‘Ofụn Anam-Akpanikọ’ ye Otu Ukara Esie
“Anie ndien edi asan̄autom emi anamde akpanikọ, onyụn̄ enyenede ọniọn̄, emi ete esie okonịmde ete, akara mbonufọk imọ, onyụn̄ ọnọ mmọ udia ke edikem ini?”—MATTHEW 24.45.
1. Ntak emi Jehovah onyịmede ndiyak odudu nnọ owo, ndien anie ke enye akanam emi akpan akpan?
JEHOVAH edi Abasi eti ndutịm. Enye n̄ko edi Andinọ kpukpru nti odudu. Sia enyenede mbuọtidem ke nsọn̄ọnda mme edibotn̄kpọ esie oro ẹnamde akpanikọ, enye omonyịme ndiyak odudu nnọ owo. Enyeemi enye akayakde n̄kpon n̄kan odudu ọnọ edi Eyen esie, Jesus Christ. Ke akpanikọ, Abasi “okonyụn̄ ada kpukpru n̄kpọ adak Enye ke ukot, onyụn̄ ọnọ Enye ete edi Ibuot kpukpru n̄kpọ, ọnọ ufọn ufọk Abasi.”—Ephesus 1:22.
2. Nso ke Paul okot esop Christian, ndien mmanie ke Christ akayak odudu ọnọ?
2 Apostle Paul okot esop Christian “ufọk Abasi” onyụn̄ ọdọhọ ete ke ẹnịm Christ, nte anam-akpanikọ Eyen Jehovah, ndise mban̄a ufọk emi. (1 Timothy 3:15; Mme Hebrew 3:6) N̄ko, Christ, ayak odudu esịn mbonufọk Abasi ke ubọk. Nnyịn imekeme ndikụt emi ke ikọ Jesus ke Matthew 24:45-47. Enye ọkọdọhọ ete: “Anie ndien edi asan̄autom emi anamde akpanikọ, onyụn̄ enyenede ọniọn̄, emi ete esie okonịmde ete, akara mbonufọk imọ, onyụn̄ ọnọ mmọ udia ke edikem ini? Ọfọfọn ọnọ asan̄autom oro eteufọk esie edidide okụt enye anamde ntre. Ke akpanikọ ke ndọhọ mbufo nte, eteufọk esie eyenam enye edi andikara kpukpru se enye enyenede.”
Esenyịn Ufọk eke Akpa Isua Ikie
3. Mmanie ẹnam “asan̄autom emi anamde akpanikọ, onyụn̄ enyenede ọniọn̄,” nso enyịn̄ ke enọ mmọ nte owo kiet kiet?
3 Otode nnyịn ndikpep N̄wed Abasi, nnyịn imọfiọk ite ke mbonufọk Abasi oro ẹyetde aran ke spirit, ẹmi ẹdude ke ikpehe ini ekededi, ke ẹtan̄de ẹdian ọtọkiet, ẹnam “asan̄autom emi anamde akpanikọ, onyụn̄ enyenede ọniọn̄,” “akama-ukpọhọde,” m̀mê “esenyịn ufọk.” Owo mmọ kiet kiet, kpa ikọt ufọk Jehovah edi se ẹkotde “mbonufọk” m̀mê ‘otu mme edeme-udia.’—Matthew 24:45; Luke 12:42; Reference Bible, ikọ idakisọn̄.
4. Esisịt ini mbemiso n̄kpa esie, nso mbụme ke Jesus okobụp, ndien enye ekemen idemesie odomo ye anie?
4 Ọfiọn̄ ifan̄ mbemiso n̄kpa esie, Jesus ama obụp mbụme oro ẹwetde ke Luke 12:42 ẹte: “Anie ndien edi akama-ukpọhọde, emi anamde akpanikọ onyụn̄ edide ọniọn̄, emi eteufọk esie edinịmde enye nte andikara kpukpru mbonufọk esie, man enye edeme udia ọnọ mmọ ke edikem ini?” Ndien, usen ifan̄ mbemiso n̄kpa esie, Jesus ama emen idemesie odomo ye owo emi okoyomde ndika idụt efen, emi okotde ifụn esie ayak inyene esie ọnọ mmọ.—Matthew 25:14.
