Kụt Ete Imenịm Mme Ebe Iso N̄kpọ Ke Akpa!

Mbubịteyo emi edi mbono esop, edi enyene utom anade afo anam. Nso ke afo edinịm akpa?

AFO edi ebe ye ete nditọ. Nte utom ekperede ndisuana ke usen ọkpọsọn̄ utom emi akakde owo, ekikere fo ọwọn̄ọde ebịne ndutịm mbono esop eke mbubịteyo oro. Edieke ọnyọn̄de ke ndondo oro utom asuanade, afo edinyene sụk ini oro ekemde ndiyere mmọn̄, n̄kpụhọ ọfọn̄, nnyụn̄ ndia udia itọk itọk mbemiso adahade mbono esop. Kpa idaha oro, eteutom fo ọbiọn̄ọde edidọhọ anam utom ebe ini. Enye ọn̄wọn̄ọ ke iyekpe fi okụk ọfọn. Afo omoyom okụk.

Mîdịghe afo edi n̄wanndọ ye eka nditọ. Nte osụk anamde udia mbubịteyo, afo ada okụt eboho ọfọn̄ oro owo mîkwọhọkede, ẹmi ẹdiyomde ndusụk mmọ ke ndan̄nsiere. Afo obụp idemfo ete, ‘Edieke ndụkde mbono esop mbubịteyo emi, ini ewe ke ndinyene ifet n̄kwọhọde ọfọn̄?’ Sia ọtọn̄ọde utom idịbi udia uyọhọ ini ndondo emi, afo ke ekpep nte ọsọn̄de ndise mban̄a mme utom ufọk ke adan̄aemi an̄wanade okụk.

Mîdịghe afo edi eyen ufọkn̄wed. Ke ubet fo, utomufọk ọyọyọhọ okpokoro ukotn̄wed fo. Ebịghi ẹkenọ ata ediwak ke otu mmọ, edi afo ama onụk mmọ enịm, ndien idahaemi ini ekem ndinam ediwak utom ẹmi inikiet. Emi onụk fi ndiben̄e ete ye eka fo ẹyak afo afiak mbono esop etie ke ufọk man okụre utomufọk fo.

Ewe ke afo edinịm akpa: udiana utom idịbi udia, edikwọhọde ọfọn̄, utomufọk, m̀mê mbono esop? Ke nditịn̄ ke usụn̄ifiọk eke spirit, nso ke ndinịm mme ebe iso n̄kpọ ke akpa ọwọrọ? Nso idi ekikere Jehovah?

Nso Ikpebem Iso?

Esisịt ini ke nditọ Israel ẹma ẹkebọ Ibet Duop, ẹma ẹkụt eren kiet atan̄de ifia ke Sabbath. Ibet ama ọsọn̄ọ akpan emi. (Numbers 15:32-34; Deuteronomy 5:12-15) Didie ke afo ekpekebiere ikọ emi? Nte afo ekpekefen owo oro, ọdọhọde ete, idem n̄kpọ, enye ikanamke utom man odu ebeubọk inem uwem edi man ọnọ ubon esie mme akpan n̄kpọ oro ẹyomde? Nte afo okpokosio owụt ete ke ediwak ifet ẹyedu ke ofụri isua oro ndinịm Sabbath ndien nte ke nditaba ifet kiet kpọt, ndusụk ke ntak emi owo oro okokpude ndibabak nnam ndutịm, edi se ẹkemede ndifen mmemmem mmemmem?

Jehovah ekese idaha oro ke ata akamba n̄kpọ. Bible ọdọhọ ete: “Ndien Jehovah ọdọhọ Moses, ete, Owo oro enyene ndikpa.” (Numbers 15:35) Ntak emi Jehovah akadade se owo oro akanamde ke akamba n̄kpọ ntre?

