Ẹmek Mme Esenyịn ye Mme Asan̄autom Unamutom ke Ido Ukara Abasi
“Ẹtịm ẹse idem mbufo, ye ofụri otu erọn̄, emi Edisana Spirit ekenịmde mbufo ke mme andikpeme mmọ.”—UTOM 20:28.
1, 2. Didie ke Isaiah 60:22 osu?
JEHOVAH ama ebem iso etịn̄ ke anyan ini ko ete ke n̄wọrọnda n̄kpọ ayada itie ke utịt ini. Ẹma ẹda prọfet Isaiah ẹtịn̄ ẹte: “Ekpri ayakabade edi tọsịn, esisịt oyonyụn̄ akabade edi ọkpọsọn̄ idụt: ami Jehovah nyanam enye awara ke ekem ini esie.”—Isaiah 60:22.
2 Ndi uyarade odu nte ke ntịn̄nnịm ikọ emi ke osu mfịn? Ih, ke akpanikọ odu! Ke mme iduọk isua 1870, ẹma ẹtọn̄ọ esop ikọt Jehovah kiet ke Allegheny, Pennsylvania, U.S.A. Ọtọn̄ọde ke utọ ekpri ntọn̄ọ oro, ediwak esop tọsịn ke mme itie duop ẹsiaha ndien ke ẹkọri ke ofụri ererimbot. Ediwak miliọn mme anditan̄a Obio Ubọn̄—ọkpọsọn̄ idụt—ẹbuana idahaemi ye se ibede esop 91,000 ke idụt 235 ke ofụri isọn̄. Ye unana mbụme, emi ọsọn̄ọ nte ke Jehovah ke anam editan̄ mme ata andituak ibuot mbok awara mbemiso “akwa ukụt” oro enen̄erede ekpere idahaemi.—Matthew 24:21; Ediyarade 7:9-14.
3. Nso ke ndina baptism ‘ke enyịn̄ Ete, Eyen, ye Edisana Spirit’ ọwọrọ?
3 Ke ẹma ẹkenam ọkpọkpọ uyakidem ẹnọ Jehovah, ndien ke n̄kemuyo ye item Jesus, ediwak miliọn owo emi ẹma ẹna baptism “ke enyịn̄ Ete ye Eyen ye Edisana Spirit.” (Matthew 28:19) Ndina baptism “ke enyịn̄ Ete” ọwọrọ nte ke mbon oro ẹma ẹkeyak idem ẹnọ mi ẹnyịme Jehovah nte Ete mmọ eke heaven ye Ọnọ-Uwem ẹnyụn̄ ẹsụk ibuot ẹnọ itie edikara esie. Baptism ‘ke enyịn̄ Eyen’ ọwọrọ ke mmọ ẹnyịme Jesus Christ nte Andifak, Adausụn̄, ye Edidem mmọ. Mmọ n̄ko ẹnyịme udeme oro edisana spirit, m̀mê anamutom odudu, Abasi enyenede ke ndinọ uwem mmọ ndausụn̄. Emi owụt nte ke mmọ ẹna baptism ‘ke enyịn̄ Edisana Spirit.’
4. Didie ke ẹdori mme asan̄autom Christian ubọk?
4 Ke baptism mmọ, ẹdori mbufa mbet ubọk nte mme asan̄autom Jehovah Abasi. Anie odori mmọ ubọk? Ke ntatara usụn̄, mme ikọ oro ẹwetde ke 2 Corinth 3:5 (NW) ẹban̄a mmọ: “Abasi anam nnyịn itịm idot [nte mme asan̄autom].” Mmọ ikemeke ndikere mban̄a ukpono ekededi oro okponde akan edidi se Jehovah Abasi ke idemesie odoride ubọk! Ke mmọ ẹma ẹkena baptism, mmọ ẹyeka iso ndikọri ke n̄kan̄ eke spirit nte mme asan̄autom “eti mbụk” adan̄a nte mmọ ẹnyịmede ndausụn̄ spirit Abasi ẹnyụn̄ ẹkade iso ndida Ikọ esie nsịn ke edinam.—Matthew 24:14, NW; Utom 9:31.
