N̄kponn̄kan Ubọn̄ Ufọk Jehovah
“Nyesịn ubọn̄ ke ufọk emi nyọhọ, Jehovah mme udịm ọdọhọ ntem.”—HAGGAI 2:7.
1. Didie ke edisana spirit enyene ebuana ye mbuọtidem ye utom?
KE ADAN̄AEMI ọkwọrọde ikọ ke ufọk ke ufọk, owo kiet ke otu Mme Ntiense Jehovah ama osobo ye eyenan̄wan Pentecostal emi ọkọdọhọde ete, ‘Nnyịn inyene edisana spirit, edi mbufo ẹdi mme andinam utom.’ Ke mbufiọk, ẹma ẹnam an̄wan̄a enye nte ke ẹyedemede owo emi enyenede edisana spirit, nte ido edide, ndinam utom Abasi. James 2:17 ọdọhọ ete: “Edinịm ke akpanikọ, eke mîsan̄ake ye edinam n̄kpọ, amakpa ke idem esie.” Ebede ke un̄wam spirit Jehovah, Mme Ntiense esie ẹmekọri ọkpọsọn̄ mbuọtidem, ndien enye ‘emesịn ubọn̄ ọyọhọ ufọk esie’ ebe ke ndinam mmọ ẹnam ndinen utom—akpan akpan ‘edikwọrọ eti mbụk Obio Ubọn̄ ke ofụri isọn̄ nte ntiense nnọ kpukpru mme idụt.’ Ke ini ẹnamde utom emi ẹkesịm udomo oro Jehovah oyomde, “adan̄aoro ke utịt eyedi.”—Matthew 24:14.
2. (a) Ndisịn idem ke utom Jehovah edida nso edidiọn̄ idi? (b) Ntak emi nnyịn ikpenemde esịt iban̄a se itiede nte ‘ubịghi’?
2 Otode ke mme ikọ Jesus ẹmi, nnyịn imesịm ubiere nte ke ana utom nnyịn mfịn owụhọ ke edikwọrọ “ubọn̄ ubọn̄ eti mbụk Abasi inemesịt” emi ẹyakde ẹsịn nnyịn ke ubọk, nnọ mbon en̄wen. (1 Timothy 1:11, NW) Adan̄a nte nnyịn ke inemesịt isịnde idem ofụri ofụri ke utom Jehovah, ntre ke editie nte utịt ọsọp edi. Ke Habakkuk 2:2, 3, nnyịn ikot mme ikọ Jehovah ẹmi: “Wet n̄kukụt emi, nyụn̄ kap enye sịn ke itiat n̄wed, man andikot enye ọsọp ukot. Koro n̄kukụt anade kan̄a ọnọ ini emi ẹnịmde; ndien enye eyesioro uyo ke utịt, idinyụn̄ isụhọ nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.” Ih, “n̄kukụt” ọyọwọrọ osu ‘idem ọkpọkọm ebebịghi.’ Ke emi sia nnyịn idude ke ọyọhọ isua 83 eke ukara Obio Ubọn̄ Jesus, ndusụk owo ẹkeme ndikere ke nnyịn idu idahaemi ke ini emi ebịghide. Nte nnyịn ikpokopke inemesịt, nte ededi, nte ke utịt idịghe kan̄a? Ke iduọk isua 1990 emi, ẹmedorode mme ukpan ke edikwọrọ eti mbụk, emi etiede nte utịben̄kpọ, ke N̄kan̄ Edem Usiahautịn Europe, mme ikpehe Africa, ye mme idụt efen. Se itiede nte ‘ubịghi’ mi anam ini odu nditan̄ ediwak “erọn̄” efen efen mbok ke mme efakutom oro ẹbererede mi ke ndondo emi.—John 10:16.
