Ndi Unam Ẹsika Heaven?
Se Bible ọdọhọde
Bible ọdọhọ ke otu kpukpru n̄kpọ emi odude ke isọn̄, ke ibat ibat owo kpọt ẹdika heaven. (Ediyarade 14:1, 3) Mmọ ẹdika heaven man ẹketiene Jesus ẹkara nte ndidem ye mme oku. (Luke 22:28-30; Ediyarade 5:9, 10) Edi Abasi ayanam ata ediwak owo ẹset ẹdidu uwem ke Paradise ke isọn̄ emi.—Psalm 37:11, 29.
Udûkwe itie ndomokiet ke Bible emi ẹdọhọde ke unam ndomokiet ayaka heaven. Ntak edi ke unam ikemeke ndinam se isinamde owo odot ndika heaven. (Mme Hebrew 3:1) Se isinamde owo odot ndika heaven esịne ndikpep n̄kpọ mban̄a Abasi, ndibuọt idem ye Abasi, nnyụn̄ nnam item Abasi. (Matthew 19:17; John 3:16; 17:3) Ke otu kpukpru n̄kpọ emi odude ke isọn̄, mme owo kpọt ke ẹkebot man ẹdu uwem ke nsinsi.—Genesis 2:16, 17; 3:22, 23.
Odu uwem n̄kpọ ndomokiet ke isọn̄ ikemeke ndika heaven ibọhọke Abasi anam enye eset aka. (1 Corinth 15:42) Bible etịn̄ aban̄a nsio nsio ediset ke n̄kpa. (1 Ndidem 17:17-24; 2 Ndidem 4:32-37; 13:20, 21; Luke 7:11-15; 8:41, 42, 49-56; John 11:38-44; Utom 9:36-42; 20:7-12) Owo ikanamke unam ndomokiet eset, owo owo kpọt ke ẹkenam ẹset.
Ndi unam enyene ukpọn̄?
Inyeneke. Bible owụt ke owo ye unam inyeneke-nyene ukpọn̄, ke mmọ ke idemmọ ẹdi ukpọn̄. (Numbers 31:28) Abasi ikesịnke-sịn Adam ukpọn̄ ke idem, Adam ke idemesie akakabade “edi ukpọn̄ eke odude uwem” ini Abasi okobotde enye ama. (Genesis 2:7) N̄kpọ iba ke ẹkeda ẹbot ukpọn̄: “Ntan isọn̄” ye “ibifịk uwem.”
Ndi ukpọn̄ esikpa?
Ih. Bible ọdọhọ ke ukpọn̄ esikpa. (Leviticus 21:11; Ezekiel 18:20) Owo ye unam ẹma ẹkpa, mmọ ẹsitaha ẹkabade ntan. (Ecclesiastes 3:19, 20) Ọwọrọ mmọ idụhe aba.a
Ndi unam esinam idiọkn̄kpọ?
Ihih, sia idiọkn̄kpọ edi ndikere m̀mê ndinam n̄kpọ emi abiatde ibet Abasi. Mme odu uwem n̄kpọ emi mîdiọn̄ọk se Abasi asuade ikemeke ndinam idiọkn̄kpọ—unam ẹsịne ke otu mme odu uwem n̄kpọ emi mîdiọn̄oke ibet Abasi. Unam ẹnyene ntụk, inyeneke ifiọk. Ntụk oro esida mmọ usụn̄ ini mmọ ẹdude uwem. (2 Peter 2:12) Kpa ye oro unam mînamke idiọkn̄kpọ, mmọ ẹsikpa isua uwem mmọ ama ekem.
Ndi ọdiọk owo ndidiọk unam ukama?
Ih. Abasi ọkọdọhọ mme owo ẹkara mme unam, ikọdọhọke ẹdiọk mmọ ukama. (Genesis 1:28; Psalm 8:6-8) Abasi esikere aban̄a kpukpru unam, ekpededi n̄kpri inuen. (Jonah 4:11; Matthew 10:29) Enye akpan ikọt esie ndidiọk unam ukama.—Exodus 23:12; Deuteronomy 25:4; Mme N̄ke 12:10.