5. (a) Ini ewe ke Jesus ekemek mmọ en̄wen ndise mban̄a inyene esie? (b) Nso ntatara utom ke Christ ọkọnọ mbon oro ẹdidide ubak otu esenyịn ufọk esie?
5 Ini ewe ke Jesus ekemek mmọ en̄wen ndise mban̄a inyene esie? Emi akada itie ke enye ama ekeset ke n̄kpa. Ke ikọ esie oro ẹmehede, emi ẹkụtde ke Matthew 28:19, 20, Christ ekebemiso ayak ntatara utom edikpep ye edinam mbet ọnọ mbon oro ẹdidide ubak otu esenyịn ufọk esie. Otode ke owo kiet kiet ndikwọrọ ikọ “tutu osịm utịt ererimbot,” mbon utom ẹmi ẹyetat in̄wan̄ isụn̄utom oro Jesus ọkọtọn̄ọde nditọ ke ini utom ukwọrọikọ esie ke isọn̄. (Utom 1:8) Emi esịne mmọ ndinam n̄kpọ nte “mme isụn̄utom ẹmi [ẹ]dide ke enyịn Christ.” Nte “mme akama-ukpọhọde ndịben̄kpọ Abasi,” mmọ ẹyenam mme mbet ẹnyụn̄ ẹdeme udia eke spirit ẹnọ mmọ.—2 Corinth 5:20; 1 Corinth 4:1, 2.
Otu Ukara eke Mbonufọk Ẹmi
6. Ẹkeyet otu akpama-ukpọhọde eke akpa isia ikie aran ke spirit ndinọ nso?
6 Nte otu, mme Christian oro ẹyetde aran ke spirit ẹkenyene ndidi akama-ukpọhọde eteufọk, m̀mê esenyịn ufọk, ẹmi ẹkemekde ndideme ekemini udia eke spirit nnọ ikọt ufọk Abasi kiet kiet. Ke ufan̄ isua 41 C.E. ye 98 C.E., ke ndausụn̄ odudu spirit, mbon otu mme akama-ukpọhọde eke akpa isua ikie ẹma ẹwet mbụk n̄kpọntịbe 5, leta 21, ye n̄wed Ediyarade ke ufọn nditọete mmọ. Mme uwetn̄kpọ eke odudu spirit ẹmi esịne nti udia eke spirit ọnọ mbonufọk ẹmi, oro edi, mbonufọk Abasi kiet kiet oro ẹyetde aran.
7. Kaban̄a nso uduak ke Christ ekemek ekpri ibat irenowo osio ke otu ifụn oro?
7 Ke adan̄aemi kpukpru mme Christian oro ẹyetde aran ke ẹtan̄de ẹdian kiet ẹnamde ufọk Abasi, ekese uyarade ẹdu nte ke Christ ekemek ekpri ibat irenowo osio ke otu ifụn oro ndinam utom nte otu ukara oro ẹkụtde ke enyịn. Ntọn̄ọ ntọn̄ọ mbụk aban̄ade ufọk Abasi owụt nte ke mme apostle 12, esịnede Matthias, ẹkedi itiat idakisọn̄ ọnọ otu ukara eke akpa isua ikie. Utom Mme Apostle 1:20-26 ọnọ nnyịn uyarade aban̄a emi. Ke se iban̄ade edida owo nsịn ke itie Judas Iscariot, ẹtịn̄ ẹtụk “itieutom esie” ye “itieutom emi ye idaha apostle.”
