Ntatara Utom ke Ini Edidu Christ
1. Ke nso usụn̄ ke pa·rou·siʹa Christ ebiet “mme usen Noah”?
EDIDU Christ—kpa n̄kpọntịbe oro ẹketiede ẹbet ke anyanini! Ini oro ebietde “mme usen Noah,” emi Jesus eketịn̄de aban̄a ke ebuana ye “akpatre ini eyo emi,” ama edisịm ke isua 1914. (Matthew 24:3, 37) Edi nso ke edidu, m̀mê pa·rou·siʹa Christ, ediwọrọ ọnọ nsụhọ “asan̄autom emi anamde akpanikọ, onyụn̄ enyenede ọniọn̄” oro ẹyetde aran? (Matthew 24:45) Kamse, nte ke mmọ ẹyekabade ẹdọdiọn̄ ẹnyene ifịk ẹkan nte mme ọnọ un̄wana! Mme utịbe utịbe n̄kpọ ẹkenyene nditịbe! Anana-mbiet utom editan̄ mbok ekenyene nditọn̄ọ.
2. Nso edinam asana akada itie ke edisu eke Malachi 3:1-5?
2 Akpa, kan̄a, ama oyom ẹnam mme Christian oro ẹyetde aran mi ẹsana. Nte Malachi 3:1-5 ekebemde iso etịn̄, Jehovah Abasi ye “angel ediomi” esie, kpa Jesus Christ, ẹma ẹdi ndise temple eke spirit ke ndaeyo eke 1918. Ikpe ekenyene nditọn̄ọ ke “ufọk Abasi.” (1 Peter 4:17) Malachi 3:3 ama ebemiso etịn̄ ete: “Enye [Jehovah] onyụn̄ etie etem silver onyụn̄ anam asana: onyụn̄ anam nditọ Levi ẹsana, onyụn̄ ọdiọn̄ mmọ nte gold ye silver.” Emi ekedi ikpehe ini edinam ọfọn ye edinam asana.
3. Ntak okodotde nte edinam asana eke spirit ada itie?
3 Ke ndibe ini ikpe emi, emi okosịmde utịt ke 1918, ẹma ẹnam nsụhọ otu asan̄autom emi asana ọbọhọ ndek ererimbot ye eke ido ukpono. Ntak emi Jehovah akanamde mmọ ẹsana? Koro emi ama abuana temple eke spirit esie. Emi edi ndutịm ebietde temple ndida ntuak ibuot nnọ Jehovah ke isọn̄ uwa usio-isop Jesus Christ. Jehovah okoyom temple esie odu ke edisana idaha man ke ini ẹdidade akwa ibat mme andituak ibuot ẹmi ẹnyenede idotenyịn eke isọn̄ ẹdi do, mmọ ẹkpekụt ebiet oro ẹnọde itie edikara ofụri ekondo esie ukpono, ebiet emi ẹnamde enyịn̄ esie asana, ye ebiet emi ẹnịmde ndinen mbet esie. Ntem, mmọ ẹyedifiọk Jehovah ẹnyụn̄ ẹdiana ke ndinam ẹdiọn̄ọ ẹban̄a ikpọ uduak esie.
Mme Ifetutom Efen Efen
4, 5. (a) Didie ke mbụme Jesus Christ anam owo kiet kiet ke otu asan̄autom odụn̄ọde idem mfịn? (b) Ke ewe usụn̄ ke ẹkpenyene ndidiọn̄ọ mme ikọ oro “asan̄autom emi anamde akpanikọ, onyụn̄ enyenede ọniọn̄” ye ‘mbonufọk esie’? (c) Nso utom ke Jesus ọkọnọ asan̄autom emi?
