Uwem ye Utom Jesus

Ekan̄ ke Esịt Okụre

KE ẸKPỌN̄DE Jesus ke in̄wan̄ Gethsemane ẹfen̄e ke ntak ndịk ye mme apostle eken, Peter ye John ẹtre itọk mmọ. Eyedi mmọ ẹsịme Jesus ke ẹdade enye ẹka ufọk Annas. Ke ini Annas ọnọde enye ẹsọk Akwa Oku, Caiaphas, Peter ye John ẹtiene nsannsan, nte an̄wan̄ade ẹkopde ndịk ẹban̄a uwem mmọ ẹnyụn̄ ẹkerede ntotụn̄ọ ntotụn̄ọ ẹban̄a se iditịbede inọ Eteufọk mmọ.

Ke ẹsịmde akwa ebietidụn̄ Caiaphas, John ekeme ndibe ndụk esịt okụre, sia akwa oku ọdiọn̄ọde enye. Nte ededi, ẹdaha ẹkpọn̄ Peter ke enyịnusụn̄ ke an̄wa. Edi ibịghike John afiak edi editịn̄ ikọ ye ekpemeusụn̄, emi edide ofụn an̄wan, ndien ẹyak Peter ebe odụk.

Etisịm idahaemi, tuep edi, ndien mme adaidaha ye mme asan̄autom akwa oku ẹma ẹbara ikan̄ ukan̄. Peter etiene mmọ ẹwebe ikan̄ ke adan̄aemi ebetde ubiereikpe Jesus. Do, ke un̄wana nyayama ikan̄ oro, ekpemeusụn̄ oro akayakde Peter ebe odụk okụt enye: “Afo nde okodu ye Jesus eyen Galilee.”

Ke ndịk ke ntak ẹfiọkde enye, ke iso kpukpru mmọ Peter akan̄ ke imọ akanam ifiọkke Jesus. Enye ọdọhọ ete: “Ndiọn̄ọke, nnyụn̄ mfiọkke se ikọ fo ọwọrọde.”

Ye oro, Peter ọwọrọ asan̄a ekpere inuaotop. Do, eyenan̄wan efen ọfiọk enye onyụn̄ ọdọnọ mmọ oro ẹdade do n̄ko ete: “Owo emi nde okodu ye Jesus eyen Nazareth.” Inikiet efen, Peter akan̄, ọn̄wọn̄ọde ete: “Ndiọn̄ọke owo oro.”

Peter osụk odu ke esịt okụre, odomode ndidịbe adan̄a nte enye ekekeme. Eyedi enye edịghe ke ọtọ emi ke ntak emi ekikọ ọkpọkde ke n̄kịm n̄wan̄a usenubọk. Mi kan̄a, ikpe Jesus ke akaiso, nte an̄wan̄ade adade itie ke n̄kan̄ ikpehe ufọk oro odude ke enyọn̄ esịt okụre oro. Eyedi Peter ye mbon en̄wen ẹmi ẹbetde ke isọn̄ ke ẹkụt nsio nsio ntiense oro ẹdade man ẹditie ntiense nte ẹdụkde-dụk ẹnyụn̄ ẹwọrọde-wọrọ.

N̄kpọ nte hour kiet ebe tọn̄ọ nte ẹkediọn̄ọ Peter ke akpatre nte nsan̄a Jesus. Idahaemi ediwak mbon oro ẹdade ẹkpere ẹdi ẹdidọhọ enye ete: “Ke akpanikọ afo edi owo kiet ke otu mmọ, koro ikọ inua fo ayarade emi.” Kiet ke otu mmọ edi iman Malchus, emi Peter okosịbede enye utọn̄. Enye ọdọhọ ete: “Nte n̄kekwe fi ye Enye ke in̄wan̄ mfri?”

“Ndiọn̄ọke owo emi,” ntre ke Peter etịn̄ ke ọkpọsọn̄ uyo. Ke akpanikọ, ke ndision̄o ikọ isụn̄i nnyụn̄ n̄wọn̄ọ n̄kpọ, ke editịm ntịn̄, osụn̄ide idemesie edieke mîdịghe akpanikọ ke imọ itịn̄, enye odomo ndinam mmọ ẹnịm nte ke kpukpru mmọ ẹnam ndudue.

Ke ndondo oro Peter akan̄de ọyọhọ utịm ikata emi, ekikọ ọkpọk. Ndien ke ndondo oro, Jesus, emi nte an̄wan̄ade ọwọrọde ada ke esa ke enyọn̄ esịt okụre oro, ọwọn̄ọde onyụn̄ ese enye. Idahaoro, Peter, eti se Jesus eketịn̄de hour ifan̄ ke mbemiso ke ubet enyọn̄: “Ke ini ekikọ mîkpọkke kan̄a utịm ikaba, afo eyekan̄ Mi utịm ikata.” Ke udobi idiọkn̄kpọ esie efịkde enye, Peter ọwọrọ an̄wa onyụn̄ atua eyet etieti.

Didie ke emi ekeme nditịbe? Ke otịmde ọfiọk ukeme eke spirit esie, didie ke Peter ekpekeme ndikan̄ Eteufọk esie utịm ikata ke adiana ke adiana ke usọp usọp idaha ntre? N̄kpọntịbe emi nte eyịghe mîdụhe emen Peter ke mbuari. Ẹyụrọde akpanikọ, ndien ẹbat Jesus nte idiọk abiatibet. Ẹnam se inende etie nte se ikwan̄ade, owo oro mîdụhe isop nte edue-isop. Ntre ke ntak mfịghe mfịghe idaha ẹdude, nsọn̄ọnda Peter oyok. Inikiet inikiet nnennen ukeme ima akpanikọ esie ebịt. Ke ndiọkiso esie, ndịk owo emen enye emen. Oro okûkam otịme ọnọ nnyịn tutu amama! Matthew 26:57, 58, 69-75; Mark 14:30, 53, 54, 66-72; Luke 22:54-62; John 18:15-18, 25-27.

▪ Didie Peter ye John ẹkeme ndibe ndọk esịt okụre akwa oku?

▪ Ke adan̄aemi Peter ye John ẹdude ke esịt okụre, nso ida itie ke esịt ufọk?

▪ Ikafan̄ ke ekikọ ọkpọk, ndien ikafan̄ ke Peter akan̄ ete ke ifiọkke Christ?

▪ Peter ndision̄o ikọ isụn̄i nnyụn̄ n̄wọn̄ọ n̄kpọ ọwọrọ nso?

▪ Nso inam Peter akan̄ ke imọ ifiọkke Jesus?