Mme Mbụme Ẹtode Mme Andikot

Ndi Jesus kemi ọfiọk ini Armageddon?

Etie nte otịm owụt ifiọk ndinịm ke akpanikọ nte ke enye ọfiọk.

Ndusụk owo ẹkeme ndiyịk ntak emi mbụme emi akam edemerede. Iso-ọfọn edi ke ntak ikọ Jesus oro ẹkụtde ke Matthew 24:36: “Baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ke mîbọhọke Ete ikpọn̄.” Tịm fiọk ubak udịmikọ oro “Eyen inyụn̄ ifiọkke.”

Ufan̄ikọ emi edi ubak ibọrọ oro Jesus ọkọnọde ke mbụme mme apostle oro: ‘Ini ewe ke mme n̄kpọ ẹmi ẹdidi, nso idinyụn̄ idi idiọn̄ọ edidu fo ye eke akpatre ini eyo emi?’ (Matthew 24:3) Ke ọwọrọetop prọfesi esie oro aban̄ade mme uyarade ẹmi ẹnamde “idiọn̄ọ” oro, enye ama ebemiso etịn̄ aban̄a ekọn̄, akan̄, unyekisọn̄, edikọbọ mme ata Christian, ye mme n̄kpọ eken ke isọn̄ oro ẹdiwụtde edidu esie. Ebede ke idiọn̄ọ emi mme anditiene enye ẹma ẹfiọk ẹte ke utịt ama ekpere. Enye ama anam nte emi ekperede an̄wan̄a ke ndimen ndomo ye ini emi eto fig esitọn̄ọde ndisiaha ikọn̄, owụtde ke ndaeyo ama ekpere. Enye ama adian ete: “Kpasụk ntre mbufo n̄ko, ke ini ẹkụtde kpukpru n̄kpọ ẹmi, ẹfiọk ẹte Enye ke ekpere, odu ke enyịn-usụn̄.”—Matthew 24:33.

Edi Jesus iketịn̄ke nnennen ini emi utịt edidide. Utu ke oro, enye eketịn̄ se ikokotde oro ke Matthew 24:36. Oro edi nte Edisana Ŋwed Abasi Ibom okotde, ndien ediwak edikabade Bible eke eyomfịn ẹkot kpasụk ntre. Edi, ndusụk n̄kani edikabade isịneke “Eyen inyụn̄ ifiọkke.”

Ke uwụtn̄kpọ, Douay Version eke Catholic okot ete: “Edi amaedi usen ye hour oro baba owo kiet ifiọkke, mme angel ke heaven ifiọkke, ibọhọke Ete ikpọn̄.” King James Version okot kpa ntre. Ntak ẹsiode “Eyen inyụn̄ ifiọkke” ẹfep, okposụkedi enye odude ke Mark 13:32? Koro ko ke ntọn̄ọ ntọn̄ọ ọyọhọ isua ikie 17 ke ini ẹketịmde edikabade iba oro, mme uwetn̄kpọ oro mme akabade n̄wed ẹkekamade ikesịneke ikọ oro. Kan̄a kemi, nte ededi, ẹma ẹfiọhọ ediwak n̄kani uwetn̄kpọ usem Greek. Mmọemi, emi ẹtịmde ẹkpere ini oro ẹkewetde akpasarade uwetn̄kpọ Matthew oro, ẹsịne “Eyen inyụn̄ ifiọkke” ke Matthew 24:36.

Nte enemde, Jerusalem Bible eke Catholic esịne ubak udịmikọ oro, ye ikọ idakisọn̄ ọdọhọde ete ke Vulgate eke usem Latin isịnke ikọ oro “ndusụk ke ntak ukpepn̄kpọ ido ukpono.” Edi ntre ke akpanikọ! Mme akabade n̄wed ye mme osion̄o n̄wed ẹmi ẹnịmde Abasi-Ita-ke-Kiet ke akpanikọ ẹkeme ndiyom nditre ndisịn ubak udịmikọ oro owụtde ke Jesus ikenyeneke ndusụk ifiọk oro Ete esie ekenyenede. Didie ke Jesus mîkpekenyeneke ifiọk iban̄a ndusụk n̄kpọ edieke enye ye Ete esie ẹkedide ubak adiana-ita Abasi?

