Ndikọ Owo ke Mmọn̄ Ofụri Ererimbot
“Koro edieke n̄kwọrọde gospel, nnyeneke ntak mbụre; utom oro obiomo mi ke idem nte n̄kpọ eke nnyenede ndinam; koro idifọnke-fọn inọ mi edieke mmen̄kwọrọke gospel.”—1 CORINTH 9:16.
1, 2. (a) Mmanie ke akpanikọ ẹsobo n̄kpọ-ata oro ẹwụtde ke 1 Corinth 9:16, ndien ntak afo ọbọrọde ntre-e? (b) Nso mbiomo ke Mme Ntiense Jehovah ẹnyịme ndibiom?
MMANIE ke ọyọhọ isua ikie-20 emi ẹnen̄ede ẹsobo n̄kpọ-ata oro ikọ Paul eke enyọn̄ emi odoride? Mmanie ẹwọrọ ẹka ke ererimbot ke ediwak miliọn ndikọ irenowo ye iban ẹmi “ẹnyenede udọn̄ ke n̄kpọ eke spirit mmọ”? (Matthew 5:3, NW) Mmanie mîdọn̄ke enyịn iban̄a n̄kpọkọbi ye n̄kpa, ndien mmanie ẹsobo n̄kpọ ntre ke ediwak idụt, ke ntak edisu ewụhọ Christ ke Matthew 24:14?
2 Mbụk ọbọrọ ete: Mme Ntiense Jehovah. Isua oko ikpọn̄ Mme Ntiense ẹwakde ẹbe miliọn inan̄ ‘ẹkekwọrọ eti mbụk’ ke ufọk ke ufọk ke idụt ye efakutom 211 ye ke se iwakde ikan usem 200. Mmọemi ikedịghe sụk otu mme isụn̄utom oro ẹnọde ukpep. Baba, kpukpru owo ke otu Mme Ntiense Jehovah ẹkụt nte obiomode mmimọ ndikwọrọ nnyụn̄ n̄kpep n̄kpọ ke ufọk ke ufọk ye ke kpukpru ifet oro odotde. Ntak emi mmọ ẹnyenede udọn̄ ndibuana se mmọ ẹnịmde ke akpanikọ ye mmọ en̄wen? Koro mmọ ẹfiọk ẹte ke ifiọk asan̄a ye mbiomo.—Ezekiel 33:8, 9; Rome 10:14, 15; 1 Corinth 9:16, 17.
Ndikọ Owo, N̄kpọ-ata Ofụri Ererimbot
3. Utom ukọiyak ana atara okosịm nso udomo?
3 Akwa utom ukọiyak emi itreke, yak idọhọ, ke ndusụk akpa m̀mê n̄kpọdiọhọ mmọn̄ m̀mê idem akwa akpa inyan̄ibom. Baba, nte Jesus okowụkde, ẹkenyene ndinam enye ke “kpukpru mme idụt.” (Mark 13:10) Mbemiso ọdọkde ebịne Ete esie, Jesus ama asian mme mbet esie ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye edisana spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu osịm utịt ererimbot.”—Matthew 28:19, 20.
4. (a) Anaedi nso ikakpa mme akpa anditiene Jesus ẹdide Jew idem? (b) Didie ke Mme Ntiense Jehovah ẹse udomo utom ukwọrọikọ mmọ?
