Nte Mme Christian Ẹnamde N̄kpọ ye An̄wan̄wa Esuene

ẸSITIE fi didie ke idem ke ini owo esuenede fi mîdịghe osude nsu adian fi? Nte ekpedide afo eyekop ubiak idiọk idiọk. Mme Ntiense Jehovah ẹsisobo mbiet n̄kpọ ntre ke ini mmọ ẹkabarede ẹdi mbon ẹmi ẹtịn̄de ukwan̄ ikọ ẹdian m̀mê mme ikọ oro mîdịghe akpanikọ ke ndutịm usuanetop. Edi nte Jesus ọkọdọhọde ke Matthew 5:11, 12, mmọ ẹsụk ẹnyenyene ntak ndikop idatesịt.

Ke uwụtn̄kpọ, n̄wed Catholic kiet ke Germany ọkọdọhọ ete ke “Ntiense kiet kiet enyene nditịp n̄kpọ nte mbahade 17 osịm 28 eke ikie ke otu okụk oro enye enyenede nnọ ibuot itieutom isio n̄ka oro.” Mme Ntiense Jehovah, nte ededi, idịghe isio n̄ka, ẹnyụn̄ ẹnyene okụk ẹdade ẹse ẹban̄a utom mmọ ẹto mme etịbe imaesịt. Ukwan̄ ntọt emi ama otụn ediwak mme andikot usụn̄, emi Mme Ntiense Jehovah ẹsemede ẹban̄a. Edi didie ke mme ata Christian ẹkpenam n̄kpọ ye esuene ke ndutịm usuanetop?

Uwụtn̄kpọ Emi Mme Christian Ẹnyenede Nditiene

Matthew ibuot 23 etịn̄ in̄wan̄în̄wan̄ nte Jesus okobiomde mme andibiọn̄ọ ido ukpono esie ikpe ke ntak mbubịk ye abian̄a mmọ. Nte emi ọnọ mme Christian uwụtn̄kpọ ke nte ẹkpenamde n̄kpọ ye mbon nsụkuyo mfịn? Inen̄ekede idi ntre. Eyen Abasi okobiom mbon ido ukpono oro ẹkebiọn̄ọde enye ikpe etiene san̄asan̄a odudu ye ikike emi enye ekenyenede, anamde oro ke ufọn otuowo oro ẹkekpan̄de utọn̄.

Matthew 15:1-11 obụk nte ke ẹma ẹsụk Jesus uyo koro ẹkedọhọde ke mme mbet esie ẹma ẹbiat item mme Jew. Didie ke Jesus akanam n̄kpọ? Enye ama ọsọn̄ọ ada. Ndusụk ini, Jesus ama eneni in̄wan̄în̄wan̄ ye mbon oro ẹkesụkde enye uyo, afan̄ade ye mme ukwan̄ ekikere mmọ. Ke nditịm ntịn̄, mme Christian mfịn iduehe ke ndidomo ndinen̄ede mme ukwan̄ ekikere ẹban̄ade utom ye mme ukpepn̄kpọ mmọ, ẹdomode ndinam idaha an̄wan̄a ke usụn̄ edide akpanikọ onyụn̄ owụtde ifiọk. Mmọ ẹnam emi man ẹn̄wam mbon esit akpanikọ ndifiọk nte ke nsụkuyo oro ẹsụkde Mme Ntiense Jehovah inyeneke nsọn̄ọ ndien ke edi edori ikọ.

Edi tịmfiọk nte Jesus akanamde n̄kpọ esisịt ini ke ukperedem ke ini mme mbet esie ẹkedọhọde ẹte: “Nte ọmọfiọk ete mme Pharisee ẹyat esịt, ke ini mmọ ẹkopde ikọ ẹmi?” Mme Pharisee ẹmi ẹma “ẹyat esịt”—ikedịghe n̄kukụre mmọ ndiyat esịt edi ẹma ẹkabade ẹdi mme ọsọn̄ibuot mme andibiọn̄ọ emi Jesus ekesịnde. Ntem enye ama ọbọrọ ete: “Ẹsana mmọ ẹyak: mmọ ẹdi nnan mme adausụn̄.” Ndikaiso nnyene nneme ye mme utọ idiọk mbon usua oro ekedi ikpîkpu, inyeneke ufọn inọ owo ndomokiet, ndien akpada n̄kukụre okosụn̄ọ ke ikpîkpu mfan̄a. (Matthew 7:6; 15:12-14; men 27:11-14 domo.) Mme ibọrọ ẹmi Jesus ọkọnọde ẹwụt nte ke “ini eke ẹdopde, ye ini eke ẹtịn̄de ikọ” ẹdu.—Ecclesiastes 3:7.