3. Ntak emi obufa ifiọk oro inyenede iban̄a “emana emi” ekpedemerede nnyịn ndinam utom Abasi usọp usọp?
3 Prọfet oro ọdọhọ ete: ‘Enye idinyụn̄ ibehe ini.’ Jesus ama ọdọhọ ete ke idiọk emana oro odude kemi idibehe ifep tutu “kpukpru n̄kpọ ẹmi ẹwọrọ ẹsu.” (Matthew 24:34) Nte obufa ifiọk oro inyenede iban̄a mme ikọ esie ọwọrọ ke utom ukwọrọikọ nnyịn idịghe usọp usọp?a Akpanikọ owụt nte ke se idude akam edi isio ye oro! Iduọk emana nnyịn emi ke ọduọ odụk idaha idiọkn̄kpọ ye mbiara oro mînyeneke mbiet ke ofụri mbụk emi ekebemde iso. (Men Utom 2:40 domo.) Nnyịn inyene ndinam utom nnyịn usọp usọp. (2 Timothy 4:2) Kpukpru prọfesi ẹban̄ade ini akwa ukụt ẹwụt ẹte ke enye edidi ke mbuari, ke isọrọ kiet, n̄wọn n̄wọn—nte inọ. (1 Thessalonica 5:1-4; Ediyarade 3:3; 16:15) “Mmọdo mbufo nde ẹben̄e idem; koro ke ini eke mbufo mîdorike enyịn, Eyen Owo eyedi.” (Matthew 24:44) Nte emana anana-uten̄e Abasi ubonowo emi asan̄ade ekpere nsobo, ke akpanikọ nnyịn ikpenyeneke nditop ọsọn̄urua idotenyịn nsinsi uwem nnyịn nduọk ebe ke ndifiak ‘n̄kewere ke mbat’ mme n̄kpọ ererimbot oro ẹwọn̄ọrede owo ntịn̄enyịn!—2 Peter 2:22; 3:10; Luke 21:32-36.
4. Idaha ewe oyom ẹnam n̄kọri ke udomo ‘udia oro ẹnọde ke edikem ini,’ ndien didie ke ẹnam emi?
4 Nte prọfesi Jesus ọkọdọhọde, ke 1914 “ntọn̄ọ ubiak-uman” ama ọtọn̄ọ nte ubonowo okodụkde “akpatre ini eyo emi.” Mfụhọ, mme akama-nsobo n̄kpọntịbe, ye ukwan̄ido ẹmetọt tutu ẹsịm usen mfịn. (Matthew 24:3-8, 12) Ke ukem ini oro, Jehovah ọmọdọn̄ otu asan̄autom emi anamde akpanikọ onyụn̄ enyenede ọniọn̄ oro ẹyetde aran ndinọ mbonufọk Eteufọk mmọ, Christ, ‘udia eke spirit ke edikem ini.’ (Matthew 24:45-47) Ke odude ke ebekpo esie ke heaven, Edidem Messiah emi ke ọnọ ndausụn̄ idahaemi ke utịbe utịbe ndutịm unọ udia eke spirit ke ofụri isọn̄.
Akpakịp “Udia”
5. Akpan n̄kpọ “udia” ọbọ nso ntịn̄enyịn?
5 Kere ban̄a nte ẹtịmde “udia.” (Luke 12:42) Akpan n̄kpọ oro odude ke ndutịm udia Christian edi Ikọ Abasi, kpa Bible. Man ẹkpep Bible uforo uforo, nnennen edikabade oro ẹkemede ndikot edi akpan n̄kpọ. Ẹmeyụhọ udọn̄ emi sụn̄sụn̄ ke ediwak isua ẹmi ẹbede, akpan akpan ọtọn̄ọde ke 1950 ke ini ẹkesiode New World Translation of the Christian Greek Scriptures ke Ikọmbakara. Etisịm 1961 ofụri Bible eke New World Translation ama edidu, ndien ikebịghike mme nsiondi esie ẹma ẹdu ke ikpọ usem eken. Eboho 3 ẹmi ẹkesiode ke isua utom 1996 anam ofụri ibat ọdọk esịm 27, emi 14 ẹdide ofụri Bible. Man ẹkeme ndise mban̄a utom emi ke Bible, ọkọrọ ye ke mme un̄wam Bible, n̄kpọ nte mme Christian 1,174 oro ẹma ẹkeyak idem ẹnọ ke ẹnam utom uyọhọ ini idahaemi ke ndikabade n̄wed ke idụt 77.
