‘Ndifiọk Se Nnyịn Idide’​—Ke Ini Usọrọ Editi

“Edieke nnyịn ikpodụn̄ọrede idem nnyịn ise, Abasi ikpekpehe ikpe ye nnyịn . . . mbak edibiom nnyịn ikpe.”​—1 CORINTH 11:31, 32.

1. Mme ata Christian enen̄ede ẹyom ndifep nso, ndien ntak-a?

AKPATRE n̄kpọ oro Christian okpoyomde otịbe ọnọ imọ edi Jehovah ndibiom enye ikpe idiọk idiọk. Ndiyat “Ebiereikpe ofụri ererimbot” esịt ekeme ndida nsịm “ẹdibiom nnyịn ikpe ye ererimbot” ndinyụn̄ ntaba edinyan̄a. Oro edi ntre edide nnyịn idori enyịn ndidu uwem ke heaven ye Jesus m̀mê ndidu anana-utịt uwem ke paradise isọn̄.​—Genesis 18:25; 1 Corinth 11:32.

2, 3. Ke nso n̄kpọ ke ẹkeme ndibiom nnyịn ikpe idiọk idiọk, ndien nso ke Paul eketịn̄ aban̄a emi?

² Ke 1 Corinth ibuot 11, apostle Paul ama etịn̄ aban̄a ikpehe kiet emi ẹkemede ndibiom nnyịn ikpe. Ke adan̄aemi enye eketịn̄de ikọ esie nnennen ọnọ mme Christian oro ẹyetde aran, item esie edi akpan n̄kpọ ọnọ kpukpru owo, akpan akpan ke ini edinam emi. Nnyịn ndidiọn̄ọ se nnyịn ke idem nnyịn idide ekeme ndin̄wam nnyịn ndinyene unyịme Abasi ndien owo ibiomke nnyịn ikpe. Ke enemede n̄kpọ aban̄a usọrọ Udia Mbubịteyo Ọbọn̄ eke isua ke isua, Paul ekewet ete:

³ “Ke okoneyo oro ẹdade Enye ẹnọ, Ọbọn̄ Jesus emen uyo; ndien ke Enye ama ọkọnọ Abasi ekọm, Enye obụn̄ uyo, onyụn̄ ọdọhọ ete, Emi edi ikpọkidem Mi ọnọ mbufo; ẹnam emi nditi Mi. Kpa ntre n̄ko ke Enye emen Cup, ke ẹma ẹkedia n̄kpọ ẹma, ete, Cup emi edi obufa ediomi ke iyịp Mi; ẹnam emi, adan̄a ini nte ẹn̄wọn̄wọn̄, ke editi Mi. Koro adan̄a ini nte ẹdadia uyo emi ẹnyụn̄ ẹn̄wọn̄ cup emi, mbufo ẹkwọrọ n̄kpa Ọbọn̄ tutu Enye edi.”​—1 Corinth 11:23-26.a

4. Nso idida itie ke mbubịteyo April 10, 1990?

⁴ Ke utịn ama okosop ke April 10, 1990, Mme Ntiense Jehovah eyenịm usọrọ Editi n̄kpa Christ. Nte ido edide, otu oro edisopde idem edidi esop kiet; ntre ufan̄ eyedu ọnọ mbon oro mîdịghe Mme Ntiense kan̄a. Mbonoesop emi editie didie? Utịn̄ikọ Bible eyedu. Ekem, ke ẹma ẹkebọn̄ akam, ẹyemen uyo ẹsan̄a ẹkanade. Ẹyefiak ẹbọn̄ akam ndimen cup nsan̄a n̄kanade. Utu ke ndinam kpukpru ẹmi nte ekemde ye akani ido edinam m̀mê ndutịm oro owo mîkemeke ndikpụhọde, ẹdidiomi ibat uyo ye cup ye ido nte ẹmende mmọ ẹsan̄a ẹkanade nte ekemde ye idaha n̄kann̄kụk. Akpan n̄kpọ edi ndinam n̄kpọ ẹmi ẹdu ẹnọ kpukpru mme andidụk, idem okposụkedi ekese esop ẹdimende mmọ ẹsan̄a ẹkanade ye unana edidia. Nte ededi, nso mme n̄kpọ ke ẹmen ẹsan̄a ẹkanade, ndien nso ke mmọ ẹdi? Akande oro, nso ke nnyịn ikpebem iso ikere iban̄a man ifiọk se nnyịn ke idem nnyịn idide?

