Eti Ndausụn̄—M̀mọ̀n̄ ke Nnyịn Ikeme Ndikụt Enye?

BIBLE ọdọhọ ete: “Kpukpru ufọk ẹnyene andibọp, edi Enye emi ọkọbọpde kpukpru n̄kpọ edi Abasi.” (Mme Hebrew 3:4; Ediyarade 4:10b) Sia ata Abasi, Jehovah, edide Andibot nnyịn, enye ‘ọfiọk nte nnyịn iborode.’ (Psalm 103:14) Enye enyene ọyọhọ ifiọk aban̄a mme ukeme nnyịn ye se nnyịn iyomde. Ndien sia enye edide Abasi ima, enye oyom ndiyụhọ mme n̄kpọ oro iyomde do. (Psalm 145:16; 1 John 4:8) Owo isioho udọn̄ nnyịn kaban̄a eti ndausụn̄ ifep.

Ebede ke prọfet Isaiah, Jehovah ọkọdọhọ ete: “Sese, mmenịm enye ke ntiense mme idụt, [nte adausụn̄, NW] ye etubom mme idụt.” (Isaiah 55:4) Usọbọ mfịna unana ndausụn̄ eke eyomfịn abuana edidiọn̄ọ Adausụn̄ emi—Ata Ọkpọsọn̄ ke idemesie ekemekde—nnyụn̄ nnyịme ndausụn̄ esie. Anie ndien edi Adausụn̄ ye Etubom emi ẹkebemde iso ẹtịn̄ ẹban̄a? Nso idi mme n̄kpọ oro ẹdade ẹdiọn̄ọ enye nte adausụn̄? Enye edida nnyịn usụn̄ aka m̀mọ̀n̄? Nso ke ana nnyịn inam man ibọ ufọn ito ndausụn̄ esie?

Adausụn̄ Oro Ẹken̄wọn̄ọde Edisịm

N̄kpọ nte isua 2,500 oro ẹkebede, angel Gabriel ama owụt prọfet Daniel idem onyụn̄ ọdọhọ enye ete: “Fiọk, ndien, nyụn̄ tịm nịm ibuot, ete, ke ọtọn̄ọde ke ini emi uyo ọwọrọde, ete ẹtọn̄ọ ntak ẹdiọn̄ ẹnyụn̄ ẹbọp Jerusalem, tutu esịm ke ini Messiah [kpa Adausụn̄, NW], eyedi urua itiaba ye urua ata ye iba: ẹyetọn̄ọ ntak ẹdiọn̄ an̄wa ye ukpe, kpa ke ini nnanenyịn.”—Daniel 9:25.

Nte an̄wan̄ade, angel emi eketịn̄ ọnọ Daniel aban̄a akpan ini emi Adausụn̄ oro Jehovah emekde edidide. “Messiah kpa Adausụn̄” edibiọn̄ọde ke utịt urua 69, m̀mê isua 483, ke ẹtọn̄ọde ke 455 M.E.N. ẹbat, ke ini ẹkenọde ewụhọ ẹte ẹtọn̄ọ ntak ẹbọp Jerusalem.a (Nehemiah 2:1-8) Nso iketịbe ke utịt ini oro? Luke andiwet Gospel etịn̄ ete: “Ke ọyọhọ isua efịt emi Tiberius Caesar adade ubọn̄, ke ini Pontius Pilate edide andikara Judea, Herod onyụn̄ edide tetrarch Galilee [29 E.N.], . . . uyo Abasi esịm John eyen Zacharias ke desert. Ndien enye asan̄a ke ofụri n̄kan-n̄kụk Jordan edikwọrọ baptism edikabade esịt, man ẹfen mme idiọk-n̄kpọ.” Ke ini oro, ‘mbio obio ẹketie ke idotenyịn’ ẹbet Messiah kpa Adausụn̄. (Luke 3:1-3, 15) Okposụkedi otuowo ẹkedide ẹbịne John, enye ikedịghe Adausụn̄ oro.

Ekem ke n̄kpọ nte October 29 E.N., Jesus eyen Nazareth ama edi ebịne John ndina baptism. Ndien John ama etie ntiense, ọdọhọde ete: “Mma n̄kụt Spirit nte otode ke enyọn̄ osụhọde nte ibiom odoro Enye ke idem. Ndien n̄kọdiọn̄ọke Enye; edi Enye emi ọkọdọn̄de mi ete nda mmọn̄ nnịm baptism ọdọhọ mi ete, Owo eke edikụtde nte Spirit osụhọrede odoro Enye ke idem edi Enye emi enịmde owo baptism ke Edisana Spirit. Ami mma nnyụn̄ n̄kụt, nnyụn̄ ntie ntiense nte, Emi edi Eyen Abasi.” (John 1:32-34) Ke baptism esie, Jesus ama akabade edi Adausụn̄ emi ẹyetde aran—Messiah, m̀mê Christ.