4 Ke 1919 otu asan̄autom emi ẹma ẹkenam asana mi ẹma ẹkeme ndisak iso nse utom oro ẹsụk ẹkade-kaiso nditat. Ko ke edem ke 1914, Jesus Christ, Eteufọk mmọ, ama ọbọ Obio Ubọn̄ eke heaven ada enyene. Ke ini enye akafiakde edi ebịne mbonutom ufọk esie ndise ofụri “mbonufọk” esie, enye ekesịne ọfọn̄ ubọn̄, emi enye mîkenyeneke ke ini enye okodude mi ke isọn̄. Nso ke enye okokụt? Nte otu asan̄autom emi ama esịn idem ese aban̄a mme ufọn n̄kpọ Eteufọk? Nte ẹkewetde ke Matthew 24:45-47, Jesus ama obụp mbụme kiet oro akanamde mbet emi ẹyetde aran mi kiet kiet odụn̄ọde ese nte enye ke idemesie ayakde idem ọnọ Messiah Jehovah: “Anie ndien edi asan̄autom emi anamde akpanikọ, onyụn̄ enyenede ọniọn̄, emi ete esie okonịmde ete, akara mbonufọk imọ, onyụn̄ ọnọ mmọ udia ke edikem ini? Ọfọfọn ọnọ asan̄autom oro eteufọk esie edidide okụt enye anamde ntre. Ke akpanikọ ke ndọhọ mbufo nte, eteufọk esie eyenam enye edi andikara kpukpru se enye enyenede.”
5 Nte an̄wan̄ade, editịn̄ emi Jesus eketịn̄de aban̄a asan̄autom emi anamde akpanikọ mi ikemeke ndidi owo ekededi san̄asan̄a. Baba, edi emi akam etịn̄ aban̄a anam-akpanikọ esop Christ oro ẹyetde aran ke ofụri ofụri, nte otu. Mbonufọk ẹdi mme anditiene Christ oro ẹyetde aran nte owo kiet kiet. Jesus ama ọfiọk ete ke imọ imọn̄ ida iyịp imọ idep mmọemi ẹyetde aran mi, ntre enye ama etịn̄ nte odotde aban̄a mmọ ke otu nte asan̄autom esie. Akpa Corinth 7:23 ọdọhọ aban̄a mmọ ete: “Ẹkedep MBUFO [ke nditịn̄ mban̄a nte otu] ke ekọmurua; ẹkedụk ufụn ẹnọ owo.” Jesus ama ọdọn̄ otu asan̄autom esie ete ẹyak un̄wana mmọ ayama man ẹdụri ẹnyụn̄ ẹnam mme mbet efen man ẹnyụn̄ ẹkaiso ẹbọk mbonufọk imọ ke ndinọ mmọ udia eke spirit mmọ ke edikem ini.
6. Didie ke ẹkenọ asan̄autom emi utịp nte utịp Jesus ndidi ndise?
6 Ọtọn̄ọde ke ini emi edidu Christ ọkọtọn̄ọde tutu osịm 1918, otu asan̄autom emi, kpa ye usua, ukọbọ, ye idem ndusụk ndutịme, ke okoyom usụn̄ ndinọ mbonufọk ẹmi udia ke edikem ini. Emi edi se Eteufọk okokụtde ke ini edisan̄a nse esie ọkọtọn̄ọde. Esịt ama enem Ọbọn̄ Jesus, ndien ke 1919 enye ama ọdọhọ ete ke ọfọfọn ọnọ otu asan̄autom emi anamde akpanikọ oro ẹnọde unyịme mi. Nso ikedi ọnọ inemesịt utịp eke asan̄autom emi ke ndikanam se Eteufọk esie ekemekde enye ete anam? Edimenede idaha! Ih, ẹma ẹnọ ikpọ mbiomo ke ndinam mme ufọn n̄kpọ Eteufọk esie ọkọri. Sia Eteufọk kemi ekedide Edidem eke heaven, kamse, ndien, inyene esie eke isọn̄ ẹma ẹkam ẹkabade ẹsọn̄ urua ẹkan.
7, 8. (a) Nso idi ‘kpukpru inyene’ Eteufọk? (b) Nso ke ẹyom ẹto asan̄autom emi ke ndise enyịn mban̄a inyene ẹmi?