“Emi Edi Ikpọkidem Mi”

5, 6. (a) Nso ke Jesus akanam ye uyo? (b) Nso orụk uyo ke Jesus akakama?

⁵ Nnyịn ima ikot se Paul “[ọ)kọbọde ke ubọk Ọbọn̄” ke se iban̄ade usọrọ Editi. Mbụk ẹdu n̄ko ẹmi mme Andiwet Gospel ita ẹkewetde, emi kiet ke otu mmọ okodude ke itie ke ini Jesus ọkọtọn̄ọde usọrọ emi. (1 Corinth 11:23; Matthew 26:26-29; Mark 14:22-25; Luke 22:19, 20) Mbụk ẹmi ọdọhọ ete ke Jesus ekebemiso emen uyo, ọbọn̄ akam, ndien ekem obụn̄ onyụn̄ edeme enye. Nso ikedi uyo oro? Ke usụn̄ oro asan̄ade ekekem, nso ke ẹkama mfịn? Enye ọwọrọ nso m̀mê ada aban̄a nso?

⁶ Ẹma ẹnyene mme n̄kpọ oro ẹkedade ẹto usọrọ Passover mme Jew, emi kiet ekedide uyo oro owo mîsịnke leaven, emi Moses okokotde “uyo eke leaven mîdụhe, kpa uyo ukụt.” (Deuteronomy 16:3; Exodus 12:8) Ẹkeda ndomuyo wheat ẹnam uyo emi ye unana edisịn leaven, inụn̄, m̀mê mme ndinụm. Sia leaven mîsịneke (Hebrew, mats·tsahʹ), enye eketie mbara mbara onyụn̄ ekeme ndisọp mbụn̄ọ; ẹkenyene ndibobụn̄ enye ke udomo oro ẹkemede ndita.​—Mark 6:41; 8:6; Utom 27:35.

7. Nso ke Mme Ntiense Jehovah ẹkama ndida mban̄a uyo ke ini usọrọ Editi?

⁷ Jesus akakama uyo eke leaven mîdụhe ke usọrọ Udia Mbubịteyo Ọbọn̄, ntre Mme Ntiense Jehovah ẹnam ukem oro mfịn. Matzoth mme Jew oro odude ke kpukpru ebiet odot ke edinam emi edieke owo mîsịnke n̄kpọ ẹmi anamde enye enịn̄e, utọ nte malt, onyịm, m̀mê nsenunen. (Matzoth oro esịnede mme utọ ndinụm oro ikpekemeke-keme ndidot ndidi se ẹkotde “uyo ukụt.”) Mîdịghe, mbiowo esop ẹkeme ndidọhọ owo ada ndomuyo wheat ye mmọn̄ anam uyo eke leaven mîdụhe. Edieke ndomuyo wheat mîdụhe, ẹkeme ndida ndomuyo oro ẹnyenede ẹto barley, edesi, ibokpot m̀mê ndomuyo orụk ibokpot efen ẹnam uyo eke leaven mîdụhe. Ana ẹbot usụn̄uyo emi ekara ekara ẹnam efere ẹnyụn̄ ẹsan̄ ke usan usan̄uyo oro ẹfiọn̄ọde esisịt aran.

8. Ntak emi uyo eke leaven mîdụhe edide n̄kpọ idiọn̄ọ emi odotde, ndien nso ke edita enye ada aban̄a? (Mme Hebrew 10:5-7; 1 Peter 4:1)