6. Didie ke N̄ka ese aban̄a udọn̄ oro ẹnyenede kaban̄a mme n̄wed Bible?
6 Ke ndinọ utom akamba udịm mme akabade n̄wed emi ibetedem, n̄kọk itieutom Watch Tower Society 24 ẹmi ẹsimịn̄de n̄wed ke ẹsion̄o mme n̄wed ke eboho emi ẹtịmde-tịm ẹwak ẹkan. Ke ntak emi, ke ẹka iso ndiwụk mme ukwak umịn̄n̄wed rotary efen ẹmi ẹnen̄erede ẹsọp ke mme ikpọ n̄kọk itieutom. Ibat magazine Enyọn̄-Ukpeme ye Awake! ke ọdọk ke ọfiọn̄ ke ọfiọn̄, esịmde ofụri ibat edide idem 943,892,500 ke ẹtan̄de ẹdian ọtọkiet, kpa n̄kọri mbahade 13.4 eke ikie ke isua oro. Ofụri ibat Bible ye ikpọ n̄wed oro ẹmịn̄de ke United States, Brazil, Finland, Germany, Italy, Japan, Korea, ye Mexico ikpọn̄ ọmọdọk ke mbahade 40 eke ikie ọtọn̄ọde ke 1995 esịm idem 76,760,098 ke 1996. Mme n̄kọk itieutom eken n̄ko ẹmetịp ekese ẹsịn ke ofụri ibat n̄wed oro ẹmịn̄de ndidọk.
7. Didie ke Isaiah 54:2 edi usọp usọp ke usụn̄ okponde akan idahaemi?
7 Ẹnyene ekese n̄kọri emi ke iduọk isua 1990 ebe ke edidorode mme ukpan oro ẹkedoride Mme Ntiense Jehovah ke N̄kan̄ Edem Usiahautịn Europe ye Africa. Biọn̄ udia eke spirit okpon ke mme ebiet ẹmi. Ke ntre ẹnọ ikot ata usọp usọp akan nte akanam edide: “N̄wan̄ade ebiet tent fo, yak mmọ ẹnyụn̄ ẹnen̄ede ikpehe idụn̄ fo ẹkọn̄: kûfat ubọk, nam urụk fo ọniọn̄, nyụn̄ nam ọkpọhọ fo ẹsọn̄ọ.”—Isaiah 54:2.
8. Ewe edinam ntatubọk in̄wam ke ndinọ un̄wam ke okụk?
8 Ntem, edi se ẹyomde ẹte ẹtat mme itieutom ke ediwak ke otu n̄kọk itieutom N̄ka 104. Ke ntak idaha nsọn̄ọn̄kpọ ndutịm uforo ke ata ediwak mbufa efakutom ẹmi ẹbererede, akamba ubak ubiatokụk oro ẹnamde ke utom editat emi oto mme etịbe ẹnamde kaban̄a utom ofụri ererimbot ẹnyenede ẹto mme idụt ẹmi ẹnyenede uforo ẹkan. Ke inemesịt, mme esop ye mme owo kiet kiet ẹmenam n̄kpọ ke ofụri esịt, ke edu eke Exodus 35:21: “Ndien kpukpru owo eke esịt mmọ edemerede mmọ, ye kpukpru owo eke spirit mmọ anamde mmọ ẹnyịme, ẹdi, ẹda enọ Jehovah ẹdisọk ke edinam [utom].” Nnyịn imada ifet emi ndikọm kpukpru owo ẹmi ẹtienede ẹbuana ke enọ ntatubọk emi.—2 Corinth 9:11.
9. Didie ke Rome 10:13, 18 osu mfịn?
9 Ke 1996 mme n̄wed Watch Tower Society ke akpanikọ ẹmenọ enyịn̄ ye mme uduak Jehovah ubọn̄ tutu esịm utịt isọn̄. Edi kpa nte apostle Paul ekebemde iso etịn̄. Ke okotde oto prọfesi Joel ye Psalm ọyọhọ 19, enye ama ewet ete: “Owo ekededi eke edisemede okot enyịn̄ Jehovah eyebọhọ. Edi mmọdọhọ nte, Nte mmọ ikokopke? Ke akpanikọ mmọ ẹma ẹkop. Uyom mmọ ọmọwọrọ ke ofụri isọn̄, ikọ mmọ ẹnyụn̄ ẹsịm utịt ererimbot.” (Rome 10:13, 18) Ke nditoro ọsọn̄urua enyịn̄ Jehovah ntem, ikọt esie ẹmenyene akamba udeme ke ndida ubọn̄ nyọhọ ufọk utuakibuot esie. Nte ededi, editan̄a emi ọkọsọn̄ uyo adan̄a didie akpan akpan ke 1996? Mbọk ẹdụn̄ọde chart oro etienede ke page 18 esịm 21.