8. Mme utom oro otu ukara eke akpa isua ikie ekenyenede ekesịne nso?
8 Utọ itieutom oro ama esịne mbiomo oro mme apostle ẹkenyenede ndimek irenowo oro ẹdotde nnọ mme ifetutom, ndinyụn̄ ntịm utom ukwọrọikọ.’. Edi enye ama esịne se ikande oro. Enye n̄ko ama abuana edinọ ukpep ye edinam mme akpan n̄kpọ ke se ẹnịmde ke akpanikọ an̄wan̄a. Ke ndisu un̄wọn̄ọ Christ oro ẹwetde ke John 16:13, “spirit akpanikọ” ekenyene ndida esop Christian usụn̄ ke adiana ke adiana n̄kosịm ofụri akpanikọ. Toto ke ntọn̄ọ, mbon oro ẹkenyịmede ikọ Abasi ẹnyụn̄ ẹkabarede ẹdi mme Christian oro ẹyetde aran, ẹmi ẹnade baptism ẹmekaiso ndisịn idemmọ ke ‘ukpepn̄kpọ mme apostle.’ Ke akpanikọ, ntak emi ẹkemekde irenowo itiaba oro ẹdotde ndise mban̄a mbubehe udeme udia ekedi man “mme apostle duopeba” oro ẹkpenyene ifet ‘ndiyịre ke akam ye utom ukwọrọikọ.’—Utom 2:42; 6:1-6.
9. Didie ke akpa otu ukara okosụhọde osịm owo 11, edi nte an̄wan̄ade, ntak owo mîkanamke ibat oro afiak ọdọk osịm 12 ndondo oro?
9 Ke akpa, etie nte mme apostle Jesus kpọt ẹkenam otu ukara. Edi nte enye edisụk etie ntre? Ke n̄kpọ nte isua 44 C.E., Herod Agrippa I ama owot apostle James, eyeneka John. (Utom 12:1, 2) Nte an̄wan̄ade, mmọ ikememkke owo ndida itie esie nte apostle, nte ẹkenamde ye Judas. Ntak owo mîkemekke-e? Nte eyịghe mîdụhe, emi ekedi sia James akanamde akpanikọ tutu osịm n̄kpa, nte akpa ke otu mme apostle 12 ndikpa. Ke n̄kan̄ eken, Judas ekedi anamidiọk ẹkenyụn̄ enyenede ndinam owo ada itie esie man ẹnam mme apostle 12 ẹkem ibat, ẹmi ẹdide itiat idakisọn̄ Israel eke spirit.—Ephesus 2:20; Ediyarade 21:14.
10. Ini ewe, n̄ko didie ke otu ukara eke akpa isua ikie akatara, ndien didie ke Christ akada enye ndinọ ufọk Abasi ndausụn̄?
10 Akpa mbon otu ukara eke akpa isua ikie ẹkedi mme apostle, kpa irenowo ẹmi ẹkesan̄ade ye Jesus, ẹkenyụn̄ ẹkụtde n̄kpa ye ediset ke n̄kpa esie. (Utom 1:21, 22) Edi n̄kpọ emi ekenyene ndikpụhọde. Nte mme isua ẹkebede, irenowo Christian eken ẹma ẹnyene n̄kọri eke spirit ẹma ẹnyụn̄ ẹmek mmọ nte mbiowo ke esop Jerusalem. Etisịm isua 49 C.E. ke ukperedem, ẹma ẹnam otu ukara atara okûdi sụk mme apostle oro ẹkesụhọde edi n̄ko ndisịne ibat ibat ikpọ nditọete iren eken ke Jerusalem. (Utom 15:2) Ntre ibat owo ke otu ukara ikedịghe se mîkemeke ndikpụhọde, edi nte an̄wan̄ade, Abasi akada usụn̄ man enye okpụhọde ekekem ye idaha ikọt esie. Christ, ifịk ifịk Ibuot esop oro, ama ada otu ukara emi ẹkanamde atara mi ndibiere mme akpan ukpepn̄kpọ akaban̄ade mme Christian oro mîkedịghe mme Jew ndidi se ẹnịmde mbobi ẹnyụn̄ ẹsụkde idem ẹnọ Ibet Moses. Otu ukara oro ama ewet leta anam ubiere esie an̄wan̄a onyụn̄ ọnọ mme ewụhọ oro ẹdinịmde.—Utom 15:23-29.