⁸ Utọ uyo oro odot koro enye mîsịneke leaven (yeast), emi Bible ọdọhọde ke ada aban̄a mbiara n̄kpọ m̀mê idiọkn̄kpọ. Paul ama ọnọ item aban̄a owo oro odude oburobụt uwem ke esop ete: ‘Ekpri ubak leaven anam ofụri eboho uyo ofụt. Esio akani leaven ẹduọk, man mbufo ẹdi n̄kpọ eke leaven mîdụhe ke esịt. Ẹmewot passover nnyịn, kpa Christ. Eyak nnyịn ikûda akani leaven, kpa ibak ye ukwan̄ido, inịm usọrọ, edi ida uyo edisana ido ye akpanikọ, eke leaven mîdụhe, inịm.’ (1 Corinth 5:6-8; men Matthew 13:33; 16:6, 12 domo.) Uyo eke leaven mîdụhe edi ndamban̄a n̄kpọ oro ekemde ye ikpọkidem eke owo Jesus, koro enye ekedi ‘edisana, inyeneke n̄kari, inyụn̄ iduehe, isan̄ake ye mme anamidiọk.’ (Mme Hebrew 7:26) Jesus ama odu do ke mfọnmma ikpọkidem eke owo ke ini enye ọkọdọhọde mme apostle ete: “Ẹbọ ẹnyụn̄ ẹta [uyo] emi, enye edi ikpọkidem mi.” (Matthew 26:26, A New Translation of the Bible, emi James Moffatt ewetde) Ndita uyo oro ọwọrọ ete ke owo omonịm ufọn uwa oro Jesus awade ke ibuot esie ke akpanikọ omonyụn̄ onyịme enye. Emi, nte ededi, esịne se ikande oro.

Wine ye Se Ọwọrọde

9. Nso n̄kpọ idiọn̄ọ efen ke Jesus ọdọhọ ke ẹkpenyene ndikama?

⁹ Jesus ama akama n̄kpọ idiọn̄ọ efen: “Enye n̄ko ama emen cup, ndien ke ama ọkọnọ Abasi ekọm ayak ọnọ mmọ ete, Ẹda ẹn̄wọn̄, kpukpru mbufo; emi edi iyịp mi, kpa iyịp obufa ediomi, emi ẹduọkde kaban̄a ediwak owo, man ẹmen idiọkn̄kpọ mmọ ẹfep.” (Matthew 26:27, 28, Moffatt) Nso ikesịne ke cup oro ẹkebuanade mi oro enye ọkọnọde, ndien nso ke enye ọwọrọ ọnọ nnyịn nte nnyịn idomode ndifiọk se nnyịn ke idem nnyịn idide?

10. Didie ke wine ekedinyene itie ke Passover mme Jew?

¹⁰ Ke ini Moses ekebemde iso etịn̄ aban̄a usọrọ Passover, enye ikasiakke edin̄wọn̄ n̄kpọ ndomokiet. Ediwak nditọ ukpepn̄kpọ ẹnịm ke akpanikọ ẹte ke ẹkeda wine ẹdisịn ke Passover ke ata ukperedem, iso-ọfọn ke ọyọhọ isua ikie iba B.C.E.b Ke se ededi, edikama wine ke usọrọ emi ekedi ọsọ n̄kpọ ke akpa isua ikie, ndien Jesus ikafan̄ake ye emi. Enye ama akama wine Passover ke ini ọkọtọn̄ọde usọrọ Editi.

11. Nso uto wine ke odot ẹkama ke usọrọ Udia Mbubịteyo Ọbọn̄?

¹¹ Sia Passover mme Jew akadade itie ke anyanini ke ẹma ẹketet grape, Jesus ikakamake mmọn̄ grape oro mîdatke, edi akakama ndat ndat wine oro ke mmemmem usụn̄ ekemede ndida mban̄a iyịp esie. (Men Ediyarade 14:20 domo.) Iyomke ẹdian n̄kpọ ke iyịp Christ, ntre ata wine odot, utu ke mme wine oro ẹbuakde n̄kpọ ndinam enye ọsọn̄inua (utọ nte port, sherry, m̀mê muscatel) m̀mê ndibuak ndinem utebe m̀mê ikọn̄ usọbọ (vermouth, Dubonnet, m̀mê n̄kpọsọn̄ wine udia). Nte ededi, iyomke nnyịn ifịna idem iban̄a usụn̄ nte ẹkenamde wine, m̀mê ẹma ẹsịn ekpri sugar ke ini ẹkefụkde ẹnịm man enyene uke-uke inem m̀mê ọsọn̄inua m̀mê ẹma ẹsịn esisịt sulfur mbak edibiara.c Ediwak esop ẹsikama ndat ndat wine oro ẹnyamde ke urua (utọ nte Chianti, Burgundy, Beaujolais, m̀mê claret) m̀mê ndat ndat wine oro mmọ ẹnamde. Wine ye uyo ẹdi sụk n̄kpọ idiọn̄ọ, m̀mê ndamban̄a n̄kpọ; ntre, ẹkeme ndida se iyọhọde isụhọ ẹnyọn̄ ufọk ẹnyụn̄ ẹkama ke ukperedem nte udia m̀mê edin̄wọn̄ n̄kpọ.

