Ndisịn Un̄wana ke Edidu Christ
“Ke ini Eyen Owo edidide ke ubọn̄ Esie, . . . Enye eyenyụn̄ abahade mmọ kiet ye eken.”—MATTHEW 25:31, 32.
1. Mme ọkwọrọ ederi Christendom ẹkabade mme ikọ Matthew 24:3 ndiwọrọ nso?
USEN ita mbemiso n̄kpa Jesus, owo inan̄ ke otu mbet esie ẹma ẹka ẹbịne enye ẹnyụn̄ ẹkebụp enye ye ọkpọsọn̄ udọn̄ ẹte: “Sian nnyịn, ini ewe ke mme n̄kpọ ẹmi ẹditịbe? ndien nso ididi idiọn̄ọ edidi fo [Greek, pa·rou·siʹa], ye eke utịt ererimbot?” Ke ediwak isua ikie mme ọkwọrọ ederi ye mme ewet n̄wed Christendom ẹmekabade mme ikọ oro ẹketịn̄de ẹnọ Jesus mi ke Matthew 24:3 (King James Version) ndiwọrọ nte ke enye eyetọn̄ọ ntak edi ke idem eke obụk man ofụri ubonowo ẹkụt enye. Ntem, mmọ ẹmekpep nte ke edifiak ndi Christ edidi ye akwa uwụtidem ye ke ido oro ẹkụtde ke enyịn. Mmọ ẹkot enye editọn̄ọ ntak ndi Christ. Edi nte ekikere mmọ enen?
2, 3. (a) Nso ukpụhọde ke ọyọhọ Ebọhọ 2 eke Studies in the Scriptures esịn ke ufọt mme ikọ ẹmi “edidi” ye “edidu”? (b) Nso ke ikọt Jehovah ẹkedidiọn̄ọ kaban̄a se pa·rou·siʹa Christ ọwọrọde?
2 Etisịm 1889, ikọt Jehovah oro ẹyetde aran, nte mme ọnọ un̄wana eke ọyọhọ isua ikie-19, ẹma ẹbọbọ edinen̄ede ke n̄kpọ aban̄ade edifiak ndi Christ. Ke Eboho 2 eke Studies in the Scriptures, page 158 osịm 161, Charles T. Russell, akpa etieibuot Watch Tower Bible and Tract Society, ekewet ete: “Parousia . . . owụt edidu, ndien owo ikpedehede ikabade enye edidi, nte ẹkụtde ke ọsọ Bible Ikọmbakara . . . ‘Emphatic Diaglott,’ kpa ata eti edikabade Obufa Testament, akabade parousia nte enende, edidu . . . , idịghe edidi, nte n̄kpọ eke edide ke usụn̄, edi edidu, nte n̄kpọ eke ama ekedide edisịm [Jesus] ọdọhọ ete, ‘Nte mme usen Noah ekededi, kpasụk ntre ke parousia [edidu] Eyen owo edinyụn̄ edi.’ Tịmfiọk, ete ke se ẹmende ẹdomo idịghe edidi Noah ye edidi Ọbọn̄ nnyịn . . . Ukpụhọde, ndien, edi ini edidu Noah ke otu mme owo ‘mbemiso ukwọ,’ ye ini oro Christ odude ke ererimbot, ke edidu esie ọyọhọ ikaba, ‘mbemiso ikan̄’—kpa ọkpọsọn̄ afanikọn̄ Usen Ọbọn̄ [Jehovah] emi emana emi edisịmde utịt.”—Matthew 24:37.
3 Ntre ikọt Jehovah eke ọyọhọ isua ikie-19 ema ẹfiọk nnennen nte ke pa·rou·siʹa Christ edidi se enyịn mîkwe. Mmọ ẹma ẹdifiọk n̄ko ẹte ke utịt Ini Mme Gentile edidi ke ndaeyo eke 1914. Nte un̄wana eke spirit akakade iso ayama, mmọ nte ini akade ẹma ẹdifiọk ẹte ke ẹma ẹdori Jesus Christ ke ebekpo ke heaven nte Edidem Obio Ubọn̄ ke ukem isua oro, kpa 1914.—Mme N̄ke 4:18; Daniel 7:13, 14; Luke 21:24; Ediyarade 11:15.