Mme Ntiense Jehovah idorike enyịn kpukpru owo nditịn̄ eti n̄kpọ mban̄a mmọ. Mmọ ẹnyene ikọ Jesus emi ke ekikere: “Eyedọdiọk ọnọ mbufo, ke ini kpukpru owo ẹditịn̄de se ifọnde ẹban̄a mbufo! Koro mme ete mmọ ẹkenam ntre ye mme prọfet abian̄a.” (Luke 6:26) Inikiet ẹma ẹbụp C. T. Russell, akpa etieibuot Watch Tower Society, ntak emi enye mîkakan̄ke idem ke ikọ esuene oro ẹketịn̄de ẹdian enye. Enye ọkọbọrọ ete: “Edieke atuakde ada nditịgha kpukpru ebua oro ẹkpọide fi, afo tutu amama udukaha anyan.”

Ntre nnyịn ikpenyeneke ndiyak ikọ emi mbon oro ẹbierede ndidi mme andibiọn̄ọ ọwọn̄ọde ntịn̄enyịn nnyịn ọkpọn̄ utom inamde inọ Abasi. (Psalm 119:69) Ẹyak nnyịn isịn idem ke utom mme ata Christian, oro edi, edikwọrọ ikọ. Nte ndammana utịp edide, nnyịn iyenyene ifet ndibọrọ mme mbụme nnyụn̄ nnam n̄kpọ aban̄ade utom nnyịn an̄wan̄a, nte edifori ido uwem owo ye edida Ikọ Abasi nteme enye.—Matthew 24:14; 28:19, 20.

Nte Ekpenyene Ndibọrọ Ikọ Nsụkuyo?

Jesus eketịn̄ aban̄a mme anditiene enye ete: “Mbufo [idịghe] mbon ererimbot . . . ke ntak oro ererimbot asua mbufo.” (John 15:19) Ediwak ntọt ndutịm usuanetop oro ẹsuenede Mme Ntiense Jehovah ẹdi ediwụt usua emi, ndien ẹkpenyene ndifụmi utọ ntọt oro. Nte ededi, ndusụk ini ndutịm usuanetop ekeme ndinọ ntọt owụtde unana ifiọk oro ẹnyenede ẹban̄a Mme Ntiense mîdịghe oro akwan̄ade onyụn̄ okpude ndinam ndusụk akpanikọ ẹn̄wan̄a. Ndusụk mme ọkọmbụk ẹkeme ndibọ ntọt mmọ nto mbon idiọkesịt. Edide nnyịn imofụmi abian̄a abian̄a ntọt oro ke ndutịm usuanetop m̀mê ida inọ akpanikọ ebe ke usụn̄ oro odotde etiene mme idaha ẹdude, andisịn nsọk nnọ nsụkuyo oro, ye uduak esie.

Ndusụk ini ẹkeme ndinen̄ede mme n̄kpọ ebe ke leta oro ẹtịmde ẹwet ẹnọ ẹsọk andiwet edieke ẹmịn̄de leta oro ofụri ofụri. Edi utọ leta oro ekeme ndinam ata n̄kpọ efen akan se ẹkeduakde. Didie? Akpa nsu oro ekeme ndidọdiọn̄ nsuana, mîdịghe ẹkeme ndinọ mme andibiọn̄ọ n̄kaiso ifet ndinam ẹmịn̄ mme abian̄a ikọ ye mme ndudue. Ke ediwak idaha esifọn ndiyak n̄kpọ aban̄ade leta ẹdinọde andiwet nsịn ke ubọk mbiowo. Edieke etikwọ etikwọ ntọt ke ndutịm usuanetop edemerede idiọkesịt, ọfis n̄kọk itieutom Watch Tower Society ekeme nditọt mme esop ke idụt oro aban̄a mme akpan n̄kpọ ẹmi ẹdude, ke ntem ẹn̄wamde kpukpru mme asuanetop ndinọ mme obụp mbụme nti ibọrọ.