4 Ye mme anditiene Jesus ẹdide Jew, emi ekedi utom nduaidem. Enye ama asian mbet esie ẹdide Jew ete ke mmọ kemi ẹkenyene ndika mbịne mme Gentile ‘oro mîsanake’ ẹmi ẹtode ke kpukpru idụt ẹnyụn̄ ẹkpep mmọ n̄kpọ. Ama oyom edinam ndusụk edinen̄ede ke n̄kan̄ mmọ man mmọ ẹdiọn̄ọ se utom oro ọwọrọde ẹnyụn̄ ẹnam enye. (Utom 10:9-35) Edi usụn̄ efen ikodụhe; Jesus ama asian mmọ ke n̄ke ete ke “in̄wan̄ edi ererimbot.” Ke ntre, Mme Ntiense Jehovah mfịn ẹse ofụri ererimbot nte ebiet ukọiyak oro mmọ ẹnyenede unen. Adan̄a idụhe ke “mmọn̄” ndibiọn̄ọ utom oro Abasi ọnọde mmọ. Ndusụk ini esiyom mbufiọk ke ebiet emi ifụre ido ukpono mîdụhe. Kpa ye oro, mmọ ẹsinam utom ukọiyak ye nte ini edide usọp usọp ke ekikere. Ntak edide ntre-e? Koro mme n̄kpọntịbe ererimbot ye nte prọfesi Bible osude owụt ete ke nnyịn idu ke akpatre ikpehe ke utom ukọiyak ofụri ererimbot emi.—Matthew 13:38; Luke 21:28-33.
N̄kọri ke Utom Ukọiyak Ofụri Ererimbot
5. Nso orụk owo ẹnam n̄kpọ ẹban̄a utom ukọiyak ofụri ererimbot?
5 “Ẹkekọ” n̄wakn̄kan ke otu mme ada udeme Obio Ubọn̄ oro ẹyetde aran ke mme idụt mbemiso 1935, ntre anaedi ọyọhọ ibat mmọ ama ekem. Ntre, akpan akpan ọtọn̄ọde ke 1935, Mme Ntiense Jehovah ke ẹyom mbon oro ẹsụhọrede idem oro ẹkemede nditịn̄ mban̄a nte “mbon nsụkidem” ẹmi ‘ẹdidade isọn̄ ẹnyene.’ (Psalm 37:11, 29) Mmọemi ẹdi mbon oro “ẹsemede ẹnyụn̄ ẹtuade ẹban̄a kpukpru mbubiam ido ẹmi mmọ ẹnamde ke ufọt esie.” Mmọ ẹnam n̄kpọ ke ufọn ukara Obio Ubọn̄ Abasi mbemiso “akwa ukụt” osịmde idiọk ye oburobụt editịm n̄kpọ Satan ẹnyụn̄ ẹtopde mme andituak ibuot nnọ enye ẹdọn̄ ke “akwa ikan̄ eke asakde” emi edide nsinsi nsobo.—Ezekiel 9:4; Matthew 13:47-50; 24:21.
6, 7. (a) Nso usio-ukot ke ẹkenam ke 1943 kaban̄a utom ukwọrọikọ? (b) Nso ikedi utịp?
6 Nte utom ukọiyak ofụri ererimbot omokụt unen kan̄a kemi? Yak akpanikọ ẹtịn̄ ikọ ke idemmọ. Ko ke edem ke 1943, Ekọn̄ Ererimbot II ke okosụk ofụme, edi mme anam-akpanikọ nditọete oro ẹyetde aran ke ibuot itieutom ofụri ererimbot eke Mme Ntiense Jehovah ke Brooklyn, New York, ẹma ẹda ẹkụt nte ke ẹyenam akwa utom ukọiyak ofụri ererimbot. Ntre, nso usio-ukot ke ẹkenam?a—Ediyarade 12:16, 17.
7 Ke 1943 Watchtower Society ama ọtọn̄ọ ufọkn̄wed isụn̄utom ẹmi ẹkotde Gilead (Hebrew, “Otu Ntiense”; Genesis 31:47, 48) oro ọkọtọn̄ọde ndinọ mme isụn̄utom ke mme itie ikie ukpep ke kpukpru ọfiọn̄ itiokiet man ẹkpekeme ndidọn̄ mmọ ẹka nte mme ndamban̄a ọkọiyak ke ofụri isọn̄. Ko ke ini oro, ifịk ifịk Mme Ntiense 126,329 kpọt oro ẹdide mme ọkọ owo ẹkedu ke idụt 54. ke ufan̄ isua duop ibat oro ama ekpere ndidọk nsịm Mme Ntiense 519,982 ke idụt 143! Ke akpanikọ, Ufọkn̄wed Gilead ama osion̄o mme uko uko ọkọiyak ẹdide iren ye iban, ẹmi ẹnyịmede ndiwọrọ n̄ka esenidụt nnyụn̄ n̄kpụhọde nda ekekem ye obufa mmọn̄ ukọiyak. Nte utịp, ediwak tọsịn mbon esịt akpanikọ ẹma ẹyere ikot. Mme isụn̄utom oro, ye Mme Ntiense n̄kann̄kụk oro mmọ ẹkedade ẹnam utom, ẹma ẹsịn itiat idakisọn̄ ẹnọ utịbe utịbe n̄kọri oro adade itie idahaemi.
