Edinyan̄a Ke Ini ediyarade Jesus Christ
“Ẹkam ẹdara; man mbufo ẹkpenyụn̄ ẹdat esịt etieti ke adan̄aemi ẹdiyararede ubọn̄ Esie.”—1 PETER 4:13.
1. Didie ke Jehovah ofori mme asan̄autom esie?
JEHOVAH omofori Mme Ntiense esie ye ediwak enọ. Nte Akwa Ọnọitem nnyịn, enye emesịn nnyịn ke un̄wana ye ọyọhọ ifiọk aban̄ade ekikere ye uduak esie. Ebede ke edisana spirit esie, enye amanam nnyịn ikọri ukeme ndinam un̄wana ayama ye uko. Apostle Paul emi ẹkenọde odudu spirit etịn̄ ọnọ nnyịn ke 1 Corinth 1:6, 7 ete: “Ikọ ntiense, eke ẹkenọde ẹban̄a Christ, edi akpanikọ; ntre ke mbufo inanake baba enọ kiet, ke ini mbufo ẹtiede ẹbet ediyarade Ọbọn̄ nnyịn Jesus Christ.”
2. Nso idara idara idotenyịn ke “ediyarade Ọbọn̄ nnyịn Jesus Christ” akama?
2 “Ediyarade Ọbọn̄ nnyịn Jesus Christ”—nso ke oro ọwọrọ? Enye aban̄a ini emi ẹyararede Jesus nte ubọn̄ ubọn̄ Edidem, anamde n̄kpọ ndinọ mme anam-akpanikọ anditiene enye utịp nnyụn̄ nsio usiene nnọ mmọemi mîbakke Abasi. Nte 1 Peter 4:13 owụtde, enye edidi ini ọnọ mme Christian oro ẹyetde aran ke spirit oro ẹmụmde nsọn̄ọnda ẹkama ye mme anam-akpanikọ nsan̄a mmọ eke akwa otuowo ‘ndidara nnyụn̄ ndat esịt etieti,’ koro enye edide idiọn̄ọ utịt editịm n̄kpọ Satan.
3. Didie ke ana nnyịn isọn̄ọ ida, nte nditọete nnyịn ke Thessalonica ẹkenamde?
3 Nte ini oro asan̄ade ekpere, Satan ke iyatesịt esie ke anam mfịghe oro enye odoride nnyịn ototịm ọsọn̄. Nte lion eke okụnide, enye ke odomo ndita nnyịn. Ana nnyịn isọn̄ọ ida! (1 Peter 5:8-10) Nditọete nnyịn ke Thessalonica eset, ke ini ẹkedide mbufa ke akpanikọ, ẹma ẹkụt ukem ukụt oro ediwak ke otu Mme Ntiense Jehovah ẹsobode mfịn. Ntre, mme ikọ emi apostle Paul eketịn̄de ọnọ mmọ ẹnen̄ede ẹnyene ufọn ẹnọ nnyịn. Enye ekewet ete: “[Enen] Abasi ke enyịn ndida ukụt nsio usiene nnọ mmọemi ẹsịnde mbufo ẹkụt ukụt, ndinyụn̄ nda nduọkodudu nnọ mbufo ẹmi ẹkụtde ukụt, kpa nte Enye edinamde ye nnyịn n̄ko, ke ini emi Ọbọn̄ Jesus editode ke heaven ọbiọn̄ọde ke ikan̄ emi asakde, ye mme angel odudu Esie, edisio usiene ọnọ mmọemi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus.” (2 Thessalonica 1:6-8) Ih, ana ubọhọ edi!
4. Ntak emi mme ọkwọrọ ederi ẹdotde ubiereikpe oro ẹdinọde ke ediyarade Jesus?
4 Mme adaiso ido ukpono mme Jew ẹkedi ntak ekese ukọbọ oro okodude ke eyo Paul. Kpasụk ntre mfịn, mbon oro ẹdọhọde nte idade ke ibuot Abasi, akpan akpan mme ọkwọrọ ederi Christendom, ẹsiwak ndisịn nsọk nnọ ubiọn̄ọ oro esisịmde mme ama-emem Ntiense Jehovah. Mmọ ẹnam nte imọfiọk Abasi, edi mmọ ẹsịn “Jehovah kiet” eke Bible, ẹmende ndịbe ndịbe Abasi-Ita-ke-Kiet ẹnịm ke itie esie. (Mark 12:29) Mmọ isụkke ibuot inọ eti mbụk Ọbọn̄ nnyịn Jesus, ẹdoride enyịn ke ukara ubọkowo kaban̄a ubọhọ ẹnyụn̄ ẹsịn eti mbụk aban̄ade Obio Ubọn̄ Christ edinen ido oro edidide. Ana ẹsobo kpukpru mme andibiọn̄ọ ẹdide mbon ido ukpono mi ẹfep ke ini “emi Ọbọn̄ Jesus editode ke heaven ọbiọn̄ọrede”!
