Ini Ndidu ke Edidemede
“Ẹnyene ndibem iso n̄kwọrọ gospel nnọ kpukpru mme idụt. . . . Edi ẹyenyan̄a owo eke edimede ime tutu osịm akpatre.”—MARK 13:10, 13.
1. Ntak emi nnyịn ikpenyenede ndiyọ nnyụn̄ nsọn̄ esịt?
NNYỊN inyene ndiyọ—ke ufọt emana unana mbuọtidem ye ukwan̄ido! Toto ke 1914 emana mme owo amakabade ọdiọk, kpa nte ekedide ke eyo Jesus. Ndien mfịn idiọk oro odu ke udomo ofụri ererimbot. Ke “ukperedem ini” ẹmi, “ndiọkeyo” oro apostle Paul eketịn̄de aban̄a ke ọnọmọ ubonowo. ‘Ndiọi owo ye mbon abian̄a ke ẹdọdiọn̄ ẹdiọk ẹka iso.’ Nte an̄wan̄ade, “ofụri ererimbot onyụn̄ esịne ke ubọk andidiọk,” Satan kpa Devil, emi esịnde akpatre ukeme esie kemi ndisobo isọn̄. Edi sọn̄ esịt! “Akwa ukụt” emi edidade ubọhọ oro ebịghide ọsọk kpukpru mbon oro ẹmade edinen ido ke edi.—2 Timothy 3:1-5, 13; 1 John 5:19; Ediyarade 7:14.
2. Didie ke prọfesi okosu ke 1914?
2 Ke inemesịt, Jehovah kemi omodori Ọbọn̄ Jesus Christ ke ebekpo ke heaven, kpa ntịmidem ndisio mme asua ubonowo ẹdide mbon ufịk mfep. (Ediyarade 11:15) Kpa nte ekedide ke akpa edidi Messiah, ntre ke isua ikie emi n̄wọrọnda prọfesi emi Daniel ekewetde omosu. Ke Daniel 4:16, 17, 32, ẹsian nnyịn ẹban̄a nnennen itie ukara ke isọn̄ emi ẹkpọnọrede ẹnịm ke ufan̄ ‘ini itiaba.’ Ke akpan edisu mmọ, ini itiaba ẹmi ẹdi isua itiaba eke Bible ẹmi ẹsịnede ‘usen’ 360 ke kiet, m̀mê isua 2,520 ke ofụri ofụri.a Mmọ ẹketọn̄ọ ke 607 M.E.N., ke ini Babylon ọkọtọn̄ọde ndidịghi obio ubọn̄ Israel ke ikpat, tutu osịm 1914 E.N., kpa isua emi ẹkedoride Jesus ke ebekpo ke heaven nte Edidem ubonowo emi enyenede unen. Ekem “ini mme Gentile” ama etre. (Luke 21:24) Edi mme idụt ẹma ẹsịn ndida nnọ Obio Ubọn̄ Messiah oro ekedide.—Psalm 2:1-6, 10-12; 110:1, 2.
3, 4. (a) Didie ke ẹkeme ndimen mme n̄kpọntịbe eke akpa isua ikie ndomo ye eke eyo nnyịn? (b) Ewe mme mbụme oro ẹdotde ke ẹkeme ndibụp?
3 Nte ọyọhọ urua 70 eke mme isua (29-36 E.N.) akasan̄ade ekpere, ndien n̄ko nte isua 1914 akasan̄ade ekpere, mbon oro ẹkebakde Abasi ẹma ẹdori enyịn Messiah ndidi. Ndien enye ama edisịm! Ke idaha kiet kiet, nte ededi, usụn̄ nte enye okowụtde idem ama okpụhọde ye nte ẹkedoride enyịn. Ke idaha kiet kiet n̄ko, ke ekpri ini ke ẹmende ẹdomo ama ekebe, idiọk “emana” ke akpatre okụt ubiereikpe otode ewụhọ Abasi.—Matthew 24:34.
4 Ke ibuotikọ nnyịn oro ekebemde iso, nnyịn ima ikụt nte idiọk emana mme Jew oro okoyomde iyịp Jesus okosịmde utịt. Nso, ndien, kaban̄a idiọk emana ubonowo emi akam ọbiọn̄ọde m̀mê ofụmide enye kemi? Ini ewe ke ẹdibiere ikpe ẹnọ emana unana mbuọtidem emi?
“Ẹkpeme”!
