Mme Mbụme Ẹtode Mme Andikot
Nte nnyịn ikpenyene ndibiere nto Matthew 11:11 nte ke Jesus ama ebemiso ọdiọn̄ọ ete ke John Andinịm owo baptism eyekpa mbemiso Jesus?
Ih, Jesus nte an̄wan̄ade ama ọfiọk ete ke John idibọhọke idu uwem man akabade edi Christian oro ẹyetde aran, koro Jesus ọkọdọhọde ete: “Ke akpanikọ ke ndọhọ mbufo, Ke otu mmọ eke iban ẹmande, akananam owo idahake ida emi okponde akan John Baptist: edi owo emi ekpride akan ke Obio Ubọn̄ Heaven okpon akan enye.”—Matthew 11:11.
Ke ini angel Gabriel ọkọtọtde aban̄a emana John oro edidide, enye ama ebemiso etịn̄ ete ke John, “eyeda spirit ye odudu Elijah . . . anam mmọemi ẹkenịmde ẹnọ Ọbọn̄ [“Jehovah,” NW] ẹben̄e idem ẹbet Enye.” John ekenyene ndidi ọdiọn̄usụn̄, otịmde mme owo idem ọnọ Messiah Jehovah. Edi n̄kpọ ndomokiet ke ntọt Abasi oro ikowụtke ite ke John ke idemesie eyekabade edi mbet Messiah oro edide do, m̀mê n̄kpọ ndomokiet ndikọnọ ekikere mban̄a oro ke ikọ prọfesi oro ete John, Zechariah eketịn̄de.—Luke 1:17, 67-79.
Ntre, ke ama okonịm Jesus baptism, John ama akaiso ndikwọrọ ikọ nnyụn̄ nnịm owo baptism, ọsọn̄ọde eyịre ke utom esie emi edide nditịm mme owo idem. John ke utịbe utịbe usụn̄ ama ọfiọk ete ke Jesus eyenịm baptism ye edisana spirit, edi John ke idemesie ikọdọhọke ite ke imọ iyebọ edisana spirit, ikabarede idi Christian oro ẹyetde aran. (Matthew 3:11) John n̄ko ama ọfiọk ete ke imọ iyekaiso ndikpekpri, ke adan̄aemi Jesus edikade iso ndikpokpon.—John 3:22-30.
Ke ini Jesus eketịn̄de se ikotde ke Matthew 11:11, ẹma ẹsesịn John ke ufọk-n̄kpọkọbi. Jesus ama anam ẹdiọn̄ọ ke mbemiso nte ke prọfet oro ẹsịnde ke ufọk-n̄kpọkọbi mi ama ekpri akan owo oro ekpride akan, emi ke ini iso edinamde utom nte edidem-oku ke heaven. Edi, etie n̄ko nte ke Jesus ama ọfiọk ete ke John eyesọp akpa, ebede efep ke iso isọn̄ mbemiso “obufa” usụn̄ ndinyene uwem eke heaven ebederede. (Mme Hebrew 10:19, 20) Oro ọkọwọrọ nte ke John ididụhe uwem ikosịm usen Pentecost eke 33 E.N., ke ini edida edisana spirit nyet mme mbet Jesus aran ọkọtọn̄ọde. Ntre, ẹkeme ndida ikọ Jesus ke Matthew 11:11 ndidi uyarade nte ke enye ama ọfiọk ete ke John idikaha heaven.