Akwa Tọsịn Isua ke Asan̄a Ekpere

“Ekem n̄kụt mme ebekpo, owo ẹnyụn̄ ẹtie ke esịt, ẹnyụn̄ ẹyak ubiereikpe ẹsịn mmọ ke ubọk; ye mme ukpọn̄ owo oro ẹkebịghide mmọ ibuot ke ntak ikọ ntiense Jesus ye ikọ Abasi, ye kpukpru mmọemi mîkatuakke ibuot inọ unam oro ye mbiet esie, mîkonyụn̄ ibọhọ idiọn̄ọ ke ọkpọiso ye ke ubọk mmọ; mmọ ẹnyụn̄ ẹdu uwem, ẹnyụn̄ ẹda ubọn̄ ye Christ ke tọsịn isua.” “Enye [Abasi] eyekwọhọde kpukpru mmọn̄eyet ke enyịn [ubonowo] efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”​—Ediyarade 20:4; 21:4.

NTRE Bible ebemiso etịn̄ aban̄a akwa tọsịn isua oro asan̄ade ekpere​—kpa Tọsịn Isua Ukara Jesus Christ ye otu nsan̄a ndidem eke heaven. Iso-ọfọn afo emekeme ndida prọfesi emi nte ikpîkpu n̄kpọ ndap, kpa n̄kpọ abian̄a. Kpa ye oro, eti ntak odu afo ndida Tọsịn Isua emi edide mi nte ata idem n̄kpọ!

N̄kpọ kiet edi, edikpep Bible eyenam fi ọfiọk ete ke enye ama eneme n̄kpọ aban̄a tọsịn isua itiokiet ẹmi ẹkebede ke mbụk ubonowo ke n̄wọrọnda usụn̄ oro ẹkemede ndibuọt idem. Akande oro, Bible edi n̄wed prọfesi, ndien ata ediwak n̄kpọ oro enye ekebemde iso etịn̄, m̀mê mme prọfesi, ẹma ẹwọwọrọ ẹsu ke kpukpru ikpehe.a Ke edide ntre, ntak owo mîkpọbuọtke idem ke enye ndibemiso ntịn̄ n̄kpọ mban̄a Tọsịn Isua ukara Christ oro asan̄ade ekpere-e? Nte ededi, afo emekeme ndinyene eyịghe mban̄a se Bible etịn̄de ọnọ nnyịn aban̄a ikpehe ini oro. Nso uduak ke enye ediyọhọ? Ndien ke edide akpan n̄kpọ udọn̄ ọnọ fi, didie ke enye editụk uwem fo?

Ẹma Ẹduọk N̄kpọ-Akpa

Bible owụt ete ke Ukara Tọsịn Isua eke Christ edi usụn̄ oro enye adade ndiyak ata ọsọn̄urua n̄kpọ-akpa nnọ “nditọ” esie. Edi nso n̄kpọ-akpa? Ndien “nditọ” ewe? Ẹkeme ndidọhọ ke n̄kpọ-akpa edi inyene oro owo ayakde ọnọ nditọ esie ke ini enye akpade. Ke ini eteete nnyịn Adam ọkọsọn̄de ibuot ye Abasi, enye ke idemesie ye kpukpru nditọ esie​—ofụri ekpụk ubonowo​—ẹma ẹduọk unen edidu nsinsi uwem ke paradise isọn̄. Adam ke ntre ama ayak n̄kpọ-akpa edide idiọkn̄kpọ, n̄kpa, ye nditaha ọnọ nditọ esie.​—Genesis 3:1-19; Rome 5:12.