5. (a) Kaban̄a nso eti ntak ke mîyomke nnyịn ifiọk ini emi “usen m̀mê hour” Jehovah edidide? (b) Nte Mark ọdọhọde, Jesus akada ewe eti item eberi prọfesi esie?
5 Ke ama eketịn̄ prọfesi aban̄a mme n̄kpọntịbe ẹdade ẹkesịm ini “akwa ukụt,” Jesus ama adian ete: “Edi baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ke mîbọhọke Ete ikpọn̄.” (Matthew 24:3-36; Mark 13:3-32) Iyomke nnyịn ifiọk nnennen ini eke mme n̄kpọntịbe ẹmi. Utu ke oro, ana nnyịn inọ ntịn̄enyịn ke ndidu ke ukpeme, ndikọri ọkpọsọn̄ mbuọtidem, nnyụn̄ nsịn idem ke utom Jehovah—idịghe ke ndibat usenọfiọn̄. Jesus ekeberi akwa prọfesi esie ke ndidọhọ ete: “Ẹtịn̄ enyịn ẹse, ẹkpeme . . . koro mbufo mîfiọkke edikem ini. . . . Mbufo ẹkpeme ndien . . . Se ndọhọde mbufo, mmonyụn̄ ndọhọ kpukpru owo nte, Ẹkpeme.” (Mark 13:33-37) N̄kpọndịk odu ke ekịm ererimbot emi. Ana nnyịn ikpeme!—Rome 13:11-13.
6. (a) Mbuọtidem nnyịn ọkpọkọn̄ọ ke nso? (b) Didie ke nnyịn ikeme “ndibat usen nnyịn”? (c) Nso ke ikọ Jesus aban̄ade “emana” ọkọwọrọ akpan akpan?
6 Ikụreke ke nnyịn ndinọ ntịn̄enyịn ke mme prọfesi eke odudu spirit ẹmi ẹban̄ade mme akpatre usen eke idiọk editịm n̄kpọ emi edi ana nnyịn ikọn̄ mbuọtidem nnyịn akpan akpan ke ọsọn̄urua iyịp Christ Jesus ye mme utịbe un̄wọn̄ọ Abasi ẹkọn̄ọde do. (Mme Hebrew 6:17-19; 9:14; 1 Peter 1:18, 19; 2 Peter 1:16-19) Ke ẹnyenede udọn̄ ndikụt utịt idiọk editịm n̄kpọ emi, ikọt Jehovah ke ndusụk ini ẹma ẹsinọ ekikere ẹban̄a ini emi “akwa ukụt” editọn̄ọde, idem ẹdade emi ẹkebuan ye nte ẹbatde eyouwem emana oro okodude toto ke 1914. Nte ededi, “nnyịn [idaha] esịt ifiọk idi,” ke ndikere m̀mê isua mîdịghe m̀mê usen ifan̄ inam emana kiet, edi ke ndikere adan̄a nte ikemede “ndibat usen nnyịn” ke ndida idara idara itoro nsọk Jehovah. (Psalm 90:12) Utu ke ndinịm edumbet ke ndibat ini, ikọ oro “emana” nte Jesus akadade etịn̄ ikọ ada akpan akpan aban̄a mbon iduọk ini kiet ke ndusụk ikpehe ini ke mbụk, ye edu oro ẹdade ẹdiọn̄ọ mmọ.b
7. Nso ke akwa ekpep ukpepn̄kpọ mbụkeset ekewet aban̄a “emana eke 1914,” ndien didie ke emi asan̄a ekekem ye prọfesi Jesus?
7 Ke n̄kemuyo ye se ẹtịn̄de ke enyọn̄ emi, Robert Wohl, akwa ekpep ukpepn̄kpọ mbụkeset, ekewet ke n̄wed esie oro The Generation of 1914, ete: “Owo idaha usenọfiọn̄ inam emana oro odude ke mbụk an̄wan̄a . . . Owo idaha usenọfiọn̄ inam enye an̄wan̄a.” Edi enye ama owụt nte ke Ekọn̄ Ererimbot I ama anam ẹnyene “akakan ifiọk ẹban̄a ubahade oro odude ye ini edem,” ndien enye ama adian ete: “Mbon oro ẹkebọhọde ekọn̄ oro ikemeke-keme ndifre nte ke ererimbot kiet ama etre ndien efen ọtọn̄ọ ke August 1914.” Didie ke oro edi akpanikọ ntem! Emi owụk ntịn̄enyịn ke ọkpọikọ. “Emana [ubonowo] emi” omokụt ikpọ ukpụhọde toto ke 1914. Enye omokụt isọn̄ ọyọhọde ye iyịp ediwak miliọn owo. Ekọn̄, nsobo ofụri orụk, edinam oyomonsia, ubiatibet, ye ukwan̄ido ẹmesiaha ke ofụri ererimbot. Akan̄, udọn̄ọ, ye oburobụt ido ẹsan̄a ẹdụk ererimbot nnyịn. Jesus eketịn̄ prọfesi ete: “Mbufo n̄ko, ke ini mbufo [mme mbet esie] ẹkụtde nte mme n̄kpọ ẹmi ẹtịbede, ẹfiọk ẹte Ubọn̄ Abasi ke ekpere. Ke akpanikọ ke ndọhọ mbufo nte, Emana emi idibehe ifep tutu kpukpru n̄kpọ ẹmi ẹwọrọ ẹsu.”—Luke 21:31, 32.
