Uwem ye Utom Jesus

Mme Akpatre Uwụt Idem, ye Pentecost Eke 33 C.E.

KE IDAHA kiet Jesus anam ndutịm ọnọ kpukpru mme apostle esie 11 ndisobo ye enye ke obot kiet ke Galilee. Nte an̄wan̄ade ẹtịn̄ ẹnọ mme mbet eken ẹban̄a mbono emi, ndien ofụri ibat awakde ebe owo 500 ẹsop idem. Nso inem inem mbono ke emi edi ntem ke ini Jesus owụtde idem onyụn̄ ọtọn̄ọde ndikpep mmọ n̄kpọ!

Ke otu mme n̄kpọ eken, Jesus anam an̄wan̄a akwa otuowo oro nte ke Abasi ọmọnọ imọ ofụri odudu ke heaven ye ke isọn̄. Enye eteme ete, “Mbufo ẹka ẹkanam kpukpru mme idụt edi mbet Mi, ẹnịm mmọ baptism ẹsịn ke enyịn̄ Ete ye Eyen ye edisana spirit: ẹnyụn̄ ẹkpep mmọ ẹnam kpukpru n̄kpọ eke nketemede mbufo.”

Kere ban̄a emi! Irenowo, iban, ye nditọn̄wọn̄ kpukpru ẹbọ ukem ewụhọ emi ndibuana ke utom edinam mbet. Mme andibiọn̄ọ ẹyedomo nditre edikwọrọ ye edinọ ukpep mmọ, edi Jesus ọdọn̄ mmọ esịt ete: “Sese, Ami ndodu ye mbufo kpukpru ini, tutu osịm utịt ererimbot.” Jesus odu ye mme anditiene enye ebe ke edisana spirit, man an̄wam mmọ ẹnam utom ukwọrọikọ mmọ.

Jesus owụt mme mbet esie idem nte idude uwem ke usen 40 ke etienede ediset ke n̄kpa esie. Ke mme ini uwụt idem ẹmi, enye ekpep mmọ aban̄a Obio Ubọn̄ Abasi, enye onyụn̄ ọsọn̄ọ etịn̄ se mbiomo mmọ ẹdide nte mme mbet esie. Ke idaha kiet enye akam owụt James eyeneka esie idem onyụn̄ anam enyeemi mîkonịmke ke akpanikọ inikiet mi onịm nte ke Imọ ke akpanikọ idi Christ.

Ke adan̄aemi mme apostle ẹsụk ẹdude ke Galilee, Jesus nte an̄wan̄ade ọtọt mmọ ete ẹfiak ẹnyọn̄ọ Jerusalem. Ke ini osobode ye mmọ do, enye odọhọ mmọ ete: “Ekûkpọn̄ Jerusalem, edi ẹtie ẹbet se Ete ọkọn̄wọn̄ọde ndinọ; emi mbufo ẹkekopde ke inua Mi: koro John akadade mmọn̄ onịm baptism, edi ẹyenịm mbufo baptism ke edisana spirit ke usen ifan̄ mîbehe kan̄a.”

Ekem Jesus afiak osobo ye mme apostle esie onyụn̄ ada mmọ ọwọrọ ke obio tutu osịm Bethany, emi odude ke edem usiahautịn itịghede Obot Olives. Ke n̄kpaidem, kpa ye ofụri se enye etịn̄de aban̄a edikpọn̄ esie nnyọn̄ heaven ke mîbịghike, mmọ ẹsụk ẹnịm ẹte ke Obio Ubọn̄ esie ediwụhọ ke isọn̄. Ntem mmọ ẹbụp ẹte: “Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel kemi?”

Utu ke ndifiak ndomo ndinen̄ede mme ukwan̄ ekikere mmọ, Jesus ọbọrọ mmemmem mmemmem ete: “Inaha inọ mbufo ndifiọk ini m̀mê eyo, eke Ete okonịmde akama ke ubọk Esiemmọ.” Ekem, ke ọsọn̄ọde etịn̄ inikiet efen utom oro anade mmọ ẹnam, enye ọdọhọ ete: “Mbufo ẹyebọ odudu, ke edisana spirit ama edi edidoro mbufo ke idem: mbufo ẹyenyụn̄ ẹdi mme ntiense Mi ke Jerusalem, ye ke ofụri Judea ye Samaria, tutu osịm utịt ererimbot.”