‘Edidi’ Jesus Christ
5. Didie ke ẹwụt ediyarade Jesus in̄wan̄în̄wan̄ ke Matthew 24:29, 30?
5 Jesus owụt ediyarade oro in̄wan̄în̄wan̄ ke Matthew 24:29, 30. Ke etịn̄de aban̄a nsio nsio ikpehe ke idiọn̄ọ edidu esie ye eke akpatre ini eyo emi, enye ọdọhọ ete: “Utịn eyekabade okịm, ọfiọn̄ idinyụn̄ inọhọ un̄wana esie, mme ntantaọfiọn̄ ẹyenyụn̄ ẹto ke ikpaenyọn̄ ẹduọn̄ọ, ẹyenyụn̄ ẹnyen̄e mme odudu ikpaenyọn̄.” Ke ini oro “idiọn̄ọ Eyen Owo eyewụt idem ke enyọn̄.” Mme idụt isọn̄ “ẹyenyụn̄ ẹfụhọ, mmọ ẹyenyụn̄ ẹkụt Eyen Owo [Edidem Messiah Abasi] odorode ke obubịt enyọn̄ edi ye odudu ye akwa ubọn̄.” ‘Edidi’ emi, er·khoʹme·non ke usem Greek, etịn̄ aban̄a Jesus ndiwọrọ n̄wụt idem nte Andiwụt unen Jehovah.
6, 7. Didie ke edi nte ke “kpukpru enyịn ẹyenyụn̄ ẹkụt Enye,” ndien mmanie ẹbuana ke emi?
6 Apostle John n̄ko etịn̄ aban̄a ‘edidi’ emi ke Ediyarade 1:7, ke ebiet emi enye ọdọhọde: “Sese, Enye ọmọn̄ asan̄a ke obubịt enyọn̄ edi.” Oh, mme asua oro idikwe Jesus ke ata enyịn, koro “obubịt enyọn̄” owụt ete ke enye edidi ke usụn̄ oro enyịn mîkwe ndibiere ikpe. Edieke mme ikpîkpu owo ẹkpekụtde ubọn̄ eke heaven esie ke ata enyịn, mmọ ẹkpekabade nnan, ukem nte Saul ọkọdọn̄ọde nnan ke usụn̄ akade Damascus, ke ini Jesus oro ẹnọde ubọn̄ okowụtde enye idem ke akwa un̄wana oro akasiahade.—Utom 9:3-8; 22:6-11.
7 Mbụk Ediyarade ọdọhọ ete ke “kpukpru enyịn ẹyenyụn̄ ẹkụt Enye, ye mmọemi ẹkekịmde Enye; ndien kpukpru mme idụt isọn̄ ẹyeseme Enye.” Emi ọwọrọ ete ke mme andibiọn̄ọ ẹmi ẹdude ke isọn̄ ẹyefiọk ebe ke nsobo oro Jesus edidade etiene mmọ nte ke enye ama edi ke odudu ye akwa ubọn̄ nte Ebiereikpe Jehovah. Ntak ẹtịn̄de ẹban̄a mme asua ẹmi nte “mmọemi ẹkekịmde Enye”? Emi edi koro usua oro mmọ ẹsuade mme asan̄autom Jehovah mfịn ebiet eke mme andikọkọbọ Jesus. Mmọ, ke akpanikọ, ‘ẹyeseme idiọk idiọk ke mfụhọ ke ntak esie.’