8. Didie ke mme prọfet Jehovah ẹsọn̄ọ ẹwụt ufọn edidu ke edidemede?
8 Ih, ọyọhọ edikan eke Obio Ubọn̄ Messiah emekpere! Ndi ufọn ndomokiet odu, ndien, ke ndiyom usenọfiọn̄ m̀mê ndinọ ekikere mban̄a ataata uniọn̄ ini “emana” kiet? Ke akpanikọ idụhe! Habakkuk 2:3 etịn̄ in̄wan̄în̄wan̄ ete: “N̄kukụt [ana] kan̄a ọnọ ini emi ẹnịmde; ndien enye eyesioro uyo ke utịt, idinyụn̄ isụhọ nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.” Usen unam ibat Jehovah emekpere akan nte akanam edide.—Jeremiah 25:31-33; Malachi 4:1.
9. Mme n̄kpọntịbe ewe toto ke 1914 ẹwụt nte ke ini edi ibio?
9 Ke ini ukara Obio Ubọn̄ Christ ọkọtọn̄ọde ke 1914, ẹma ẹsio Satan ẹduọk ke isọn̄. Emi ọwọrọ “mbọm isọn̄ . . . koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” (Ediyarade 12:12, sịghisịghi ubọkn̄wed edi eke nnyịn.) Ini oro edi ibio, ke akpanikọ, ke ẹmende ẹdomo ye ediwak tọsịn isua oro Satan akarade. Obio Ubọn̄ emekpere, kpa ntre ke edi ye usen m̀mê hour emi Jehovah edibierede ikpe ọnọ idiọk emana emi!—Mme N̄ke 3:25; 10:24, 25.
“Emana” Oro Ebede Efep
10. Didie ke “emana emi” ebiet eke eyo Noah?
10 Ẹyak nnyịn itịm idụn̄ọde ikọ Jesus ke Matthew 24:34, 35: “Ke akpanikọ ke ndọhọ mbufo, Emana emi idibehe ifep tutu kpukpru n̄kpọ ẹmi ẹwọrọ ẹsu. Enyọn̄ ye isọn̄ ẹyebe ẹfep, edi ikọ Mi idibehe ifep.” (Sịghisịghi ubọkn̄wed edi eke nnyịn.) Mme ikọ Jesus oro ẹtienede ẹwụt nte ke ‘baba owo kiet ifiọkke usen m̀mê hour oro.’ Ke otịmde edi akpan n̄kpọ akan, enye owụt nte ke ana nnyịn ifep mme afia oro ẹkande nnyịn ẹkụk ke emana emi. Ntem Jesus adian ete: “Koro nte mme usen Noah ẹkedide, kpasụk ntre ke edidi Eyen Owo eyenyụn̄ edi. Koro nte mmọ ẹdiade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ndọ ke mme usen eke ẹkebemde ukwọ iso, tutu osịm usen emi Noah odụkde ke ubom, mînyụn̄ ifiọkke tutu ukwọ edi edimen mmọ kpukpru efep; kpasụk ntre ke edidi Eyen Owo eyedi.” (Matthew 24:36-39) Jesus mi ekemen emana eyo esie odomo ye eke usen Noah.—Genesis 6:5, 9; ikọ idakisọn̄ NW.