Ndidọk Idọk ke Ofụri Ererimbot
10. Nso n̄wọrọnda ikpehe ke afo okụt ke utom ikọt Jehovah, nte ẹwụtde ibio ibio ke chart ke page 18 esịm 21?
10 Akananam mme ikọ Jesus oro ẹkụtde ke Luke 10:2 isọn̄ke odudu ntem: “Ke akpanikọ idọk okpon, edi mme anam-utom iwakke; ẹben̄e ndien Enyene-idọk, ete, Enye osio mme anam-utom ọdọn̄ ẹdi ke idọk Esie.” Nte afo ke eyere ikot oro? Ediwak miliọn owo ke ofụri ererimbot ke ẹyere. Ẹkụt emi ẹto obufa n̄wakn̄kan ibat mme asuanetop Obio Ubọn̄ 5,413,769 ẹmi ẹkenọde ibatutom an̄wautom ke 1996. Ke adianade do, mbufa nditọete iren ye iban 366,579 ẹma ẹna baptism. Nnyịn ida ‘ndiye n̄kpọ kpukpru mme idụt’ ẹmi ke n̄kpọuto didie ntem, ẹmi idahaemi ẹbuanade ke ‘ndida ubọn̄ nyọhọ ufọk utuakibuot Jehovah’!—Haggai 2:7, NW.
11. Ntak emi kpukpru nnyịn inyenede ntak ndidat esịt?
11 Mme ntọt editat utom ke mbufa an̄wautom oro ẹbererede ẹdi n̄wọrọnda. Ndi ndusụk ke otu nnyịn imesịn mbon oro ẹnyenede utọ n̄kọri oro idahaemi enyịn? N̄wan̄ansa-o, nnyịn idadara ye mmọ. Kpukpru idụt ẹkenyene esisịt ntọn̄ọ. Zechariah, prọfet oro okodude ke ukem ini ye Haggai, ama ewet ete: “Anie owo esịn usen ekpri n̄kpọ ke ndek?” (Zechariah 4:10) Nnyịn imenen̄ede ikop inemesịt nte ke mme idụt ẹmi utom unọ ikọ ntiense etịmde enyene nsọn̄ọ, ediwak miliọn mme asuanetop Obio Ubọn̄ ẹdu idahaemi, ndien ẹsinam utom ke efakutom ndien ndien, idem ẹnamde kpukpru urua ke ediwak ikpọ obio. Nte nnyịn imenyene ntak nditek ubọk ke adan̄aemi Jehovah idahaemi anamde ifet edinyan̄a atara esịm mme ikpehe oro ẹkedoride ukpan? Baba-o! Jesus ọkọdọhọ ete: “In̄wan̄ edi ererimbot.” (Matthew 13:38) Ana ẹka iso ẹnọ ọyọhọ ọyọhọ ikọ ntiense, kpa nte mme akpa mbet ẹkenọde ọyọhọ ọyọhọ ikọ ntiense ke utịt editịm n̄kpọ mme Jew.—Utom 2:40; 10:42; 20:24; 28:23.
