Ibịghike ukara Abasi eyedisịm ofụri isọn̄, ndien kpukpru mfịna nnyịn oyokụre. Ọfọn yak kpukpru owo ẹkop n̄kpọ emi sia ata eti mbụk edi emi. Jesus okoyom mme mbet esie ẹnam kpukpru owo ẹkop eti mbụk emi! (Matthew 28:19, 20) Didie ke Mme Ntiense Jehovah ẹnam se Jesus okoyomde emi?

1. Didie ke ẹnam se idude ke Matthew 24:14 mfịn?

Jesus ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄.” (Matthew 24:14) Esinenem Mme Ntiense Jehovah ndinam oro. Usem emi ikwọrọde ikọ idahaemi ke ofụri ererimbot ebe usem 1,000! Utọ akamba utom emi enen̄ede oyom ini ye odudu ye edidianakiet. Edi idịghe odudu idem nnyịn ke ida inam utom emi​—Jehovah an̄wam nnyịn.

2. Nso ke isinam man ikwọrọ ikọ inọ mme owo?

Imesika ebiet ekededi ikụtde mme owo ikọkwọrọ ikọ inọ mmọ. Imesisan̄a “ke ufọk ke ufọk” ikwọrọ ikọ ukem nte mme Christian eyo mme apostle. (Utom 5:42) Nte isinamde ikwọrọ ikọ inọ ata ediwak miliọn owo kpukpru isua edi oro. Edi sia ndusụk owo mîsiwakke ndidu ke ufọk, imesika ikọkwọrọ ikọ n̄ko ke itie mme owo ẹsiwakde. Imesinyụn̄ ida ufan̄ ekededi emi ikụtde inam mme owo ẹdiọn̄ọ ẹban̄a Jehovah ye se enye aduakde ndinam.

3. Edi utom mmanie ndikwọrọ mban̄a nti n̄kpọ emi Abasi edinamde?

Edi utom mme ata Christian ndikwọrọ mban̄a nti n̄kpọ emi Abasi edinamde. Nnyịn idaha utom oro ibre mbre. Imesisịn idem ikwọrọ ikọ nte ikekeme sia imọdiọn̄ọ ke oro ekeme ndinyan̄a owo. (Kot 1 Timothy 4:16.) Isinam utom emi ke mfọn sia Ikọ Abasi ọdọhọ ete: “Mbufo ẹkebọ ke mfọn, ẹnọ ke mfọn.” (Matthew 10:7, 8) Idịghe kpukpru owo ẹsima ndikop ukwọrọikọ nnyịn, edi kpa ye oro nnyịn isụk ikaka iso ikwọrọ ikọ sia utom ukwọrọikọ emi enem Jehovah onyụn̄ owụt ke ikpono enye.

SỊN IDEM KPEP

4. Imesinam se ikekeme man ikwọrọ ikọ inọ mme owo

VIDIO: Ndika N̄kọkwọrọ Ikọ ke “Ata Utịt Ikpehe Isọn̄” (7:​33)

• Ke ofụri se Mme Ntiense Jehovah ẹnamde man ẹnen̄ede ẹkwọrọ ikọ, ewe ye ewe ke afo ama akan?

Kot Matthew 22:39 ye Rome 10:​13-​15, ekem ẹbọrọ mbụme emi ẹnyụn̄ ẹneme ẹban̄a mmọ:

• Didie ke ukwọrọikọ nnyịn owụt ke imama mme mbọhọidụn̄ nnyịn?

• Jehovah ada didie mbon oro ẹnamde mme owo ẹdiọn̄ọ nti n̄kpọ oro enye aduakde ndinam?​—Se ufan̄ikọ 15.

5. Nnyịn inam utom ye Abasi

N̄kpọ emi owụtde ke Jehovah Abasi ke an̄wam nnyịn ke utom ukwọrọikọ emi idịghe kiet, idịghe iba. Ke uwụtn̄kpọ, uwemeyo usen kiet ke New Zealand, brọda nnyịn kiet​—brọda oro esikere Paul​—ama okokụt mma kiet ini enye osụk asan̄ade ke ufọk ke ufọk ọkwọrọ ikọ. Usenubọk oro ke mma oro ọkọbọn̄ akam okot enyịn̄ Abasi, Jehovah, onyụn̄ eben̄e enye ete ọnọ owo edin̄wam imọ idiọn̄ọ enye. Ndien hour ita kpọt ke enye ama ọkọbọn̄ akam oro, Paul ama aka ufọk esie.

Kot 1 Corinth 3:​9, ekem ẹbọrọ mbụme emi ẹnyụn̄ ẹneme ẹban̄a enye:

• Didie ke se isitịbede, utọ nte eke New Zealand oro, owụt ke Jehovah ke an̄wam nnyịn ke utom emi?

