Uwem ye Utom Jesus

Jesus Odu Uwem!

KE INI iban oro ẹkụtde nte udi Jesus anade ukpọk, Mary Magdalene efehe man eketịn̄ ọnọ Peter ye John. Nte ededi, iban eken nte an̄wan̄ade ẹsụhọ ke udi. Ibịghike, angel kiet ọbiọn̄ọde onyụn̄ okot mmọ odụk esịt.

Mi iban oro n̄ko ẹkụt angel en̄wen, ndien kiet ke otu mme angel ẹmi ọdọhọ mmọ ete: “Mbufo ẹkûfehe ndịk, koro mmọfiọk nte mbufo ẹyom Jesus emi ẹkewotde ke eto. Enye idụhe mi, koro ẹma ẹnam enye eset, kpa nte enye ọkọdọhọde. Ẹdi, ẹdise ebiet emi enye akanade. Ẹnyụn̄ ẹka usọp usọp ẹketịn̄ ẹnọ mme mbet esie ẹte ke ẹma ẹnam enye eset ke n̄kpa.” (NW) Ntre ke ndịk ye akwa idara, iban ẹmi n̄ko ẹfen̄e ẹwọn̄ọ.

Etisịm ini emi, Mary omokụt Peter ye John, enye onyụn̄ etịn̄ ọnọ mmọ ete: “Ẹkemen Ọbọn̄ ẹfep ke udi, ndien nnyịn ifiọkke ọtọ nte ẹnịmde Enye.” Inikiet inikiet, mbet iba oro ẹtọn̄ọ itọk. John ọsọp ukot itọk akan—nte an̄wan̄ade sia edide akparawa—enye onyụn̄ ebemiso osịm udi. Etisịm ini emi, iban oro ẹmekpọn̄, ntre owo ndomokiet idụhe. Ke onụhọde, John onyụn̄ọ ese esịt udi onyụn̄ okụt nnyan n̄kpri mbai ọfọn̄, edi enye ada ke enyọn̄.

Ke ini Peter osịmde, enye imen̄eke edi ebe nnennen odụk esịt. Enye okụt nnyan n̄kpri mbai ọfọn̄ nte ẹbonode do n̄ko ye ọfọn̄ emi ẹkedade ẹbọp Jesus ibuot. Ẹwan̄ enye ẹnịm ọtọkiet. Idahaemi John n̄ko odụk udi, enye onyụn̄ onịm ikọ Mary ke akpanikọ. Edi Peter m̀mê John ifiọkke ite ke Jesus ama eset ke n̄kpa, idem okposụkedi Enye ke ediwak ini ekesitịn̄de ọnọ mmọ ete ke Imọ iyeset. Ke ẹdude ke eyịghe, mmọ mbiba ẹfiak ẹnyọn̄ọ ufọk, edi Mary, oro afiakde edi itie udi osụhọ.

Mi kan̄a, iban eken ẹwara ẹka nditịn̄ nnọ mme mbet nte ke Jesus ama eset, nte mme angel oro ẹkewụkde mmọ ndinam. Ke adan̄aemi mmọ ẹsụk ẹfehede ẹka ke ofụri ukeme mmọ, Jesus osobo ye mmọ onyụn̄ ọdọhọ ete: “Mmọkọm mbufo.” Ke ẹduọn̄ọde enye ke ukot, mmọ ẹtuak ibuot ẹnọ enye. Ndien Jesus ọdọhọ ete: “Ẹkûfehe ndịk: ẹka ẹkọdọhọ nditọete Mi, ẹte, mmọ ẹnyọn̄ọ ẹka ke Galilee; mmọ ẹdinyụn̄ ẹkụt Mi do.”

Mbemiso, ke ini unyekisọn̄ okotịbede, mme angel ẹkenyụn̄ ẹbiọn̄ọrede, mbonekọn̄ oro ẹkedude ke ukpeme ẹma ẹnyek idem ẹnyụn̄ ẹkabade ẹtie nte mme akpan̄kpa. Ke ẹfiakde ẹdiọn̄ọ idem, mmọ inikiet inikiet ẹma ẹdụk obio ẹnyụn̄ ẹmen kpukpru se ikotịbede ẹtịn̄ ẹnọ ikpọ oku. Ke ẹma ẹkesop ibuot ye “mbiowo” mme Jew, ẹbiere ndidomo ndifụk n̄kpọntịbe emi ke ndinọ mbonekọn̄ oro ubọkedem. Ẹteme mmọ ẹte: “Mbufo ẹdọhọ ẹte, mbet Esie ẹkedi ke okoneyo ediyịp Enye, ke adan̄aemi nnyịn idede idap.”