Ndisan̄a N̄ka Iso Iso
12. Nso ntak ke nnyịn inyene ‘ndinen̄ede iso nsan̄a’? (Se n̄ko ekebe, “Ndikpen̄e Ukpen̄e ‘ke Utịt Ererimbot.’”)
12 Ih, ana nnyịn isan̄a ikpat kiet, ‘inen̄ede iso isan̄a’ ye chariot Jehovah eke enyọn̄ eke mme angel. (Ezekiel 1:12) Nnyịn imenyene mme ikọ Peter ẹmi ke ekikere: “Ọbọn̄ iduọnke ke edinam un̄wọn̄ọ Esie, ke ido nte ndusụk owo ẹkerede ẹte, Enye ọduọn; Enye akam enyene anyan ime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Ẹyak uwụtn̄kpọ ifịk nditọete nnyịn ke mme idụt oro ẹbuenede ke idaha ndutịm uforo edemede nnyịn. Se ikpetiede nte ubịghi ke Armageddon ndin̄wana edi ndiyak ẹtan̄ ediwak tọsịn owo ke mme itie ikie ẹbok ke mme idụt ẹmi ọkọrọ ye ke mme efakutom oro ẹnamde utom mfọn mfọn. Kûnam ndudue ndomokiet: “Akwa usen Jehovah emekpere, emekpere, eyenyụn̄ ọsọp eti-eti.” (Zephaniah 1:14) Nnyịn ikpenyene ndinam n̄kpọ usọp usọp n̄ko ke ndinọ ọyọhọ ọyọhọ akpatre ikọ ntiense!
13, 14. (a) Nso ke ẹkeme nditịn̄ mban̄a nte ẹkesuande mme n̄wed ke 1996? (b) Nso san̄asan̄a ndutịm ke mme esop ẹkeme ndinam kpukpru isua, ndien didie ke afo odiomi nditiene mbuana?
13 Okposụkedi ọyọhọ ntọt mîdụhe ke chart utom oro, n̄wọrọnda n̄kọri odu ke ibat Bible, n̄wed, ye mme magazine oro ẹkesuande isua oko. Ke uwụtn̄kpọ, ibat magazine oro ẹnịmde ke ofụri ererimbot ama owụt n̄kọri ke mbahade 19 eke ikie, ofụri ibat edide idem 543,667,923 ẹmi ẹkenịmde. Mme magazine nnyịn ẹnam edi mmemmem n̄kpọ ndikwọrọ ikọ ke nsio nsio usụn̄—ke mme efak, ke mme itie nduọkodudu, ke itiembehe bọs, ke mme itie mbubehe. Ntọt ẹwụt nte ke ndusụk efakutom ẹmi ẹsinamde utom ukwọrọikọ Obio Ubọn̄ ndien ndien, mme anam mbubehe ẹsima nte mme magazine nnyịn ẹtiede ndien mmọ ke ẹnyịme mme ukpepn̄kpọ Bible.
14 Ke isua kiet kiet ke ọfiọn̄ April, nte ido edide mme esop ẹsidiomi san̄asan̄a utom magazine, ẹnamde ubịnikọt oro ẹsibịghide ofụri usen ke ufọk ke ufọk ye ke mme an̄wan̄wa ebiet. Nte esop mbufo eyetiene abuana ke emi ke April 1997? Ẹmetịm mme n̄wọrọnda nsiondi Enyọn̄-Ukpeme ye Awake! eke April, ndien edinọ mmọ ke ukem ini ke ofụri ererimbot iditreke ndinịm mbụk! Ke isuo Cyprus, mme esop, ke ẹkamade ikọ ẹmi “sịm kpukpru owo nte ekekeme ye etop Obio Ubọn̄,” nte utịn̄ikọ mmọ, ẹma ẹkam ẹsitiene ẹbuana kpukpru ọfiọn̄ ke utọ utom magazine oro ẹkediomide, ẹnyenede obufa n̄wakn̄kan ibat 275,359 oro ẹkenịmde ke isua oro, kpa n̄kọri ke mbahade 54 eke ikie.
Mme Akpatre Etop Haggai
15. (a) Ntak emi Jehovah akafiakde otobo etop ebe ke Haggai? (b) Ọyọhọ etop ita oro Haggai ọkọnọde ọkpọnọ nnyịn nso ukpepn̄kpọ?