8. Nso ntọt ke Jesus ye Paul ẹnọ kaban̄a mbabuat nsobo?
8 Didie ke usen usiene Jehovah oro edidi? Ke prọfesi oro ke Luke ibuot 21, Jesus etịn̄ aban̄a mme afanikọn̄ oro ẹditịbede oro ẹnamde n̄kpọ nte idiọn̄ọ edidu esie ọtọn̄ọde ke 1914. Ekem, ke ufan̄ikọ 34 ye 35, Jesus odụri owo utọn̄ ete: “Ẹkpeme idem mbufo, mbak uyụhọ udia ye mmịn ye ekikere uwem emi ẹdinam esịt mbufo odobi, ndien usen oro edibuat mbufo nte ekpọ; koro usen oro eyesịm kpukpru mmọemi ẹdụn̄de ke iso isọn̄.” Ih, usen usiene Jehovah oro edidi inikiet inikiet, ke mbuari! Apostle Paul ọsọn̄ọ emi ke 1 Thessalonica 5:2, 3, ọdọhọde ete: “Usen Ọbọn̄ ọmọn̄ edi nte inọ ke okoneyo. Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ.” Idem idahaemi mme idụt ke ẹneme ẹban̄a emem ye ifụre ke ẹnyụn̄ ẹduak ndisọn̄ọ Edidiana M’idụt ndise n̄kpọ mban̄a mme ebiet ẹmi mfịna ẹdude ebe ke odudu ekọn̄.
9. Mmanie ke ‘un̄wana ayama’ ọnọ, ndien ntak-a?
9 Ke 1Th 5 ufan̄ikọ 4 ye 5, apostle oro akaiso asian nnyịn ete: “Edi mbufo nditọete idụhe ke ekịm, eke ẹkpesịnde usen oro abuat mbufo nte inọ: koro kpukpru mbufo ẹdi nditọ un̄wana ye nditọ uwemeyo: nnyịn idịghe mbon okoneyo, inyụn̄ idịghe mbon ekịm.” Nnyịn imadara ndidi nditọ un̄wana—mme andinọ mbon en̄wen oro ẹyomde ata emem ye ifụre ke obufa ererimbot Abasi un̄wana. Ke Psalm 97:10, 11, nnyịn ikot ite: “Mbufo ẹmi ẹmade Jehovah, ẹsua idiọkido: enye onịm ukpọn̄ mbonima esie; eyesio mmọ mme idiọkowo ke ubọk. Ẹmetọ un̄wana ke isọn̄ ẹnọ ndinen owo, ẹtọ idatesịt ẹnọ mbon esịt kiet.”
Nte Mme N̄kpọ Ẹditiede
10. Nso mbemiso ntọt ke akpana nnyịn inam kaban̄a usen ikpe Abasi? (Ediyarade 16:15)
10 Mme n̄kpọ ẹditie didie ke ini akwa ukụt ọtọn̄ọde? Ẹyak nnyịn ikụbọde ika Ediyarade ibuot 16. Tịmfiọk, nte ẹnamde an̄wan̄a ke ufan̄ikọ 13 osịm 16, nte ke ndedehe, spirit mme demon ẹtan̄ mme idụt ke ofụri ekondo ẹbok ke Har–Magedon, kpa ekọn̄ akwa usen Abasi Andikara kpukpru n̄kpọ. N̄ko, ẹdori nsọn̄uyo nte ke usen unam ibat oro edidi nte inọ, ndien ẹdụri nnyịn utọn̄ ẹte idu ke edidemede—ikaiso isịne edisịnen̄kpọ eke spirit oro onịmde nnyịn idiọn̄ọ ọnọ edinyan̄a. Ini emekem ndikpe ikpe nnọ mbon isọn̄, kpa mme idụt, ye—akpan owo efen. Anie edi oro?
11. Didie ke n̄wan eke Ediyarade 17:5 owụt idemesie?
11 Enye edi ndamban̄a n̄wan oro odomode ndinịm idemesie ke “akpan n̄kpọ.” Ẹtịn̄ ẹban̄a enye ke Ediyarade 17:5 nte “ndịbe ikọ emi ọwọrọde ete, Akwa Babylon! Eka mme akpara ye mbubiam ido eke ẹdude ke isọn̄.” Edi enye idịghe aba ndịben̄kpọ inọ Mme Ntiense Jehovah. Enye omowụt idemesie an̄wan̄wa nte ukara ererimbot eke nsunsu ido ukpono, emi n̄ka Christendom ẹnamde akamba ubak esie. Se idide mbubiam ke enyịn Jehovah edi enye ndisịn idemesie ke mbubehe ukaraidem, enye ‘ndin̄wọn̄ iyịp nti ikọt Abasi’ ebe ke ndikọbọ mme Christian akpanikọ, ye ubiomikpe iyịp esie kaban̄a “kpukpru mmọemi owo ẹkewotde ke isọn̄,” esịnede se iwakde ikan owo miliọn ikie kiet ẹmi ẹwotde ke ekọn̄ eke isua ikie-20 emi kpọt.—Ediyarade 17:2, 6; 18:24.