Nte oyom afo ke idemfo ke usụn̄ ekededi esịn idem ke mme utọ ukwan̄ edori ikọ oro? Item Jesus ọdọhọde “ẹsana mmọ ẹyak,” ẹfụmi mmọ, enyene n̄kpọ ndinam in̄wan̄în̄wan̄ ye otu mme asua emi. Mme Christian oro ẹnamde akpanikọ ẹnyene mme ntak ẹtode Bible ndifep mbon nsọn̄ibuot ye mme ekikere mmọ. (1 Corinth 5:11-13; Titus 3:10, 11; 1 John 2:19; 2 John 10, 11) Edieke owo ke esịt akpanikọ oyomde ndifiọk m̀mê uyo oro ẹsụkde Mme Ntiense edi akpanikọ m̀mê nsu, enyene-isọn̄ ifiọk oro afo enyenede esiwak ndikem ndida nnọ ibọrọ.—Se Enyọn̄-Ukpeme eke September 15, 1986, page 13 ye 14.

Edieke afo osobode ukwan̄ ntọt ke ndutịm usuanetop, nam item Mme N̄ke 14:15: “Ọkọi ese kpukpru ikọ ke akpanikọ: edi ọniọn̄ otịm ese ikpat isan̄ esiemmọ.” Ke Switzerland ediwak owo ẹma ẹkop iyatesịt ke ini ntọt emi ẹkewetde man otụk owo ke idem ọkọdọhọde ete ke n̄kaiferi Ntiense kiet akakpa ke ntak emi iman esie ẹkesịnde ndinyịme mme anamutom ufọkibọk ẹkịm iyịp ẹsịn. Nte se ikenen̄erede itịbe ekedi oro? Baba. Owo udọn̄ọ oro ekesịn edikịm iyịp nsịn ke idem ke ntak ido ukpono, edi enye ama onyịme ukpụhọ ibọkusọbọ emi owo mîkamake iyịp. Ẹkpekenam emi ye unana ubiat ini ndien eyedi ẹkpekenyan̄a uwem esie. Nte ededi, ufọkibọk oro ama abiat ini nte mîdotke tutu ini ebe akaha. Ntọt ndutịm usuanetop oro iketịn̄ke mme n̄kpọ ẹmi.

Ntem, tịm dụn̄ọde udomo akpanikọ emi odude ke mme orụk ntọt oro. Nnyịn imekeme ndinam an̄wan̄a mme obụp mbụme nte ke mbiowo n̄kann̄kụk ẹsise ẹban̄a mme utọ mfịna oro ke ima ima usụn̄ ye nte ekemde ye ndausụn̄ Bible. Ndiyịre ye mme edumbet ke ini ẹnọde mme ibọrọ esikpan nnyịn ndinam ubiere ke ibụmede.—Mme N̄ke 18:13.

Nnennen Ntọt Oro Okodude Edi Akpan N̄kpọ

Ke akpa isua ikie, mme owo ẹma ẹsu nsu ẹban̄a Jesus Christ man ẹbiat enyịn̄ esie, ndusụk owo ẹkam ẹdade enye nte abiat mbio obio ibuot. (Luke 7:34; 23:2; men Matthew 22:21 domo.) Ekem, obufa esop Christian ama osobo in̄wan̄în̄wan̄ ubiọn̄ọ otode mbon ido ukpono ye mbon ererimbot. Sia edide “Abasi ekemek n̄kpọ oro edide ndisịme ke ererimbot,” ediwak owo ẹkese mme asan̄autom esie ke usụhọde. (1 Corinth 1:22-29) Ana mme ata Christian mfịn ẹkere ẹban̄a esuene, emi edide orụk ukọbọ.—John 15:20.

Nte ededi, Mme Ntiense Jehovah ẹsidara ke ini owo emi mmọ ẹnyenede nneme mîwụtke asari onyụn̄ owụtde ukem edu nte ndusụk mbon oro ẹkekade ẹkesobo ye Paul ke Rome, ẹmi ẹkedọhọde ẹte: “Iyom ndikop se ekerede ke inua fo: edi ama edi n̄ka emi, nnyịn imọfiọk ite mme owo ẹtịn̄ n̄kpọ ẹbiat enye ke kpukpru ebiet.”—Utom 28:22.