7 Ntre, nso ẹdi “kpukpru se enye enyenede”? Mmọemi ẹdi ofụri inyene eke spirit ke isọn̄ oro ẹkabarede ẹdi inyene Christ ke ebuana ye odudu esie nte Edidem eke heaven. Emi ke akpan ama esịne utom oro ẹnọde ẹte ẹnam mbet ẹnọ Christ, ye akwa ifet edinam n̄kpọ nte mme andida ke ibuot Obio Ubọn̄ Abasi oro ẹma ẹkewowụk nnọ kpukpru idụt ererimbot.
8 Utọ edimenede idaha oro man ẹse enyịn ke kpukpru se Eteufọk enyenede ama oyom ete otu asan̄autom emi esịn ekese ini ye ntịn̄enyịn ke ndikụt nte ke ẹnam utom Obio Ubọn̄ ndien, ih, ẹtọn̄ọ ikpọ ufọkutom ndida nnam utom oro. Enye kemi ama enyene ata akamba an̄wautom—kpa ofụri isọn̄ oro ẹdụn̄de.
Nditan̄ Mme Erọn̄ Mbok
9. Nso isụn̄ọ ke editat utom eke asan̄autom emi?
9 Ke n̄kopitem, ndien, otu asan̄autom emi anamde akpanikọ onyụn̄ enyenede ọniọn̄ emi Christ enyenede ama atat utom esie. Nso ikedi utịp? Ẹma ẹtan̄ akpatre ke otu owo 144,000 oro ẹyetde aran edibok. Ndien n̄kukụt John oro ẹwetde ke Ediyarade 7:9-17 ama akabade edi akama-nduaidem, inem inem ata idem n̄kpọ. Akpan akpan ọtọn̄ọde ke 1935 ke otu asan̄autom emi adara ndikụt nte edisu eke n̄kukụt emi akade iso ndiyarade. Ke ofụri isọn̄, “akwa otuowo” ẹdide ediwak miliọn idahaemi ke ẹbụn̄ọ ẹdụk okụre temple Jehovah eke spirit nte mme andituak ibuot nnọ enye. Angel Jehovah akasian John ete ke baba owo kiet ikemeke ndibat akwa otuowo emi. Oro ọwọrọ ke owo inịmke adan̄a ke ibat owo oro otu asan̄autom emi enyenede ndida ndi ke temple Jehovah eke spirit. Adan̄a ini nte usụn̄ anade in̄wan̄, utom editan̄ mmọ mbok eyeka iso.
10. Ke nso ima ima utom ke asan̄autom emi abuana mfịn?
10 Otu asan̄autom emi anamde akpanikọ mi enyene ndodobi mbiomo ke ndise mban̄a “mme erọn̄ en̄wen” oro ẹkade-kaiso ndikọri ke ibat, ẹfiọkde ẹte ke mbon mbieterọn̄ ẹmi ẹtode ke kpukpru idụt mi ẹnen̄ede ẹsọn̄ urua ẹnọ Eteufọk, kpa Jesus. Mmọ ke akpanikọ ẹdi otuerọn̄ esie. (John 10:16; Utom 20:28; 1 Peter 5:2-4) Ntem ye ima ẹnyenede ẹnọ Eteufọk ye mme erọn̄, asan̄autom emi ye inemesịt emese aban̄a mme ufọn n̄kpọ eke spirit eke akwa otuowo.
11-13. Nso ikọ oro odotde ke etieibuot Watch Tower Society ini oro eketịn̄ kaban̄a utom asan̄autom emi?