Kot Utom 1:​8, ekem ẹbọrọ mbụme emi ẹnyụn̄ ẹneme ẹban̄a enye:

• Ntak emi iyomde Jehovah an̄wam nnyịn ke utom ukwọrọikọ emi?

Ndi ọmọdiọn̄ọ?

Kpukpru urua ke mbono esop nnyịn, ẹsinam ẹwụt nte ikpọkwọrọde ikọ. Ekpedi omodụk mboho ikọ Abasi nnyịn emi akpa, okụt didie mme n̄kpọ ẹsinamde do?

6. Ikwọrọ ikọ sia Abasi ọdọhọ ikwọrọ

Ke eyo mme apostle, mme asua ẹma ẹsidomo ndinam mbet Jesus ẹtre ukwọrọikọ. Edi mme Christian ini oro ẹma ẹsida ibet ukara ẹwụt ke imenyene unen ndikwọrọ ikọ. (Philippi 1:7) Mme Ntiense Jehovah ẹsinyụn̄ ẹnam ntre.a

VIDIO: Ẹnyịme Ndika Esop ke Ntak Eti Mbụk (2:28)

Kot Utom 5:​27-​42, ekem ẹbọrọ mbụme emi ẹnyụn̄ ẹneme ẹban̄a enye:

• Ntak emi nnyịn mîsitreke ndikwọrọ ikọ?​—Se ufan̄ikọ 29, 38, ye 39.

SE IKPEPDE

Jesus ọkọdọhọ mbet esie ẹkwọrọ ikọ ke ofụri ererimbot. Jehovah ke an̄wam ikọt esie ẹnam utom oro.

Se M̀mê Emeti

• Nso ye nso ke isinam man ikwọrọ eti mbụk ke ofụri ererimbot?

• Didie ke ukwọrọikọ nnyịn owụt ke imama mme mbọhọidụn̄ nnyịn?

• Ndi emekere ke utom ukwọrọikọ esinam owo okop inemesịt? Nso inam ọdọhọ ntre?

KPEP N̄KPỌ EN̄WEN

Se nte Mme Ntiense Jehovah ẹkwọrọde ikọ ẹnọ mme owo ke ikpọ obio.

San̄asan̄a Ukwọrọikọ ke Paris (5:11)

Nso ke Mme Ntiense Jehovah ẹnam man ẹn̄wam mbon itọk ekọn̄?

Ndikpep Mme Ẹfehe Itọk Ekọn̄ Ikọ Abasi (5:59)

Kop nte esinemde owo, owo ama ada ofụri uwem esie anam utom Abasi

Enem Mi Ndida Ofụri Uwem Mi Nnam Utom Abasi (6:29)

Se se esop ẹkebierede emi anamde emem utom ndikwọrọ eti mbụk.

“Mme Ọkwọrọ Obio Ubọn̄ Ẹda Ikọ Mmọ Ẹka Esop” (Obio Ubọn̄ Abasi Akara!, ibuot 13)

Jesus ọkọdọhọ ke ana mbon emi ẹyomde ndidi Christian ẹna baptism. (Kot Matthew 28:​19, 20.) Nso idi baptism? Nso ke owo akpanam man odot ndina baptism?

1. Nso idi baptism?

Ẹda ikọ oro baptism ẹto ikọ Greek emi ọwọrọde “bụk,” m̀mê nyịni ke mmọn̄. John ama enyịni Jesus ofụri idem ke mmọn̄ ini enye ekenịmde Jesus baptism ke Akpa Jordan, ndien Jesus “ọwọrọ ke mmọn̄.” (Matthew 3:​13, 16) Ntre ke ata mme Christian ẹsinịm owo baptism. Mmọ ẹsibụk owo ofụri idem ke mmọn̄ ini ẹnịmde owo baptism.

2. Nso ke owo ndina baptism esiwụt?

Baptism esiwụt ke owo ama ayak uwem esie, m̀mê idemesie, ọnọ Jehovah Abasi. Didie ke owo esiyak idem ọnọ Abasi? Owo esiyak idem ọnọ Jehovah ke ini owo ọbọn̄de akam ọdọhọ Jehovah ke iyanam n̄kpọ esie ke ofụri eyo uwem imọ​—enye esinam oro mbemiso usen baptism. Enye esin̄wọn̄ọ ke iyokpono Jehovah, ke ndinam uduak esie edi ata akpan n̄kpọ ke uwem imọ. Enye esinyụn̄ “akan̄ idemesie onyụn̄ . . . aka iso etiene” se Jesus ekekpepde onyụn̄ anamde. (Matthew 16:24) Ndiyak idem nnọ Jehovah Abasi nnyụn̄ nna baptism esinam owo enen̄ede ekpere Jehovah ye ikọt esie.