“Edidu Ọbọn̄ Nnyịn”
4. “Edidu Ọbọn̄ nnyịn Jesus Christ” etịn̄ aban̄a nso?
4 Ke eyo nnyịn, ndien, nso ke ikọ Bible oro “edidu Ọbọn̄ nnyịn Jesus Christ” ọwọrọ? (1 Thessalonica 5:23, NW) N̄wed kiet ọdọhọ ke ikọ oro “edidu,” pa·rou·siʹa, “ama akabade edi ikọ oro ẹmehede ndida ntịn̄ mban̄a edidi akwa owo, akpan [akpan] ndidem ye mme andikara ndika n̄kese mbahade obio ukara.” Ntre ikọ emi ada aban̄a ubọn̄ ubọn̄ edidu oro Ọbọn̄ Jesus Christ odude nte Edidem, ọtọn̄ọde ke 1914 ye ke oro ebede, ke etienede edidori oro ẹkedoride enye ke ebekpo ke heaven. Enye odu ke usụn̄ oro enyịn mîkwe man ‘ada ubọn̄ ke otu mme asua esie,’ akarade ifịk ifịk nte Edidem man osu ntịn̄nnịm ewụhọ emi. (Psalm 110:2) Ke n̄kpọ nte isua 79, mme owo ke isọn̄ ke ẹkụt mme utịp ubọn̄ ubọn̄ edidu Christ oro enyịn mîkwe.
5. Nso n̄kpọntịbe oro ẹdude ke ini pa·rou·siʹa ke ẹdineme ẹban̄a ke ibuotikọ ukpepn̄kpọ ita oro ẹdude ke magazine emi?
5 Ke udịm udịm ibuotikọ ita ẹmi, nnyịn iyedụn̄ọde akpan uyarade ẹban̄ade se Obio Ubọn̄ Christ anamde ke ikpehe ini emi. Akpa, nnyịn iyewụt ndusụk prọfesi Bible oro ẹbemde iso ẹtịn̄ ẹban̄a mme n̄kpọntịbe oro ẹma ẹkedada itie m̀mê oro ẹsụk ẹdade itie idahaemi. Ọyọhọ iba, nnyịn iyetịn̄ iban̄a akwa utom oro otu asan̄autom emi anamde akpanikọ, onyụn̄ enyenede ọniọn̄ oro Jesus adade ke ofụri ikpehe ini ubọn̄ ubọn̄ edidu esie emi, anamde. (Matthew 24:45-47) Ọyọhọ ibuotikọ ita eyesian nnyịn aban̄a ubọn̄ ubọn̄ utịt, kpa ikpehe ini “akwa ukụt.” Oro edi ini emi Jesus edide nte Ebiereikpe Jehovah ndisobo mme idiọkowo ndinyụn̄ nnyan̄a ndinen owo. (Matthew 24:21, 29-31) Ini nsobo oro ke apostle Paul eketịn̄ aban̄a nte edida “nduọkodudu nnọ mbufo ẹmi ẹkụtde ukụt, kpa nte Enye edinamde ye nnyịn n̄ko, ke ini emi Ọbọn̄ Jesus editode ke heaven ọbiọn̄ọde ke ikan̄ emi asakde, ye mme angel odudu Esie, edisio usiene ọnọ mmọemi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus.”—2 Thessalonica 1:7, 8.