Ini Ndinam Ibat ye Esenyịn Ufọk
11. Nte nditọete ẹma ẹdara eti ndausụn̄ oro otu ukara ọkọnọde, ndien nso iwụt ite ke Jehovah ama ọdiọn̄ ndutịm emi?
11 Nte owo kiet kiet ye nte mme esop, mme akpa Christian oro ẹma ẹdara ọkpọsọn̄ ndausụn̄ oro otu ukara ọkọnọde. Ke esop oro okodude ke Antioch ke Syria ama okokot leta oro okotode otu ukara, mmọ ẹma ẹdara ke nsịnudọn̄ oro ẹkenọde. Nte mme esop ẹkebọde ntọt ẹmi ẹnyụn̄ ẹnịm mme ewụhọ ẹmi, mmọ ẹma ‘ẹkaiso ndisọn̄ọ nda ke mbuọtidem ẹnyụn̄ ẹkọri ke ibat ke usen ke usen.’ (Utom 16:5) Nte uyarade owụtde, Abasi ama ọdiọn̄ ndutịm emi.—Utom 15:30, 31.
12, 13. Mme n̄kpọntịbe ewe ke Jesus ekebemiso etịn̄ onịm ke n̄ke esie aban̄ade okụk ye talent?
12 Edi ke n̄ke esie oro aban̄ade okụk (mina), Jesus ekemen idemesie odomo ye ọbọn̄ kiet emi akakade anyan idụt ndikọbọ ubọn̄ nda nnyene, ndien ekem ọnyọn̄de edi. (Luke 19:11, 12) Nte utịp ediset esie ke n̄kpa ke 33 C.E., ẹma ẹmenede Jesus Christ ẹnịm ke ubọk nnasia Abasi, emi enye ekenyenede nditie tutu ẹda mme asua esie ẹnịm enye ke idak ikpat.—Utom 2:33-35.
13 Ke mbiet n̄ke oro, kpa n̄ke talent, Jesus eketịn̄ ete ke anyanini ama ekebe, eteufọk ama edi ndinam ibat ye ifụn esie. Kaban̄a ifụn oro ẹkenamde akpanikọ, eteufọk oro ọkọdọhọ ete: “Afo . . . akanam akpanikọ ke se mîwakke; nyenịm fi ekpeme ediwak n̄kpọ; dụk ke idara ọbọn̄ fo.” Edi kaban̄a ofụn oro mîkanamke akpanikọ, enye ọkọdọhọ ete: “Ẹyebọ enye kpa se enye enyenede. Mbufo ẹnyụn̄ ẹduọk asan̄autom emi mîdorike mi udori ke ekịm ke esien.”—Matthew 25:21-23, 29, 30.
14. Nso ke Jesus okodori enyịn ndikụt nte ifụn esie oro ẹyetde aran ẹnamde?
14 Ke anyanini ama ekebe—ke ekperede ndidi isua ikie-19—ẹma ẹnọ Christ odudu ndikara nte edidem ke 1914, ke utịt “ini mme Gentile.” (Luke 21:24) Ibio ini ke oro ebede, enye ama “edi edibat ibat” ye ifụn esie, kpa mme Christian oro ẹyetde aran ke spirit. (Matthew 25:19) Nso ke Jesus okodori enyịn ndikụt nto mmọ nte owo kiet kiet ye nte otu? Utom akama-ukpọhọde ama akaiso nte ekedide toto ke akpa isua ikie. Christ ama ayak mme talent esịn mme owo ke ubọk—”ọnọ owo kiet kiet nte ukeme esie edide.” Ntre, Jesus ama odori enyịn ndikụt mme utịp oro ekemde ye idaha owo. (Matthew 25:15) Edumbet oro ke 1 N̄wed Corinth 4:2 enyene n̄kpọ ndinam mi, emi ọdọhọde ete: “N̄kọm owo ẹyom ẹte mme akama-ukpọhọde ẹdi mme anam-akpanikọ.” Ndida mme talent oro nsịn ke utom ọkọwọrọ ndinam n̄kpọ ke esịt akpanikọ nte mme isụn̄utom Abasi, ẹnamde mme mbet ẹnyụn̄ ẹdemede akpanikọ eke spirit ẹnọ mmọ.—2 Corinth 5:20.