12. Ntak emi ido ukpono Christendom odotde ubiomikpe?
12 Ke ọdiọkde akan kpukpru ẹmi, n̄ka Christendom ẹmeda esuene ẹsọk enyịn̄ Abasi oro mmọ ke mbubịk ẹdọhọde nte idade ke ibuot esie. Mmọ ẹmekpep akwaifiọk owo eke mbon Babylon ye Greek utu ke ndikpep edisana Ikọ Abasi ẹnyụn̄ ẹtịp ẹsịn ke mbiara eduuwem ofụri ererimbot ke ndinyịme usụn̄uwem nnam-se-mmade oro abiatde mme edumbet Bible. Ẹda mme ikọ eke James 5:1, 5 ẹbiom mbon idiọkitọn̄ oro ẹdide usọ ke abian̄a abian̄a mbubehe ke otu mmọ ikpe: “Da mbufo mbon inyene, ẹtuan̄a, ẹnyụn̄ ẹsio n̄kpo ẹban̄a nditaha eke edisịmde mbufo. Mbufo ẹdu uwem, ẹdia nti n̄kpọ ke isọn̄, ẹnyụn̄ ẹbịne mbre; ẹmebọk esịt mbufo ke usen afai.”
Ọduọ ye Akwa Babylon!
13. Didie ke ntọn̄ọ akwa ukụt edidi, ndien nso usọp usọp n̄kpọ ke ẹsịn udọn̄ ẹnọ ke Ediyarade 18:4, 5?
13 Ntọn̄ọ akwa ukụt edisan̄a ye ubiomikpe oro Jehovah ebierede ọnọ Akwa Babylon. Ediyarade 17:15-18 etịn̄ in̄wan̄în̄wan̄ aban̄a “uduak” Abasi—ndinam “nnụk duop oro,” kpa n̄kpọsọn̄ odudu ẹmi ẹtode esịt ediwak idut “unam” EM, ndisobo enye mfep. “Nnụk duop oro okokụtde ye unam ẹyesua akpara oro, ẹnyụn̄ ẹbiat enye, ẹnyụn̄ ẹnịm enye iferi, ẹnyụn̄ ẹta enye ikpọkidem, ẹnyụn̄ ẹfọp enye ke ikan̄ ẹwot. Koro Abasi ekesịn mmọ ke esịt, ẹte ẹnam uduak Imọ.” Eyịghe idụhe uyo otode heaven ọnọde usọp usọp ntọt ke Ediyarade 18:4, 5 ete: “Mbufo ikọt Mi, ẹwọn̄ọ ke esịt, mbak mbufo ẹdibuana ke idiọkn̄kpọ esie, ẹdinyụn̄ ẹtiene ẹbọ mme ufen esie; koro mme idiọkn̄kpọ esie ẹma ẹboho ẹkon̄ ẹsịm enyọn̄, Abasi omonyụn̄ eti mme ukwan̄n̄kpọ esie.” Mfiori ikot oro akaiso ete: Ẹsịbe kpukpru ebuana ye nsunsu ido ukpono, mbemiso ini ebede akaha!
14. Mmanie ẹdituan̄a ẹban̄a nsobo Akwa Babylon, ndien ntak-a?
14 Didie ke ererimbot edise nsobo Akwa Babylon? Ke ẹdade nsannsan ẹkụt, ndiọi mbon mbre ukara—kpa “ndidem isọn̄”—ẹyefụhọ ẹban̄a enye koro mmọ ẹkenyenede uyụhọ idatesịt edem mbiba ẹto use eke spirit mmọ. Mmọ efen oro ẹdituade ẹnyụn̄ ẹseme ẹban̄a enye n̄ko ẹdidi mme ọdiọkitọn̄ n̄ka unyamurua, kpa “mbonurua . . . , ẹmi ẹkabarede ẹforo oto ke obio oro.” Mmọemi n̄ko ẹyeda nsannsan ẹkpọn̄ enye, ẹdọhọde ẹte: “Mbọm, mbọm, akwa obio, emi ekesịnede linen, ye purple, ye ididuot ọfọn̄, onyụn̄ adade gold ye ọsọn̄urua itiat ye pearl abana idem! Koro ke hour kiet inyene eke ẹwakde ntem ẹma ẹkabade ẹkpu.” Kpukpru ndiye ọfọn̄ ukwọrọ ederi ye ata ikpọ ufọkabasi ererimbot ẹyetak ke nsinsi! (Ediyarade 18:9-17) Edi nte kpukpru owo ẹdituan̄a ẹban̄a Akwa Babylon?