Idiọn̄ọ Oro
6. Nso ntan̄ndian idiọn̄ọ ke ẹtịn̄ ẹban̄a ke Matthew ibuot 24 ye 25?
6 Ke isua ikie efụtenan̄ ẹmi ẹkebede, mme ọnọ un̄wana mbet Jesus ẹma ẹbụp enye ẹban̄a idiọn̄ọ, m̀mê uyarade, edidu esie ke ini iso ke odudu Obio Ubọn̄. Ibọrọ esie, oro ẹwetde ke ọyọhọ ibuot 24 ye 25 ke Matthew, ọnọ ntan̄ndian idiọn̄ọ, kpukpru n̄kpọ oro ẹsude idahaemi ke udomo eke ofụri ererimbot. Edisu idiọn̄ọ oro onịm ini ukụt ye akwa udomo idiọn̄ọ. Jesus ọkọtọt ete: “Ẹkpeme mbak owo baba kiet ididaha mbufo iwaha ikpọn̄ usụn̄. Koro ediwak owo ẹyedi ke enyịn̄ Mi, ẹte, Ami ndi Christ: ẹyenyụn̄ ẹda ediwak owo ẹwaha ẹkpọn̄ usụn̄. Mbufo ẹyenyụn̄ ẹkop ẹban̄a ekọn̄ ye etop ekọn̄; ẹkpeme ẹkûtịmede esịt; koro mme n̄kpọ ẹmi ẹnyene ndiwọrọ; edi idịghe utịt kan̄a.”—Matthew 24:4-6.
7. Nso ikpehe idiọn̄ọ ke nnyịn ikụt nte osude toto ke 1914?
7 Jesus ama akaiso etịn̄ prọfesi ete ke ekọn̄ eyedu ke udomo oro akanam mîdụhe. Ke edisu, iba ke otu ẹmi edi se ẹdiọn̄ọde nte mme ekọn̄ ererimbot, emi kiet ọkọtọn̄ọde ke 1914 osịm 1918 ndien udiana ọtọn̄ọde ke 1939 osịm 1945. N̄ko-n̄ko, enye ama ọdọhọ ete ke unana udia ye unyekisọn̄ ẹyedu ke nsio nsio ebiet. Ẹyekọbọ mme ata Christian idiọk idiọk. Ke edisu prọfesi emi, Mme Ntiense Jehovah, kpa mme ọnọ un̄wana eyomfịn, ẹsobo ukọbọ ke isua anan̄ ẹmi ẹkebede ke adan̄aemi ẹkwọrọde eti mbụk Obio Ubọn̄ Abasi “ke ofụri ekondo nte ntiense ẹnọ kpukpru mme idụt.” (Matthew 24:7-14) Yearbook of Jehovah’s Witnesses kiet kiet adian ke uyarade oro nte ke mme ikpehe eke idiọn̄ọ emi ke ẹsu.
8, 9. (a) Nso ke ubọn̄ ubọn̄ edidu Jesus abuana? (b) Nso ke prọfesi Jesus aban̄ade mme Christ nsu owụt kaban̄a ebiet ye ido edidu esie?
8 Sia itie edidem Jesus osịmde ofụri isọn̄, ẹmetat utuakibuot akpanikọ ke kpukpru akamba ubak isọn̄. Ubọn̄ ubọn̄ edidu (pa·rou·siʹa) esie edi ini edidụn̄ọde ofụri ekondo. (1 Peter 2:12) Edi nte ibuot obio, m̀mê iwụk ebiet emi edikemede ndikụt Jesus odu? Jesus ama ọbọrọ emi ke ndibemiso ntịn̄ nte ke mme Christ nsu ẹyedaha ẹda, ke ini ẹdoride enyịn ẹban̄a edidu imọ. Enye ama odụri owo utọn̄ ete: “Edieke mmọ ẹdọhọde mbufo ete, Sese, Enye [Christ] odu ke desert; ẹkûwọrọ ẹka: Sese, Enye odu ke ubet; ẹkûnịm ke akpanikọ, koro nte emịnen̄-mịnen̄ otode ke edem usiahautịn ọwọrọ ayama osịm edem usoputịn, ntre ke [edidu, NW] [pa·rou·siʹa] Eyen Owo eyedi.”—Matthew 24:24, 26, 27.