12. Jesus akanam an̄wan̄a ete ke wine ada aban̄a nso?

¹² Akpanikọ oro nte ke Jesus ama etịn̄ aban̄a iyịp esie ke okoneyo Passover ekpekeme ndinam ẹti iyịp eyenerọn̄ ko ke Egypt. Edi tịmfiọk nte Jesus ekenen̄erede emen emi odomo ke isio isio usụn̄, ọdọhọde ete: “Cup emi edi Obufa Ediomi ke iyịp Mi, emi ẹduọkde kaban̄a mbufo.” (Luke 22:20) Abasi ama ebemiso anam ediomi ye idụt Israel eke obụk, ndien ẹkesọn̄ọ enye ke iyịp unam oro ẹkewade. Ebuana ama odu ke ufọt iyịp mme uwa oro ye iyịp Jesus. Mbiba ẹma ẹbuana ke Abasi nditọn̄ọ ediomi ye idụt ẹkedide ikọt esie. (Exodus 24:3-8; Mme Hebrew 9:17-20) Ikpehe kiet ke Ibet ediomi ekedi nte ke Israel eke obụk ama enyene idotenyịn ndinam idụt oku-ndidem. (Exodus 19:5, 6) Nte ededi, ke Israel ama okokpu ndinịm ediomi Jehovah, enye ama ọdọhọ ete ke imọ iyemen “akpa ediomi” oro ikpụhọ ye “obufa ediomi.” (Mme Hebrew 9:1, 15; Jeremiah 31:31-34) Cup wine oro Jesus kemi ọnọde mme anam-akpanikọ apostle ada aban̄a obufa ediomi emi.

13, 14. (a) Ndidu ke obufa ediomi ọwọrọ nso? (b) Owo ndidia mme n̄kpọ idiọn̄ọ oro ọwọrọ nso?

¹³ Mme Christian oro ẹdade ẹdisịn ke obufa ediomi emi ẹnam idụt oku-ndidem eke spirit. (Galatia 6:16) Apostle Peter ekewet ẹte: “Mbufo ẹdi ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi onịmde ọnọ Idemesie, man mbufo ẹka ẹkatan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana esie.” (1 Peter 2:9) Utọ edinyan̄a oro mmọ ẹkebọde otịm an̄wan̄a​—uwem ke heaven nte mme andikara ye Jesus. Ediyarade 20:6 ọsọn̄ọ emi ete: “Ọfọfọn ọnọ owo emi ẹnyenede udeme ke akpa ediset: . . . mmọ ẹyedi mme oku Abasi ye Christ, mmọ ẹyenyụn̄ ẹda ubọn̄ ye Enye ke tọsịn isua.”

¹⁴ Ke akpanikọ, ke Jesus ama eketeme mme apostle ẹte ẹta uyo ẹnyụn̄ ẹn̄wọn̄ wine idiọn̄ọ oro, enye ama asian mmọ ete ke mmọ ‘ẹyedia n̄kpọ ẹnyụn̄ ẹn̄wọn̄ n̄kpọ ke okpokoro imọ ke obio ubọn̄ imọ, ẹnyụn̄ ẹtie ke ebekpo ẹkpe ikpe ẹnọ esien Israel duopeba.’ (Luke 22:28-30) Mmọdo, ndita nnyụn̄ n̄n̄wọn̄ mme n̄kpọ idiọn̄ọ Editi enyene se ọwọrọde akan ikpîkpu edinịm uwa Jesus ke akpanikọ. Ana Christian kiet kiet onyịme ufak onyụn̄ ọbuọt idem edieke enye oyomde ndinyene nsinsi uwem ke ebiet ekededi. (Matthew 20:28; John 6:51) Edi ndita nnyụn̄ n̄n̄wọn̄ n̄kpọ idiọn̄ọ ẹmi owụt nte ke owo oro odu ke obufa ediomi, emi ẹmekde ndidu ye Jesus ke Obio Ubọn̄ esie.