11. Didie ke Jesus ekemen ‘mme emana’ odomo, nte Matthew ye Luke ẹbụkde?
11 Idịghe akpa ini mme apostle ẹkekopde nte Jesus emende ‘mme emana’ odomo ekedi oro, koro ndusụk usen ke mbemiso enye ama etịn̄ aban̄a idemesie ete: “Eyen Owo . . . enyene ndibem iso n̄kụt ediwak ukụt, mbio emana emi ẹyenyụn̄ ẹsịn Enye. Ndien nte ekedide ke eyo Noah, kpa ntre ke edidi ke usen Eyen Owo.” (Luke 17:24-26, sịghisịghi ubọkn̄wed edi eke nnyịn.) Ntem, Matthew ibuot 24 ye Luke ibuot 17 ẹnam ukem edimen ndomo. Ke eyo Noah “kpukpru owo [oro] ẹkebiatde usụn̄ mmọ ke isọn̄” oro ẹkenyụn̄ ẹsobode ke Ukwọ ẹkedi “emana emi.” Ke usen Jesus ọsọn̄ibuot mbon Jew oro ẹkesịnde Jesus ekedi “emana emi.”—Genesis 6:11, 12; 7:1.
12, 13. (a) Mfịn, nso idi “emana emi” mîdibehe ifep? (b) Didie ke ikọt Jehovah idahaemi ẹyọ “idiọk ye n̄kwakwan̄a emana” emi?
12 Ke ntre, ke akpatre edisu eke prọfesi Jesus mfịn, “emana emi” nte an̄wan̄ade ada aban̄a mme owo ke isọn̄ ẹmi ẹkụtde idiọn̄ọ edidu Christ edi ẹkpude ndikpụhọde mme usụn̄ mmọ. Ke edide isio, nnyịn nte mme mbet Jesus imesịn nditiene usụn̄uwem “emana emi.” Okposụkedi idude ke ererimbot, inaha nnyịn idi ubak esie, “koro ini ke ekpere.” (Ediyarade 1:3; John 17:16) Apostle Paul ọnọ nnyịn item ete: “Ke edinam kpukpru n̄kpọ ẹtre nsụkuyo ye eneni; man mbufo ẹkûnyene ubiom-ikpe, ẹkûnyụn̄ ẹnyene ndudue, edi ẹdi nditọ Abasi eke ẹnanade ndo ke ufọt n̄kwakwan̄a ye idiọk emana; emi mbufo ke ẹyayama ke otu mmọ nte ntantafiọn̄ ke ererimbot.”—Philippi 2:14-16b; Colossae 3:5-10; 1 John 2:15-17.
13 Nnyịn ‘ndiyama nte ntantaọfiọn̄’ isịneke ediwụt edisana edu Christian kpọt edi, ke akande kpukpru n̄kpọ, edinam utom eke prọfesi Jesus emi: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Idụhe owo ndomokiet emi ekemede nditịn̄ ini emi utịt oro edidide, edi nnyịn imọfiọk ite ke utịt “emana emi” eke mme idiọkowo eyedi inikiet oro ẹnọde ikọ ntiense “tutu osịm utịt ererimbot” ke usụn̄ oyụhọde Abasi.—Utom 1:8.
“Usen m̀mê Hour Oro”
14. Nso item ke Jesus ye Paul ẹkenọ ẹban̄a “ini ye eyo,” ndien didie ke nnyịn ikpanam n̄kpọ?
14 Ke ẹma ẹkenọ ikọ ntiense ofụri ererimbot ke udomo oro Jehovah aduakde, eyedi “usen m̀mê hour” esie ndisio ndutịm ererimbot emi mfep. Iyomke nnyịn ibemiso idiọn̄ọ usenọfiọn̄ oro. Ntem, ke etienede uwụtn̄kpọ Jesus, apostle Paul ama ọnọ item ete: “Nditọ-ete, inaha nte ẹwet baba n̄kpọ kiet ẹnọ mbufo ẹban̄a mme ini ye mme eyo. Koro mbufo ke idem mbufo ẹmetịm ẹfiọk ẹte usen Ọbọn̄ mọn̄ edi nte inọ ke okoneyo. Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ, nte emi uman abuatde n̄wan idịbi; ndien mmọ idikwe usụn̄ ubọhọ.” Tịmfiọk se Paul ọkọnọde ntịn̄enyịn: ‘Edi ke ini mmọ ẹdọhọde.’ Ih, ke ini ẹtịn̄de ẹban̄a “emem ye ifụre,” ke ini owo mîtịmke idori enyịn, ẹyenọ ubiereikpe Abasi ke mbuari. Item Paul emi odot didie ntem: “Mmọdo ndien, ẹyak nnyịn ikûde idap, nte mmọ eken, edi ẹyak nnyịn itaba idap ikpeme, imụm idem ikama”!—1 Thessalonica 5:1-3, 6; se n̄ko 1Th 5 ufan̄ikọ 7-11; Utom 1:7.