Ẹmek ke Ido Ukara Abasi —Idịghe ke Ido Ukara Mbio Obio
5. Nte ẹsimek mme esenyịn ye mme asan̄autom unamutom ke ido ukara mbio obio? Nam an̄wan̄a.
5 Ẹyom eti edise enyịn ẹto mme esenyịn oro ẹdotde ẹnyụn̄ ẹyom un̄wam ẹto mme asan̄autom unamutom man ẹse ẹban̄a mme udọn̄ n̄kpọ eke spirit mme ifịk ifịk asan̄autom oro ibat mmọ ọkọride-kọri. (Philippi 1:1) Didie ke ẹsimek utọ iren oro ẹmade n̄kpọ eke spirit do? Idịghe ke utọ ido edimek oro Christendom ẹsidade. Ke uwụtn̄kpọ, owo imekke mme esenyịn Christian ke ido ukara mbio obio, oro edi, ebe ke n̄wakn̄kan ibat mme andibuana ke esop ndimenede ubọk. Utu ke oro, ẹnam mme edimek emi ke ido ukara Abasi. Nso ke emi ọwọrọ?
6. (a) Nso idi ata ukara Abasi? (b) Ntak emi edimek mme esenyịn ye mme asan̄autom unamutom edide edimek eke ukara Abasi?
6 Ke nditịn̄ ibio ibio, ata ukara Abasi edi ukara emi Abasi akarade. Mme Ntiense Jehovah ẹsụk ibuot unyịme unyịme ẹnọ ukara esie ẹnyụn̄ ẹdiana ọtọkiet man ẹnam uduak Abasi. (Psalm 143:10; Matthew 6:9, 10) Edimek mme esenyịn Christian, m̀mê mbiowo, ye mme asan̄autom unamutom edi edimek eke ukara Abasi koro ẹnam editoro ye edimek utọ iren oro ẹdotde mi nte ekemde ye ndutịm Abasi oro ẹwetde ke Edisana N̄wed Abasi. Ndien nte “etubom kpukpru,” Jehovah enyene unen ndibiere nte ẹdinamde n̄kpọ ke esop esie oro ẹkụtde ke enyịn.—1 Chronicles 29:11; Psalm 97:9.
7. Didie ke ẹkara Mme Ntiense Jehovah?
7 Ke okpụhọrede ye ediwak otu ido ukpono ke Christendom, Mme Ntiense Jehovah ibiereke orụk ndutịm ido ukpono oro mmọ ẹtienede inọ idemmo. Mme ata Christian emi ẹdomo ndisọn̄ọ nyịre ye mme idaha Jehovah. Mmọ idaha ndusụk ndutịm esop, eke otu mme ọkwọrọ ederi, m̀mê eke ikpọ owo ufọkabasi imek mme esenyịn mmọ isịn ke itieutom. Edieke mme edu ererimbot ẹyomde ndibe ndụk mme edimek emi, ikọt Jehovah isinyịmeke. Ye iwụk, mmọ ẹsisọn̄ọ ẹda ke ukem idaha oro mme apostle ẹkedade ke akpa isua ikie ke ini mmọ ẹkedọhọde ẹte: “Nnyịn inyene ndikop uyo Abasi n̄kan uyo owo.” (Utom 5:29) Ntem, Mme Ntiense ẹsisụk idem ẹnọ Abasi ke kpukpru n̄kpọ. (Mme Hebrew 12:9; James 4:7) Nditiene ndutịm ukara Abasi ada unyịme Abasi edi.
8. Didie ke ndutịm ukara mbio obio okpụhọde ye ndutịm ukara Abasi?
8 Nte mme asan̄autom Akwa Akara Ukara Abasi, Jehovah, nnyịn iyanam ọfọn ndikere mban̄a mme ukpụhọde oro ẹdude ke ufọt ndutịm ukara mbio obio ye ndutịm ukara Abasi. Mme ndutịm ukara mbio obio ẹsiyom kpukpru obio ẹnyene mme andida ke ibuot mmọ ndien ẹsiwak ndibebịn ikọt nyom ifetutom ẹnyụn̄ ẹmek ebe ke n̄wakn̄kan ibatowo ndisịn n̄wed nnọ. Owo ibuanke mme utọ edinam oro ke mme edimek eke ukara Abasi. Mme edimek eke ukara Abasi itoho owo; m̀mê mmọ ndito ndusụk n̄ka oro ibet enyịmede. Nte an̄wan̄ade, ke etịn̄de aban̄a edimek oro Jesus ye Jehovah ẹkemekde enye nte “apostle mme Gentile,” Paul ama asian mbon Galatia ete ke edimek imọ “itoho owo, inyụn̄ idịghe owo ẹnọ, edi Jesus Christ ọnọ, ye Abasi Ete, emi akanamde Enye eset ke n̄kpa.”—Rome 11:13; Galatia 1:1.