Ufọn Edifiọk Se Idide ke Ini Usọrọ Editi

15. Didie ke Jesus akanam ẹdiọn̄ọ obufa idotenyịn oro mme asan̄autom Abasi ẹnyenede?

¹⁵ Nte ibuotikọ enye eken akanamde an̄wan̄a, mbemiso eyo Jesus mme anam-akpanikọ ikọt Abasi ikenyeneke idotenyịn uka heaven. Mmọ ẹkesak iso ẹse edinyene nsinsi uwem ke isọn̄, kpa akpa ebietidụn̄ ubonowo. Jesus Christ ekedi akpa owo oro ẹkenamde eset nte spirit, ndien enye ama akabade edi akpa ke otu ubonowo ẹmi ẹkemende ẹdọk ke heaven. (Ephesus 1:20-22; 1 Peter 3:18, 22) Paul ama ọsọn̄ọ emi, ewetde ete: “Nnyịn [imenyene] uko ndibe ndụk ke Edisana Ebiet ke iyịp Jesus, ke usụn̄ oro Enye okonịmde ọnọ nnyịn, kpa obufa ye odu-uwem usụn̄.” (Mme Hebrew 10:19, 20) Mmanie ẹdiana, ke Jesus ama ekeberede usụn̄ oro?

16. Nso idotenyịn idu inọ mbon oro ẹtade uyo ẹnyụn̄ ẹn̄wọn̄de wine?

¹⁶ Ke okoneyo oro Jesus ọkọtọn̄ọde usọrọ Udia Mbubịteyo Ọbọn̄, enye ama asian mme anam-akpanikọ apostle esie ete ke imọ iyetịm itie inịm inọ mmọ ke heaven. (John 14:2, 3) Ti, nte ededi, ete ke Jesus ama ọdọhọ n̄ko ete ke mbon oro ẹdiade uyo ẹnyụn̄ ẹn̄wọn̄de cup ẹyedu ke Obio Ubọn̄ imọ ẹnyụn̄ ẹtie ke ebekpo ẹkpe ikpe. Nte oro ẹkpedi mme apostle kpọt? Baba, koro ke ukperedem apostle John ama edifiọk ete ke mme Christian en̄wen n̄ko ẹyekan ẹnyụn̄ ‘ẹsụhọde ẹtetie ye Jesus ke ebekpo esie,’ ndien kpukpru mmọ ẹyekabade ẹdi ‘obio ubọn̄ j’e mme oku ndikara ofụri isọn̄.’ (Ediyarade 3:21; 5:10) John n̄ko ama ọfiọk ofụri ibat mme Christian oro “ẹkefakde ẹsio ẹfep ke isọn̄”​—144,000. (Ediyarade 14:1-3) Sia emi edide ata ekpri otu, kpa “ekpri otuerọn̄” ke ẹmende ẹdomo ye kpukpru mbon oro ẹtuakde ibuot ẹnọ Abasi ke ediwak emana ẹmi ẹkebede, san̄asan̄a ifiọk edi se ẹyomde ke ini usọrọ Editi.​—Luke 12:32.

17, 18. (a) Ndusụk mme Christian ke Corinth ẹkeduọ ẹdụk nso edu? (b) Ntak emi ọkpọsọn̄ udia ye edin̄wọn̄ n̄kpọ ẹkenen̄erede ọdiọk-ọ? (Mme Hebrew 10:28-31)

¹⁷ Paul ama etịn̄ aban̄a emi ke leta oro enye ekewetde ọnọ ẹsọk mbon Corinth ke ini ndusụk mme apostle ẹkesụk ẹdude uwem ye ke ini Abasi okokotde mme Christian “ẹte ẹdidi nti ikọt Abasi.” Paul ọkọdọhọ, ke idiọk edinam ama ọtọn̄ọ ke otu mbon oro ẹkenyenede ndidia mme n̄kpọ idiọn̄ọ ẹmi. Ndusụk owo ẹma ẹbebem iso ẹnịm usọrọ oro akanamde mmọ ẹdia n̄kpọ m̀mê ẹn̄wọn̄ n̄kpọ ẹkaha, anamde mmọ ẹtie idap idap, ẹnyụn̄ ẹtie nditen̄ nditen̄ ke ekikere mmọ. Nte utịp, mmọ ikekemeke ‘ndifiọk ikpọkidem,’ kpa ata ikpọkidem Jesus oro uyo emi akadade aban̄a. Ndi oro ama enen̄ede ọdiọk? Ih! Ke ndidia ke usụn̄ oro mîdotke, mmọ ẹma ẹnyene ‘ubiomikpe ẹban̄a ikpọkidem ye iyịp Ọbọn̄.’ Edieke mmọ ẹkedude ke edidemede ke ekikere ye ke spirit, ‘mmọ ẹkpekeme ndifiọk se mmọ ẹdide ndien owo ikpekpehe ikpe ye mmọ.’​—1 Corinth 1:2; 11:20-22, 27-31.