8, 9. (a) Mme uwụtn̄kpọ ewe ke ẹkeme ndisiak kaban̄a n̄wọrọnda utom isụn̄utom? (b) Didie ke mme isụn̄utom ẹkụt n̄wọrọnda n̄kọri ke an̄wautom mmọ? (Se n̄ko 1992 Yearbook of Jehovah’s Witnesses.)
8 Ediwak anam-akpanikọ n̄kani mbon oro ẹkedude ke mme akpa otu ukpepn̄kpọ Gilead ke ẹsụk ẹnam utom ke utom esenidụt mmọ, idem okposụkedi mmọ kemi ẹma ẹkebe isua 70 m̀mê idem isua 80 ke emana. Uwụtn̄kpọ kiet oro owụtde ediwak ke otu mmọemi edi eke Eric Britten emi ọsọn̄de ke isua 82 ye n̄wan esie, Christina, ẹmi ẹkekụrede ukpep ke otu ukpepn̄kpọ Gilead ọyọhọ 15 ke 1950 ndien ke ẹsụk ẹnam utom ke Brazil. Ke ini mmọ ẹkekade ndinam utom ke Brazil, Mme Ntiense ke idụt oro ikosịmke 3,000. Idahaemi ẹwak ẹkan owo 300,000! Ke akpanikọ, ‘esisịt amakabade edi tọsịn’ ke Brazil koro utom ukọiyak omon̄wụm mfri.—Isaiah 60:22.
9 Ndien nso ke nnyịn ikeme nditịn̄ mban̄a mme isụn̄utom ke Africa? N̄wakn̄kan ke otu mmọ ẹma ẹkabade ẹmehe ye ata isio isio ido edinam ẹnyụn̄ ẹdi ẹdima mbon Africa. Uwụtn̄kpọ ẹdi John ye Eric Cooke ye iban mmọ, Kathleen ye Myrtle, ẹmi ẹnamde utom idahaemi ke South Africa. John ye Eric ẹkekụre ukpep ke ọyọhọ otu itiaita ke 1947. Ke otu mmọ, mmọ ẹma ẹnam utom ke Angola, Zimbabwe, Mozambique, ye South Africa. Ndusụk isụn̄utom ẹma ẹkpan̄a ke Africa ke ntak udọn̄ọ, ndien mmọ eken ke ntak ekọn̄ ye ukọbọ, utọ nte Alan Battey ye Arthur Lawson, ẹmi ẹkekpan̄ade ndondo emi ke ini ekọn̄ mbio obio ke Liberia. Edi, mmọn̄ Africa on̄wụm mfri etieti. Idahaemi Mme Ntiense ẹwakde ẹbe 400,000 ẹdu ke ofụri akwa ikpehe isọn̄ oro.