15, 16. (a) Ntak emi nnyịn mîkpekereke ke Armageddon ke osụk oyom usụn̄ akan nte nnyịn ikenịmde ke akpanikọ? (b) Didie ke ẹnyene ndinam itie edikara Jehovah okpon ke n̄kpet n̄kpet ini iso?
15 Nte ata nnennen ifiọk emi nnyịn inyenede mi iban̄a “emana emi” ọwọrọ ke Armageddon odu oyom usụn̄ akan nte nnyịn ikekerede? N̄wan̄ansa-o! Okposụkedi nnyịn ke ini ekededi mîfiọkke “usen m̀mê hour oro,” Jehovah Abasi ọfiọk emi kpukpru ini, ndien enye ikpụhọkede. (Malachi 3:6) Nte an̄wan̄ade, ererimbot ke osụk asan̄a aka akpatre nsobo. Ufọn ndidu ke edidemede ototịm edi akpan n̄kpọ akan nte akanam edide. Jehovah amayarade ọnọ nnyịn “n̄kpọ eke enyenede ndisu ke ekpri ibio ini,” ndien nnyịn ikpenyene ndinam n̄kpọ ye ọyọhọ ifiọk kaban̄a nte ini edide usọp usọp.—Ediyarade 1:1; 11:18; 16:14, 16.
16 Nte ini asan̄ade ekpere, du ke edidemede, koro Jehovah ọmọn̄ ada nsobo etiene ofụri editịm n̄kpọ Satan! (Jeremiah 25:29-31) Jehovah ọdọhọ ete: “Ami nyenyụn̄ nnịm idem mi ke akwa ye ke edisana, nnyụn̄ nnam mmọ ẹfiọk mi ke enyịn ediwak mme idụt. Ndien mmọ ẹyefiọk ẹte ke ami ndi Jehovah.” (Ezekiel 38:23) Akpatre “usen Jehovah” oro emekpere!—Joel 1:15; 2:1, 2; Amos 5:18-20; Zephaniah 2:2, 3.
Edinen “Obufa Enyọn̄ ye Obufa Isọn̄”
17, 18. (a) Nte Jesus ye Peter ẹketịn̄de, didie ke “emana emi” ebe efep? (b) Ntak emi nnyịn ikpakade iso ndidu ke ukpeme kaban̄a edu ye mme edinam uten̄e Abasi?
17 Kaban̄a ‘kpukpru n̄kpọ ẹmi ẹditịbede’ Jesus ọkọdọhọ ete: “Enyọn̄ ye isọn̄ ẹyebe ẹfep, edi ikọ Mi idibehe ifep.” (Matthew 24:34, 35) Eyedi Jesus ekenyene ke ekikere “enyọn̄ ye isọn̄”—kpa mme andikara ye mbon oro ẹdude ke idak ukara—eke “emana emi.” Apostle Peter ama ada ukem ikọ oro ke nditịn̄ mban̄a “ikpa-enyọn̄ ye isọn̄ ẹmi ẹdude ke emi,” ẹmi ‘ẹkemụmde ẹnịm ẹnọ ikan̄, ẹkpeme ẹnịm ẹnọ usen eke Abasi edikpede ikpe ye mmọ ẹmi mîbakke Abasi.’ Ekem enye etịn̄ aban̄a nte ‘usen Jehovah edibuatde nte inọ, emi ukara ikpaenyọn̄ edibede efep’ ọkọrọ ye idiọk n̄kaowo, m̀mê “isọn̄,” ye ndiọi utom esie. Ekem apostle oro ọnọ nnyịn item ndinyene ‘edisana ido ye uten̄e Abasi, nte nnyịn itiede ibet inyụn̄ isọn̄ọde iyom edidi usen Jehovah, emi enyọn̄ editarade ke ikan̄, ẹdinyụn̄ ẹsịnde se ẹdade ẹbot ererimbot ẹtara ke ọkpọsọn̄ ufiop.’ Nso itiene? Peter ọwọn̄ọde ntịn̄enyịn nnyịn ọnọ ‘obufa enyọn̄ ye obufa isọn̄ emi edinen ido edidụn̄de.’—2 Peter 3:7, 10-13.c
18 “Obufa enyọn̄” oro, kpa ukara Obio Ubọn̄ ke ubọk Christ Jesus ye nsan̄a ndidem esie, eyen̄wan̄a mme edidiọn̄ ofụk edinen “obufa isọn̄” n̄ka ubonowo. Nte afo eyedi andibuana ke n̄kaowo oro? Ke edide ntre, afo emenyene ntak ndidara mban̄a utịbe ini iso oro odude!—Isaiah 65:17-19; Ediyarade 21:1-5.