Ih, “adausụn̄ ye etubom mme idụt” oro ẹken̄wọn̄ọde ekedi Jesus Christ. Ndien ke ini nnyịn idụn̄ọrede mme edu esie nte adausụn̄, nnyịn isọsọp ikụt nte ke ndausụn̄ esie enen̄ede okpon akan se ẹyomde mfịn ẹto eti adausụn̄.

Messiah—Eti Adausụn̄

Eti adausụn̄ ọnọ in̄wan̄-in̄wan̄ ndausụn̄ onyụn̄ an̄wam mme owo oro enye adade usụn̄ ndinyene ọkpọkpọ odudu ye ukeme man mmọ ẹkeme ndise mban̄a mme mfịna uforo uforo. N̄wed oro 21st Century Leadership: Dialogues With 100 Top Leaders ọdọhọ ete: ‘Emi edi se ẹyomde man adausụn̄ ọyọhọ isua ikie 21 okụt unen.’ Jesus eketịm mme andikpan̄ utọn̄ nnọ enye idem mfọn mfọn didie ntem ndise mban̄a mme idaha eke usen ke usen! Kam kere ban̄a utịn̄ikọ esie oro ọwọrọde etop akan—Ukwọrọikọ oro ke Obot. Mme ikọ oro ẹwetde ke Matthew ibuot 5 esịm 7 ẹyọhọ ye nti item.

Ke uwụtn̄kpọ, kere ban̄a, item Jesus kaban̄a edibiere utọk owo ye owo. Enye ọkọdọhọ ete: “Mmọdo edieke adade enọ fo edi ke itie-uwa, onyụn̄ etide do ete, eyen-ete fo enyene ikọ ye afo, kpọn̄ enọ fo do ke iso itie-uwa, ka kebem iso nam emem ye eyen-ete fo, ndien di diwa enọ fo.” (Matthew 5:23, 24) Ndibem iso nnam emem ye mbon efen edi ebeiso n̄kpọ—idem edi akpan n̄kpọ akan mme edinam ido ukpono, utọ nte edinọ mme enọ ke itieuwa temple ke Jerusalem nte ẹkeyomde ke Ibet Moses. Ke ẹsiode oro ẹfep, Abasi inyịmeke mme edinam utuakibuot. Item Jesus enyene ufọn mfịn nte ekenyenede ediwak isua ikie oro ẹkebede.

Jesus n̄ko ama an̄wam mme andikpan̄ utọn̄ nnọ enye ndifep afia oburobụt ido. Enye ama ọnọ mmọ item ete: “Mbufo ẹmekop ẹte, ẹkenọ owo uyo, ẹte, Kûsịn efịbe: edi Ami ndọhọ mbufo nte, Owo ekededi eke esede n̄wan ke enyịn use ama esịn efịbe ye enye ama ke esịt esie.” (Matthew 5:27, 28) Item emi odot didie ntem! Ntak emi nnyịn ikpọtọn̄ọde ndinam n̄kpọ emi adade esịm efịbe ebe ke ndikere mban̄a enye? Jesus ọkọdọhọ ete ke use ye efịbe ẹto ke esịt ẹwọn̄ọ. (Matthew 15:18, 19) Oyowụt eti ibuot nnyịn ndikpeme esịt nnyịn.—Mme N̄ke 4:23.

Ukwọrọikọ oro ke Obot n̄ko esịne ata eti item ke ndima mme asua owo, ndiwụt ntatubọk, ndinyene nnennen ekikere mban̄a n̄kpọ obụkidem ye eke spirit, ye mme n̄kpọ ntre. (Matthew 5:43-47; 6:1-4, 19-21, 24-34) Jesus ama akam owụt otuowo esie nte ẹkpeyomde un̄wam Abasi ebe ke ndikpep mmọ nte ẹkpebọn̄de akam. (Matthew 6:9-13) Messiah Adausụn̄ ọsọn̄ọ onyụn̄ etịm mme mbet esie idem ndise mban̄a mme ọsọ mfịna ubonowo.

Utịm ikotiokiet ke Ukwọrọikọ oro ke Obot, Jesus ọtọn̄ọ utịn̄ikọ esie ye mme ikọ emi “mbufo ẹmekop ẹte, ẹkenọ owo uyo, ẹte” m̀mê “ẹkenyụn̄ ẹdọhọ ẹte,” edi enye ndien ama ọnọ ekikere efen, ọdọhọde ete, “edi Ami ndọhọ mbufo nte.” (Matthew 5:21, 22, 27, 28, 31-34, 38, 39, 43, 44) Oro owụt nte ke mme andikpan̄ utọn̄ nnọ enye ẹma ẹmehe ye edinam n̄kpọ ke akpan usụn̄ kiet, nte ekemde ye item mme Pharisee. Edi idahaemi Jesus okowụt mmọ isio isio usụn̄—enye emi owụtde ata edu Ibet Moses. Ntem Jesus ama ọtọn̄ọ ndinam ukpụhọde, ndien enye akanam emi ke usụn̄ oro ekedide mmemmem n̄kpọ ọnọ mme anditiene enye ndinyịme. Ih, Jesus ama onụk mme owo ẹnam ikpọ ukpụhọde ke uwem mmọ, ke n̄kan̄ eke spirit ye ke n̄kan̄ ido uwem. Emi edi idiọn̄ọ eti adausụn̄.