9 Jesus, kpa “Eyen Owo,” ama ọfiọk ọfọn akan owo efen ekededi ke isọn̄ ebiet emi edikemede ndikụt enye ke ini edidu esie ama enen̄ede ọtọn̄ọ. Enye ididụhe mi m̀mê ko m̀mê ke akpan ebiet ekededi ke isọn̄. Enye idiwọrọke iwụt idem ke ebiet emi odude nsannsan, “ke desert,” man mbon oro ẹdiyomde Messiah ẹkpekeme ndisobo ye enye do ke ebiet emi mbon ukara eke idụt mîdikemeke ndikụt enye, kpa ebiet emi mme anditiene enye ẹdikemede ndibọ ukpep ke idak ndausụn̄ esie, ẹben̄ede idem ndisiak en̄wan ukaraidem nnyụn̄ mmenede enye ndori ke ebekpo nte Messiah Andikara ererimbot. N̄ko-n̄ko, enye idinyụn̄ idịbeke ke n̄kpọ nte “ubet,” anamde ibat ibat owo oro ẹmekde ẹfiọk ebiet emi enye odude, man ke odude do, ye unana edidi se ẹkụtde ẹnyụn̄ ẹfiọkde ebiet eke enye odude, enye ekpekeme ndidụk odu nnyụn̄ ndiomi ndedịbe ediomi ye ndiọi nsan̄a esie mban̄a nte edisan̄ade emen mme ukara ererimbot ẹfep onyụn̄ anamde ẹyet enye aran nte Messiah oro ẹken̄wọn̄ọde. Baba-o!
10. Didie ke mme un̄wana akpanikọ Bible ẹyama ke udomo eke ofụri ererimbot?
10 Ke edide isio ye oro, idụhe n̄kpọ ndomokiet oro ẹkenyenede ndidịp mban̄a edidi oro Jesus edidide nte Edidem, ke ntọn̄ọ ubọn̄ ubọn̄ edidu esie. Nte Jesus ekebemde iso etịn̄, ke udomo eke ofụri ererimbot, mme un̄wana akpanikọ Bible ẹkaiso ndiyama ke akamba udomo ọtọn̄ọde ke mme ikpehe edem usiahautịn osịm mme ikpehe edem usoputịn. Ke akpanikọ, nte mme ọnọ un̄wana eyomfịn, Mme Ntiense Jehovah ẹwụt nte idide ‘un̄wana mme idụt, man edinyan̄a [Jehovah] okposịm ke utịt ererimbot.’—Isaiah 49:6.
Utom Mme Angel
11. (a) Ke nso usụn̄ ke ẹda udịm mme angel ẹnam n̄kpọ ndisịn un̄wana Obio Ubọn̄ ayama? (b) Ini ewe ndien ke otu ewe ke ẹketan̄ otu ibokpot ẹbok?
11 Mme itien̄wed efen oro ẹnyenede ebuana ye edidu Jesus ẹtịn̄ ẹban̄a enye nte asan̄ade ye udịm mme angel mîdịghe nte ‘osiode mmọ ọdọn̄.’ (Matthew 16:27; 24:31) Ke n̄ke ibokpot ye idiọk n̄kpasịp, Jesus ọkọdọhọ ke “in̄wan̄ edi ererimbot” ye nte ke “ini ukpen̄e edi akpatre ini eyo emi; ndien mbon ukpen̄e ẹdi mme angel.” Nte ededi, emi iwọrọke ite ke ini edidu esie ke odudu Obio Ubọn̄ ye ubọn̄, ke enye ada sụk mme isụn̄utom oro ẹdide angel ndidọn̄ utom ke isọn̄. Ọtọn̄ọde ke 1919, mme angel oro ẹdude ke idak ndausụn̄ Jesus ẹma ẹbahade otu ibokpot eke ẹyetde aran oro ẹbonde ke spirit ẹmi ẹdude ke isọn̄, emi mme n̄kpọntịbe Ekọn̄ Ererimbot I akasuande, ndien ẹma ẹtịm mmọemi idem ẹnọ n̄kaiso utom ke enyịn̄ Edidem. (Matthew 13:38-43) Ke mme iduọk isua 1920 ediwak tọsịn owo efen efen ẹma ẹda idaha mmọ ke n̄kan̄ Obio Ubọn̄ Abasi oro ẹma ẹkewowụk ẹnyụn̄ ẹyet mmọ aran ke spirit Abasi. Ẹma ẹda mbon oro ẹyetde aran mi ẹdidian ke udịm akpa nsụhọ uforo uforo. Nte otu, mmọ ẹnam otu asan̄autom emi anamde akpanikọ onyụn̄ enyenede ọniọn̄ ke eyo nnyịn.