Ke adan̄aemi mmọ ẹsụk ẹsede, Jesus ọtọn̄ọ ndidaha ndọk enyọn̄, ndien ekem obubịt enyọn̄ ofụk enye mmọ inyụn̄ ikwe enye aba. Ke ọfọrọrede idem eke obụk esie, enye ọdọk ke heaven nte owo eke spirit. Nte mbet 11 ẹmi ẹkade iso ẹwụk enyịn ẹse ikpaenyọn̄, owo 2 ẹmi ẹsịnede mfia ọfọn̄idem ẹbiọn̄ọde ẹkpere mmọ. Mme angel ẹmi ẹsịnede idem eke obụk mi ẹbụp ẹte: “Mbufo mbon Galilee, nsinam mbufo ẹdade ẹse ikpaenyọn̄? Jesus emi, emi ẹmende Enye ẹkpọn̄ mbufo ẹdụk ke heaven, eyedi kpa [ke] ido emi mbufo ẹkụtde Enye ọnyọn̄de odụk ke heaven.”

Ido emi Jesus adade ọkpọn̄ isọn̄ ndondo emi edi ye unana an̄wan̄wa usọrọ ndien edi mme anam-akpanikọ mme anditiene enye ikpọn̄îkpọn̄ ẹda ẹse. Ntre enye edifiak edi ke ukem ido emi—ye unana an̄wan̄wa usọrọ ye mme anam-akpanikọ mme anditiene enye ikpọn̄îkpọn̄ ẹfiọkde nte ke enye amafiak edi onyụn̄ ọtọn̄ọ edidu esie ke odudu Obio Ubọn̄.

Mme apostle kemi ẹsụhọde Obot Olives, ẹbe Ebeden̄ Kidron, ẹnyụn̄ ẹdụk Jerusalem inikiet efen. Mmọ ẹdu do ke n̄kopuyo nnọ ewụhọ Jesus. Usen duop ke ukperedem, ke Usọrọ Pentecost mme Jew eke 33 C.E., ke adan̄aemi n̄kpọ nte mme mbet 120 ẹsopde idem ke ubet enyọn̄ ke Jerusalem, uyom ebietde uyom ata ọkpọsọn̄ oyobio eke ofụmede ọyọhọ ofụri ufọk oro. Mme edeme eke ẹbietde edeme ikan̄ ẹbiọn̄ọde, ndien kiet odoro owo kiet kiet ke otu mbon oro ẹdude, ndien mme mbet kpukpru ẹtọn̄ọ ndisem nsio nsio usem. Emi edi edin̄wan̄a edisana spirit nnọ oro Jesus ọkọn̄wọn̄ọde! Matthew 28:16-20; Luke 24:49-52; 1 Corinth 15:5-7; Utom 1:3-15; 2:1-4.

◆ Mmanie ke Jesus ọnọ mme item unyọn̄ ke obot kiet ke Galilee, ndien nso idi mme item ẹmi?

◆ Nso ndọn̄esịt ke Jesus ọnọ mme mbet esie, ndien didie ke enye edidu ye mmọ?

◆ Jesus owụt mme mbet esie idem ebịghi adan̄a didie tọn̄ọ nte enye ekeset ke n̄kpa, ndien nso ke enye ekpep mmọ?

◆ Anie owo, oro nte an̄wan̄ade mîkedịghe mbet mbemiso n̄kpa Jesus, ke Jesus owụt idem?

◆ Mme akpatre mbono ewe ke Jesus enyene ye mme apostle esie, ndien nso ida itie ke ini edinam ẹmi?

◆ Didie ke edi nte ke Jesus edifiak edi ke ukem ido emi enye ọnyọn̄de?

◆ Nso itịbe ke Pentecost eke 33 C.E.?