19. Nso akwa ifet ke nnyịn ikeme ndinyene idahaemi?
19 Ih, ke ẹkam ẹtan̄ edinen “emana” ubonowo ẹbok idahaemi. Mfịn “asan̄autom emi anamde akpanikọ, onyụn̄ enyenede ọniọn̄,” emi ẹyetde aran ke ọnọ ukpepn̄kpọ Abasi ke n̄kemuyo ye mme ikọ eke Psalm 78:1, 4: “O mbufo ikọt mi, ẹkop mbet mi: ẹkpan̄ utọn̄ mbufo ke ikọ inua mi . . . [sian] emana en̄wen itoro Jehovah ye odudu esie, ye mme utịbe n̄kpọ esie emi enye akanamde.” (Matthew 24:45-47) Ke April 14 isua emi, ke se iwakde ikan esop 75,500 ye ke n̄kpọ nte idụt 230, se ibede owo 12,000,000 ke ofụri ererimbot ẹkedụk Editi n̄kpa Christ. Nte afo ama odu ke otu mmọ? Afo akpakam ọkọn̄ mbuọtidem fo ke Christ Jesus onyụn̄ ‘okot enyịn̄ Jehovah kaban̄a ubọhọ.’—Rome 10:10-13.
20. Sia edide “ẹsịbe ini omụhọ,” didie ke nnyịn ikpenyene ndidu ke edidemede, ndien ye nso idotenyịn ke ekikere?
20 Apostle Paul ọkọdọhọ ete: “Ẹsịbe ini omụhọ.” Ini edi emi, ke ntre, ndikaiso ndu ke edidemede nnyụn̄ nsịn idem ke utom Jehovah, nte nnyịn iyọde mme idomo ye usua oro idiọk emana ubonowo emi adade etiene nnyịn. (1 Corinth 7:29; Matthew 10:22; 24:13, 14) Ẹyak nnyịn idu ke ukpeme, itịmde itịn̄ enyịn ke kpukpru n̄kpọ oro ẹkebemde iso ẹtịn̄ ke Bible nte ẹdiwọrọde ẹnọ “emana emi.” (Luke 21:31-33) Ebede ke ndibọhọ mme n̄kpọ ẹmi ye ke ndida ye unyịme Abasi ke iso Eyen owo, nnyịn ke akpatre imekeme ndibọ enọ nsinsi uwem.
[Mme Ikọ idakisọn̄]
a Kaban̄a ọyọhọ ntọt aban̄ade ‘ini itiaba,’ se “Yak Obio Ubọn̄ Fo Edi,” page 127-139, 186-189, emi Watchtower Bible and Tract Society of New York, Inc., emịn̄de.
b Se Insight on the Scriptures, Eboho 1, page 918, emi Watchtower Bible and Tract Society of New York, Inc., emịn̄de.
c Se n̄ko Our Incoming World Government—God’s Kingdom, emi Watchtower Bible and Tract Society of New York, Inc., emịn̄de, page 152-156 ye 180-181.
Mme Mbụme Ndụn̄ọde:
◻ Ke ima ikọfiọk edisu eke Daniel 4:32, didie ke nnyịn idahaemi ikpodu ‘ke ukpeme’?
◻ Didie ke mme Gospel Matthew ye Luke ẹnam ẹdiọn̄ọ “emana emi”?
◻ Nte nnyịn itiede ibet “usen m̀mê hour oro,” nso ke nnyịn ikụt, ndien didie ke nnyịn ikpanam n̄kpọ?
◻ Nso ke idotenyịn “obufa enyọn̄ ye obufa isọn̄” ekpesịn udọn̄ ọnọ nnyịn ndinam?
[Mme ndise ke page 17]
Ubonowo emi okụtde ndutụhọ eyenyene ubọhọ ke ini afai afai, idiọk emana emi ebede efep
[Ebiet Ẹdade N̄kpọ Ẹto]
Alexandra Boulat/Sipa Press
[Ebiet Ẹdade N̄kpọ Ẹto]
Ufien ye isọn̄ isọn̄: Luc Delahaye/Sipa Press
[Ndise ke page 18]
Ubọn̄ ubọn̄ “obufa enyọn̄ ye obufa isọn̄” akam odu ke iso ọnọ ofụri orụk ubonowo