15 Usen 63 ke enye ama okotobo udiana etop esie, Jehovah ama ọdọn̄ Haggai utom ye ọyọhọ etop ita oro nnyịn ikemede ndinyene ke ekikere mfịn. Haggai eketịn̄ ikọ nte n̄kpọ eke mme Jew ẹkesịnde itiat idakisọn̄ temple ini oro, emi mmọ ke akpanikọ ẹkesịnde ke isua 17 ke edem. Ini kiet efen Jehovah ama okụt nte odotde ndinam mme n̄kpọ ẹsana. Mme oku ye mme owo ẹma ẹtek ubọk ndien ke ntre mmọ ikasanake ke enyịn Jehovah. Nte ekeme ndidi nte ke ndusụk ikọt Jehovah ẹtek ubọk mmọ mfịn, idem ẹsịnde idem ke mme anana-ukpan usụn̄uwem uma inyene? Edi usọp usọp n̄kpọ ete kpukpru nnyịn ikere ‘tọn̄ọde ke mfịn emi ka iso’ nditoro enyịn̄ Jehovah, ibuọtde idem ke un̄wọn̄ọ esie: “Toto ke mfịn emi nyọdiọn̄ mbufo.”—Haggai 2:10-19; Mme Hebrew 6:11, 12.
16. Nso ‘edinyen̄e’ isan̄a ikpere, ndien nso ididi utịp?
16 Kpa ke usen oro, uyo “Jehovah mme udịm” ama esịm Haggai ọyọhọ utịm ikanan̄ ye akpatre ini. Enye ama anam ẹfiọk se isịnede ke Enye ‘ndinyen̄e enyọn̄ ye isọn̄,’ ọdọhọde: “Nyoyụt ebekpo mme idụt n̄kabade nnịm; nyonyụn̄ nsobo odudu mbọn̄ mme idụt; nyonyụn̄ nyụt chariot ye mmọ eke ẹdorode ke esịt n̄kabade nnịm; ndien mme horse ye mmọ eke ẹdorode mmọ ẹyesụhọde, kpukpru owo ke ofụt eyen ete mmọ.” (Haggai 2:6, 21, 22) ‘Edinyen̄e’ oro ke ntre eyesịm ata utịt esie ke ini Jehovah edinamde isọn̄ asana ofụri ofụri ke Armageddon. Adan̄aoro eyedi “ndiye n̄kpọ kpukpru mme idụt” ẹma ẹdụk ẹdi ndinam ntọn̄ọ n̄ka owo nnọ obufa ererimbot. Nso ntak ke emi edi ntem ndidara nnyụn̄ ntoro Jehovah!—Haggai 2:7, NW; Ediyarade 19:6, 7; 21:1-4.
17. Didie ke ẹnịm Jesus nte “seal”?
17 Ke ndiberi prọfesi esie, Haggai ewet ete: “Jehovah mme udịm ọdọhọ, ete, Ke usen oro nyada fi Zerubbabel . . . nnyụn̄ nnịm fi seal: koro mmemek fi, ke edi uyo Jehovah mme udịm.” (Haggai 2:23) Christ Jesus edi ndamban̄a Edidem Messiah ye Akwa Oku Jehovah idahaemi, odude ke heaven anam utom oro Ọbọn̄ Zerubbabel ye Akwa Oku Joshua ẹkenamde nsio nsio ke Jerusalem eke isọn̄. Ukem nte seal akwa owo ukara ke ubọk nnasia Jehovah, Jesus edi owo emi akabarede edi “Edi ntre” nte n̄kpọutom emi Jehovah adade ke ndinam ediwak “un̄wọn̄ọ Abasi” ẹsu. (2 Corinth 1:20; Ephesus 3:10, 11; Ediyarade 19:10) Ofụri etop prọfesi eke Bible ẹkọn̄ọ ke ndutịm Jehovah aban̄ade Christ nte Edidem ye oku edide Andifak.—John 18:37; 1 Peter 1:18, 19.
18. Didie ke akpatre ‘uyo Jehovah mme udịm’ edinyene inem inem edisu?
18 Ke akpanikọ ke usen nnyịn emi, ẹkụt n̄kponn̄kan ubọn̄ ke nyayama temple Jehovah eke spirit! Ndien ibịghike, ke Jehovah ama ọkọkpọri ofụri editịm n̄kpọ Satan efep, Haggai 2:9 eyenyene n̄kaiso inem inem edisu: “Ke ebiet emi ke ndinọ emem, Jehovah mme udịm ọdọhọ.” Emem ke akpatre!—emem ofụri ererimbot emi ebịghide, emi “seal” Jehovah, kpa Christ Jesus, “Ọbọn̄ Emem,” ọnọde ubiọn̄, emi ẹwetde ẹban̄a enye ẹte: “Ubọn̄ ye emem ididopke ndikọri . . . Ufụp Jehovah mme udịm ayanam n̄kpọ emi.” (Isaiah 9:6, 7) Ke nsinsi nsinsi ubọn̄ ufọk utuakibuot Jehovah ọyọwọrọ owụt idem ke ofụri ini emem emem ukara ofụri ekondo esie. Nnyịn ikpakam ika iso idu ke ufọk oro ke nsinsi!—Psalm 27:4; 65:4; 84:10.