N̄wed ukpepn̄kpọ aban̄ade ukamautom ọtọt nte edide ọkpọsọn̄ n̄kpọ ndinam utọ ukpụhọde oro. Enye ọdọhọ ete: “Oyom anam-ukpụhọde [adausụn̄] enyene edu anamutom n̄kaowo, ifiọk ekpepn̄kpọ mban̄a ekikere owo, ukeme efehe-itọk anyan usụn̄, edisọn̄ọ nyịre nte ebua, edida ke idem nte odụn̄ ikpọn̄, ye ime edisana owo. Ndien idem ye ofụri edu emi, ubiọn̄ edikụt unen idụhe.”

N̄wed kiet emi ibuotikọ ọdọhọde, “Ndausụn̄: Nte Edu Edi Akpan N̄kpọ?” ọkọdọhọ ete: “Mme adausụn̄ ẹnyene ndidu uwem ke usụn̄ oro mmọ ẹyomde mme anditiene mmọ ẹdu.” Ke akpanikọ, eti adausụn̄ anam se enye ọkwọrọde. Didie ke ekedi akpanikọ ntem ye Jesus Christ! Ih, enye ama ekpep mbon oro ẹkedude ye enye ndinyene nsụhọdeidem, edi enye n̄ko ama ọnọ mmọ ukpep oro ẹkụtde ke enyịn ebe ke ndiyet mmọ ukot. (John 13:5-15) Enye n̄kukụre ikosioho mme mbet esie idọn̄ ndikọkwọrọ eti mbụk Obio Ubọn̄ Abasi, edi enye ama esịn̄ede idemesie ọkpọsọn̄ ke utom oro. (Matthew 4:18-25; Luke 8:1-3; 9:1-6; 10:1-24; John 10:40-42) Ndien ke edinam n̄kpọ mban̄a ndausụn̄, Jesus ama enịm uwụtn̄kpọ. Enye ama etịn̄ aban̄a idemesie ete: “Eyen ikemeke ndinam baba n̄kpọ kiet ke Idem Esie, ke mîbọhọke se okụtde nte Ete anamde.”—John 5:19.

Se Jesus eketịn̄de onyụn̄ anamde, oro ẹnemede ke enyọn̄ emi, ẹwụt in̄wan̄-in̄wan̄ nte ke enye edi eti Adausụn̄. Ke akpanikọ, enye akan kpukpru idaha eke owo kaban̄a eti ndausụn̄. Jesus edi mfọnmma. Sia ama ọkọbọ uwem eke mîkemeke ndikpa ke ama akakpa onyụn̄ eset ke n̄kpa, enye odu uwem ke nsinsi. (1 Peter 3:18; Ediyarade 1:13-18) Adausụn̄ ewe ekeme ndinyene mme n̄kpọ ẹnamde ẹdot mi?

Nso ke Ana Nnyịn Inam?

Nte edidem emi akarade ke Obio Ubọn̄ Abasi, “Messiah kpa Adausụn̄” ayan̄wan̄a mme edidiọn̄ ofụk mme okopitem ubonowo. Ke afan̄ emi N̄wed Abasi ọn̄wọn̄ọ ete: “Ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.” (Isaiah 11:9) “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:11) “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.” (Micah 4:4) “Abasi ke Idem Esie oyonyụn̄ odu ye mmọ, onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:3, 4.

Ererimbot mfịn omosobo mfịna unana ndausụn̄. Nte ededi, Jesus Christ ke ada mbon nsụkidem usụn̄ aka emem emem obufa ererimbot, ebiet emi mme okopitem ubonowo ẹdidianade ọtọkiet ke utuakibuot Jehovah Abasi ẹdinyụn̄ ẹsan̄ade ẹbịne edisịm mfọnmma. Edi akpan n̄kpọ didie ntem nnyịn ndida ini n̄kọ ifiọk ata Abasi ye eke Adausụn̄ emi enye emekde nnyụn̄ ndu uwem ekekem ye ifiọk oro!—John 17:3.

Kiet ke otu mfọnn̄kan ukpono oro nnyịn ikemede ndinọ owo edi ndikpebe enye. Nte nnyịn ndien ikpodomoke ndikpebe n̄kponn̄kan Adausụn̄ ke mbụk owo—Jesus Christ? Didie ke nnyịn ikeme ndinam ntre? Nso odudu ke edinyịme ndausụn̄ esie edinyene ke uwem nnyịn? Ẹyeneme mme mbụme emi ye mmọ eken ke ibuotikọ iba emi ẹtienede.

[Ikọ idakisọn̄]

[Ndise ke page 4]

Daniel ama ebem iso etịn̄ aban̄a Adausụn̄ emi Abasi emekde ndidi

[Mme ndise ke page 7]

Mme ukpepn̄kpọ Jesus ẹma ẹtịm mme owo idem ndise mban̄a mme mfịna uwem

[Ndise ke page 7]

Jesus ayada okopitem ubonowo usụn̄ esịm emem emem obufa ererimbot