‘Ofụn’ Oro ye Otu Ukara Esie nte Utịt Akasan̄ade Ekpere
15. (a) Nso ke Christ okodori enyịn ndikụt nte otu esenyịn ufọk esie anamde? (b) Nso iwụt nte ke Christ ama odori enyịn ndikụt otu ifụn oro ẹnamde emi mbemiso enye edide ndise mbonufọk esie?
15 Jesus okodori enyịn ndikụt nte mme Christian oro ẹyetde aran, nte otu, ẹnamde n̄kpọ nte akama-ukpọhọde oro anamde akpanikọ, ọnọde mbonufọk esie ‘udeme udia mmọ ke edikem ini.’ (Luke 12:42) Nte ekemde ye Luke 12:43, Christ ọkọdọhọ ete: “Ọfọfọn ọnọ asan̄autom oro eteufọk esie edidide okụt enye anamde ntem.” Emi owụt ete ke ndusụk ini mbemiso Christ ekedide ndinam ibat ye ifụn esie oro ẹyetde aran ke spirit, mmọ ẹma ẹdedeme udia eke spirit ẹnọ mme andibuana ke esop Christian, kpa ikọt ufọk Abasi. Mmanie ke Christ okokụt ẹnamde ntem ke ini enye akafiakde edi ye odudu ubọn̄ ke 1914 onyụn̄ ọtọn̄ọde ndise ufọk Abasi ke 1918?—Malachi 3:1-4; Luke 19:12; 1 Peter 4:17.
16. Ke ini Christ ekedide ndise ufọk Abasi ke 1918, ntak enye mîkekwe mme ufọkederi Christendom nte ẹnọde udia eke spirit ke edikem ini?
16 Nte anyanini oro Jesus eketiede ke ubọk nnasia Jehovah ebet akasan̄ade ekpere utịt, sụn̄sụn̄, ẹma ẹdidiọn̄ọ enyeemi ọkọnọde mbonufọk Christ udeme udia eke spirit idem mbemiso 1914. Ndi afo ekere ke ekedi mme ufọkederi Christendom? Ke akpanikọ idịghe, koro mmọ ẹkesịnde idem ntotụn̄ọ ntotụn̄ọ ke mbre ukaraidem. Mmọ ẹkedi unyịme unyịme n̄kpọutom ẹnọ n̄kọri usiak obufa idụt, ẹnyụn̄ ẹdomo ndisio kiet eken mfep ndiyarade uma-idụt mmọ n̄wụt, ke ntre ẹsịnde udọn̄ ẹnọ ufụtidụt. Ibịghike emi ama anam mmọ ẹnyene akwa ubiomikpe uduọkiyịp, oro edi, ke ini mmọ ẹkenọde mme ukara ukaraidem ẹmi ẹkebuanade ke akpa ekọn̄ ererimbot oro ifịk ifịk un̄wam. Ke n̄kan̄ eke spirit, ekikere ye ifiọk Eyomfịn ama owụri mbuọtidem mmọ. Nsọn̄ọn̄kpọ eke spirit ama ada itie koro ediwak mme ọkwọrọ ederi mmọ ẹkekabarede mmemmem mmemmem ẹdi n̄kpọ-udia ẹnọ ikpọ mbon nsụkuyo ye ukpepn̄kpọ edito-ke-unam-mforo-owo. Owo ikemeke ndidori enyịn ndinyene eti udia eke spirit ndomokiet nto mme ọkwọrọ ederi Christendom!