3. Nso ke owo akpanam man odot ndina baptism?

Afo oyodot ndina baptism edieke ekpepde n̄kpọ aban̄a Jehovah onyụn̄ enen̄erede ọbuọt idem ye enye. (Kot Mme Hebrew 11:6.) Nte afo ọdiọn̄ọde Jehovah aka onyụn̄ ọbuọtde idem ye enye, ntre ke afo editetịm ima enye. Oro ayanam enenem fi nditịn̄ mban̄a enye nnyụn̄ nnam se enye amade. (2 Timothy 4:2; 1 John 5:3) Owo emi asan̄ade “nte odotde ye Jehovah,” m̀mê emi odude uwem nte Jehovah amade, ekeme ndiyak idem nnọ Jehovah Abasi onyụn̄ ana baptism.​—Colossae 1:​9, 10.a

SỊN IDEM KPEP

4. Imekeme ndikpep n̄kpọ nto baptism Jesus

Kot Matthew 3:​13-​17 man ekpep ediwak n̄kpọ aban̄a baptism Jesus. Ekem ẹbọrọ mbụme emi ẹnyụn̄ ẹneme ẹban̄a mmọ:

• Ndi Jesus ekedi nsekeyen ini enye akanade baptism?

• Ẹkenịm Jesus baptism didie? Ndi ẹkesesịme enye mmọn̄? Ndi ẹketọtọhọ enye mmọn̄ ke ibuot?

Jesus ọkọtọn̄ọ akpan utom emi Abasi ọkọdọn̄de enye ke enye ama akana baptism ama. Kot Luke 3:​21-​23 ye John 6:​38, ekem ẹbọrọ mbụme emi ẹnyụn̄ ẹneme ẹban̄a enye:

• Nso ikedi ata akpan utom Jesus ke Jesus ama akana baptism ama?

5. Afo emekeme ndina Baptism

Idem esinyek ndusụk owo ndiyak idem nnọ Abasi nnyụn̄ nna baptism. Edi emekeme ndinam se idin̄wamde fi ekeme ndina baptism, sia baptism edi akpan n̄kpọ. Okpoyom ndidiọn̄ọ ndusụk owo emi ẹkenamde oro, se VIDIO emi.

VIDIO: Se Idinamde Ekpere Jehovah (1:​11)

Kot John 17:3 ye James 1:​5, ekem ẹbọrọ mbụme emi ẹnyụn̄ ẹneme ẹban̄a enye:

• Nso ke owo akpanam man odot ndina baptism?

1. Isiyak idem inọ Jehovah ke ini ibọn̄de akam idọhọ enye ke iyanam n̄kpọ esie ke ofụri eyo uwem nnyịn

2. Ke ini inade baptism, isiwụt ke ima iyak idem inọ Abasi

6. Baptism esinam Jehovah abat owo esịn ke otu ikọt esie

Ke ini inade baptism, imetiene idụk ubon ikọt Abasi emi ẹdianade kiet ẹnyụn̄ ẹdude ke ofụri ererimbot. Kpa ye oro itode nsio nsio itie ye nsio nsio ubon, kpukpru nnyịn inịm ukem n̄kpọ isinyụn̄ idu uwem nte Abasi oyomde. Kot Psalm 25:14 ye 1 Peter 2:​17, ekem ẹbọrọ mbụme emi ẹnyụn̄ ẹneme ẹban̄a enye:

• Didie ke owo ndina baptism ekeme ndinam owo ekpere Jehovah ye ikọt esie?

SE IKPEPDE

Jesus ama ọdọhọ ke ana mbon oro ẹyomde ndidi Christian ẹna baptism. Ana owo ọbuọt idem ye Jehovah, odu uwem nte Enye ọdọhọde, onyụn̄ ayak idem ọnọ Enye man odot ndina baptism.

Se M̀mê Emeti

• Nso idi baptism? Ntak emi baptism edide akpan n̄kpọ?

• Ndiyak idem nnọ Abasi asan̄a nso ye baptism?

• Nso ye nso ke owo akpanam man ayak idem ọnọ Jehovah Abasi onyụn̄ ana baptism?

KPEP N̄KPỌ EN̄WEN

Se se akpanade ọdiọn̄ọ aban̄a baptism.

“Nso Idi Baptism?” (Odu ke jw.org)

Se nsio nsio n̄kpọ oro owo akpanamde man odot ndina baptism.

“Ndima Jehovah ye Se Enye Anamde Ọnọ Fi Ẹdinam Fi Ana Baptism” (Enyọn̄-Ukpeme, March 2020)

Se se ikanamde ete kiet ebiere ndina baptism.

“Mmọ Ẹkeyom Ndụn̄ọde Se Bible Ekpepde Nse” (Enyọn̄-Ukpeme, February 1, 2013)

Se se inamde baptism edi akpan n̄kpọ ye nte ekemede ndiben̄e idem ndina baptism.

“Ndi Akpana Nna Baptism?” (Mme Mbụme Oro N̄kparawa Owo Ẹbụpde​—Mme Ibọrọ Oro Ẹnyenede Ufọn, Eboho 2, ibuot 37)