¹⁸ Nso ke okoyom mme Christian oro ẹfiọk ndien didie? Akpan akpan, mmọ ẹkenyene ndifiọk ke esịt ye ke ekikere mban̄a ikot oro ẹkekotde mmọ ndibuana ke otu owo 144,000 ẹmi ẹnyenede udeme uwem eke heaven. Didie ke mmọ ẹkefiọk emi, ndien ndi ediwak owo mfịn ẹkpenyene ndinịm ke akpanikọ nte ke mmimọ idi ubak ekpri otu emi Abasi emekde toto ke eyo mme apostle?

19. Nso n̄wọrọnda idaha ikodu ke usọrọ Editi eke 1989?

¹⁹ Ke akpanikọ, edi esisịt ibat mme ata Christian mfịn ẹdiọn̄ọ emi ẹban̄a idemmọ. Ke usọrọ Udia Mbubịteyo Ọbọn̄ eke 1989, se ibede owo 9,479,000 ẹkesop idem ke mme esop Mme Ntiense Jehovah ke ofụri isọn̄. N̄kpọ nte owo 8,700 ẹkedọhọ nte inyenede idotenyịn edidi se ‘ẹnyan̄ade ẹnọ obio ubọn̄ eke heaven.’ (2 Timothy 4:18) Ata ediwak owo​—ih, kpa ediwak million mme anam-akpanikọ Christian en̄wen ẹmi ẹdiọn̄de, ẹmi ẹkesopde idem ọtọkiet​—ẹma ẹfiọk ẹte ke eti idotenyịn mmimọ edi ndidu uwem nsinsi ke isọn̄.

20. Didie ke ẹsinam mbon oro ẹdude ke otu owo 144,000 ẹdiọn̄ọ ke ẹma ẹkot mmimọ? (1 John 2:27)

²⁰ Ke Pentecost eke 33 C.E., Abasi ama ọtọn̄ọ ndimek owo 144,000 nnọ uwem eke heaven. Sia idotenyịn emi ekedide obufa, ndien mme asan̄autom Abasi oro ẹkedude mbemiso eyo Jesus mîkenyeneke, didie ke mbon oro ẹkemekde ẹkpediọn̄ọ mîdịghe ẹkpeda idotenyịn emi ke akpanikọ? Mmọ ẹfiọk emi ebe ke ndibọ n̄kpọ ntiense emi edisana spirit Abasi ọnọde. Oro iwọrọke ite ke mmọ ẹnen̄ede ẹkụt edisana spirit ke enyịn (enye idịghe owo) m̀mê ndikere ke spirit ke eneme nneme ye mmimọ ke esịt, m̀mê ndikop uyo ẹtode obio mme spirit. Paul anam an̄wan̄a ete: “Spirit ke idemesie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi onịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyenyụn̄ ida ubọn̄ ye Enye.”​—Rome 8:16, 17.

21. (a) Didie ke mbon oro ẹyetde aran ẹdiọn̄ọ ke mmimọ inyene idotenyịn eke heaven? (1 Corinth 10: 15-17) (b) Nso utọ owo ke mbon oro ẹyetde aran ẹdi, ndien didie ke mmọ ke nsụhọdeidem ẹnam ẹdiọn̄ọ idotenyịn mmọ?