12. Ke ewe edinam asana ke mme angel ẹketiene ẹbuana, ndien ye nso utịp ọnọ isọn̄?
12 Ẹwet uwụtn̄kpọ efen aban̄ade ebuana emi mme angel ẹnyenede ke ini edidu Jesus ke etienede edidori enye ke ebekpo ke 1914 ke Ediyarade 12:7-9: “Michael [Jesus Christ] ye mme angel esie ẹn̄wana ekọn̄ ye dragon; dragon ye mme angel esie ẹnyụn̄ ẹn̄wana ekọn̄, edi mmọ ikanke. Ufan̄ inyụn̄ idụhe aba inọ mmọ ke heaven. Ndien ẹsio akwa dragon ẹduọk ke isọn̄, kpa akani urụkikọt oro ẹkotde enye ete, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.” Ntem, ẹma ẹnam heaven asana kemi, osụhọde sụk edinam ikpehe Obio Ubọn̄ oro eke n̄kan̄ isọn̄ asana ofụri ofụri man ẹnam enyịn̄ Jehovah asana. Ke isua 1993 emi, ntọt Abasi emi osụk akakaiso enyene n̄kpọ ndinam: “Mbọm isọn̄ . . . koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.”—Ediyarade 12:12.
Ediset N̄ka Heaven
13, 14. (a) Nso ke N̄wed Abasi owụt nte okotịbede ọtọn̄ọde ke 1918 kaiso? (b) Nso ke Paul ye John ẹyarade kaban̄a nsụhọ oro ẹyetde aran mfịn?
13 Ndyọ ndyọ n̄kpọ efen oro otịbede ke ini edidu Christ edi ntọn̄ọ ediset n̄ka heaven. Apostle Paul ama owụt ete ke mme Christian oro ẹyetde aran oro ẹkedede ke anyanini ke udi mmọ ẹdidi mme akpa mbon oro ẹdinamde ẹset ẹfiak ẹdinyene uwem ẹnyụn̄ ẹkedụn̄ ye Christ Jesus ke obio mme spirit. Ẹma ẹnọ uyarade ke uwak isua ẹmi ẹkebede ndiwụt ke etie nte emi okotịbe ọtọn̄ọde ke 1918 kaiso. Paul ewet ete: “Ke Christ ke ẹyenam kpukpru owo ẹdu uwem. Edi kpukpru owo ke idaha esie; Christ ebemiso eset nte akpa mbun̄wụm; ekem mmọemi ẹdide ikọt Christ ẹyediana ye Enye ke [edidu, NW] [pa·rou·siʹa] Esie.” (1 Corinth 15:22, 23) Ẹsọn̄ọ edinam eset eke mbon oro ẹyetde aran ke ini edidu Christ ke 1 Thessalonica 4:15-17: “Nnyịn ida ikọinua Ọbọn̄ idọhọ mbufo ntem ite, nnyịn ẹmi idude uwem, ẹmi isụhọde itie ibet [edidu, NW] [pa·rou·siʹa] Ọbọn̄, idibemke mmọemi ẹdede iso ke baba usụn̄ kiet . . . Mmọemi ẹkpan̄ade ke Christ ẹyebemiso ẹset: ndien ẹyemen nnyịn ẹmi idude uwem, ẹmi isụhọde, ẹdọk ye mmọ ke ikpaenyọn̄, man isobo ye Ọbọn̄ ke enyọn̄.” Owo 144,000 ẹdu ẹmi Christ ẹnyenede nte mbon oro ẹyetde aran oro ẹbọde utịbe utịbe utịp emi ke akpatre.—Ediyarade 14:1.