[Ikọ idakisọn̄]
a Se “Ẹma Ẹnyan̄a Ẹsio ke ‘Idiọk Emana’” ye “Ini Ndidu ke Edidemede” ke nsiondi Enyọn̄-Ukpeme eke November 1, 1995.
Nte Afo Emekeme Ndinam An̄wan̄a?
◻ Didie ke ufọk Jehovah ‘ọyọhọ ye ubọn̄’ mfịn?
◻ Ntak akanam mîdịghe usọp usọp n̄kpọ ndikwọrọ eti mbụk nte idahaemi?
◻ Nso ntak ndikwọrọ ikọ usọp usọp ke Ibatutom Isua Utom 1996 ọnọ?
◻ Didie ke Christ anam n̄kpọ nte “seal” Jehovah?
[Ekebe ke page 15]
Ndikpen̄e Ukpen̄e “ke Utịt Ererimbot”
KE Isaiah 43:6, nnyịn ikot ewụhọ Jehovah ite: “Kûbaha; da nditọ-iren mi ke anyan idụt di, ye nditọ-iban mi ke utịt ererimbot.” Itien̄wed Abasi emi ke enyene n̄wọrọnda edisu mfịn ke N̄kan̄ Edem Usiahautịn Europe. Da Moldova, akani idụt Communist, ke uwụtn̄kpọ. Odu mme obio ẹmi mbahade iba ke otu mme andidụn̄ ẹdide Mme Ntiense idahaemi. Mmọ ẹsinyene ndisan̄a anyan usụn̄ man ẹkekụt efakutom ẹkwọrọ ikọ, edi mmọ ke ẹsịn ukeme! Ediwak mme asuanetop ke mme esop ẹmi ẹdi nditọ mbon ẹmi ẹkebịnde ẹka Siberia ke ntọn̄ọ ntọn̄ọ iduọk isua 1950. Idahaemi ubon mmọ ke ẹda usụn̄ ke utom idọk. Ke otu mme asuanetop 12,565, owo 1,917 ẹkena baptism isua oko. Esop 43 ẹdu emi kiet kiet enyenede n̄kpọ nte mme asuanetop 150, ndien mme circuit ẹmekọri ẹtọn̄ọde ke inan̄ ẹsịm itiaita ke obufa isua utom emi.
Se idide n̄wọrọnda n̄kpọ, n̄ko, edi utom oro ẹtatde ke Albania. Esisịt ibat Ntiense ẹmi ẹnyenede nsọn̄ọnda ẹdu do ẹmi ẹkeyọde ata ibak ibak ukara ufịk ke n̄kpọ nte isua 50. Ẹma ẹwot ediwak mmọ. Emi anam ẹti un̄wọn̄ọ Jesus emi: “Kûnyene ndịk uban̄a ukụt eke ọmọn̄ edisịm fi. Sese, Satan ọmọn̄ edisịn ndusụk mbufo ke ufọk-n̄kpọkọbi, man ẹdomo mbufo ẹse . . . Wụt idem nte anam-akpanikọ tutu esịm n̄kpa, ndien nyọnọ fi anyanya uwem.” (Ediyarade 2:10; se n̄ko John 5:28, 29; 11:24, 25.) Nso ke nnyịn ikụt idahaemi ke Albania? Ke akpanikọ n̄wọrọnda edisu un̄wọn̄ọ Jehovah oro ẹkụtde ke Isaiah 60:22: “Ekpri ayakabade edi tọsịn”! Ke 1990 asuanetop kiet kpọt ọkọnọ ibatutom ke Albania. Nte ededi, “mme anam-utom” efen efen ẹtode Italy ye mme idụt efen ẹma ẹyere ikot Jesus emi: “Mbufo ẹka ẹkanam kpukpru mme idụt ẹdi mbet . . . , ẹnịm mmọ baptism.” (Matthew 28:19; Luke 10:2) Etisịm ini Editi n̄kpa Jesus ke 1996, mme asuanetop 773 ẹkenam utom ifịk