²¹ N̄kpọ ntiense, m̀mê se ẹdiọn̄ọde emi, amafiak ọsọn̄ọ ekikere ye idotenyịn mmọ. Mmọ ẹsụk ẹdi mme owo, ẹkopde inem nti n̄kpọ oro Jehovah obotde ke isọn̄, edi akpan n̄kpọ oro mmọ ẹkọn̄de uwem mmọ ẹnyụn̄ ẹkerede ẹban̄a edi ndidi mme ada udeme ye Christ. Mmọ inyeneke idotenyịn emi ibe ke ntụk. Mmọ ẹdi mme ata owo, ẹmi ẹdade ukem ukem ke ekikere ye edu uwem mmọ. Sia ẹnamde mmọ ẹsana ke spirit Abasi, nte ededi, mmọ ẹmenịm ikot oro ẹkotde mmọ ke akpanikọ, ikaha iso inyene eyịghe iban̄a enye. Mmọ ẹdiọn̄ọ ẹte ke edinyan̄a mmimọ edi eke heaven edieke mmimọ inamde akpanikọ. (2 Thessalonica 2:13; 2 Timothy 2: 10-12) Ke ndidiọn̄ọ se uwa Jesus ọwọrọde ọnọ mmọ ẹnyụn̄ ẹfiọkde ẹte ke mmimọ idi mme Christian oro ẹyetde aran, mmọ ke nsụhọdeidem ẹdia mme n̄kpọ idiọn̄ọ Editi.

22. Nso ke ata ediwak mbon oro ẹdụkde usọrọ Udia Mbubịteyo Ọbọn̄ ẹdiọn̄ọ?

²² Ekese mbon oro ke n̄kopitem ẹdisopde idem ke April 10 inyeneke idotenyịn emi, koro Abasi iyetke mmọ aran ke spirit, okotde mmọ ọnọ uwem eke heaven. Nte nnyịn iketịn̄de, Abasi ọkọtọn̄ọ ndimek owo 144,000 toto ke eyo mme apostle. Edi ke oro ama okosịm utịt, ẹkenyene ndidori enyịn nte ke mbon eken oro ẹdụkde ẹdi ndituak ibuot nnọ enye ẹdinyene idotenyịn oro Moses, David, John Andinịm owo baptism, ye mme anam-akpanikọ mbon en̄wen ẹmi ẹkekpade mbemiso Jesus eberede usụn̄ ọnọ uwem ke heaven, ẹkenyenede. Ntre, ediwak million mme Christian oro ẹnamde akpanikọ ẹnyụn̄ ẹnyenede ifịk mfịn isidiaha mme n̄kpọ idiọn̄ọ Editi. Mme utọ Christian ẹmi ẹfiọk se mmọ ẹdide ke iso Abasi ke usụn̄ifiọk nte ke mmọ ẹdiọn̄ọ eti idotenyịn mmọ. Mmọ ẹbọ ufọn ẹto iyịp ye ikpọkidem Jesus ke ndidi se ẹfende mme idiọkn̄kpọ mmọ ndien ekem ẹnyenede anana-utịt uwem ke isọn̄.—1 Peter 1:19; 2:24; Ediyarade 7:9, 15.

23. Ntak emi usọrọ Editi edide idara idara edinam-a? (Men 2 Chronicles 30:21 domo.)

²³ Ẹyak nnyịn, ndien, isak iso ise idara idara edinam emi ke April 10. Emi edidi ini ndinam n̄kpọ ye mbufiọk, edi enye edidi ini idara n̄ko. Edidi idara ọnọ esisịt ibat mbon oro ẹnyenede idotenyịn eke heaven, ẹmi ke usụn̄ oro enende ye ke n̄kopitem ẹditade uyo ẹnyụn̄ ẹn̄wọn̄ cup. (Ediyarade 19:7) Edidi idara n̄ko ọnọ ediwak million Christian oro ẹkopde inemesịt, ẹmi ke mbubịteyo oro ẹdinọde ntịn̄enyịn ẹnyụn̄ ẹkpep n̄kpọ ẹban̄a emi, ẹdinyụn̄ ẹdoride enyịn nditi edinam oro enyenede se ọwọrọde mi ke nsinsi ke isọn̄.​—John 3:29.

[Mme Ikọ Idakisọn̄]

Nso Idi Ibọrọ Fo?

◻ Ntak emi ẹsimende uyo eke leaven mîdụhe ẹsan̄a ke ini usọrọ Editi, ndien nso ke enye ada aban̄a?

◻ Nso idi cup oro ẹsimende ẹsan̄a ke ini usọrọ Udia Mbubịteyo Ọbọn̄, ndien nso ke enye ada aban̄a?

◻ Ntak emi oyomde owo enyene ifiọk aban̄a usọrọ Editi-e?

◻ Ntak emi afo asakde iso ese Editi emi edide ke iso-o?