Jesus ekedi isọn̄ ke obụkidem ndifiak mbọ n̄kpọ-akpa oro Adam ọkọduọkde nnọ ubonowo. Enye ama anam emi ke ndinam akpanikọ nnọ Jehovah Abasi, ayakde uwem esie unyịme unyịme ọnọ ke ibuot ubonowo. (John 3:16) Ndidu mfọnmma uwem oro ananade idiọkn̄kpọ, Jesus ama ọbọ unen edidu mfọnmma nsinsi uwem ke Paradise ke isọn̄​—kpasụk n̄kpọ oro Adam ọkọduọkde. Nte ededi, akananam Jesus idaha unen oro inam n̄kpọ; m̀mê enye ndikọduọk unen oro ke ini enye akakpade onyụn̄ esetde okodu uwem ke heaven. Enye ke ntre ekeme ndida unen emi nte ọsọn̄urua n̄kpọ-akpa oro enye ayakde ọnọ “nditọ” esie.​—Rome 5:18, 19.

Mme Adia-Akpa​—Kpa “Nditọ” Christ

Ke Isaiah 9:6 ẹkot Jesus ke ikọ prọfesi, “Nsinsi Ete.” Enye akabade edi Nsinsi Ete ọnọ ererimbot ubonowo oro ẹfakde, adade ke idaha ndiyak n̄kpọ-akpa nnọ mbon oro ẹfakde, m̀mê nditọ oro ẹdade ẹnyene mi. (Matthew 20:28; se n̄ko Psalm 37:18, 29.) Ewụt emi in̄wan̄în̄wan̄ ke un̄wọn̄ọ esie ẹte: “Edi, mbufo ẹmi Ete Mi ọdiọn̄de, ẹdida ubọn̄ ẹmi ẹkenịmde ẹnọ mbufo toto ke editọn̄ọ ererimbot.” Enye n̄ko ọkọdọhọ ete: “Ọfọfọn ọnọ mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.”​—Matthew 5:5; 25:34.

Man isọn̄ edi n̄kpọ-akpa oro odotde, nte ededi, ana mme idaha ẹkpụhọde ofụri ofụri​—ẹdade ẹkesịm idaha mfọnmma. Enye enyene ndikabade ndi ererimbot oro mfọnmma emem ye edidianakiet odude ke otu kpukpru edibot n̄kpọ Abasi. (Isaiah 11:6-9) Ana ẹsọhi kpukpru idaha unana mfọnmma ẹfep, esịnede n̄kpa. (1 Corinth 15:25, 26) Emi ọwọrọ nte ke mme akpan̄kpa, ẹmi ẹdide ubak ubonowo oro ẹfakde, ẹnyene ndidi se ẹnamde ẹset ke n̄kpa. Ke usụn̄ emi kpọt ke mmọ ẹkeme ndinyene ifet edikabade ndi mme adia-akpa Christ!​—John 5:28, 29.

Ntre, Ukara Tọsịn Isua eke Christ edide ini idara emi ‘ẹdinyan̄ade ubonowo ẹsio ke itie ufụn mbiara’ ẹnyụn̄ ẹsịm idaha mfọnmma. (Rome 8:21) Nte enemde, idem mme n̄wed ererimbot ẹdiọn̄ọ ẹte ke emi edi uduak ọ-tọsịn isua. Webster’s Ninth New Collegiate Dictionary (nsiondi eke 1985) ọdọhọ ke “tọsịn isua” edi “ini akwa idara m̀mê ini oro ubonowo ẹsịmde mfọnmma.”

Okpon Akan Ukara Solomon

Ekeme ndimen ubọn̄ ubọn̄ Tọsịn Isua emi ndomo ye emem emem, uforo uforo ukara isua-40 oro Edidem Solomon akakarade Israel eset. (1 Ndidem 4:24, 25, 29) Ke ini ọbọn̄-an̄wan Sheba akakade ekese Edidem Solomon, enye ọkọdọhọ ete: “Se n̄kokopde ke edem nnyịn mban̄a n̄kpọ fo, ye ifiọk fo, edi akpanikọ. Edi n̄konịmke ikọ oro ke akpanikọ tutu ndi, enyịn mi ẹnyụn̄ ẹkụt: ndien, sese, iketịn̄ke ibio inọ mi; eti ibuot ye inyene ẹmebe etop oro n̄kokopde. Ọfọfọn ye ikọt fo, ọfọfọn ye mme asan̄autom fo ẹmi ẹdade fi ke iso kpukpru ini, ẹnyụn̄ ẹkopde eti ibuot fo.”​—1 Ndidem 10:6-8.