Mme owo oro ẹma ẹnyene usen itiokiet nditan̄ ifia nnyụn̄ nse mban̄a se mmọ ẹyomde ke udia, edisịnen̄kpọ, ye itie udakibuot. Ẹkenyene ndiyak ọyọhọ usen itiaba nnọ mme udọn̄ n̄kpọ eke spirit mmọ. Ke adan̄aemi mîkọdiọkke nditan̄ ifia, ama akwan̄a ndida ini oro ẹkpekesiode ẹnịm ndituak ibuot nnọ Jehovah nnam oro. Okposụkedi mme Christian mîdụhe ke idak Ibet Moses, nte n̄kpọntịbe emi ikpepke nnyịn ndinam eti ndutịm mban̄a mme n̄kpọ oro ẹdide ebe iso n̄kpọ ẹnọ nnyịn mfịn?—Philippi 1:10.

Ke ẹma ẹkebiat isua 40 ke wilderness, nditọ Israel ẹma ẹben̄e idem ndidụk Isọn̄ Un̄wọn̄ọ. Ndusụk owo ẹma ẹkpa mba ndidia manna oro Abasi ọkọnọde ke wilderness ndien nte eyịghe mîdụhe ke ẹkenyene idotenyịn ẹban̄a ukpụhọde udia. Man an̄wam mmọ ndinyene nnennen idaha ekikere nte mmọ ẹkedụkde isọn̄ oro “ọfiọrọde mmọn̄eba ye aran-ọkwọk,” Jehovah ama eti mmọ ete: “Idịghe uyo ikpọn̄îkpọn̄ ke owo ada odu uwem, ke edi kpukpru se itode Jehovah ke inua ke owo ada odu uwem.”—Exodus 3:8; Deuteronomy 8:3.

Nditọ Israel ẹkenyene ndinam utom ọkpọsọn̄ kaban̄a “mmọn̄eba ye aran-ọkwọk” mmọ. Ẹkenyene ndin̄wana n̄kan mme udịmekọn̄, ndibọp mme ufọk, nnyụn̄ ntọ mme in̄wan̄. Kpa ye oro, Jehovah ama owụk mmọ ete ẹsio ini ẹnịm ke usen kiet kiet man ẹda ẹkere mme n̄kpọ eke spirit. Mmọ n̄ko ẹkenyene ndida ini n̄kpep nditọ mmọ mme usụn̄ Abasi. Jehovah ọkọdọhọ ete: “Mbufo ẹnyụn̄ ẹda [mme ewụhọ mi] ẹteme nditọ mbufo, ẹnyụn̄ ẹdọhọ ẹban̄a mmọ ke ini afo etiede ke ufọk fo, ye ke asan̄ade ke usụn̄, ye ke anade ke isọn̄, ye ke edemerede ke idap.”—Deuteronomy 11:19.

Ẹma ẹwụk iren Israel ye mme okpono Abasi ke ido mme Jew ke isọn̄ oro ndiwụt Jehovah idemmọ utịm ikata ke isua. Ke ẹfiọkde ẹte ke ofụri ubon ọyọbọ ufọn ke n̄kan̄ eke spirit oto mme utọ idaha oro, ediwak ibuot ufọk ẹma ẹnam ndutịm ẹnọ ibanndọ ye nditọ mmọ nditiene mmọ n̄ka. Edi anie edikpeme ufọk mmọ ye in̄wan̄ mmọ mbak mme asua ke ini emi mmọ mîdidụhe? Jehovah ama ọn̄wọn̄ọ ete: “Baba owo kiet idiyomke isọn̄ fo, ke ini afo edidọkde ndiwụt Jehovah Abasi fo idem, utịm ikata ke isua.” (Exodus 34:24) Ama oyom mbuọtidem man nditọ Israel ẹnịm ke akpanikọ nte ke edieke mmimọ inịmde mme udọn̄ n̄kpọ eke spirit ke akpa, n̄kpọ iditakke mmimọ ke n̄kan̄ eke obụk. Ndi Jehovah ama anam ikọ esie? Ke akpanikọ enye ama anam!