Ukem ntre, A Textual Commentary on the Greek New Testament, emi B. M. Metzger ewetde, ọdọhọ ete: “Mme ikọ oro ‘Eyen inyụn̄ ifiọkke’ idụhe ke ediwak [uwetn̄kpọ] ikọ ntiense Matthew, esịnede uwetn̄kpọ Byzantine eke ukperedem. Ke n̄kan̄ eken, mfọnn̄kan uwụtn̄kpọ ikpan̄wed Alexandria, kpa orụk uwetn̄kpọ eke Edem Usoputịn, ye eke Caesarea ẹsịne ubak udịmikọ oro. Edisio mme ikọ ẹmi mfep ke ntak mfịna oro mmọ ẹkamade ke ukpepn̄kpọ otịm enen akan edikere ke ẹkedadian mmọ ke” Mark 13:32.—Sịghisịghi ubọkn̄wed edi eke nnyịn.

“Mme mfọnn̄kan uwụtn̄kpọ” eke mme akpa uwetn̄kpọ oro ẹsọn̄ọ edikot emi nte esịnede ifiọk oro akade-ka iso ke usụn̄ oro owụtde ọniọn̄. Mme angel ikọfiọkke hour oro utịt edidide; Eyen ikonyụn̄ ifiọkke; ibọhọke Ete ikpọn̄. Ndien emi odu ke n̄kemuyo ye mme ikọ Jesus oro ẹkụtde ke Matthew 20:23, ke ebiet emi enye onyịmede ete ke imọ inyeneke odudu ndinọ owo ikpọ itie ke Obio Ubọn̄, edi ke Ete enyene.

Ntem, mme ikọ Jesus ẹwụt ẹte ke enye ikọfiọkke usen emi ‘utịt ererimbot’ edidide ke ini okodude ke isọn̄. Nte enye ama edifiọk emi ndien?

Ediyarade 6:2 etịn̄ aban̄a Jesus nte etiede ke afia enan̄ mbakara onyụn̄ ‘ọwọrọde edikan, onyụn̄ ọdọdiọn̄ akan.’ Ekem enan̄ mbakara ẹmi ẹdade ẹban̄a ekọn̄, akan̄, ye mme idiọk udọn̄ọ, utọ nte mmọ oro nnyịn ikụtde toto nte Ekọn̄ Ererimbot I ọkọtọn̄ọ ke 1914 ẹma ẹtiene. Mme Ntiense Jehovah ẹnịm ke akpanikọ ẹte ke ẹkedori Jesus ke ebekpo ke 1914 nte Edidem Obio Ubọn̄ Abasi eke heaven, kpa owo emi edidade iso ke ekọn̄ oro edide emi edisiode idiọkido efep ke isọn̄. (Ediyarade 6:3-8; 19:11-16) Sia ẹma ẹkenọ Jesus odudu kemi nte owo emi edikande ke enyịn̄ Abasi, owụt ifiọk nte ke Ete esie ama asian enye ini emi utịt edidide, ini emi enye ‘edikụrede edikan esie.’

Owo isianke nnyịn ẹmi idude ke isọn̄ usen oro, ntre mme ikọ Jesus ẹsụk ẹnyenyene n̄kpọ ndinam ye nnyịn: “Ẹtịn̄ enyịn ẹse, ẹkpeme . . . koro mbufo mîfiọkke edikem ini. . . . Se ndọhọde mbufo, mmonyụn̄ ndọhọ kpukpru owo nte, Ẹkpeme.”—Mark 13:33-37.