Kpukpru Owo Ẹnyene Udeme
10. Ntak-a ndien ke ewe usụn̄ ke mme asiakusụn̄ ẹnam utom oro odotde itoro?
10 Nte ededi, ẹnyene ndifiọk nte ke adan̄aemi mme isụn̄utom esenidụt ẹwakde ke mme itie tọsịn, mme asuanetop n̄kann̄kụk ye mme asiakusụn̄b ẹmesịm ediwak miliọn. Mmọ ke ẹnam akwa utom ukwọrọikọ ke ofụri isọn̄. Ke 1991 ke ẹbaharede ukem ukem mme asiakusụn̄ ye mme asan̄autom oro ẹsan̄ade-san̄a 550,000 ẹkedu. Nso uwak ibat ke oro edi ntem ke ini nnyịn ikerede iban̄a kpukpru mme anam-akpanikọ Ntiense ẹmi ẹsịnde akpan ukeme ndibuana ke akwa utom ukọiyak, ẹsịnde ọtọn̄ọde ke hour 60 osịm 140 ke ẹbaharede ukem ukem ke ebiet ekededi ke ukwọrọikọ kpukpru ọfiọn̄. Ediwak owo ẹnam emi ye ọkpọsọn̄ ọkpọkpọ n̄waidem ye ubiatokụk. Edi ntak-a? Koro mmọ ẹmade Jehovah Abasi mmọ ke ofụri esịt, ekikere, ukpọn̄, ye odudu, ndien mmọ ẹma mbọhọidụn̄ mmọ nte idemmọ.—Matthew 22:37-39.
11. Nso uyarade akpanikọ idu nte ke spirit Jehovah ke anam utom ke otu ikọt esie?
11 Nso ke nnyịn ikeme nditịn̄ mban̄a se ibede Mme Ntiense miliọn ita ye ubak eken ẹmi mîdụhe ke utom uyọhọ-ini edi kpa ye oro ẹsịnde ifịk ke utom Jehovah, nte idaha mmọ ẹdide? Ndusụk mmọ ẹdi ibanndọ, idem mme eka ẹmi ẹsede ẹban̄a n̄kpri nditọ, edi ẹmi ẹyakde ndusụk ọsọn̄urua ini mmọ ẹsịn ke utom ukọiyak ofụri ererimbot. Ediwak mmọ ẹdi mme ebendọ m̀mê mme ete ye utom idịbi udia uyọhọ-ini; edi, mmọ ẹsisio ini ẹnịm ke mme utịturua ye ke mbubịteyo man ẹkpep isenowo akpanikọ. Ekem odu akwa otu irenowo ye iban ẹmi mîdọhọ ndọ ye n̄kparawa owo ẹmi ẹbuanade ke ukwọrọikọ ẹnyụn̄ ẹtorode akpanikọ ebe ke edu mmọ. Ewe otu ido ukpono efen enyene se ibede mme anamutom unyịmesịt miliọn inan̄ oro owo mîkpehe okụk ẹmi ẹkwọrọde eti mbụk ukara Obio Ubọn̄ Abasi kpukpru ọfiọn̄? Ke akpanikọ emi owụt spirit Jehovah ke utom emi!—Psalm 68:11; Utom 2:16-18; men Zechariah 4:6 domo.
Mme N̄kpọ Oro Ẹtịpde Esịn ke N̄kọri
12. Ntak-a ndien ke adan̄a ibat ewe ke mme owo ẹnam n̄kpọ ẹban̄a akpanikọ?
12 Akwa utom ukwọrọikọ emi ke ada mme n̄wọrọnda utịp ẹdi kpukpru isua. Ke 1991 ẹma ẹnịm mbufa Mme Ntiense ẹwakde ẹbe 300,000 baptism ke ndibụk mmọ ofụri ofụri ke mmọn̄. Oro edi ukem ye se iwakde ibe esop 3,000 ẹmi kiet kiet enyenede Mme Ntiense 100! Didie ke ẹkenam kpukpru emi? Ẹyak nnyịn iti se Jesus ọkọdọhọde ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi . . . Ẹma ẹwet ke mme prọfet ẹte, Abasi eyekpep mmọ kpukpru n̄kpọ; kpukpru owo eke ẹkopde uyo Ete ẹnyụn̄ ẹbọde ukpepn̄kpọ ẹtiene Mi.” Ke ntre, idịghe sụk ke ukeme owo ke owo anam n̄kpọ aban̄a utom ukọiyak ofụri ererimbot. Jehovah ọdiọn̄ọ idaha esịt owo onyụn̄ odụri mbon oro ẹdotde adian idem.—John 6:44, 45; Matthew 10:11-13; Utom 13:48.