Nam n̄kpọ an̄wan̄a mbon oro mînyeneke nnennen ntọt, anamde oro ke sụn̄sụn̄ ido. (Rome 12:14; men 2 Timothy 2:25 domo.) Nọ mmọ ikot ndinyene nnennen ntọt aban̄ade Mme Ntiense Jehovah, emi edinamde ẹkûbian̄a mmọ ke nsunsu edori ikọ. Afo n̄ko emekeme ndida mme edinam an̄wan̄a oro Watch Tower Society emịn̄de oro ọnọde ọyọhọ ntọt aban̄a esop, mbụk esie, ye mme ukpepn̄kpọ esie.a Inikiet Philip ọkọbọrọ Nathanael n̄kukụre ke ndidọhọ ete: “Di dise.” (John 1:46) Nnyịn imekeme ndinam kpasụk ntre. Ẹdadara owo ekededi oro amade ndidi Ufọkmbono Obio Ubọn̄ n̄kann̄kụk man okụt ke idemesie mme orụk owo ẹmi Mme Ntiense Jehovah ẹdide ye se mmọ ẹnịmde ke akpanikọ.

Kûyak Mme Andibiọn̄ọ Ẹsịn Fi Ndịk

Edi n̄kpọ nsịnudọn̄ didie ntem ndifiọk nte ke esuene ikpanke mme owo ndikabade ndi Mme Ntiense! Ke ini mbụme ndụn̄ọde TV ke Germany, mbon nsọn̄ibuot ẹma ẹbọp ekese nsu ẹdori Mme Ntiense. Owo kiet emi ekesede ama ọdiọn̄ọ ke mme ikọ n̄kponinua mbon nsọn̄ibuot oro ẹkedi ata mfụm mfụm ikọ ndien ama onụk enye ndifiak ntọn̄ọ ukpepn̄kpọ Bible esie ye Mme Ntiense. Ih, an̄wan̄wa esuene esida okosịm nti utịp ke ndusụk ini!—Men Philippi 1:12, 13 domo.

Apostle Paul ama ọfiọk ete ke ndusụk owo ẹyekpan̄ utọn̄ ke “ikpîkpu mbụk” ẹkan akpanikọ. Enye ke ntre ama ewet ete: “Fara ke idem ke kpukpru n̄kpọ, biom ukụt, nam utom ọkwọrọ gospel, nam utom fo ma.” (2 Timothy 4:3-5) Ntre kûyak ẹwọn̄ọde ntịn̄enyịn fo, ndien ẹkûyak mme andibiọn̄ọ ‘ẹsịn mbufo ndịk ke idem ke baba usụn̄ kiet.’ (Philippi 1:28) Tie sụn̄sụn̄ kûnyụn̄ ufịna idem nyụn̄ kwọrọ eti mbụk idara idara, ndien afo eyesọn̄ọ ada ọyọ an̄wan̄wa esuene. Ih, ti un̄wọn̄ọ Jesus: “Ọfọfọn ọnọ mbufo ke adan̄aemi owo ẹdisụn̄ide mbufo, ẹnyụn̄ ẹnam mbufo isịnenyịn, ẹnyụn̄ ẹtịn̄ kpukpru orụk idiọkn̄kpọ ke nsu ẹdian mbufo kaban̄a Mi. Ẹdat esịt, ẹdara etieti: koro utịp mbufo ke Heaven omokpon: koro kpa ntre ke mmọ ẹkenam mme prọfet ẹmi ẹbemde mbufo iso edu isịnenyịn.”—Matthew 5:11, 12.

[Mme Ikọ idakisọn̄]

[Se Ẹwetde ke Ikpọ Abisi ke page 27]

Ke ini okosobode mme andibiọn̄ọ, Jesus ọkọdọhọ mme mbet esie ete: “Ẹsana mmọ ẹyak.” Ikọ esie ọkọwọrọ nso?

[Se Ẹwetde ke Ikpọ Abisi ke page 29]

“Ọfọfọn ọnọ mbufo ke adan̄aemi owo ẹdisụn̄ide mbufo, ẹnyụn̄ ẹnam mbufo isịnenyịn, ẹnyụn̄ ẹtịn̄ kpukpru orụk idiọkn̄kpọ ke nsu ẹdian mbufo kaban̄a Mi.”—Matthew 5:11