Ka Iso Ndibem Iso Nyom Obio Ubọn̄

Jesus ama ekpep mme anditiene enye ndinam mme n̄kpọ eke spirit ẹbem kpukpru n̄kpọ eken iso. Ke Ukwọrọikọ oro ke Obot, enye ama ọnọ mme andikpan̄ utọn̄ nnọ enye item ete: “Ẹkûtịmede esịt ẹbụp ẹte, Nso ke nnyịn ididia? Nso ke nnyịn idin̄wọn̄? Nso ke nnyịn idisịne? . . . Ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi [ẹyomde mi] ẹnọ mbufo.” (Matthew 6:31, 33) Esisịt ini ke Jesus ama akakpa, mme Christian oro ẹkenade baptism obufa ẹma ẹtiene item oro. Ediwak mmọ ẹkedi mme Jew m̀mê mme okpono Abasi ke ido mme Jew ẹmi ẹkenamde isan̄ ẹka Jerusalem kaban̄a usọrọ Pentecost ke 33 E.N. Ke adan̄aemi ẹdude do, n̄kpọ oro owo mîkodorike enyịn ama etịbe. Mmọ ẹma ẹkop ẹnyụn̄ ẹnyịme eti mbụk aban̄ade Jesus Christ. Ke ẹnyenede ọkpọsọn̄ udọn̄ ndikpep ekese mban̄a obufa ido ukpono mmọ, mmọ ẹma ẹka iso ẹdu ke Jerusalem. Mme n̄kpọ oro mmọ ẹkekamade ẹma ẹtọn̄ọ ndikụre, edi inem uwem n̄kpọ eke obụk okodu ke udiana itie. Mmọ ẹma ẹkụt Messiah! Nditọete Christian mmọ ẹma ẹbuana mme n̄kpọ eke obụk oro mmọ ẹkenyenede man otodo kpukpru owo ẹka iso “ẹsịn ifịk ke edikpep ye nsan̄a mme apostle, ye . . . akam.”—Utom 2:42.

Nte ini akakade, ndusụk Christian ẹma ẹfre enyịn ẹban̄a ufọn edisobo idem ọtọkiet kpukpru ini ke mme mbono esop. (Mme Hebrew 10:23-25) Eyedi mmọ ẹma ẹkabade ẹdi mme ama inyene, ẹfụmide mme n̄kpọ eke spirit ke adan̄aemi ẹdomode ndikọ okụk nnọ idemmọ ye mme ubon mmọ. Ke ama akakpak nditọete esie ete ẹkûsịn ndidụk mme mbono esop, apostle Paul ama ewet ete: “Ẹkûkọmọ ke ima inyene; ẹnem esịt ye se mbufo ẹnyenede; koro Abasi ọdọhọde ete, Ndikpụhu fi, ndinyụn̄ n̄kpọn̄ke fi.”—Mme Hebrew 13:5.

Item Paul ekedi ata ekemini. N̄kpọ nte isua ition ke Paul ama ekewet leta esie ọnọ ẹsọk mme Hebrew, udịmekọn̄ mbon Rome ke idak Cestius Gallus ama akan Jerusalem okụk. Mme anam-akpanikọ Christian ẹma ẹti ntọt Jesus nte: “Ke adan̄aemi mbufo ẹdikụtde n̄kpọ [emi] . . . , yak owo eke odude ke enyọn̄ ufọk okûsụhọde odụk ekemen n̄kpọ ekededi eke odude ke ufọk esie; yak owo eke odude ke in̄wan̄ okûnyụn̄ afiak aka ufọk ekemen ekụra esie.” (Mark 13:14-16) Mmọ ẹma ẹfiọk ẹte ke ubọhọ mmọ ikọkọn̄ọke ke utom mmọ ndinyene iwụk m̀mê idaha inyene obụkidem mmọ, edi ọkọkọn̄ọ ke mmọ ndinam mme item Jesus. Nte eyịghe mîdụhe, ama edi mmemmem ọnọ mbon oro ẹkenamde n̄kpọ ẹban̄a item Paul ẹnyụn̄ ẹnịmde mme udọn̄ n̄kpọ eke spirit akpa ndikpọn̄ ufọk, utom, ọfọn̄, ye mme ọkpọkpọ n̄kpọuto nnyụn̄ mfehe n̄ka ikpọ obot akan ye mbon oro mîkekịbeke ibọhọ ima okụk.