Edisana Spirit Emek
9. Nso ke Utom 20:28 etịn̄ aban̄a edimek mme esenyịn Christian?
9 Paul ama eti mme esenyịn oro ẹkedude ke Ephesus ete ke Abasi akada edisana spirit emek mmọ. Enye ọkọdọhọ ete: “Ẹtịm ẹse idem mbufo, ye ofụri otu erọn̄, emi Edisana Spirit ekenịmde mbufo ke mme andikpeme mmọ, ete ẹbọk mbon ufọk Abasi, emi Enye ekedepde ke iyịp [Eyen] Esie.” (Utom 20:28, sịghisịghi ubọkn̄wed edi eke nnyịn.) Ama oyom edisana spirit aka iso ada mme esenyịn Christian oro usụn̄ nte mmọ ẹkenamde utom mmọ nte mme andikpeme otuerọn̄ Abasi. Edieke eren emi ẹkemekde ẹsịn ke itieutom oro mîkesịmke mme idaha Abasi aba, nte ini akakade edisana spirit ama anam n̄kpọ ndisio enye ke itieutom esie mfep.
10. Didie ke edi nte ke edisana spirit enyene akpan udeme ke mme edimek eke ukara Abasi?
10 Didie ke edi nte ke edisana spirit enyene akpan udeme? Akpa kan̄a, ẹkeda edisana spirit ẹwet n̄wetnnịm n̄kpọ oro owụtde mme n̄kpọ ẹyomde kaban̄a edise enyịn ke n̄kan̄ eke spirit. Ke leta oro enye ọkọnọde ẹsọk Timothy ye Titus, Paul ama owụt mme idaha oro mme esenyịn ye mme asan̄autom unamutom ẹkenyenede ndisịm. Ke ofụri ofụri, enye ama asiak nsio nsio n̄kpọ 16 oro ẹyomde. Ke uwụtn̄kpọ, mme esenyịn ẹkenyene ndidi mbon emi owo mîkemeke ndidori mmọ ikọ, ẹfara ke idem, ẹnyene eti ibuot, ẹtịm ẹsan̄a, ẹkama isenowo, ẹma ndikpep owo n̄kpọ, ẹnyụn̄ ẹnịm nti uwụtn̄kpọ nte mme ibuot ubon. Mmọ ẹkenyene ndida ukem ukem ke edida n̄kpọsọn̄ mmịn, ikenyeneke ndidi mme ama okụk, ndien ẹkenyene ndinyene mfara ke idem. Ukem ntre, ẹma ẹnịm n̄kokon̄ idaha ẹnọ mbon oro ẹnyanarede ẹbịne ndidi se ẹmekde nte mme asan̄autom unamutom.—1 Timothy 3:1-10, 12, 13; Titus 1:5-9.
11. Nso idi ndusụk n̄kpọ oro ẹnamde owo odot oro anade iren emi ẹnyanarede ẹbịne edibiom mbiomo ke esop ẹsịm?
11 Edifiak ndụn̄ọde ndusụk ke otu mme n̄kpọ ẹnamde owo odot mi owụt nte ke ana mbon oro ẹdade usụn̄ ke utuakibuot Jehovah ẹnịm eti uwụtn̄kpọ ke edu uwem Christian. Ana iren emi ẹnyanarede ẹbịne edibiom mbiomo ke esop ẹnọ uyarade nte ke edisana spirit ke anam utom ke idem mmimọ. (2 Timothy 1:14) Enyene ndina in̄wan̄ in̄wan̄ nte ke spirit Abasi anam iren emi ẹsion̄o mbun̄wụm ẹdide “ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre ifụre ido, ye mfara ke idem.” (Galatia 5:22, 23) Utọ mbun̄wụm oro ẹyewụt idem ke usụn̄ nte mmọ ẹnamde n̄kpọ ye mme ekemmọ andinịm ke akpanikọ ye mbon en̄wen. Edi akpanikọ, ndusụk owo ẹkeme ndinyene ndusụk mbun̄wụm spirit, ke adan̄aemi mbon efen ẹkemede ndisịm mme n̄kpọ eken ẹnamde owo odot ndidi esenyịn ke ata akamba udomo. Nte ededi, ke ofụri usụn̄ uwem mmọ, kpukpru mbon oro ẹdoride enyịn ndidi se ẹmekde nte mme esenyịn m̀mê mme asan̄autom unamutom ẹkpenyene ndiwụt nte ke mmimọ idi iren emi imade n̄kpọ eke spirit inyụn̄ idude uwem ekekem ye mme n̄kpọ oro Ikọ Abasi oyomde.
