8)—7/15, page 21.

◻ Nso idi ‘usụn̄ Jehovah’? (Psalm 25:8, 9, 12)

Usụn̄ oro edi usụn̄ ima. Enye ọkọn̄ọ ke ndinam se inende nte ekemde ye mme idaha Abasi. Bible okot edida ima edumbet emi nsịn ke edinam “usụn̄ eke akande mmọ eken kpukpru.” (1 Corinth 12:31)—8/1, page 12.