13, 14. Nso eti edu ke ediwak Mme Ntiense ẹwụt?
13 Nte ededi, mme ọkọiyak ẹdide owo ẹdi n̄kpọutom oro Jehovah adade ndidụri mme owo ndian idem. Ke ntre, edu mmọ ye mme owo ye efakutom emi mmọ ẹnamde utom edi akpan n̄kpọ. Edi n̄kpọ nsịnudọn̄ didie ntem ndikụt nte ke ata ediwak owo ẹmeda ikọ ẹmi Paul eketịn̄de ọnọ mbon Galatia ẹsịn ke esịt: “Ẹyak ikûkpa mba ke edinam eti n̄kpọ; koro ke edikem ini nnyịn iyedọk mbun̄wụm, edieke nnyịn mîyakke idem emem nnyịn.”—Galatia 6:9.
14 Ediwak anam-akpanikọ Mme Ntiense ẹmekwọrọ ikọ ke ediwak isua, ke adan̄aemi ẹkpemede mme n̄kpọntịbe ererimbot ketket. Mmọ ẹma ẹkụt ukara Nazi, Fascist, ye eke idụt ẹdahade ẹda ẹnyụn̄ ẹduọde. Ndusụk mmọ ẹmekụt ediwak ekọn̄ ẹmi ẹdade itie toto ke 1914. Mmọ ẹmekụt mme andikara ererimbot ẹkọn̄de idotenyịn mmọ ke Ediomi M’idụt ndien ekem ke Edidiana M’idụt. Mmọ ẹmekụt ẹtrede utom Jehovah ndien ekem ẹnọde unyịme nte ekemde ye ibet ke ediwak idụt. Ke kpukpru emi, Mme Ntiense Jehovah ikpaha mba ke edinam eti n̄kpọ, esịnede edinam utom nte mme ọkọ owo. Nso n̄wọrọnda mbụk nsọn̄ọnda ke emi edi ntem!—Matthew 24:13.
15. (a) Nso un̄wam ke nnyịn inyene ke ndikpụhọde nda ekekem ye mme udọn̄ efakutom nnyịn eke ofụri ererimbot? (b) Didie ke n̄wed ẹn̄wam ke utom fo?
15 N̄kpọ efen ẹdu ẹmi ẹtịpde n̄kpọ ẹsịn ke n̄kọri ofụri ererimbot emi. Kiet edi edu edinam ukpụhọde oro mme ọkọ owo ẹmi ẹnyenede ẹban̄a udọn̄ oro odude ke efakutom. Ye mme owo eke nsio nsio ido edinam, ido ukpono, ye usem ẹwọrọde idụn̄, Mme Ntiense Jehovah ẹmenam ifiọk oro mmọ ẹnyenede ẹban̄a mme n̄kpọ ẹmi atara. Ndien esop ofụri ererimbot aman̄wam akamba akamba ke ndinam Bible ye mme n̄wed ukpep Bible ẹdu ke se ibede usem 200. New World Translation of the Holy Scriptures, ofụri ofụri m̀mê ubak ubak, odu idahaemi ke usem 13, esịnede usem Czechoslovakia ye Slovakia. Ekpri n̄wed Dara Uwem ke Isọn̄ ke Nsinsi! odu idahaemi ke usem 198, ọtọn̄ọde ke usem Albania osịm Zulu, ẹmịn̄de idem miliọn 72. N̄wed Akakan Owo Oro Akanam Odude Uwem omododu idahaemi ke usem 69. Mankind’s Search for God, oro ẹkabarede ẹsịn ke usem 29, anam ẹdiọn̄ọ ntọn̄ọ ye edinịm ke akpanikọ eke mme akpan ndutịm ido ukpono ererimbot onyụn̄ edi n̄wọrọnda un̄wam ke utom ukọiyak ofụri ererimbot.