Edieke emem, mfọnọn̄kpọ ye ifiọk eke ini ukara isua-40 Edidem Solomon eke isọn̄ okokponde, ih, utịm ikaba, akan se ọbọn̄-an̄wan Sheba ekekerede, do Tọsịn Isua Ukara Jesus Christ, kpa akamba Edidem Solomon eke heaven, ke akpanikọ eyekpon akan se mme owo ẹkerede! Ke ikọ oro Jesus eketịn̄de aban̄a idemesie, enye edi “Enyeemi okponde akan Solomon.” (Matthew 12:42) Domo ndida enyịn ikike n̄kụt ata ediye, enyene-uforo, emem emem, edinen, ye idara idara mme idaha ke isọn̄ oro afo ekemede ndikere mban̄a, ndien afo udûkam ukemeke ndidiọn̄ọ idem ubak n̄kpọ ẹmi Tọsịn Isua ukara Christ edidade edi.

Asan̄a Ekekem Ye Ọyọhọ Tọsịn Isua Ita?

Mme n̄kpọntịbe ererimbot ọtọn̄ọde ke 1914 ẹwụt ẹte ke nnyịn idu uwem ke “akpatre ini eyo emi.” Jesus ama adian do ete ke emana oro ẹkebuande ye mme n̄kpọntịbe oro ẹkebemde iso ẹtịn̄ mi “idibehe ifep tutu kpukpru n̄kpọ ẹmi ẹwọrọ ẹsu.” Nte emi ọwọrọ, ndien, nte ke Tọsịn Isua Ukara Christ eyesan̄a ekekem ye ọyọhọ tọsịn isua ita?​—Matthew 24:3-21, 34.

Jesus ama odụri mme mbet esie utọn̄ ete ẹkûtie ẹkere n̄kpọ. Enye ọkọdọhọ ete: “Inaha inọ mbufo ndifiọk ini m̀mê eyo, eke Ete okomụmde akama ke ubọk Esiemọ.” (Utom 1:7) Ndien kaban̄a nnennen “usen oro m̀mê hour” oro n̄kpọntịbe emi edidade itie, Jesus ọkọdọhọ ke edi Ete imọ ikpọn̄îkpọn̄, kpa Jehovah Abasi, ọfiọk. (Matthew 24:36) Ntre, Bible idaha ye uwak ibat prọfet ye n̄ka ukwọrọ usen nsobo oro ẹnyande ubọk ẹwụt se ididade itie ke ufọt okoneyo Usiere Obufa Isua, 1999, nte utịt ererimbot.

Nte ededi, mme n̄kpọntịbe ererimbot oro ẹdade itie kemi ẹmewụt in̄wan̄în̄wan̄ nte ke utịt n̄kịm n̄kịm, idiọk editịm n̄kpọ emi “[ọmọn̄] ebe efep” ye nte ke Tọsịn Isua ukara eke Christ “ke [asan̄a] ekpere.” (Rome 13:12) Utu ke nditie nnọ ekikere mban̄a nnennen usen ye hour oro n̄kpọ emi edidide, eti ini edi emi ndifiọk se Abasi oyomde kaban̄a edinyan̄a. (John 17:3) Ke usụn̄ emi afo emekeme ndikpep nte edidude ke otu mbon oro Jesus edidọhọde ete: “Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.” (Matthew 25:34) Mme Ntiense Jehovah ẹnyịme ẹnyụn̄ ẹkeme ndin̄wam fi ndidu ke otu mbon oro ẹdidarade mme edidiọn̄ eke akwa Tọsịn Isua oro edide.b

[Mme Ikọ Idakisọn̄]

[Se ẹwetde ke ikpọ abisi ke page 6]

“Ẹdi mbufo ẹmi Ete Mi ọdiọn̄de, edida ubọn̄ emi ẹkenịmde ẹnọ mbufo toto ke editọn̄ọ ererimbot”