11 Ih, n̄kponn̄kan ikpehe utom unọ un̄wana eke asan̄autom emi abuana editan̄ mme andidu ke idak Obio Ubọn̄ Abasi eke isọn̄ mbok. Ke enemede aban̄a ntatara utom asan̄autom emi anamde akpanikọ mi, F. W. Franz, etieibuot Watch Tower Society ini oro, mbemiso n̄kpa esie ke December 1992 ama ọdọhọ ete:
12 “Jesus Christ amada esop emi anam n̄kpọ ke ata utịbe utịbe usụn̄ kpukpru ini, nte n̄kụtde ke ifiọk eyouwem mi ke isua 99. Idịghe ikpîkpu owo ọnọ esop emi ndausụn̄, edi anaedi Ọbọn̄ Jesus Christ. Koro enye omotịm okpon onyụn̄ edi utịbe utịbe akan nte nnyịn ikakam ikerede. Mfịn nnyịn imenyene esop oro atarade osịm ofụri ererimbot. Enye ke anam utom ke Mbahade Edem Edere ye ke Mbahade Edem Usụk, ke Edem Usiahautịn ye ke Edem Usoputịn. Owo kiet kpọt ekpekeme ndidi ntak n̄wọrọnda ntatara utom emi—kpa Eyen Abasi, emi esede aban̄a otu asan̄autom emi anamde akpanikọ onyụn̄ enyenede ọniọn̄. Enye amada ekekem ye mme mbiomo esie, ndien oro edi se inamde akamba ntatara utom emi nnyịn ikụtde adade itie.
13 “Idịghe owo kiet anam n̄kpọ emi. Nnyịn inyene esop oro edide eke ukara Abasi, ndien enye anam n̄kpọ ke ido ukara Abasi, ke usụn̄ oro Abasi ọnọde ndausụn̄. Owo baba kiet, m̀mê idem andikọtọn̄ọ Watch Tower Bible and Tract Society, ikemeke ndidọhọ m̀mê ndidi se ẹdọhọde ke enye anam se ẹnamde emi ke ofụri isọn̄. Emi akam enyene ndyọ.” Nte kpukpru mbon oro ẹdide eke akwa otuowo inyịmeke ke ofụri esịt ye ekikere Brọda Franz oro ama akakpa mi? Ih, ke akpanikọ, mmọ ẹtịm ẹwụt esịtekọm ke ntatara utom asan̄autom oro anamde akpanikọ.
Mme Andidu ke Idak Obio Ubọn̄
14, 15. (a) Nso ke Jesus okowụt ke n̄ke aban̄ade talent (Matthew 25:14-30)? (b) Nte odotde, nso itiene ke Matthew ibuot 25?
14 Ke Matthew ibuot 25, n̄ke Jesus aban̄ade erọn̄ ye ebot anam akwa utom editan̄ mbok eke mme andidu ke idak Obio Ubọn̄ Abasi eke isọn̄ an̄wan̄a. Ke n̄ke oro ekebemde enyeemi iso, kpa eke talent, Jesus anam an̄wan̄a ete ke ana mme mbet oro ẹyetde aran ẹmi ẹdoride enyịn ndikara ye enye ke Obio Ubọn̄ esie eke heaven ẹnam utom man ẹnam inyene esie eke isọn̄ ọtọt. Nte otịmde odot, ndien, ke n̄ke esie emi etienede, Jesus owụt se ẹyomde ẹto mbon oro ẹyomde ndikabade ndi mme andidu ke idak Obio Ubọn̄ esie eke heaven.
15 Tịmfiọk se enye etịn̄de ke Matthew 25:31-33: “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie: Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot; ndien eyenịm erọn̄ ke ubọk nnasia Esie, ye ebot ke ufien.”