17. Ntak emi Christ ekesịnde ndusụk Christian oro ẹyetde aran, ndien emi ọkọwọrọ nso ọnọ mmọ?
17 Ukem oro n̄ko, eti udia eke spirit ndomokiet ikotoho mme Christian oro ẹyetde aran ẹmi edinyan̄a idemmọ ekedide se ibehede mmọ ikan edida talent Eteufọk mmọ nsịn ke utom. Mmọ ẹma ẹkabade ẹdi “ifu,” idotke ndise mban̄a inyene eteufọk mmọ. Ntem, ẹma ẹtop mmọ ẹduọk “ke ekịm ke esien,” kpa ebiet emi mme ufọkederi Christendom ẹsụk ẹdude kpukpru ini.—Matthew 25:24-30.
18. Mmanie ke Eteufọk okokụt nte ẹnọde mbonufọk esie udia eke spirit ke edikem ini, ndien nso isọn̄ọ emi?
18 Ke ọnyọn̄de edi ndise ifụn esie ke 1918, mmanie ke Eteufọk oro, kpa Jesus Christ okokụt ẹnọde mbonufọk esie udeme udia mmọ ke edikem ini? Ọfọn, ke ini oro, mmanie ẹkenọ ata mme oyom-akpanikọ nnennen ifiọk aban̄ade uwa ufak, enyịn̄ Abasi, edidu Christ oro enyịn mîkwe, ye se isua 1914 ọwọrọde? Mmanie ẹkeyarade nsunsu ukpepn̄kpọ Abasi-Ita-ke-Kiet, ukpọn̄ ikpaha ke nsinsi, ye hell ikan̄? Ndien mmanie ẹkedụri owo utọn̄ ẹban̄a mme n̄kpọndịk ẹdude ke ukpepn̄kpọ edito-ke-unam-mforo-owo ye ubụpekpo? Mme akpanikọ ẹwụt nte ke ekedi otu Christian oro ẹyetde aran, ẹmi ẹkebuanade ye mme andiwet magazine oro, Zion’s Watch Tower and Herald of Christ’s Presence, emi ẹkotde idahaemi Enyọn̄-Ukpeme ọnọ Ntọt Obio Ubọn̄ Jehovah.
19. Didie ke otu asan̄autom anam-akpanikọ akayarade idemesie mbemiso 1918, ndien ewe usụn̄ ke enye akada edeme udia eke spirit, n̄ko toto ke ini ewe?
19 Ke nsiondi esie eke November 1, 1944, Enyọn̄-Ukpeme (Ikọmbakara) oro ọkọdọhọ ete: “Ke 1878, isua aba mbemiso Ọbọn̄ edide temple ke 1918, ama odu otu ata Christian ẹmi ẹyakde idem ẹnọ, ẹmi ẹkekịbede ẹwọrọ ke esop ukara mme oku ye eke mme ọkwọrọ ederi ido ukpono, ẹmi ẹkenyụn̄ ẹyomde nditiene Ido Ukpono Christ. .. Ke isua oro eketienede, oro edi, ke July, 1879, man kpukpru ini ẹkpedeme akpanikọ emi Abasi ọnọde ebe ke Christ nte ‘udia ke edikem ini’ ẹnọ ofụri mbonufọk esie ẹmi ẹdide nditọ oro ẹyakde idem ẹnọ, ẹma ẹtọn̄ọ ndimịn̄ magazine emi, Enyọn̄-Ukpeme.”
20. (a) Didie ke Otu Ukara eke eyomfịn akasan̄a edidu? (b) Nso ke mbon Otu Ukara ẹnam, ndien ke ndausụn̄ anie?