12. Mmanie ke ẹkeme ndidọhọ ke edisana spirit emek?
12 Ke ini Paul eketemede mbon efen ete ẹkpebe imọ, enye ama ekeme ndinam oro ye uko koro enye ke idemesie ekekpebede Jesus Christ, emi ‘ọkọkpọn̄de uwụtn̄kpọ ọnọ nnyịn, ete, nnyịn ikpetiene isan̄a ke nde ikpat Imọ.’ (1 Peter 2:21; 1 Corinth 11:1) Ntem ẹkeme ndidọhọ ke edisana spirit emek mbon oro ẹsịmde mme n̄kpọ N̄wed Abasi oro ẹyomde ke ini ẹmekde mmọ nte mme esenyịn m̀mê mme asan̄autom unamutom.
13. Didie ke edisana spirit esin̄wam mbon oro ẹtorode iren ẹnọ ndinam utom ke esop?
13 N̄kpọ efen odu oro owụtde nte edisana spirit anamde utom ke editoro ye edimek mme esenyịn. Jesus ọkọdọhọ ete ke ‘Ete nnyịn ke heaven esiyak Edisana Spirit ọnọ mmọ eke ẹben̄ede Enye.’ (Luke 11:13) Ntre ke ini mbiowo esop n̄kann̄kụk ẹsopde idem nditoro iren nnọ mbiomo ke esop, mmọ ẹsibọn̄ akam ẹben̄e spirit Abasi ndida mmọ usụn̄. Mmọ ẹsikọn̄ editoro mmọ ke se ẹwetde ke Ikọ Abasi eke odudu spirit, ndien edisana spirit esin̄wam mmọ ndifiọk m̀mê owo oro ẹyomde ndimek esịm mme n̄kpọ N̄wed Abasi oro ẹyomde. Mbon oro ẹnamde mme editoro oro ikpenyeneke ndiyak nte owo etiede ke enyọn̄ enyọn̄ idem, ifiọkn̄wed, m̀mê ndammana ukeme, otụk mmọ nte mîdotke. Akpan n̄kpọ oro anade mmọ ẹwụk ntịn̄enyịn enyene ndidi m̀mê enye edi owo emi amade n̄kpọ eke spirit, owo emi mme andibuana ke esop mîdimen̄eke ndika mbịne kaban̄a item eke spirit.
14. Nso ke nnyịn ikpep ito Utom 6:1-3?
14 Ke adan̄aemi mme otu mbiowo ẹbuanade ye mme esenyịn oro ẹsan̄ade-san̄a nditoro nditọete ndinam utom nte mbiowo ye mme asan̄autom unamutom, ẹnam ata edimek ẹtiene uwụtn̄kpọ oro ẹkenịmde ke akpa isua ikie. Ke idaha kiet, ẹma ẹyom iren oro ẹdotde ke n̄kan̄ eke spirit ndise mban̄a akpan utom. Otu ukara ama ọnọ ndausụn̄ etienede mi: “Ẹmek owo itiaba, emi ẹnyenede eti enyịn̄, ẹnyụn̄ ẹyọhọde ye Edisana Spirit, ye ifiọk, ẹsio ke otu idem mbufo, man nnyịn inịm mmọ ndise mban̄a utom emi.” (Utom 6:1-3) Ke adan̄aemi iren emi ẹkedude do ẹkenamde editoro nnọ, iren emi ẹkenọde mbiomo edimek ke Jerusalem ẹkenam edimek oro. Ẹtiene ukem uwụtn̄kpọ oro mfịn.