16. Didie ke ẹtan̄ mme idụt ẹbok ẹnyụn̄ ẹbahade mme owo?
16 Jesus ama ọbiọn̄ọde ke ubọn̄ esie ke 1914. Ke ọtọn̄ọde edinam, enye, ye kpukpru mme angel esie, ẹma ẹn̄wana ẹnyụn̄ ẹbịn mme demon emi ẹdide mme asua esie ẹsion̄o ke heaven. Se itienede n̄ke esie an̄wam nnyịn ndidiọn̄ọ nte ke Jesus ndisụhọde ntie ke ebekpo ubọn̄ esie owụt idaha edinọ ubiereikpe ke ini edidu esie. Editan̄ kpukpru mme idụt mbok ke iso esie ọwọrọ ete ke Jesus anam n̄kpọ ye mme idụt nte otuerọn̄ esie eke ini iso, ke nditịn̄ ke ndamban̄a usụn̄. Emi edi otuerọn̄ oro esịnede erọn̄ ye ebot. Ke adan̄aemi ẹkemede ndida ubak usen ndibahade erọn̄ n̄kpọn̄ ebot ke ataata otuerọn̄, edibahade mme owo oro ẹnyenede ifụre ndinam edimek ke ofụri isọn̄ ada ini oro otịmde ọniọn̄ akan oro. Emi edi koro edibahade ọkọn̄ọ ke usụn̄ edinam owo kiet kiet.
17. Ntak emi idaha oro odude mfịn edide akpan n̄kpọ ọnọ kpukpru owo?
17 Ke n̄ke oro, Edidem-Ekpemerọn̄ onịm mbon mbieterọn̄ ke ubọk nnasia esie ye mbon mbietebot ke ufien esie. N̄kan̄ ubọk nnasia ọwọrọ utebeikpe—nsinsi uwem. N̄kan̄ ubọk ufien ada aban̄a ubiomikpe—eke nsinsi nsobo. Ubiere Edidem ke n̄kpọ emi enyene ata akwa utịp.
18. Ntak emi unana edikụt Edidem ke enyịn mînamke owo baba kiet ọbọhọ nduduọhọ?
18 Unana edikụt Eyen owo emi akarade mi ke enyịn ke ini edidu, m̀mê pa·rou·siʹa esie, inamke owo baba kiet ọbọhọ nduduọhọ. Ediwak mbon mbieterọn̄ mfịn ke ẹdiana ye otu asan̄autom emi ke ndikwọrọ eti mbụk Obio Ubọn̄ Abasi ke ofụri ererimbot, ẹnamde un̄wana mmọ ayama. Ke akpanikọ, edinọ ikọ ntiense mmọ omosịm ofụri ikpehe isọn̄.—Matthew 24:14.
19. Nso edu eke otu erọn̄ ke ẹwụt ke n̄ke erọn̄ ye ebot?
19 Ntak emi Edidem-Ekpemerọn̄ adade ini iso oro ẹdiọn̄de ọnọ otu oro ẹdide eke erọn̄ nte utịp-e? Ke ntak ibetedem ofụri esịt oro mmọ ẹnọde utom edikwọrọ Obio Ubọn̄ ye mfọnido oro mmọ ẹwụtde nditọete esie oro ẹyetde aran, emi Jesus abatde nte ẹnamde ẹnọ enye ke idemesie. Ke ntre, ubọn̄ ubọn̄ Eyen owo ọdọhọ mmọ ete: “Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.”—Matthew 25:34; 28:19, 20.
Ndin̄wam Edidem
20, 21. Nso uyarade ke mme erọn̄ ẹnọ nte ke mmimọ ida ke n̄kan̄ Obio Ubọn̄?
20 Tịmfiọk ete ke ini Edidem ọnọde mme erọn̄ ẹmi ikot ete ẹdida n̄kan̄ isọn̄ eke Obio Ubọn̄ Abasi ẹnyene, mmọ ẹdu ke n̄kpaidem. Mmọ ẹbụp enye ete: ‘Ọbọn̄, ini ewe ke nnyịn ikanam kpukpru n̄kpọ ẹmi inọ fi?’ Enye ọbọrọ ete: “Ke akpanikọ ke ndọhọ mbufo, Adan̄a nte mbufo ẹkenamde n̄kpọ emi ẹnọ kiet ke otu nditọete Mi, kpa ata n̄kpri ẹmi, mbufo ẹkenam ẹnọ Mi.” (Matthew 25:40) Ke ini Jesus okowụtde Mary Magdalene idem ke usen oro enye ekesetde, enye ama etịn̄ aban̄a nditọete esie eke spirit ke ini enye ọkọdọhọde n̄wan oro ete: “Bịne nditọete Mi.” (John 20:17) Ke ini edidu esie oro enyịn mîkwe, Jesus enyene sụk ekpri nsụhọ ke otu nditọete esie oro ẹdide owo 144,000 oro ẹsụk ẹdude uwem ke isọn̄.