15, 16. Nso ntak idatesịt ke ikọt Abasi ẹdinyene?
15 Ediyarade 18:20, 21 ọbọrọ ete: “Ẹdara ẹban̄a enye O heaven, ye mbufo nti ikọt Abasi ye mme apostle ye mme prọfet, koro Abasi ama ekpe ikpe ibuot mbufo ye enye.” Kpa nte ẹmende akwa itiat ukọk n̄kpọ ẹduọk ke inyan̄, “ke ẹdisio akwa obio Babylon ẹduọk ke ọkpọsọn̄ iduọ, ndien idikwe enye aba.”
16 Nso ntak ndidat esịt ke emi edi ntem! Ediyarade 19:1-8 osio emi owụt. Mfiori oro, “Hallelujah,” omoto ke heaven utịm ikanan̄ ọwọrọ. Akpa ita ke otu mme Hallelujah ẹmi ẹtoro Jehovah koro enye ebierede edinen ikpe ọnọ idiọk akpara oro, kpa Akwa Babylon. Ukara ererimbot eke nsunsu ido ukpono idụhe aba! Uyo oto ke ebekpo Abasi ọwọrọ, ọdọhọ ete: “Ẹtoro Abasi nnyịn, kpukpru mbufo ikọt Esie, ẹmi ẹten̄ede Enye, n̄kpri ye ikpọ.” Nso ifet ke nnyịn idinyene ntem ndibuana ke ikwọ oro!
Ndọ Eyenerọn̄
17. Ke ẹmende Ediyarade 11:17 ye 19:6 ẹdomo, ke ewe udọn̄ikọ iba ke Jehovah ọtọn̄ọ ndikara nte Edidem?
17 Ọyọhọ Hallelujah inan̄ asan̄a ye ibuotikọ ikwọ efen: “Hallelujah; koro Ọbọn̄ Abasi nnyịn, Andikara kpukpru n̄kpọ, ada ubọn̄.” Edi nte idịghe ukem ikwọ oro ke ẹkekwọ ke Ediyarade 11:17? Do nnyịn ikot ite: “Imọkọm Fi, O Ọbọn̄ Abasi nnyịn, Andikara kpukpru n̄kpọ, . . . koro Afo amada akwa odudu Fo ada ubọn̄.” Ih. Nte ededi, udọn̄ikọ eke Ediyarade 11:17 etịn̄ aban̄a Jehovah ndiwụk Obio Ubọn̄ Messiah ke 1914 ‘man ada esan̄ ukwak akara kpukpru mme idụt.’ (Ediyarade 12:5) Ediyarade 19:6 esịne ke otu udọn̄ikọ oro ẹtịn̄de ẹban̄a nsobo Akwa Babylon. Ye edisio ido ukpono mbiet akpara oro mfep, ẹyewụt unen Jehovah nte Abasi. Edituak ibuot nnọ enye nte Akakan Andikara ye Edidem eyekaiso kemi ke nsinsi nsinsi!
18. Edisio Akwa Babylon mfep eberede usụn̄ ọnọ nso idara idara ntọt?
18 Ntem, ẹyekeme ndinọ idara idara ntọt emi: “Ẹyak nnyịn idara inyụn̄ idat esịt, inyụn̄ inọ [Jah] ubọn̄; koro ekem ini ndọ Eyenerọn̄, n̄wan Esie otịm idem eben̄e Enye; ẹnyụn̄ ẹnọ enye ndisịne ediye linen eke asanade onyụn̄ esemde; koro ediye linen oro edi edinen ido nti ikọt Abasi.” (Ediyarade 19:7, 8) Owo itịn̄ke nnennen ini emi mbon oro ẹyetde aran ẹmi ẹsụk ẹdude idahaemi ke isọn̄ ẹdisetde ika heaven. Edi ẹnọ nnyịn nsọn̄ọ ke udọn̄ikọ emi nte ke mmọ ndibuana ke ndọ Eyenerọn̄, Christ Jesus, edidi ini inemesịt, akpan akpan sia edide mmọ ẹyekụt nnennen nte ẹsuenede idiọk akpara oro, Akwa Babylon.