15. Didie ke Otu Ukara abuana ke n̄kpọ aban̄ade edimek mme owo?
15 Otu Ukara eke Mme Ntiense Jehovah esimek kpukpru mme andibuana ke Kọmiti N̄kọk Itieutom nnennen nnennen. Ke ini ẹbierede m̀mê anie ekeme ndikama utọ ndodobi mbiomo oro, Otu Ukara esiti mme ikọ Jesus emi: “Owo ekededi eke ẹnọde enye ediwak n̄kpọ, ke ẹdiyom ediwak n̄kpọ ke ubọk esie: kpa ntre n̄ko owo eke ẹyakde ediwak n̄kpọ ẹnọ enye, ke ubọk esie ke ẹdibụp se iwakde ikan.” (Luke 12:48) Ke adianade ye edimek mme andibuana ke Kọmiti N̄kọk Itieutom, Otu Ukara esimek mbiowo Bethel ye mme esenyịn oro ẹsan̄ade-san̄a. Nte ededi, mmọ ẹsidọn̄ nditọete oro ẹdotde ndinam utom ke ibuot mmọ ndinam ndusụk edimek eken. Uwụtn̄kpọ N̄wed Abasi odu n̄ko kaban̄a emi.
‘Mek, Kpa nte N̄ketemede Fi’
16. Ntak emi Paul ọkọkpọn̄de Titus ke Crete, ndien nso ke emi owụt kaban̄a mme edimek eke ukara Abasi mfịn?
16 Paul ama ọdọhọ nsan̄autom esie Titus ete: “N̄kọkpọn̄ fi ke Crete ke ntak emi, man afo enen̄ede enịm n̄kpọ eke ẹnanade, onyụn̄ emek mbiowo enịm ke obio ke obio, kpa nte n̄ketemede fi.” (Titus 1:5) Ekem Paul ama owụt mme n̄kpọ ẹnamde owo odot oro Titus ekenyenede ndiyom nto iren oro ẹdidotde utọ edimek oro. Ke ntre, mfịn Otu Ukara emek nditọete oro ẹdotde ke mme n̄kọk itieutom ndida ke ibuot esie ke ndimek mbiowo ye mme asan̄autom unamutom. Mbon oro ẹdade ke ibuot Otu Ukara ẹsikpeme man ẹkụt ẹte ke imenen̄ede ifiọk inyụn̄ itiene ndausụn̄ N̄wed Abasi ke ndinam mme utọ edimek oro. Ntem, ke idak ndausụn̄ Otu Ukara ke ẹmek iren oro ẹdotde ndinam utom ke mme esop Mme Ntiense Jehovah ke ofụri ererimbot.
17. Didie ke ọfis n̄kọk itieutom esise aban̄a editoro nnọ kaban̄a edimek nte mme esenyịn ye mme asan̄autom unamutom?
17 Ke ini ẹyakde mme editoro kaban̄a edimek mme esenyịn ye mme asan̄autom unamutom ẹnọ ọfis n̄kọk itieutom Watch Tower Society, iren emi ẹnyenede mbufiọk ẹsiberi edem ke spirit Abasi kaban̄a ndausụn̄ ke ndinam mme edimek oro. Iren emi ẹsifiọk ke mmimọ iyanam ibat, ẹfiọkde ẹte ke inaha mmimọ isọp idori owo ubọk imen isịn ke itie, mbak mmimọ idibuana ke idiọkn̄kpọ esie.—1 Timothy 5:22.
18, 19. (a) Didie ke ẹsinam ndusụk edimek? (b) Didie ke ẹnam ofụri ndutịm editoro ye edimek?
18 Ẹkeme ndida leta oro enyenede akpan ufịkn̄kpọ otode n̄ka oro ibet enyịmede nnam ndusụk edimek. Ẹkeme ndida utọ leta oro mmek se iwakde ibe eyenete kiet ke esop.
19 Jehovah anam mme edimek eke ukara Abasi ebe ke Eyen esie ye usụn̄ oro ẹkemede ndikụt ke isọn̄, kpa “asan̄autom emi anamde akpanikọ, onyụn̄ enyenede ọniọn̄” ye Otu Ukara esie. (Matthew 24:45-47) Edisana spirit ọnọ ofụri utọ ndutịm editoro ye edimek oro ndausụn̄. Oro edi ntre koro ẹwet mme n̄kpọ ẹnamde owo odot ke Ikọ Abasi, emi ẹdade odudu edisana spirit ẹwet, ndien owo emi ẹmekde ọnọ uyarade edision̄o mbun̄wụm spirit oro. Ke ntre, ẹnyene ndida nte ke edisana spirit anam mme edimek oro. Kpa nte ẹkemekde mme esenyịn ye mme asan̄autom unamutom ke ido ukara Abasi ke akpa isua ikie, ukem oro ke ẹnam mfịn.
