Uwem ye Utom Jesus

Ke Ini Christ Edide ke Ukara Obio Ubọn̄

JESUS osụk odu ye mme apostle esie ke Obot Olive. Ke iboro mbụme oro mmọ ẹkebụpde ẹyom idiọn̄ọ edidu esie ye eke akpatre ini eyo emi, enye kemi asian mmọ akpatre ke otu udịm udịm uwụtn̄kpọ ita. Jesus ọtọn̄ọ ke ndidọhọ, “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie.”

Mme owo ikemeke ndikụt mme angel ke ubọn̄ ubọn̄ idaha mmọ ke heaven. Ntre edidi oro Eyen owo, Jesus Christ, edide ye mme angel ana edi se enyịn owo mîkwe. Edidi oro ada itie ke isua 1914. Edi ye nso uduak? Jesus anam an̄wan̄a ete: “Ndien ẹyebon kpukpru mme idụt ke iso Esie: Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot; ndien eyenịm erọn̄ ke ubọk nnasia Esie ye ebot ke ufien.”

Ke etịn̄de se iditịbede inọ mbon oro ẹbaharede enịm ke n̄kan̄ oro ẹwụtde mfọn, Jesus ọdọhọ ete: “Ekem Edidem eyedọhọ mmọemi ẹdude ke ubọk nnasia, ete, Edi, mbufo ẹmi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.” Mme erọn̄ ẹmi idikarake ye Christ ke heaven edi ẹdida Obio Ubọn̄ oro ẹnyene ke ndidi mme andidu ke idak esie mi ke isọn̄. “Editọn̄ọ ererimbot,” akada itie ke ini Adam ye Eve ke akpa ẹkenyenede nditọ ẹmi ẹkpekemede ndibọ ufọn nto ndutịm Abasi ndifak ubonowo.

Edi ntak emi ebaharede mme erọn̄ ẹnịm ke n̄kan̄ ubọk nnasia mfọn Edidem-e? Edidem ọbọrọ ete, “Koro Ami n̄kokopde biọn̄, ndien mbufo ẹnọ Mi udia; itọn̄ akasat Mi, ndien mbufo ẹnọ Mi mmọn̄; n̄kedi esen, ndien mbufo ẹda Mi ẹka ufọk; n̄kedi iferi, ndien mbufo ẹsịne Mi ọfọn̄; n̄kọdọdọn̄ọ, ndien mbufo ẹdi ẹdise Mi; n̄kodu ke ufọk-n̄kpọkọbi, ndien mbufo ẹdi ke ọtọ Mi.”

Sia mme erọn̄ ẹdude ke isọn̄, mmọ ẹyom ndidiọn̄ọ nte mmọ ẹkenamde orụk nti utom ntre enọ Edidem mmọ eke heaven. Mmọ ẹbụp ete, “Ọbọn̄, ini ewe ke ikokụt Fi etiede biọn̄, ndien inọ Fi udia; m̀mê nte itọn̄ asatde Fi, ndien inọ Fi mmọn̄? Ini ewe ke ikonyụn̄ ikụt Fi edide esen, ndien ida Fi ika ufọk? m̀mê iferi, ndien isịne Fi ọfọn̄? Ini ewe ke ikonyụn̄ ikụt Fi ọdọn̄ọde, m̀mê ke ufọk-n̄kpọkọbi, ndien idi idise Fi?”

Edidem ọbọrọ ete, “Ke akpanikọ ke ndọhọ mbufo, Adan̄a nte mbufo ẹkenamde n̄kpọ ẹmi ẹnọ kiet ke otu nditọete Mi, kpa ata n̄kpri ẹmi, mbufo ẹkenam ẹnọ Mi.” Nditọete Christ ẹdi nsụhọ ke otu owo 144,000 ẹmi ẹdikarade ye enye ke heaven. Ndien ndinam eti n̄kpo nnọ mmọ, Jesus ọdọhọ, ke edi ukem nte edinam eti n̄kpọ nnọ imọ.

Ekem, Edidem ọwọn̄ọde etịn̄ ikọ ye mme ebot. “Ẹdianade Mi, mbufo ẹmi ẹdide mbon nsobo, ẹkedụk ke nsinsi ikan̄, emi ẹkenịmde ẹnọ Satan ye mme angel esie. Koro Ami n̄kokopde biọn̄, ndien mbufo inọhọ Mi udia; itọn̄ akasat Mi, ndien mbufo inọhọ Mi mmọn̄: n̄kedi esen, ndien mbufo idaha Mi ika ufọk; n̄kedi iferi, ndien mbufo isịneke Mi ọfọn̄; n̄kọdọdọn̄ọ, nnyụn̄ ntie ke ufọk-n̄kpọkọbi, ndien mbufo idịghe idise Mi.”

Mme ebot, nte ededi, ẹdọhọ ete: “Ọbọn̄, ini ewe ke nnyịn ikokụt Fi etiede biọn̄, m̀mê itọn̄ asatde Fi, m̀mê nte edide esen, m̀mê iferi, m̀mê nte ọdọn̄ọde, m̀mê nte etiede ke ufọk-n̄kpọkọbi, ndien nnyịn itre ndinam n̄kpọ nnọ Fi?” Ẹbiom mme ebot ikpe ke ukem isọn̄ ntak oro ẹtebede mme erọn̄ ikpe. Jesus ọbọrọ ete, “Adan̄a nte mbufo mîkanamke n̄kpọ ẹmi inọ kiet ke otu ata ekpri ẹmi [nditọete mi], mbufo inamke inọ Mi.”

Ntre edidu Christ ke ukara Obio Ubọn̄, mbemiso utịt idiọk editịm n̄kpọ emi ke akwa ukụt, edikam edi ini ikpe. Mme ebot “ẹyedaha ẹkedụk ke nsinsi [nsobo]; edi ndinen owo [mme erọn̄] ẹyedụk ke nsinsi uwem.” Matthew 25:31-46; Ediyarade 14:1-3.

◆ Ntak anade edidu Christ edi se enyịn owo mîkwe, ndien nso utom ke enye anam ke ini oro?

◆ Ke nso usụn̄ifiọk ke mme erọn̄ ẹda Obio Ubọn̄ ẹnyene?

◆ Ini ewe ke “editọn̄ọ ererimbot” akada itie, ndien ntak ekedide ini oro-o?

◆ Ke nso isọn̄ ntak ke ẹbiere ikpe ẹnọ mme owo edide nte mme erọn̄ m̀mê nte mme ebot?