Uwem ye Utom Jesus

Mme Asian ye Ndisịme Nditọiban

JESUS ọbọrọ mme apostle esie mbụme oro ẹbụpde ẹban̄a edidu esie ke ukara Obio Ubọn̄. Idahaemi enye ọnọ mme idiọn̄ọ efen efen ke n̄ke, m̀mê mme uwụtn̄kpọ.

Mbon oro ẹdude uwem ke ini edidu esie ẹyekụt nte uwụtn̄kpọ ẹmi kiet kiet osude. Enye etịn̄ aban̄a akpa uwụtn̄kpọ ye ikọ ẹmi ete: “Adan̄aoro ẹyeda Obio Ubọn̄ Heaven ẹdomo ye nditọiban duop, eke ẹmende utuenikan̄ mmọ, ẹwọn̄ọ ẹka ẹkesobo ye ọdọ-ndọ. Ndien owo ition ke otu mmọ ẹdi ndisịme, ition ẹnyụn̄ ẹdi asian.”

Ye ikọ oro “ẹyeda Obio Ubọn̄ Heaven ẹdomo ye nditọiban duop,” ikọ Jesus iwọrọke ite ke ubak ibat mbon oro ẹdade Obio Ubọn̄ Heaven ẹnyene ẹdi ndisịme ndien ubak eken ẹdi asian! Baba, edi ikọ esie ọwọrọ nte ke ebuana ye Obio Ubọn̄ eke heaven, ke n̄kpọ ebietde emi m̀mê oko odu, m̀mê nte ke n̄kpọ ẹmi enyenede ebuana ye Obio Ubọn̄ ẹdibiet n̄kpọ emi m̀mê eken.

Nditọiban duop oro ẹda ẹban̄a kpukpru mme Christian ẹmi ẹdude ke udịm m̀mê emi ẹdọhọde ke idu ke udịm ndibọ Obio Ubọn̄ heaven nda. Ekedi ke Pentecost eke 33 C.E. ke ẹken̄wọn̄ọ ndiyak esop Christian nnọ ubọn̄ ubọn̄ ebendọ emi ẹkenamde eset ke n̄kpa, kpa Jesus Christ ke ndọ. Edi ndọ oro ekenyene ndida itie ke heaven ke ini oro owo mîsiakke ke ini iso.

Ke uwụtn̄kpọ oro, nditọiban duop oro ẹwọrọ ẹka do ye uduak edidara ebendọ nnyụn̄ mbuana ke edinam ndọ. Ke ini eren emi ebehede, mmọ ẹyeda utuenikan̄ mmọ ẹnam usụn̄ oro ebendọ edisan̄ade ayama, ke ntre ẹkponode enye nte enye adade n̄wanndọ esie odụk ufọk oro ẹkeben̄ede ẹnịm ẹnọ enye. Nte ededi, Jesus anam an̄wan̄a ete: “Mme ndisịme ẹmen utuenikan̄ mmọ, edi idaha aran idian ye mmọ; edi mme asian ẹda aran ke ekpeme ye mme utuenikan̄ mmọ. Edi ke adan̄aemi ọdọ-ndọ ebịghide edidi, kpukpru mmọ ẹyet idap ẹde.”

Ọkpọsọn̄ edibịghi oro ebendọ emi ebịghide ndidi owụt nte ke edidu Christ nte Edidem oro akarade edidi ke ata ini iso. Enye ke akpatre ama ọdọk ebekpo esie odoro ke isua 1914. Ke anyan ikpehe ini eke okoneyo oro, kpukpru nditọiban oro ẹma ẹde idap. Edi owo ibiomke mmọ ikpe ke ntak emi. Ẹbiom ndisịme nditọiban ẹmi ikpe ke ntak mmọ mîkadaha aran idian ye mme utuenikan̄ mmọ. Jesus anam an̄wan̄a nte nditọiban ẹmi ẹkedemerede mbemiso ebendọ ebehede ete:

“Edi ke ufọt okoneyo ẹfiori ẹte, Sese, ọdọ-ndọ! Mbufo ẹwọn̄ọ ẹka ẹkesobo ye enye. Ekem kpukpru nditọiban oro ẹdaha ke enyọn̄, ẹdiọn̄ utuenikan̄ mmọ. Edi mme ndisịme ẹdọhọ mme asian ẹte, ẹnọ nnyịn aran mbufo esisịt; koro mme utuenikan̄ nnyịn ẹmọn̄ ẹnịme. Edi mme asian ẹbọrọ ẹte, Ndusụk aran idikemke nnyịn ye mbufo: ẹkam ẹka ke ọtọ mme anyam-aran ẹkedep ke idem mbufo.”

Aran oro ada aban̄a n̄kpọ oro anamde mme ata Christian ẹyama nte un̄wana, oro edi, N̄wed Abasi eke odudu spirit, oro mmọ ẹsọn̄ọde ẹmụm ẹkama, ọkọrọ ye edisana spirit, emi an̄wamde ke ndinam Ikọ oro an̄wan̄a. Aran eke spirit oro an̄wam nditọiban ẹmi ẹnyenede ọniọn̄ mi ndiyama ke ndidara ebendọ ke ini ẹsan̄ade eka usọrọ ndọ. Edi otu ndisịme nditọiban oro inyeneke aran eke spirit oro ẹyomde mi ke idemmọ, ye ke mme utuenikan̄ mmọ. Ntre Jesus etịn̄ aban̄a se itịbede ete:

“Edi ke ini [mme ndisịme nditọiban] ẹkade ẹkedep [aran], ọdọ-ndọ edi; ndien mmọemi ẹben̄ede idem ẹtiene enye ẹdụk ke udia ndọ: ndien ẹberi usụn̄. Edikem nditọiban eken ẹdi ẹdidọhọ ẹte, Ọbọn̄, Ọbọn̄, sio usụn̄ nnọ nnyịn. Edi enye ọbọro ete, Ke akpanikọ ke ndọhọ mbufo, Ndiọn̄ọke mbufo.”

Ke Christ ama ekebehe ke Obio Ubọn̄ esie eke heaven, otu mme enyene-ọniọn̄ nditọiban eke mme ata Christian oro ẹyetde aran mi ẹma ẹdemede ẹdụk ifet oro mmọ ẹnyenede ndisịn un̄wana ke n̄kịm n̄kịm ererimbot emi ke nditoro edidi Ebendọ oro, Edi mbon oro ndisịme nditọiban ẹmi ẹdade ẹban̄a ikeben̄eke idem ndinọ itoro emi. Ntre ke edikem ini, Christ iberekede usụn̄ usọrọ ndọ eke heaven inọ mmọ. Enye ọkpọn̄ mmọ ke an̄wa ke n̄kịm n̄kịm ererimbot eke ufọt okoneyo oro, man ẹkpan̄a ye kpukpru mme anam ukwan̄ido eken. Jesus eberi ete, “Ẹkpeme ndien, koro mbufo mîfiọkke usen m̀mê hour.” Matthew 25:1-13.

◆ Nditọiban duop oro ẹda ẹban̄a mmanie?

◆ Ini ewe ke ẹnam un̄wọn̄ọ ediyak mmọ nnọ ebendọ ke ndọ, edi ini ewe ke enye ebehe man ada n̄wanndọ esie aka usọrọ ndọ?

◆ Nso ke aran oro ada aban̄a, ndien edinyene enye an̄wam nditọiban ẹmi ẹnyenede ọniọn̄ mi ndinam nso?

◆ Usọrọ ndọ oro ada itie ke mmọn̄?

◆ Nso akwa utịp ke ndisịme nditọiban oro ẹtaba, ndien nso idi idaha mmọ