Ndiwụt Esịtekọm Mban̄a Ndausụn̄ Jehovah
20. Ntak emi nnyịn itienede itịn̄ ikọ David oro ẹwetde ke Psalm 133:1?
20 Ke ini uforo eke spirit ye n̄kọri ukara Abasi emi ke utom ukwọrọikọ Obio Ubọn̄, nnyịn imowụt esịtekọm nte ke Jehovah akpan akpan emek mme esenyịn ye mme asan̄autom unamutom. Ndutịm N̄wed Abasi emi an̄wam ke ndimụm n̄kokon̄ idaha edinen ido Abasi n̄kama ke otu nnyịn nte Mme Ntiense Jehovah. Akan oro, edu Christian ye ukeme ofụri esịt iren emi ẹtịp akamba akamba ẹsịn ke utịbe utịbe emem ye edidianakiet nnyịn nte mme asan̄autom Jehovah. Ukem nte David andiwet psalm, onụk nnyịn ke ntre ndifiori nte: “Idụn̄ nditọ-ete ke idem ọtọ kiet ọfọn didie! onyụn̄ eye didie!”—Psalm 133:1.
21. Didie ke Isaiah 60:17 osu mfịn?
21 Nnyịn iwụt esịtekọm didie ntem iban̄a ndausụn̄ Jehovah ebe ke Ikọ ye edisana spirit esie! Ndien, ke akpanikọ, mme ikọ oro ẹwetde ke Isaiah 60:17 ẹnyene se ẹwọrọde: “Nyada gold ndinịm ke itie okpoho, nyada silver ndinịm ke itie ukwak, ye okpoho ke itie eto, ye ukwak ke itie itiat: ndien nyanam mbọn̄ fo ẹdi emem, nyonyụn̄ nnam mme andikara fi ẹdi edinen ido.” Nte ẹkade iso ndida ndutịm ukara Abasi nnam n̄kpọ ọyọhọ ọyọhọ ke otu Mme Ntiense Jehovah, nnyịn imokụt nti idaha emi ke ofụri esop Abasi eke isọn̄.
22. Nnyịn nte enende iwụt esịtekọm iban̄a nso, ndien nso ke nnyịn ikpebiere ndinam?
22 Nnyịn imenen̄ede iwụt esịtekọm iban̄a mme ndutịm ukara Abasi oro nnyịn inyenede. Ndien nnyịn imenen̄ede iwụt esịtekọm iban̄a ọkpọsọn̄ ye ọnọ-uyụhọ utom oro mme esenyịn ye mme asan̄autom unamutom oro ẹmekde ke ido ukara Abasi ẹnamde. Nnyịn ke ofụri esịt imotoro ima ima Ete nnyịn eke heaven, emi ọnọde nnyịn uforo eke spirit onyụn̄ ọdiọn̄de nnyịn ata uwak uwak. (Mme N̄ke 10:22) Ke ntre, ẹyak nnyịn ibiere ndisan̄a ikpat kiet ye esop Jehovah. Ke akande kpukpru, ẹyak nnyịn ika iso ndinam utom ọtọkiet ke edidianakiet ke ukpono, itoro, ye ubọn̄ akwa ye edisana enyịn̄ Jehovah.
Didie ke Afo Ọkpọbọrọ?
• Ntak emi nnyịn ikemede ndidọhọ ke ẹmek mme esenyịn ye mme asan̄autom unamutom ke ido ukara Abasi, idịghe ke ido ukara mbio obio?
• Didie ke edisana spirit esimek iren Christian oro ẹdotde?
• Didie ke Otu Ukara abuana ke edimek mme esenyịn ye mme asan̄autom unamutom?
• Ke se iban̄ade mme edimek eke ukara Abasi, ntak emi nnyịn ikpowụtde esịtekọm inọ Jehovah?
[Mme ndise ke page 15]
Mbiowo ye mme asan̄autom unamutom ẹnyene ifet ndinam utom ebe ke edimek eke ukara Abasi