16. Didie ke ndusụk owo ẹnam n̄kpọ ẹban̄a mme udọn̄ oro odude ke mme idụt efen?
16 Nso n̄kpọ efen anam utom ukọiyak ofụri ererimbot ọkọri? Ediwak tọsịn owo ẹmenyịme ndiyere ‘ikot owo Macedonia.’ Ukem nte Paul okonyịmede ndiwọrọ ke Asia Minor n̄ka Macedonia ke Europe, ke ikot Abasi, ediwak Mme Ntiense ẹma ẹwọrọ ẹka mme idụt ye efakutom ẹmi udọn̄ kaban̄a mme ọkwọrọikọ Obio Ubọn̄ okponde akan, ọkọrọ ye mbiowo ye mme asan̄autom unamutom. Mmọ ẹbiet mme ataata ọkọiyak ẹmi ẹkụtde ke ẹkọ iyak ẹma ke mmọn̄ n̄kann̄kụk mmọ ẹnyụn̄ ẹwọrọde ẹka mmọn̄ ẹmi ibat ibat ubom ẹdude iyak onyụn̄ awakde.—Utom 16:9-12; Luke 5:4-10.
17. Nso uwụtn̄kpọ ẹban̄ade mbon oro ẹkeyerede ‘ikot owo Macedonia’ ke nnyịn inyene?
17 Mme otu nditọ ukpepn̄kpọ eke ndondo emi ke ufọkn̄wed isụn̄utom Gilead ẹsịne nditọ ufọkn̄wed ẹtode nsio nsio idụt ke Europe ẹmi ẹkekpepde Ikọmbakara ẹnyụn̄ ẹnọde idemmọ ndinam utom ke mme idụt ye ido edinam efen. Ukem ntre, ebede ke Ufọkn̄wed Unọ Mme Asan̄autom Ukpep, ẹmenọ ediwak nditọete iren oro mîdọhọ ndọ ukpep ntatara ntatara ndien ekem ẹnọ mmọ ẹka idụt efen ndikọsọn̄ọ mme esop ye circuit idem. N̄wọrọnda mmọn̄ ukọiyak efen ẹdu ke mme efakutom ẹmi ẹbederede idahaemi ke Edem Usiahautịn Europe ye n̄kani idụt obio ukara Soviet.—Men Rome 15:20, 21 domo.
18. (a) Ntak emi mme asiakusụn̄ ẹsiwakde ndidi mme asan̄autom oro ẹnyenede uforo? (b) Didie ke mmọ ẹkeme ndin̄wam mbon efen ke esop?
18 Udiana un̄wam ke utom ukọiyak ofụri ererimbot edi Ufọkn̄wed Utom Usiakusụn̄ emi mme asiakusụn̄ ofụri ini ẹsidụkde. Ke ofụri urua iba oro ẹdụn̄ọrede n̄wed Shining as Illuminators in the World, emi ẹtịmde san̄asan̄a ẹnọ mme asiakusụn̄, mmọ ẹnam n̄kọri ke ukeme unam utom mmọ nte mmọ ẹnemede mme utọ ibuotikọ nte “Ndibịne Usụn̄ Ima,” “Tiene Jesus Nte Uwụtn̄kpọ,” ye “Ndikọri Usọ Unọ Ukpep.” Kpukpru esop ẹkop inemesịt didie ntem ndinyene otu mme ọkọiyak eke ufọk-ke-ufọk oro ẹdotde ẹmi ẹkemede ndinọ ediwak owo ukpep ke akwa utom ukọiyak emi!—Matthew 5:14-16; Philippi 2:15; 2 Timothy 2:1, 2.
Nte Nnyịn Imekeme Ndinam N̄kọri?