20 Ke ọnọde ntọt aban̄a n̄kọri Otu Ukara eke eyomfịn, nsiondi Enyọn̄-Ukpeme eke July 1, 1972, ama anam an̄wan̄a ete: “Isua ition ke ukperedem [ke 1884] ẹma ẹsịn Zion’s Watch Tower Tract Society ke n̄wedibet ama onyụn̄ anam n̄kpọ nte ‘isụn̄utom’ ndinam udia eke spirit oro osịm ediwak tọsịn mbon esịt-akpanikọ ẹmi ẹyomde ndidiọn̄ọ Abasi ndinyụn̄ ndiọn̄ọ Ikọ esie... Mme Christian ẹmi ẹyetde aran, ẹmi ẹkeyakde idem ẹnọ ẹnyụn̄ ẹna baptism, ẹma ẹdibuana ye N̄ka oro ke ibuot itieutom ke Pennsylvania. Edide ẹkedu ke Otu mme Ese-Utom m̀mê ikodụhe, mmọ ẹma ẹyak idemmọ ẹnọ akpan utom eke otu ‘asan̄autom emi anamde akpanikọ, onyụn̄ enyenede ọniọn̄.’ Mmọ ẹma ẹn̄wam ke unọ udia ye ndausụn̄ eke otu asan̄autom oro, ndien ke ntem otu ukara ama owụt idemesie. Emi nte an̄wan̄ade ekedi ke ndausụn̄ anamutom odudu m̀mê edisana spirit Jehovah oro enyịn mîkwe. N̄ko, ke ndausụn̄ Jesus Christ, kpa Ibuot Esop Christian.”
21. (a) Mmanie ke Christ okokụt ẹdemede udia eke spirit, ndien didie ke enye ọkọnọ mmọ utịp? (b) Nso ina ibet ofụn anam-akpanikọ ye Otu Ukara esie?
21 Ke 1918, ke ini Jesus Christ okodụn̄ọrede mbon oro ẹkedọhọde ke idi ifụn esie, enye ama okụt nte otu Christian eke ofụri ererimbot ẹmịn̄de akpanikọ Bible oro ẹdikamade ke esịt esop ye ke an̄wa ke utom ukwọrọikọ. Ke 1919 enye ke akpanikọ ama otịbe ukem nte Christ ekebemde iso etịn̄ ete: “Ọfọfọn ọnọ asan̄autom oro eteufọk esie edidide okụt enye anamde ntre. Ke akpanikọ ke ndọhọ mbufo nte, eteufọk esie eyenam enye edi andikara kpukpru se enye enyenede.” (Matthew 24:46, 47) Mme ata Christian ẹmi ẹma ẹdụk ke idara Eteufọk mmọ. Ke ẹma ẹkenam “akpanikọ ke se mîwakke,” Eteufọk ama emek mmọ ete “ẹkpeme ediwak n̄kpọ.” (Matthew 25:21) Ofụn anam-akpanikọ ye Otu Ukara esie ama odu ke itie, eben̄ede idem ọnọ utom oro ẹtatde. Nnyịn ikpokop idatesịt didie ntem nte ke emi ekedi ntre, koro mme Christian anam-akpanikọ ke ẹbọ ufọn akamba akamba ẹto utom unyịmesịt oro ofụn anam-akpanikọ ye Otu Ukara esie ẹnamde!
Mme Akpan N̄kpọ Nditi
◻ Anie edi Ibuot ufọk Abasi, ndien mmanie ke Enye akayak odudu ọnọ?
◻ Nso utom otuowo ke Christ ọkọnọ otu ifụn esie?
◻ Ewe otu en̄wen ikodu ke otu ifụn ẹmi, ndien nso ikedi akpan utom esie?
◻ Ke ini Christ ekedide ndise ufọk Abasi, mmanie ikọnọ mbonufọk mmọ udia eke spirit?
◻ Didie ke Otu Ukara eke eyomfịn ekedidu?
[Ndise ke page 10]
‘Ofụn’ akpa isua ikie ama enyene otu ukara oro ekesịnede mme apostle ye nyobiowo esop Jerusalem