ifịk ke an̄wautom, ndien mmọemi ẹma ẹkot owo 6,523 ẹdidụk mme mbono Editi mmọ, ẹwakde utịm ike-itiaita ẹkan ibat mme asuanetop! Ẹma ẹtọt ibat mme andidụk oro akpade owo idem ke mme ikpehe oro ẹdude nsannsan. Okposụkedi mme asuanetop n̄kann̄kụk ndomokiet mîkodụhe, obio Kukës ye Divjakë kiet kiet ẹma ẹnyene ibat mme andidụk 192 ye 230. Krujë, emi ekenyenede asuanetop kiet kpọt, ama enyene owo 212 ẹmi ẹkedụkde. Mme asuanetop 30 ke Korçë ẹma ẹbọ itie emi okodụkde n̄kpọ nte owo 300. Ke ibat oro ẹma ẹkedụk efe mbono ẹyọhọ, owo 200 efen ẹkenyene ndifiak nnyọn̄ sia ufan̄ mîkodụhe. Ke akpanikọ in̄wan̄ adat ndikpen̄e ukpen̄e!
Ntọt emi oto Romania: “Ke adan̄aemi ikanamde utom ke ufọk ke ufọk, nnyịn ima isobo ye owo kiet emi ọkọdọhọde ke imọ ikedi kiet ke otu Mme Ntiense Jehovah ikonyụn̄ idụn̄ ke ekpri obio emi, nte nnyịn ifiọkde, Ntiense ndomokiet mîkodụhe. Enye ama asian nnyịn ete ke adianade ye imọ owo 15 efen ẹma ẹdu ẹmi ẹkenịmde mme mbonoesop ke Thursday ye Sunday ke ediwak isua ye nte ke mmọ ẹma ẹtọn̄ọ ndikwọrọ ikọ ke ufọk ke ufọk. Nnyịn ima ika obio oro ke edem usen oro. Irenowo, iban, ye nditọwọn̄ 15 ẹmi ẹkebọde n̄wed 20 ye mbufa magazine 20 ẹma ẹdu ke ubet iba ẹbet nnyịn. Nnyịn ima iwụt mmọ nte ẹkpenịmde ukpepn̄kpọ Bible. Nnyịn ima ikwọ ikwọ ọtọkiet inyụn̄ ibọrọ mme akpan mbụme mmọ ẹmi ẹkedide usọp usọp. Owo emi akadade usụn̄ ke otu oro ama ọdọhọ ete: ‘Usen ifan̄ ẹmi ẹkebede, mma mbọn̄ akam ye mmọn̄eyet nnọ Jehovah nte ọnọ ekpemerọn̄ edi ebịne nnyịn, ndien ẹmeyere akam mi.’ Nnyịn ima inen̄ede ikop inemesịt, ndien ke ini ikọkpọn̄de do, nte eyenakpa emi okokụtde ete esie ke akpatre, enye ama ọdọhọ ete: ‘Mbọk ẹkûfre nnyịn enyịn. Ẹfiak ẹdi ẹdise nnyịn!’ Nnyịn ima inam oro, ndien idahaemi ke ẹnịm ukpepn̄kpọ Bible itiaba ke obio oro. Ke ediwak mbufa efakutom, ẹsida mme n̄wed Bible ẹmi ẹmade etieti, ẹtọn̄ọ utom ke utịbe utịbe usụn̄, ndien emi owụt ete ke utom emi ọtọn̄ọ oto Abasi.”
[Chart ke page 18-21]
IBATUTOM ISUA UTOM 1996 EKE MME NTIENSE JEHOVAH KE OFỤRI ERERIMBOT
(Se magazine)
[Mme ndise ke page 16, 17]
Ke ẹtan̄ “ndiye n̄kpọ kpukpru mme idụt” ẹbok ke Mme Isuo Inyan̄ibom (1), Edem Usụk America (2), Africa (3), Asia (4), Edem Edere America (5), ye Europe (6)