14 Nte Paul owụtde, nsụhọ oro ẹyetde aran emi ẹdude uwem mfịn ibemke mme anam-akpanikọ, akpa n̄kpa usụn̄ Abasi ye mme mbet eke eset ẹmi ẹkedide Christian iso idụk Obio Ubọn̄. Apostle John akaiso etịn̄ aban̄a mbon oro ẹyetde aran ẹmi ẹkpade mfịn nte etienede mi ete: “Ọfọfọn ọnọ mme akpan̄kpa ẹmi ẹkpade ke Ọbọn̄, ọtọn̄ọde ke ini emi: Spirit ete, Edi ntre; man mmọ ẹduọk odudu ke ọkpọsọn̄ utom mmọ; koro se mmọ ẹkenamde ẹtiene mmọ ke edem,” oro edi, ke mmọ ndiset ndu uwem. (Ediyarade 14:13) Ndien Paul ọdọhọ ete: “Sese mmọn̄ ndọhọ ndịben̄kpọ nnọ mbufo. Idịghe kpukpru nnyịn iyede idap, edi ẹyenam kpukpru nnyịn ikpụhọde, ke idaha kiet, ke ediyịp enyịn kiet, ke adan̄aemi edifride akpatre ukotowo. Koro ẹyefri ukotowo, ndien ẹyenam mme akpan̄kpa ẹset nte mmọ mîdikemeke ndibiara aba, ẹyenyụn̄ ẹkpụhọde nnyịn.” (1 Corinth 15:51, 52) Nso enyene-ndyọ utịben̄kpọ ke emi edi ntem!
15, 16. (a) Nso n̄ke ke Jesus ọkọnọ ke Luke 19:11-15, ndien kaban̄a nso ntak? (b) Didie ke prọfesi emi osu?
15 Inikiet ke ini Jesus ọkọkwọrọde ikọ ọnọ otu mme anditiene enye aban̄a Obio Ubọn̄ Abasi, enye ama otop n̄ke ndin̄wam mmọ ẹnen̄ede mme ukwan̄ ekikere mmọ. Mbụk oro okot ete: “Mmọ ẹnyụn̄ ẹkere ẹte [obio ubọn̄ Abasi, NW] ọmọn̄ ada ubọn̄ idahaoro. Ntre ke Enye ọdọhọ ete, Ọbọn̄ kiet akaka anyan idụt, ndibọ ubọn̄ nda mfiak nnyọn̄. Ntem ke enye okot owo duop ke otu ikọt esie, onyụn̄ ọnọ mmọ okụk duop, onyụn̄ ọdọhọ mmọ ete, Ẹda emi ẹnyam urua tutu ndi. . . . Edikem ke Enye ama ọkọbọ ubọn̄ oro ada, enye afiak edi, ọnọ uyo ete, ẹkot ikọt imọ oro imọ ikayakde okụk inọ mmọ, man ọfiọk udori eke mmọ ẹkekụtde ke mbubịne.”—Luke 19:11-15.
16 Jesus ekedi “Ọbọn̄” oro akakade heaven, kpa “anyan idụt” emi enye ekenyenede ndikọbọ obio ubọn̄. Enye ama ọbọ Obio Ubọn̄ oro ke 1914. Ke mîbịghike ke oro ebede, Christ nte Edidem ama anam ibat ye mbon oro ẹkedọhọde nte idide mme anditiene enye ndikụt se mmọ ẹnamde ke ndise mban̄a mme ufọn n̄kpọ Obio Ubọn̄ oro ẹkeyakde ẹsịn mmọ ke ubọk. Ibat ibat mme anam-akpanikọ ke ẹkemek ndibọ itoro eteufọk emi: “Omotịm anam, afo eti owo: sia afo akanamde akpanikọ ke ekpri n̄kpọ, di andikara obio duop.” (Luke 19:17) Ikpehe ini edidu Christ ama abuana n̄kaiso ọkpọsọn̄ utom edikwọrọ Obio Ubọn̄, esịnede editan̄a mme ubiereikpe Abasi ndori mme idiọkowo ke idem, ndien edise enyịn ke utom emi ama esịne ke odudu oro ẹkeyakde ẹsịn “eti owo” emi ke ubọk.
