Uwem ye Utom Jesus
N̄ke Talent
JESUS akaiso ndineme nneme ye mme apostle esie ke Obot Olive ke nditịn̄ n̄ke en̄wen nnọ mmọ, ọyọhọ iba ke otu ita. Usen ifan̄ ke mbemiso, ke adan̄aemi enye odude ke Jericho, enye ama otop n̄ke aban̄ade okụk (mina) ndiwụt nte ke Obio Ubọn̄ osụk ododu oyom usụn̄ ke ini iso. N̄ke oro enye otopde idahaemi, ke adan̄aemi enyenede ibat ibat mbiet n̄kpọ, etịn̄ aban̄a mme utom eke osude ke ini oro Christ odude ke ukara Obio Ubọn̄. Emi owụt ete ke ana mme mbet esie ẹnam utom ke adan̄aemi esụk ẹdude ke isọn̄ ndinam “inyene esie” ọtọt.
Jesus ọtọn̄ọ ntem: “Koro etie nte emi [oro edi, mme idaha enyenede ebuana ye Obio Ubọn̄] owo oyomde ndika idụt efen, ndien enye okot ikot esie, ayak inyene esie ọnọ mmọ.” Jesus edi owo oro, mbemiso akade idụt efen ke heaven, okot ifụn esie—mme mbet oro ẹdude ke udịm ndibọ Obio Ubọn̄ eke heaven—ayak inyene esie ọnọ mmọ. Inyene ẹmi idịghe ata inyene edi ẹda ẹban̄a in̄wan̄ oro ẹma ẹketọtọ n̄kpọ, emi enye ọkọtọn̄ọde se inyenede n̄kọri ndision̄o mme mbet efen efen ndi.
Jesus ayak inyene esie ọnọ ifụn esie ibio ibio ini mbemiso enye ọdọkde ke heaven. Didie ke edi ntre? Ke nditeme mmọ ete ẹkaiso ẹnam utom ke in̄wan̄ oro ẹma ẹketọtọ n̄kpọ ke ndikwọrọ etop Obio Ubọn̄ tutu osịm ata utịt ikpehe isọn̄. Nte Jesus ọdọhọde ete: “Enye ọnọ owo kiet talent ition, ọnọ owo efen iba, ọnọ owo efen kiet; ọnọ owo kiet kiet nte ukeme esie edide; ndien enye aka idụt efen.”
Talent itiaita oro—kpa inyene Christ—ke ntem edi se edemede nte ekemde ye ukeme, m̀mê n̄kọri eke spirit ifụn oro. Ifụn oro ẹda ẹban̄a nsio nsio otu mbet. Ke akpa isua ikie, otu oro ọkọbọde talent ition nte an̄wan̄ade ama esịne mme apostle. Jesus akaiso ọdọhọ ete ke ifụn oro ẹkebọde talent ition ye talent iba ẹma ẹnam talent emi ẹtọt utịm ikaba oto ukwọrọikọ Obio Ubọn̄ mmọ ye edinam mbet. Nte ededi, ofụn oro ọkọbọde talent kiet ama odịp enye ke isọn̄.
Jesus akaiso ete, “Ekem ke anyanini ama ekebe, ete ikọt oro edi edibat ibat ye mmọ.” Ibọhọke tutu ke ọyọhọ isua ikie-20, n̄kpọ nte isua 1,900 ke ukperedem, ke Christ ọkọnyọn̄ edi ndinam ibat, ntre, enye ke akpanikọ ekedi ke “anyanini ama ekebe.” Do Jesus anam an̄wan̄a ete:
“Owo emi ọkọbọde talent ition ada talent ition efen, edi edidọhọ ete, Ọbọn̄, afo ọkọnọ mi talent ition: sese, mmodori talent ition efen ke esịt. Ọbọn̄ esie ete, Omotịm anam, afo eti asan̄autom ye owo akpanikọ: akanam akpanikọ ke se mîwakke; nyenịm fi ekpeme ediwak n̄kpọ; dụk ke idara ọbọn̄ fo.” Ofụn oro ọkọbọde talent iba kpasụk ntre anam talent esie ọtọt utịm ikaba, enye ama onyụn̄ ọbọ ukem itoro ye utịp oro.
Nte ededi, didie ke ifụn akpanikọ ẹmi ẹdụk ke idara Eteufọk mmọ? Ọfọn, idara Eteufọk mmọ, Jesus Christ, ekedi edibọ inyene Obio Ubọn̄ ke ini enye akakade idụt efen ebịne Ete esie ke heaven. Amaedi ifụn anam-akpanikọ ke eyomfịn, mmọ ẹyenyene akwa idara ke ndidi se ẹyakde mme mbiomo Obio Ubọn̄ efen efen ẹsịn ke ubọk, ndien nte mmọ ẹkụrede utom mmọ eke isọn̄, mmọ ẹyenyene ọyọhọ idara ke ndidi se ẹnamde ẹset ẹdụk Obio Ubọn̄ eke heaven. Edi nso kaban̄a ofụn ọyọhọ ita?
Ofụn emi ama okụni ete, “Ọbọn̄, mmọfiọk fi, nte afo edi owo nsọn̄ido, ọdọdọk ke ọtọ nte mûkọtọhọ, onyụn̄ atatan̄ ke ọtọ nte mûkasuanke; ndien ndịk anam mi, nnyụn̄ ndaha n̄kodịp talent fo ke isọn̄: se, . . . se inyenede fi do.” Ofụn oro ama okokoi esịn ndinam utom ke in̄wan̄ oro ẹma ẹketọtọ n̄kpọ ke ndikwọrọ ikọ nnyụn̄ nnam mbet. Ntre eteufọk oro okot enye “idiọk asan̄autom ifu” onyụn̄ ọnọ ubiereikpe ete: “Ẹbọ enye talent oro ndien . . . Ẹnyụn̄ ẹduọk asan̄autom emi mîdorike mi udori ke ekịm ke esien: do ke editua eyet ye edita edet ẹyedu.” Mbon oro ẹdude ke otu idiọk ifụn ẹmi, ẹmi ẹtopde ẹduọk ke esien mi, inyeneke idara eke spirit ndomokiet.
Emi onịm akpan ukpepn̄kpọ ọnọ kpukpru owo oro ẹdọhọde ke idi mbet Christ. Ana mmọ ẹnam utom ndisịn n̄kọri ke inyene Eteufọk mmọ eke heaven ke ndinyene ọyọhọ ebuana ke utom ukwọrọikọ edieke anade mmọ ẹbọ itoro ye utịp esie n̄ko edieke anade mmọ ẹtre ndidi se ẹmende ẹduọk ke ekịm ke esien ye akpatre nsobo. Nte afo ke esịn ifịk ada ukeme fo anam n̄kpọ ke afan̄ emi? Matthew 25:14-30.
◆ Nso ukpepn̄kpọ ke udiana n̄ke emi ekpep?
◆ Mmanie ẹdi ifụn oro, ndien nso idi inyene ẹmi ẹyakde ẹsịn mmọ ke ubọk?
◆ Ini ewe ke eteufọk edi ndinam ibat, ndien nso ke enye okụt?
◆ Nso idi idara oro ofụn anam-akpanikọ odụkde, ndien nso itịbe inọ idiọk ofụn oro?