21 Sia owo mîkemeke ndikụt Jesus ke heaven, ekedi ke usụn̄ efen ke mme owo mbieterọn̄ ẹmi ẹnam mme n̄kpọ mfọn ẹmi ẹnọ enye. Mmọ ẹkụt enye ke ebekpo esie ye enyịn mbuọtidem mmọ kpọt. Jesus owụt esịtekọm ke ofụri ukeme oro mmọ ẹsịnde ke ndin̄wam nditọete esie eke spirit, ẹmi ẹdikabarede ẹdi nsan̄a mme ada udeme nnyene ye enye ke heaven. Enye abat se ẹnamde ẹnọ nditọete esie nte se ẹnamde ẹnọ enye ke idemesie. Mbon mbieterọn̄ ẹkokoi ẹnam nti n̄kpọ ẹnọ nditọete Christ koro mmọ ẹfiọkde nte ke mmọ ẹdi oro. Mmọ ẹfiọk ẹte ke nditọete Jesus eke spirit ẹdi mme isụn̄utom Obio Ubọn̄ Jehovah, ndien mmọ ẹyom ndinọ enye enyene-iwụk uyarade nte ke mmimọ ida ye mmọ ke n̄kan̄ Obio Ubọn̄ oro.
22. Didie ke ẹnọ otu erọn̄ utịp? (Men Ediyarade 7:14-17 domo.)
22 Jehovah ama ebemiso ada okụt nte ke otu mbieterọn̄ emi ediwọrọ owụt idem ke ini edidu Eyen esie emi, ndien enye onịm utịbe utịbe utịp ebet mmọ! Akwa otuowo ẹyenyene edidiọn̄ emem mi ke isọn̄ ke ini inem inem Ukara Tọsịn Isua eke Edidem Jehovah, kpa Jesus Christ.
23. Ke mme usụn̄ ewe ke mme erọn̄ ẹkokoi ẹn̄wam nditọete Edidem?
23 Ke ini nnyịn ikerede iban̄a mme prọfesi Bible oro ẹnyenede n̄kpọ ndinam ke ini edidu Christ, ọkọrọ ye n̄ke Jesus oro aban̄ade erọn̄ ye ebot, nso ke nnyịn ikụt? Emi: Idịghe owo ndinam eti n̄kpọ ke unana ifiọk ye ke mbuari nnọ kiet ke otu nditọete eke spirit Edidem anam owo edi erọn̄ oro enyenede edinen idaha ke iso Abasi ye Edidem esie. Mbon oro ẹdide eke otu erọn̄ ẹfiọk se mmọ ẹnamde, idem okposụkedi mmọ mîdaha ata enyịn mmọ ikụt Edidem emi akarade mi. Mmọ ẹdomo ndin̄wam nditọete Edidem idịghe ke usụn̄ eke obụkidem ikpọn̄îkpọn̄ edi n̄ko ke usụn̄ eke spirit. Didie? Ke ndin̄wam mmọ ke ndikwọrọ eti mbụk Obio Ubọn̄ Abasi ye ke ndinịm mme ukpepn̄kpọ Bible man ẹnam mme mbet ẹnọ Christ. Ntre, mfịn mme ọnọ un̄wana oro ẹtan̄ade Obio Ubọn̄ Abasi ẹwak ẹbe miliọn inan̄.