Ukwọrọikọ ke Ofụri Ererimbot
17. Nso idatesịt inịm pa·rou·siʹa idiọn̄ọ?
17 Nso efen editịbe ke ini pa·rou·siʹa emi? Enye edidi ini akwa idatesịt ke utom ukwọrọikọ ye ke ndin̄wam mbufa owo nditịm idem nnọ edibọhọ akwa ukụt emi edide. Mme andibuana ke “akwa otuowo,” ẹmi ẹn̄wamde nsụhọ, ẹkabade ẹdi “n̄weditoro.” (Ediyarade 7:9; 2 Corinth 3:1-3) Paul etịn̄ aban̄a idatesịt eke utom idọk emi ke ini enye ọdọhọde ete: “Nso idi idotenyịn nnyịn, ye idatesịt nnyịn, ye anyanya eke idade ibụre mbụre? Nte idịghe mbufo ke nnyịn idida inam mbụre ke iso Ọbọn̄ nnyịn Jesus ke adan̄aemi Enye [edidude, NW] [pa-rou·siʹa]?”—1 Thessalonica 2:19.
Ẹsana Ẹnyụn̄ Ẹnana Ndo
18. (a) Ewe akam Paul enyene n̄kpọ ndinam ye pa·rou·siʹa? (b) Nso edu ke ana kpukpru nnyịn iwụt ke ini emi, ndien ke nso usụn̄?
18 Paul ama ọbọn̄ akam n̄ko eben̄e edinam mbon oro ẹdude ke uwem ke ini edidu Christ emi ẹsana: “Abasi emem ke Idemesie akpakam anam mbufo ẹsana ofụri ofụri, onyụn̄ ekpeme mbufo ofụri ofụri ke spirit ye ukpọn̄ ye ikpọkidem, anam mbufo ẹkûnyene ndo ke ini [edidu, NW] [pa·rou·siʹa] Ọbọn̄ nnyịn Jesus Christ.” (1 Thessalonica 5:23) Ih, mfịn, edide nnyịn idu ke otu nsụhọ oro ẹyetde aran m̀mê idu ke otu akwa ibat owo eke mme erọn̄ en̄wen, edu edidianakiet ọbọp nnyịn adian ke edinam akpanikọ kpan̄ nnyịn ikpakaiso isana inyụn̄ inana ndo ke anana-mbiet ini emi. Ukem ntre, oyom nnyịn ime ime. James ekewet ete: ‘Ẹme ime ndien, nditọete, tutu edidu [pa·rou·siʹa] Ọbọn̄. . . . Ẹsọn̄ esịt; koro edidu [pa·rou·siʹa] Ọbọn̄ ekpere.’—James 5:7, 8.
19. Nso ntọt ke Peter ọkọnọ kaban̄a pa·rou·siʹa, ndien didie ke nnyịn ikpanam n̄kpọ iban̄a?
19 Apostle Peter n̄ko ama enyene n̄kpọ nditịn̄ nnọ nnyịn emi idude uwem ke ikpehe ini emi. Enye ama odụri nnyịn utọn̄ aban̄a mbon nsahi, emi ediwak mmọ ẹdude ke kpukpru ikpehe isọn̄. Peter ọdọhọ ete: “Ke akpa itie, ẹfiọk emi ẹte, ke ukperedem ini mbon nsahi ẹyeda nsahi ẹdi; mmọ ẹyesan̄a ke mme idiọkitọn̄ mmọ, ẹnyụn̄ ẹdọhọ ete, [Edidu, NW] [pa·rou·siʹa] eke Enye ọkọn̄wọn̄ọde ete [iyedu] enye? koro tọn̄ọ nte mme ete ẹkede idap, kpukpru n̄kpọ ẹtie kpa nte ẹketiede toto ke editọn̄ọ ererimbot.” (2 Peter 3:3, 4) Kpa ye oro mbon nsahi ẹwakde ke ini edidu Christ, ikọt Jehovah ẹkaiso ndiyama nte un̄wana ererimbot, kaban̄a edinyan̄a ediwak owo.
Mme Mbụme ke Ndida Nnam Ndụn̄ọde
◻ Didie ke ẹkenam se iban̄ade pa·rou·siʹa an̄wan̄a ikọt Jehovah ke adiana ke adiana?
◻ Didie ke Matthew 24:4-8 osu?
◻ Didie ke mme angel ẹdiana ye Christ emi ẹdoride ke ebekpo?
◻ Nso ndyọ ndyọ utịben̄kpọ etie nte asan̄a ye pa·rou·siʹa emi?
◻ Nso idatesịt ke ẹnyene ke ini emi, ndien mmanie ẹbuana ke enye?