19. Ukem nte apostle Paul, didie ke nnyịn ikeme ndinam n̄kọri ke utom ukwọrọikọ nnyịn?
19 Nte Paul, nnyịn iyom ndinyene in̄wan̄în̄wan̄, edu edikere mban̄a se inade ke iso. (Philippi 3:13, 14) Enye ama okpụhọde ada ekekem ye kpukpru orụk owo ye mme idaha oro ẹkedude. Enye ama ọfiọk nte asan̄ade ọdiọn̄ọ se mme owo ẹnịmde ke akpanikọ ye nte ẹkemede ndikọk ibuot ọkọn̄ọde ke edu ye ido n̄kann̄kụk. Nnyịn imekeme nditọn̄ọ mme ukpepn̄kpọ Bible ebe ke ndidu ke edidemede mban̄a nte enyeneufọk anamde n̄kpọ aban̄a etop Obio Ubọn̄ ndien ekem inam utịn̄ikọ nnyịn ekekem ye mme udọn̄ owo oro. Ye ediwak nsio nsio un̄wam ukpep Bible oro nnyịn inyenede, nnyịn imekeme ndinọ enyeoro ekemde ye idaha owo. Nnyịn ndinam ukpụhọde ye ndidu ke edidemede n̄ko ẹdi akpan n̄kpọ ke utom ukọiyak oro on̄wụmde mfri.—Utom 17:1-4, 22-28, 34; 1 Corinth 9:19-23.
20. (a) Ntak emi utom ukọiyak nnyịn edide akpan n̄kpọ ntre idahaemi? (b) Nso idi mbiomo nnyịn owo kiet kiet idahaemi-e?
20 Ntak emi n̄wọrọnda utom ukọiyak ofụri ererimbot emi edide akpan n̄kpọ ntre idahaemi-e? Koro ebede ke mme prọfesi Bible nte mme n̄kpọntịbe oro ẹkedade itie ye mmọ oro ẹsụk ẹdade itie ẹwụtde, ana in̄wan̄în̄wan̄ nte ke ndutịm ererimbot Satan asak iso ese utịt nsobo. Ntre, nso ke nnyịn, Mme Ntiense Jehovah, ikpanam? Ibuotikọ ukpepn̄kpọ ita ke magazine emi ẹmesọn̄ọ ẹtịn̄ ẹban̄a mbiomo nnyịn ndinam utom ọkpọsọn̄ nnyụn̄ nsịn ifịk ke utom ukọiyak nnyịn ke udeme mmọn̄ ofụri ererimbot nnyịn. Nnyịn imenyene okopodudu un̄wọn̄ọ otode Bible nte ke Jehovah idifreke ifịk ifịk utom ukọiyak nnyịn. Paul ọkọdọhọ ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam. Edi ọdọn̄ nnyịn nte kpukpru mbufo ẹwụt kpa orụk ifịk oro, man ẹnyene ọyọhọ idotenyịn tutu osịm utịt.”—Mme Hebrew 6:10-12.
[Mme Ikọ idakisọn̄]
a Se n̄ko Revelation—Its Grand Climax At Hand!, page 185 ye 186, emi Watchtower Bible and Tract Society of New York, Inc., emịn̄de.
b “Asuanetop asiakusụn̄ . . . Anamutom uyọhọ-ini ke otu Mme Ntiense Jehovah.”—Webster’s Third New International Dictionary.
Nte Afo Emeti?
◻ Ntak emi Mme Ntiense Jehovah ẹsede ofụri ererimbot nte ebiet utom ukọiyak mmọ-ọ?
◻ Nso edidiọn̄ ke ufọkn̄wed isụn̄utom Gilead edi ọnọ utom ukọiyak?
◻ Nso ẹdi ndusụk n̄kpọ oro ẹtịpde n̄kpọ ẹsịn ke Mme Ntiense Jehovah ndikụt unen?
◻ Didie ke nnyịn owo kiet kiet ikeme ndinam n̄kọri ke utom Christian nnyịn?
[Chart ke page 24]
MME UTỊP ẸTODE UKỌIYAK OFỤRI ERERIMBOT
Isua Idụt Mme Ntiense
1939 61 71,509
1943 54 126,329
1953 143 519,982
1973 208 1,758,429
1983 205 2,652,323
1991 211 4,278,820
[Ndise ke page 25]
Ke ẹsụk ẹnanam utom unọ ikọ ntiense ke otu mme ọkọiyak ẹdide mbon Galilee