Sia ẹkemede ndiwot mbonekọn̄ Rome ke ndide idap ke itieutom, mme oku oro ẹwọn̄ọ ẹte: “Edieke ikọ [ude idap mbufo] emi osịmde andikara utọn̄, nnyịn iyekpe ye enye, isio mbufo ke ndịk.” Sia ubọkedem oro enen̄erede okpon, mbonekọn̄ oro ẹnam kpa nte ẹtemede mmọ. Nte utịp, nsunsu etop aban̄ade ediyịp oro ẹyịpde okpo Jesus asuana ntatara ntatara ke otu mme Jew.

Mfụhọ akan Mary Magdalene, oro osụhọde ke udi ubọk. Jesus okpodu m̀mọ̀n̄? Ke onụhọde man onyụn̄ọ ese esịt udi, enye okụt angel iba ye afia edisịnen̄kpọ, oro ẹfiakde ẹbiọn̄ọde! Kiet etie ke n̄kan̄ ibuot ndien enye eken ke n̄kan̄ ukot emi okpo Jesus akanade. Mmo ẹbụp ẹte, “N̄wan, nsinam atuade?”

Mary ọbọrọ ete, “Ẹkemen Ọbọn̄ mi ẹfep, ndien mfiọkke ebiet eke ẹkenịmde Enye do.” Ekem enye ọwọn̄ọde iso onyụn̄ okụt owo kiet oro afiakde obụp enye ukem mbụme emi, ete: “N̄wan, nsinam atuade?” Ndien owo emi obụp n̄ko ete: “Oyom anie?”

Ke ekerede ete owo emi edi ekpeme-in̄wan̄ oro udi odude, n̄wan emi ọdọhọ enye ete: “Ọbọn̄, edieke afo ekemende okpo efep, sian mi ebiet eke okonịmde enye, ndien ami ndibiom enye nnyọn̄.”

Owo oro ete, “Mary.” Ndien inikiet inikiet n̄wan emi ọdiọn̄ọ, oto ntịm mmehe usụn̄ oro enye etịn̄de ikọ ọnọ enye, ete ke edi Jesus. Enye osio n̄kpo ete “Rabboni, oro edi, Andikpep.” Ndien ye akwa idara, n̄wan emi omụm enye. Edi Jesus ọdọhọ ete: “Kûtụk Mi; koro ndọkke kan̄a ntiene Ete; edi bịne nditọete Mi kọdọhọ mmọ ete, M̀mọ̀n̄ ndidọk ntiene Ete Mi ye Ete mbufo, Abasi Mi ye Abasi mbufo.”

Mary efehe idahaemi aka ke ọtọ oro mme apostle ye ekemmọ mbet ẹbonode. Enye adian mbụk esie ke mbụk oro iban eken ẹma ẹkenọnọ ẹban̄a edikụt Jesus oro ẹkenamde eset. Edi, iren ẹmi, oro mîkonịmke akpa iban oro ke akpanikọ, nte an̄wan̄ade inịmke Mary n̄ko. Matthew 28:3-15; Mark 16:5-8; Luke 24:4-12; John 20:2-18.

◆ Ke okụtde nte udi anade ukpọk, nso ke Mary Magdalene anam, ndien nso ifiọk n̄kpọntịbe ke iban eken ẹnyene?

◆ Didie ke Peter ye John ẹnam n̄kpọ ke ẹkụtde nte udi anade ukpọk?

◆ Nso ke iban eken ẹsobo ke usụn̄ nte mmọ ẹkade nditọt ediset ke n̄kpa Jesus nnọ mme mbet?

◆ Nso itịbe inọ mbonekọn̄ ukpeme oro, ndien nso ke ẹnam ẹban̄a ntọt oro mmọ ẹkenọde mme oku?

◆ Nso itịbe ke ini Mary Magdalene odude ikpọn̄ ke udi, ndien nso ke mme mbet ẹnam ẹban̄a ntọt oro iban ẹmi ẹnọde?