Nte Ndusụk Owo Ẹnịmde Mme Ẹbe Iso N̄kpọ ke Akpa Mfịn

Mme anam-akpanikọ Christian mfịn ẹwụt esịtekọm ẹban̄a ebuana ofụri ini ye nditọete mmọ, ndien ndusụk owo ẹnam mme n̄waidem man otodo ẹdụk mme mbono esop. Ke ndusụk n̄kann̄kụk, n̄kukụre utom oro odude abuana utom ẹkpụhọde-kpụhọ ini. Eyenete kiet ama esinyịme ndinam utom mme nsan̄autom esie ke mme okoneyo Saturday, emi ediwak owo ke obio mmọ ẹsimekde ndida nnọ idem nduọkodudu, edieke mmọ n̄ko ẹdikpụhọde ye enye ke mme mbubịteyo eke mme mbono esop. Nditọete eken ẹdide mme anamutom oro ẹkpụhọde-kpụhọ ini ẹsidụk mme mbono esop ke esop oro ekperede edieke utom mîyakke mmọ ẹdụk ekemmọ. Ke usụn̄ emi, ekpere ndidi akananam mmọ itabake mbono esop ndomokiet. Owo kiet oro ekenyenede udọn̄ obufa obufa ke Canada ama ọsọsọp ọfiọk nte Ufọkn̄wed Utom Ukara Abasi ye Esoputom ẹdide akpan n̄kpọ, edi ndutịm utom esie ama ọbiọn̄ọ enye ndisidụk. Ntem, enye ama esikpe nsan̄autom esie okụk ndinam utom ke ini utom esie man enye ekeme ndinyene ifet ndụk mme akpan mbono esop ẹmi.

Ediwak mbon oro ẹnyenede uyịre uyịre udọn̄ọ isiwakke nditaba mme mbono esop. Mmọ ẹsikpan̄ utọn̄ ẹkop edinam ke ufọk mmọ ebe ke urụk ukopikọ oro ẹyịride m̀mê se ẹmụmde ẹdọn̄ ke ọkpọ umụm ikọ ke ini mmọ mîkemeke ndika Ufọkmbono Obio Ubọn̄. Mmọ ẹwụt esịtekọm oro odotde itoro ẹnọ ndutịm udia eke spirit oro Jehovah ọnọde ebe ke “asan̄autom emi anamde akpanikọ, onyụn̄ enyenede ọniọn̄”! (Matthew 24:45) Mme Christian oro ẹnamde utom nte mme andikpeme mme ete ye eka mmọ oro ẹma ẹkesọn̄ ẹsinen̄ede ẹdara ke ini eyenete eren m̀mê an̄wan enyịmede nditie ye ete m̀mê eka oro man andikpeme oro ekeme ndidụk mbono esop.

Babak Nam Ndutịm!

Mme ete ye eka oro ẹnyenede udọn̄ ke mme n̄kpọ eke spirit mmọ ẹsin̄wam nditọ mmọ ndiwụt esịtekọm nnọ mme mbono esop Christian. Ke ata ediwak idaha, mmọ ẹdori enyịn nditọ mmọ ndinam utomufọk mmọ ke ini ẹnọde utu ke ndiyak mme utomufọk ẹbono ẹwak. Ke mme usen mbono esop nditọ mmọ ẹsinam utomufọk mmọ ke ndondo oro mmọ ẹnyọn̄de ufọkn̄wed ẹdi. Owo isiyakke mme edinam ini nduọkodudu ye mme edinam eken ẹbiọn̄ọ edidụk mme mbono esop.

Nte ebe ye ete, ndi afo emenịm edidụk mbono esop ke akpa? Nte n̄wanndọ ye eka, ndi emesidomo ndidiomi utom fo man enịm ufan̄ ọnọ mme mbono esop? Nte uyen, ndi odiomi utomufọk fo etiene mme mbono esop m̀mê odiomi mme mbono esop etiene utomufọk fo?

Mbono esop edi ima ima ndutịm oro Jehovah anamde. Ẹkpenyene ndisịn kpukpru ukeme man ẹbuana ke ndutịm oro. Jehovah ọyọdiọn̄ fi uwak uwak edieke afo enịmde mme ebe iso n̄kpọ ke akpa!