Ntatara Utom
24. Nso ima ima utom anam otu asan̄autom edi mbon oro ẹkopde inemesịt ẹkan ke isọn̄ mfịn?
24 Ẹyak nnyịn ibat ndusụk ke otu ediwak nti utom ẹmi otu asan̄autom emi anamde akpanikọ anamde. Akpa, ẹma ẹmek otu asan̄autom emi ndise mban̄a kpukpru inyene Eteufọk—mme ufọn n̄kpọ Obio Ubọn̄ esie ke isọn̄—ndien inyene ẹmi ke ẹkaiso nditọt. Ọyọhọ iba, otu oro inọhọ mbonufọk oro ẹyetde aran kpọt udia edi ọnọ akwa otuowo eke mme erọn̄ en̄wen oro ẹkade-kaiso ndikọri ke ibat udia eke spirit. Ọyọhọ otu ita, asan̄autom emi ke ada usụn̄ ke ndinam un̄wana Obio Ubọn̄ atara. Ọyọhọ inan̄, n̄kponn̄kan ntatara utom esie edi editan̄ akwa otuowo eke mme erọn̄ en̄wen mbok, adade mmọ ẹdi ke temple Jehovah eke spirit. Ọyọhọ ition, otu asan̄autom emi, ye ibetedem ofụri esịt oro mbon mbieterọn̄ ẹnọde, ke ọnọ ikpọ n̄kpọutom ndikama ke mme ndutịm n̄kọk itieutom ke ofụri ererimbot, adianade ye eke ibuot itieutom ke United States. Mme utọ ima ima utom oro amanam otu asan̄autom emi edi mbon oro ẹkopde inemesịt ẹkan ke isọn̄ mfịn, ndien mmọ ẹmenam ediwak miliọn mbon efen ẹkop inemesịt n̄ko. Kpukpru ẹmi ẹda ekọm ẹsọk Jehovah Abasi ye Jesus Christ, emi ẹnọde ntatara utom asan̄autom emi enyenede ọniọn̄ ndausụn̄!
25. Didie ke mme erọn̄ ẹkeme ndikaiso nnọ otu asan̄autom emi ibetedem, ye nso idotenyịn ke ekikere?
25 Otu asan̄autom emi ke anam utom ọkpọsọn̄ idahaemi akan nte akanam anamde ke utom oro Abasi ọnọde enye. Ini oro osụhọde mbemiso “akwa ukụt” ọtọn̄ọde ekpere ndikụre! (Matthew 24:21) Edi akpan n̄kpọ didie ntem ete mmọemi ẹdide erọn̄ Abasi ẹdu ke n̄kan̄ ubọk nnasia mfọn Edidem-Ekpemerọn̄ esie! Ntre, ndien, ẹyak kpukpru owo ẹkaiso ẹsịn ifịk ke ndinọ asan̄autom oro anamde akpanikọ onyụn̄ enyenede ọniọn̄ ibetedem. Edi n̄kukụre ke ndinam emi ke kpukpru mbon mbieterọn̄ usen kiet ke mîbịghike ẹdikeme ndikop inem inem ikọ emi: “Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.”
Nte Afo Emekeme Ndibọrọ?
◻ Ntọn̄ọ ubiereikpe ewe eketiene edidori Edidem ke ebekpo?
◻ Didie ke Matthew 24:45-47 enyene edisu ke eyomfịn?
◻ Kaban̄a editat utom, kaban̄a nso ke otu asan̄autom ye akwa otuowo ẹkop idatesịt ẹkan?
◻ Didie ke Matthew 25:34-40 osu ke ini pa·rou·siʹa?
“Ekem Edidem eyedọhọ mmọemi ẹdude ke ubọk nnasia, ete, Ẹdi, mbufo emi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.”—MATTHEW 25:34.
[Ndise ke page 16]
Eteufọk ayak kpukpru inyene esie esịn ke ubọk asan̄autom emi anamde akpanikọ
[Mme ndise ke page 18]
Jesus ama etetie ke ubọn̄ ubọn̄ ebekpo esie ndibiere ikpe nnọ ubonowo