Ẹsobo Ererimbot Satan
19. Nso n̄kpọ efen ke ẹtịn̄ ẹban̄a ke Ediyarade 19:11-21?
19 Afia enan̄-mbakara oro ẹkebemde iso ẹtịn̄ ẹban̄a ke Ediyarade 6:2 afiak ọwọrọ edi. Nnyịn ikot ke Ediyarade 19:11 ite: “Andidoro [ke edem afia enan̄-mbakara] ekere Anam-akpanikọ ye Ata Akpanikọ, Enye onyụn̄ asan̄a ke edinen ido ekpe ikpe onyụn̄ an̄wana ekọn̄.” Ntem ke “Edidem ndidem ye Ọbọn̄ mbọn̄” awat aka ndikpen̄e mme idụt nnyụn̄ ndịghi “obube udịghi wine ikan̄ ikan̄ iyatesịt Abasi Andikara kpukpru n̄kpọ.” “Ndidem isọn̄, ye mbonekọn̄ mmọ” ẹsop idem ke ikpîkpu ndin̄wana ekọn̄ Har–Magedon. Andiwat afia enan̄-mbakara eyedọdiọn̄ akan. Baba n̄kpọ kiet idisụhọke aba ke esop Satan eke isọn̄.—Ediyarade 19:12-21.
20. Nso itịbe inọ Devil ke idemesie?
20 Edi nso kaban̄a Devil ke idemesie? Ke Ediyarade 20:1-6, etịn̄ ẹban̄a Christ Jesus nte “angel [emi] otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk.” Enye omụm dragon, kpa akani Urụkikọt, emi edide Devil ye Satan, ọbọp enye, otop enye esịn ke editụn̄ọ ukpe, onyụn̄ ọkọbi ndien efịk ufịkn̄kpọ abaha enye. Ke ẹma ẹkesio Satan ẹfep ye ke emi enye mîdikemeke ndibian̄a mme idụt aba, ubọn̄ ubọn̄ Ukara Tọsịn Isua Eyenerọn̄ ye n̄wanndọ esie eyetọn̄ọ. Mmọn̄eyet mfụhọ ididụhe aba! N̄kpa otode Adam ididụhe aba! Eseme ididụhe aba, ntuan̄a ididụhe aba, ubiak ididụhe aba! “Ebeiso n̄kpọ ẹma ẹbe ẹfep.”—Ediyarade 21:4.
21. Nte nnyịn ye ọkpọsọn̄ udọn̄ itiede ibet ediyarade Jesus Christ, nso ikpenyene ndidi ubiere nnyịn?
21 Ke adan̄aemi nnyịn ye ọkpọsọn̄ udọn̄ itiede ibet ediyarade Ọbọn̄ nnyịn Jesus Christ, ẹyak nnyịn isịn ifịk ke nditịn̄ nnọ mmọ en̄wen mban̄a mme ima ima un̄wọn̄ọ Obio Ubọn̄ Abasi. Edinyan̄a emekpere! Nnyịn ikpakam isan̄a ika iso iso, isịn ifịk ika iso iso, nte nditọ Ọbọn̄ Jehovah Andikara oro ẹsịnde ke un̄wana!
Ke Ndidụn̄ọde
◻ Nso iwụt nte ke ediyarade Jesus Christ ekpere?
◻ Didie ke usen usiene Jehovah edidi?
◻ Didie ke ‘mme andima Jehovah’ ẹkpese idaha ererimbot oro odude kemi?
◻ Mme n̄kpọ ẹditie didie ke ini akwa ukụt ọtọn̄ọde?
[Mme ndise ke page 23]
Jesus ‘edi ke obubịt enyọn̄,’ nte enyịn mîkwe, ndinọ ubiereikpe
[Ndise ke page 25]
Ke mîbịghike nsunsu ido ukpono, idiọk editịm n̄kpọ Satan, ye Satan ke idemesie ididụhe aba